1, 2. Vyuma muka ahanjikile kaposetolo Yowano kutalisa kuchingoloshi chamakumishilo chize Yesu apwile navaposetolo jenyi?

 KASHINAKAJI umwe walunga ambachile sonekeso yenyi nakuputuka kusoneka vyuma vyavivulu anukile vize vyalingiwile kunyima. Ou kashinakaji ikiye Yowano, kaha ikiye apwile wamakumishilo kufwa havaposetolo jaYesu Kulishitu vosena. Omu apwile namyaka kafwe 100, anukile vyuma vyasolokele likumbi limwe nachingoloshi kafwe myaka 70 kunyima, vize alingile Yesu halikumbi lyamakumishilo lize apwile natumbaji twenyi shimbu kanda afwenga. Shipilitu yajila yaKalunga yamutwaminyinyine nakumukafwa anuke vyuma vyasolokele halwola kana nakuvisoneka kanawa.

² Haufuku vene uze, Yesu ahanjikile hatoma ngwenyi kalinwaha vamujihe. Yowano ikiye kaha asolola ovyo Yesu ahanjikilile ngwenyi mwalihana vamujihe mujila yayipi. Yowano ambile ngwenyi: “Hakusaka kaye katachikize ngwako ami ngwazanga Tata, shikaho nguli nakulinga nge muze angulwezele Tata. Katukenu, tufumenu kuno.”—Yowano 14:31.

3. Uno Yesu asolwele ngachilihi ngwenyi azangile Ise?

³ Yesu ahanjikile ngwenyi: “Ami ngwazanga Tata.” Kahechi chikiko chapwile chachilemu chikuma kuli ikiye. Oloze Yesu kahanjikilenga mazu kana lwola lwosenako. Hali Yowano 14:31 hakiko kaha vasoneka mazu aYesu akuvuluka ngwenyi azanga Ise. Vyuma alingilenga mukuyoya chenyi vyasolwele chikupu nge azangile Ise. Zangi yenyi yakuzanga Yehova ayisolwelenga hakumbi hakumbi. Kuhamuka, nakwononoka, nalukakachila lwenyi vyamusolwele hatoma nge azanga Kalunga. Zangi kaneyi yikiko nawa yamulingishile azate chikuma mulimo wakwambulula.

4, 5. Mbimbiliya yakundwiza zangi muka, kaha vyuma muka tunahase kuhanjika kutalisa kuzangi apwile nayo Yesu hali Yehova?

 ⁴ Vatu vamwe makumbi ano vanahase kushinganyeka ngwavo vatu vaze vakwechi zangi vapwa vakuhehela. Vanahase kushinganyeka vyatushimutwiji namyaso yazangi yize pamo yahanjika nahazangi yakulivwila peha. Numba tuhu Mbimbiliya yahanjika hazangi yakulivwila peha, oloze yahanjikaho mujila yakavumbi keshi ngana muze vayimona vatu vavavulu makumbi anoko. (Vishimo 5:15-21) Chipwe ngocho, Mazu aKalunga ahanjika chikuma hazangi yeka yakulipwila. Zangi kana kayapwa yamalengeso chipwe yakashimbu kakandende, chipwe yamangana autuko, oloze yeji kufumanga kumuchima wamutu. Yapwa yakufuma kumuchima, yazama hajindongi jajilemu kaha nawa mutu eji kuyisololanga hakupwa navilinga vyamwenemwene. Kayapwa yakulyongako. Mazu aKalunga ahanjika ngwawo: “Zangi kayakumako.”—Wavaka-Kolinde 1, 13:8.

⁵ Kakweshi mutu atwamaho lyehi hano hamavu uze azanga chikuma Yehova kuhambakana Yesuko. Kakweshi mutu uze ahambakanaho lyehi Yesu hakukavangiza lushimbi lwaYehova lwalulemuko. Lushimbi kana shina lwakwamba ngwavo: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena, nangolo jenu josena.” (Mako 12:30) Uno Yesu apwile ngachilihi nazangi kana? Vyuma muka vyamukafwile atwaleho lika kuzanga Kalunga omu apwile hano hamavu? Uno tunahase kumulondezeza ngachilihi?

6, 7. Uno twatachikiza ngachilihi ngwetu mukanda waVishimo 8:22-31, wahanjika nahali MwanaKalunga keshi hamangana kahako?

⁶ Uno mwazataho lyehi mulimo umwe nasepa lyenu uze wamilingishile mulikate nakulizanga chikuma tahi? Nge mukiko, kaha nachimikafwa mutachikize kanawa omu Yehova naMwanenyi umwe kaha wakulipwila valizanga. Mukanda waVishimo 8:30 tunaushimutwilanga mapapa kakavulu, oloze tuchihunananenu kanawa hamujimbu wosena. Muvesi 22 nakuheta ku 31, tweji kuwanangamo mazu vahwima aze afwanyisa mangana  kumutu. Uno twatachikiza ngachilihi ngwetu awa mazu atalisa nakuli MwanaKalunga?

⁷ Muvesi 22, mangana ahanjika ngwawo: “Ami yami wakuputukilako kuvyuma atengele Yehova, yami wakulivanga kumilimo yenyi yakushikulu.” Chasoloka nge vesi kana kayahanjika hamangana kahako mwomwo mangana kavalingile ‘akutengako.’ Mangana kawatwama namaputukiloko mwomwo Yehova napungako myaka yosena, kaha nawa apwa lika wamangana. (Samu 90:2) Oloze MwanaKalunga ikiye “twatwa kuvyuma vyakutenga vyosena.” Valingile wakutenga, kaha nawa ikiye wakulivanga kutenga kuli Yehova. (Wavaka-Kolose 1:15) Mukanda waVishimo walumbununa ngwawo ou MwanaKalunga kwapwile shimbu kanda vatenge melu namavu. Kaha hakupwa ikiye Lizu chipwe ngwetu Muka-kumuhanjikilako Kalunga, ngocho asolwele mangana aYehova akukupuka.—Yowano 1:1.

8. Mulimo muka azachilenga MwanaKalunga shimbu kanda ezenga hano hamavu, kaha vyuma muka tunahase kushinganyeka hakutala vyuma vyakutenga?

⁸ Mulimo muka azachilenga MwanaKalunga hamyaka yayivulu apwile mwilu shimbu kanda ezenga hano hamavu? Vesi 30 yatulweza ngwayo azachililenga hamwe naKalunga kupwa ‘kuluwa muka-kuzata.’ Uno echi chalumbununa ika? Mukanda Wavaka-Kolose 1:16 walumbununa ngwawo: “Muli ikiye mukiko vatengelele vyuma vyeka vyosena vyamwilu navyahamavu . . . Kaha vyuma vyeka vyosena vavitenga kuhichila muli ikiye, kaha vyaikiye.” Shikaho, Yehova uze apwa Tengi azachishile Mwanenyi uze apwa Kuluwa Muka-kuzata hakutenga vyuma vyosena, kuputukila vene kuvatu vakushipilitu vamwilu nakuheta nakuvyuma vyahamavu vyakufwana nge mitondo, natunyama navatu vaze vatenga mujila yakukomwesa. Kuzachila hamwe chayou Mwana naIse tunahase kuchifwanyisa kuli muka-kufunjika jizuvo hamapapilo uze mwazachila hamwe namuka-kutunga. Kahou muka-kutunga mwakavangiza jino vyuma vanamufunjikila halipapilo. Nge natulikomokela hakumona vyuma vimwe vatenga, kaha tuli nakwalisa Muka-kutenga Wamunene. (Samu 19:1) Cheji kutwanukisanga nawa omu Tengi ‘nakuluwa yenyi muka-kuzata’ vazachilile hamwe halwola lwalusuku kaha nawa mukuwahilila.

9, 10. (a) Vyuma muka vyalingishile usoko waYehova naMwanenyi uzame chikuma? (b) Vyuma muka vinahase kuzamisa usoko wenu naSenu wamwilu?

 ⁹ Lwola lumwe kulivwasana cheji kukaluhwanga nge vatu vavali vakuhona kukupuka navazachila hamwe. Oloze omu keshi mukiko chapwile kuli Yehova naMwanenyiko. Ou MwanaKalunga azachile naIse hamyaka yayivulu chikuma, kaha ambile ngwenyi: “Ngwawahilililenga kumeso enyi lwola lwosena.” (Vishimo 8:30) Chikupu vene, evwilenga kuwaha kupwa hamwe naIse, kaha naIse nawa evwilenga mwomumwe. Echi chamulingishile apwenga ngana mwaIse nakulondezeza vilinga vyenyi. Evi vikiko valizangililile chikuma. Tunahase kwamba ngwetu zangi yavo yapwa yakukola chikuma kaha nawa yikiko yapwa yakwilila mwilu nahamavu.

¹⁰ Uno echi chinalumbununa ika? Pamo munahase kushinganyeka ngwenu kamweshi kuhasa kulikata naYehova mujila kaneyiko. Chikupu vene, kakweshi mutu atwama nachihela chachilemu ngana chize atwama nacho MwanaKalungako. Chipwe ngocho, twatwama nakutokwa chachinene. Anukenu ngwenu Yesu apandamine chikuma kuli Ise hakuzachila nenyi hamwe. Yehova atuhana lisesa lyakupwa “tuvaka-kuzachila hamwe” nayikiye. (Wavaka-Kolinde 1, 3:9) Omu natulondezeza Yesu hakuzata mulimo wakwambulula, twatela kwanukanga lwola lwosena ngwetu twapwa tuvaka-kuzachila hamwe naKalunga. Echi nachilingisa usoko wetu naYehova upwenga wakukola chikuma. Echi hichuma chakulipwila chikuma.

11-13. (a) Vyuma muka vyatela kutukafwa mangana tutwaleho lika kupwa nazangi, kaha Yesu atwalileho ngachilihi kuzanga Yehova omu apwile kanyike? (b) Uno MwanaKalunga asolwele ngachilihi ngwenyi afwililile kumunangula kuli Yehova omu apwile mwilu nomu ejile hano hamavu?

¹¹ Chapwa chamwaza kutwalaho lika kuzanga Yehova mukuyoya chetu. Ngana muze lutemo lwasakiwa kulutukumwina meya nakuluzakama, mukiko nayetu nawa twasakiwa kuzata nangolo mangana tutwaleho lika kuzanga Yehova. Oloze nge katweshi  kuzata nangoloko, kaha katweshi kutwalaho kuzanga Yehovako. Yesu atwalileho lika kuzanga Yehova mukuyoya chenyi omu apwile hano hamavu. Tutalenu vyuma vyamukafwile.

¹² Achishinganyekenu vyuma ahanjikile Yesu omu apwile hatembele muYelusalema halwola apwile kanyike. Anukenu mazu ahanjikile kuli visemi jenyi akwamba ngwenyi: “Uno mwapwanga nakungutondela ika? Kamwatachikijile ngwenu ami ngwatela kupwa muzuvo yaTatako nyi?” (Luka 2:49) Hakuwana nge halwola kana apwile kanyike, Yesu atela kahashile kwanuka vyuma alingilenga mwilu shimbu kanda ezenga hano hamavuko. Chipwe ngocho, atwalileho lika kuzanga Ise Yehova. Atachikijile ngwenyi atelelele kusolola zangi kana hakulemesa Kalunga. Shikaho asakilile kupwa hatembele nakulemesa Ise. Asakilenga kutwama lika hachihela kana, kaha kasakilenga kufumahoko. Kaha nawa nge nayi hatembele katwaminenga kaha kulu nakutala vyuma vyalingiwilengako. Asakile chikuma kulinangula vyaYehova nakuhanjika havyuma atachikijile hali Ise. Muchima kana kawaputukile nakukumina kaha omu apwile namyaka 12 yakusemukako, oloze watwalileho lika.

¹³ Omu Yesu apwile mwilu, alinangwilenga vyavivulu kuli Ise. Upolofweto vasoneka hali Isaya 50:4-6 wasolola nge Yehova anangwilenga Mwanenyi mujila yakulipwila mwakuzachila mulimo wauMeshiya. Numba tuhu vyuma vamunangwilenga vyapandamine nakuukalu mwakamona Uze Vawavisa waYehova, oloze afwililile lika kulinangula. Omu Yesu ejile hano hamavu, nakukola nakupwa jino mukulwane, atwalileho lika kupwa namuchima kanou. Asakilenga kuya kuzuvo yaIse nakwazana mukulemesa nakulinangula kweseka nomu asakile Yehova. Mbimbiliya yahanjika ngwayo Yesu ayilenga lwola lwosena kutembele nakusunangonga. (Luka 4:16; 19:47) Nge tuli nakusaka tutwaleho lika kuzanga Yehova, kaha twatela kuyanga kukukunguluka chavaka-Kulishitu kuze tweji kulemeselanga Yehova, nakulinangula hali ikiye.

14, 15. (a) Mwomwo ika Yesu asakilile kupwa kwauka wenyi lwola lumwe? (b) Uno kulomba chaYesu chasolwelenga ngachilihi nge azangile chikuma Ise nakumuvumbika?

¹⁴ Yesu atwalileho lika kuzamisa zangi yenyi yakuzanga Yehova hakulombanga lwola lwosena. Numba tuhu apwilenga  wachisambo navatu nakusaka kupwa navo lwola lwosena, oloze lwola lumwe asakilenga nawa kupwa kwauka wenyi. Chakutalilaho, mukanda waLuka 5:16 wamba ngwawo: “Ikiye ayilenga kakavulu kuchihela kwakuzeneka vatu nakulomba.” Mukanda waMateu 14:23 nawa wamba ngwawo: “Omu alingile nasuula lyehi aze mayongomena, akandukile hapili kwauka wenyi nakulomba. Apwile kuze uka wenyi nomu kwatokele.” Yesu asakile kupwa kwauka wenyi halwola kanelu nahalwola lweka mangana apwenga wakulihehwa hakuhanjika naYehova mukulomba, keshi mwomwo yakuhunga vatu chipwe kuvachinako.

¹⁵ Omu Yesu alombelenga, lwola lumwe azachishilenga mazu akwamba ngwavo, “Apa, Ove Tata.” (Mako 14:36) Halwola kana luze, lizu “Apa” lyapwile lizu lyamwaza lize lyemanyinyineko “tata.” Kakavulu lizu kana lyapwilenga hamazu atete aze kanyike wamundende alinangwilenga kuhanjika. Chipwe ngocho, eli lizu lyapwilenga lyakalemesa. Kuzachisa lizu kana chasolwele nge Yesu azanga Ise, kaha nawa chasolwele nge amuvumbikilenga chikuma. Yesu asolwelenga kavumbi nazangi mukulomba chenyi chosena. Chakutalilaho, mumukanda waYowano kapetulu 17, mwatwama kulomba chaYesu chachisuku chakufuma kumuchima chize alombele haufuku wakukokela kukufwa chenyi. Chikupu vene, kulomba chaYesu cheji kutukolezezanga chikuma, kaha nachiwaha nge natulondezezanga kulomba kana. Echi kachalumbununa nge twatela kuvuluka munona munona mazu aYesuko, oloze twatela kuwana jijila jamwaza jakuhanjikilamo naSetu wamwilu namuchima wetu wosena. Nge natulinganga ngocho, kaha natuzanga chikuma Setu.

16, 17. (a) Uno mazu ahanjikilenga Yesu asolwele ngachilihi nge azanga Ise? (b) Uno Yesu asolwele ngachilihi nge Ise apwa muka-kuhana?

¹⁶ Nganomu twamonanga hakavanga, Yesu kahilukililenga mapapa kakavulu mazu akwamba ngwenyi “ami ngwazanga tata[ko].” Chipwe ngocho, mazu ahanjikilenga asolwelenga nge azanga Ise. Mujila muka? Yesu yivene ambile ngwenyi:  “Ove Tata, Mwata wamelu namavu, ngunakwalisa kumeso avatu.” (Mateu 11:25) Omu twalinangulanga muChihanda 2 chamumukanda uno, twamonanga nge Yesu asakilenga kwalisa Ise hakukafwa vatu vamutachikize. Chakutalilaho, afwanyishile Yehova kuchisemi uze afwililile kukonekela mwanenyi wakujimbala nakutalilila ngwenyi mwakinduluka. Kaha shimbu apwile hahasuku ise amumwene, kaha amulahililile nakumupakata mukasamba. (Luka 15:20) Tuvosena cheji kutukwatanga kumuchima hakumona omu Yesu alumbunwinyinemo muchima waYehova wazangi nakukonekela.

¹⁷ Kakavulu Yesu alishilenga Ise hamuchima wenyi wakuhana. Azachishile chakutalilaho chavisemi vaze kavakupukako mangana atukafwe tufwelele ngwetu Yehova mwatuhana shipilitu yenyi yajila yitukafwe. (Luka 11:13) Ahanjikile nawa halutalililo atuhana Ise lwakukayoya haya myaka yosena. Yesu alumbunwine nawa lutalililo luze apwile nalwo lwakukinduluka nakukatwama cheka kuli Ise mwilu. (Yowano 14:28; 17:5) Alwezele vaka-kumukavangiza vyalutalililo luze Yehova ahana “utanga wamikoko waundende” waKulishitu, lwakukayoyela mwilu nakuyula hamwe naMwangana wauMeshiya. (Luka 12:32; Yowano 14:2) Kaha nawa avendejekele chihwanga uze vapapalilile nenyi hamwe hakumulweza vyalutalililo lwakukayoyela muPalachise. (Luka 23:43) Ngocho kuhanjika hamuchima waYehova walikoji mujijila kaneji chamukafwile atwaleho lika kuzanga Ise. Vaka-kukavangiza Kulishitu vavavulu vatachikiza ngwavo, kuhanjikanga hali Yehova nahalutalililo ahana vaze vamuzanga cheji kulingisanga zangi yavo yitohweleko lika.

18. Jila muka yayilemu yize twatela kulondezezelamo Yesu, kaha mwomwo ika?

¹⁸ Jila yayilemu chikuma tunahase kulondezezelamo Yesu shina eyi: Kuzanga Yehova namichima yetu yosena, namyono yetu yosena, nangolo jetu josena, navishinganyeka vyetu vyosena.  (Luka 10:27) Shikaho, kuzanga Yehova kachatela kupwa chakushinganyeka kahako, oloze chatela kusoloka namuvilinga vyetu. Yesu kakuminyinyine hakushinganyeka kaha ngwenyi azanga Ise chipwe kwamba kaha ngwenyi, “ami ngwazanga tata[ko].” Ambile ngwenyi: “Hakusaka kaye katachikize ngwako ami ngwazanga Tata, shikaho nguli nakulinga nge muze angulwezele Tata.” (Yowano 14:31) Satana ahanjikile ngwenyi kakweshi mutu numba umwe nahase kuzachila Yehova namuchima wenyi wosenako. (Yopa 2:4, 5) Yesu ahamukile nakwiza hano hamavu mangana asolole kuvatu vosena ngwenyi azanga chikuma Ise, nakusolola nge Satana apwa muka-makuli. Ononokele palanga nakukufwa chenyi. Kutala namulondezeza Yesu tahi? Kutala namusolola kuvatu vosena ngwenu mwazanga chikuma Yehova Kalunga tahi?

19, 20. (a) Vyuma muka vyavilemu vyatela kutulingisa tukungulukenga lwola lwosena? (b) Twatela kumona ngachilihi chilongesa chauka, nakushinganyeka havyuma natulinangulanga, nakulomba?

¹⁹ Vatutengele namuchima wakusaka kupandama kuli Kalunga nakumuzanga. Ngocho Yehova atulongesela kanawa vyuma mangana tumulemesenga mujila yize nayilingisa tumuzange chikuma. Nge muli kukukunguluka chavaka-Kulishitu, kaha mwatela kutachikiza ngwenu munakatukila kulemesa Kalunga kenu. Kukukunguluka kana kwatwama kulomba, nakwimba myaso yakukwalisa Yehova, nakwivwilila kuvihande nakwazanamo nge chinahase. Kaha nawa kukiko tweji kulikolezezelanga navakwetu vaka-Kulishitu. (WavaHepeleu 10:24, 25) Kupwanga kukukunguluka lwola lwosena nakulemesa Yehova nachimikafwa mutwaleho lika kumuzanga.

²⁰ Zangi yetu yakuzanga Kalunga yinahase nawa kutohwelako nge natupwanga nachilongesa chauka, nakushinganyekanga havyuma natulinangulanga nakulomba. Monenunga vyuma kana kupwa hijijila jakupwilamo kwaukawenu naYehova. Omu namulinangula Mazu aKalunga nakuwashinganyeka, kaha nachipwa nge Yehova ali nakumilweza mwaya vishinganyeka vyenyi. Tachikizenu nawa ngwenu nge namulomba, kaha muli nakulweza Yehova vili kumuchima wenu. Anukenu  ngwenu katwatela kulomba kaha kuli Kalunga nge tuli nakusaka atulingile vyuma vimweko. Tweji kulombanga nawa mangana tumusakwilile havyuma natulingila nakumwalisa havyuma vyakukomwesa atenga. (Samu 146:1) Kaha nawa kwalisa Yehova namuchima wakuwahilila natwima kumeso avatu, yapwa hijila yamwaza yakumusakwililamo nakusolola nge mwamuzanga.

21. Mwomwo ika chapwila chachilemu kuzanga Yehova, kaha vyuma muka natushimutwila mutupetulu vali kulutwe?

²¹ Hakusaka tuwahililenga haya myaka yosena twatela kuzanga Kalunga. Alama naEve vatelele kuzanga Kalunga numba vafukile, oloze vahonene kulinga ngocho. Shikaho chapwa chachilemu kuzanga Kalunga numba muhase kufungulula vyeseko nakumika mukala ukalu. Echi chikiko chasakiwa hakupwa vaka-kukavangiza Yesu. Kuzanga Kalunga chatambukila hamwe nakuzanga vakwetu vatu. (WaYowano 1, 4:20) Mutupetulu vali kulutwe, natushimutwila hajijila Yesu asolwelelemo nge azanga vatu. Oloze mukapetulu nakavangizaho, natutala havyuma vyalingishile Yesu apwenga wamwashi kuhanjikisa kuvatu vavavulu.