1-4. (a) Vyuma muka vyasolokele omu Pilatu emikile Yesu kulizavu lyavatu vapwile namatoto vaze vakungulukile kuweluka wachipango chenyi? (b) Yesu alingile ngachilihi omu vamusawile nakumuyanjisa, kaha hafuma vihula muka vyavilemu?

 “TALENU! Ou mutu!” Awa mazu vawahanjikile kuli Nguvulu wavaLoma Pondeu Pilatu omu emikile Yesu Kulishitu kulizavu lyavatu vapwile namatoto, vaze vakungulukile kuweluka wachipango chenyi kulungulungu lyakucha halikumbi lyaPaseka yamu 33 C.E. (Yowano 19:5) Kamwahichile makumbi amavuluko kufuma halwola luze Yesu vamwalishile kulizavu lyavatu hakwingila muYelusalema mwaMwangana vatongola kuli Kalunga. Oloze halikumbi kaneli, vatu kanava kavamwene cheka Yesu kupwa hiMwanganako.

² Yesu vamuvwikile lihina lyaungonyi ngana lize eji kuvwalanga mwangana, kaha vamuvwikile nawa muchama kumutwe. Lihina kaneli lyakwachile hamikiki nahajimbandu vamutwile munyima, kaha nawa uze muchama wamingonga wamutuvilenga hajimbandu jize vamutwile mumutwe. Vyuma vyosenevi vavilingile mangana vamulangulule keshi kumwalisako. Vatu vakanyine ou lunga vapupwile uze vemikile kumeso avo hakuvasowangiza kuli vapilishitu vavalemu. Ava vapilishitu vatambakanyine ngwavo: “Vamupapalile hachitondo! Vamupapalile hachitondo!” Ngocho, vatu vamuchivulu navakivo vatambakanyine namuchima waukenya ngwavo: “Atela kufwa.”—Yowano 19:1-7.

³ Yesu omikile chakuzeneka kuyayavala omu vamuyanjishile nakumusaula. a Alizangile chikupu kufwa. Kutwala muze, alisuwile  afwenga mujila yayipi hachitondo chakuyanjishila haLikumbi kaneli lyaPaseka.—Yowano 19:17, 18, 30.

⁴ Yesu alisolwele kuli vaka-kumukavangiza kupwa hisepa lyavo wamwenemwene hakuvafwila. Ambile ngwenyi: “Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.” (Yowano 15:13) Mazu kana akatula vihula vyavilemu chikuma. Uno chikupu chapwile chakutamo Yesu kuhita muukalu wosenou nakufwa tahi? Mwomwo ika Yesu alisuwilile kumona ukalu wosenou? Uno tunahase kumulondezeza ngachilihi hakupwa “masepa jenyi” kaha nawa tuvaka-kumukavangiza?

5. Uno Yesu atachikijile ngachilihi chimweza ukalu mwakahitamo?

⁵ Yesu hakupwa Meshiya uze vashikile, atachikijile ngwenyi mwakahita muukalu. Ejivile upolofweto wauvulu wamuVisoneka VyachiHepeleu uze wahanjikile chimweza vyakuyanda nakufwa chaMeshiya. (Isaya 53:3-7, 12; Ndanyele 9:26) Kakavulu alwezelenga tumbaji twenyi vyaukalu mwakamona kulutwe. (Mako 8:31; 9:31) Omu apwile nakuya kuYelusalema kuPaseka yamakumishilo, Yesu alumbunwinyine vaposetolo jenyi ngwenyi: “Mwanamutu navakamuhana kuli vapilishitu vavakulwane nakuli vaka-kusoneka. Navakamusopesa nakumutongwela kufwa, navakamuhana kuvatu vakumafuchi eka, kaha navakamuhenda, navakamufwijila maleji nakumuveta vikote, nakumujiha.” (Mako 10:33, 34) Awa mazu apwile naulumbunwiso waunene. Nganomu tunamono, Yesu vamusawile chikupu, nakumufwijila maleji, nakumuveta vikote nakumujiha.

6. Mwomwo ika chapwilile chakutamo Yesu kuyanda nakufwa?

⁶ Mwomwo ika chapwilile chakutamo Yesu kuyanda nakufwa? Kuli vyuma vyavivulu kaha nawa vyavilemu vize vyamulingishile ayande nakufwa. Chatete, Yesu atelele kupwa lika wakwononoka mangana asolole kulonga chenyi nakujilika lijina lyaYehova. Anukenu ngwenu Satana avangijikilile vatu ngwenyi veji kuzachilanga Kalunga mwomwo yakusaka kunganyalilaho. (Yopa 2:1-5) Yesu asolwele hatoma makuli aSatana hakushishika chenyi “palanga nakukufwa . . . hachitondo chakuyanjishila.” (Wavaka-Fwilipi  2:8; Vishimo 27:11) Chamuchivali, kuyanda nakufwa chaMeshiya chafwikile shili yavatu. (Isaya 53:5, 10; Ndanyele 9:24) Yesu ahanyine “mwono wenyi kupwa ndando yakusokola vavavulu,” nakutusokolwela jila mangana tupwenga nausoko wamwaza naKalunga. (Mateu 20:28) Chamuchitatu, Yesu vamwesekele “lyehi mwosena ngana mwayetu,” hakumika muukalu naluyando lwosena amwene. Chikupu vene, apwa Kapilishitu Wakulitulaho wakutetela uze eji ‘kutwivwilanga keke mukuhehela chetu.’—WavaHepeleu 2:17, 18; 4:15.

7. Vyuma muka asezele Yesu mwilu hakwiza hano hamavu?

⁷ Hakusaka tutachikize kanawa mwalumbunukila kulisuula chaYesu, achishinganyekenu hachakutalilaho chino: Lunga muka nahase kuseza tanga nalimbo lyenyi nakwalukila kulifuchi lyeka okunyi natachikiza ngwenyi kulifuchi mwaya navakamukana, nakumusaula nakumuyanjisa, nakumujiha? Talenu jino havyuma alingile Yesu. Shimbu kanda ezenga hano hamavu, apwile nachihela chakulipwila mwilu omu apwile hamwe naIse. Oloze Yesu alisuwile kuseza limbo lyenyi lyamwilu nakwiza hano hamazu nakupwa mutu. Alingile ngocho numba tuhu atachikijile ngwenyi vatu vavavulu navakamukana nakumusaula, nakumuyanjisa chikuma, nakumujiha. (Wavaka-Fwilipi 2:5-7) Vyuma muka vyalingishile Yesu alisuule mujila kaneyi?

8, 9. Vyuma muka vyalingishile Yesu ahane kuyoya chenyi?

⁸ Chuma chachinene chikuma chalingishile Yesu alisuule kuhana kuyoya chenyi shina kuzanga chikuma Ise. Lukakachila lwenyi lwasolwele nge azanga Yehova. Zangi kana yamulingishile alizakamine chikuma vyalijina lyaIse. (Mateu 6:9; Yowano 17:1-6, 26) Chuma afwililile chikuma shina kufumisa katombo kosena vananehenga halijina kana. Shikaho, amwene ngwenyi chapwile hikutokwa chachinene kuyanjila kwoloka mwomwo atachikijile ngwenyi kulonga chenyi nachizata mulimo waunene wakujilika lijina lyaIse lyamwaza.—Mijimbu 1, 29:13.

⁹ Chuma chikwavo chalingishile Yesu ahane kuyoya chenyi shina kuzanga vatu. Yesu azangile vatu putu vene kushikulu.  Mbimbiliya yasolola omu Yesu evwilenga kutalisa kuvatu myaka yakunyima shimbu kanda ezenga hano hamavu ngwayo: “Ngwevwililenga kuwaha vana vavatu.” (Vishimo 8:30, 31) Zangi yenyi yasolokele hatoma omu apwile hano hamavu. Nganomu twamonanga mutupetulu vatatu vanafumuho, Yesu asolwelele zangi vatu vosena mujijila jajivulu chikumanyi vaka-kumukavangiza. Kaha kuheta haNyisane 14, 33 C.E., alisuwile jino kutufwila. (Yowano 10:11) Chikupu vene, kakwapwile jila yeka yayinene atusolwelelemo zangi kuhambakana eyiko. Kutala nayetu twatela kumulondezeza tahi? Eyo, kaha nawa vatulweza tulingenga ngocho.

10, 11. Lushimbi muka lwaluhya luze Yesu ahanyine vaka-kumukavangiza, kaha tunahase kukavangiza ngachilihi lushimbi kana, kaha nawa mwomwo ika chapwila chachilemu kuli etu kulukavangiza?

¹⁰ Haufuku wamakumishilo shimbu kanda afwenga, Yesu alwezele tumbaji twenyi ngwenyi: “Nguli nakumihana lushimbi lwaluhya ngwami mulizangenga navakwenu. Kaha nganomu ngunamizangenga enu, nayenu nawa lizangenunga navakwenu. Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:34, 35) Mwomwo ika mazu akwamba ngwavo “lizangenunga navakwenu” apwila “lushimbi lwaluhya”? Jishimbi jaMose jahanjikile lyehi ngwajo: “Zangenunga vakwenu nganomu mwalizanga enu vavene.” (VyavaLevi 19:18) Oloze lushimbi kanelu lwaluhya lwahanjika hazangi yayinene twatela kupwa nayo yize nayitulingisa tuhane kuyoya chetu hali vakwetu. Yesu alumbunwine hatoma chishina kana hakuhanjika ngwenyi: “Elu lukiko lushimbi lwami, ngwami mulizangenga navakwenu nganomu ngunamizangenga enu. Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.” (Yowano 15:12, 13) Elu lushimbi lwaluhya lwalumbununa ngwalwo: “Zangenunga vakwenu kuhambakanomu mwalizangenu vavene, keshi nge kuvazanga kaha nganomu mwalizangenu vaveneko.” Jila ayoyelelemo Yesu nakufwa chenyi vyasolwele hatoma zangi kana.

 ¹¹ Mwomwo ika chapwila chachilemu kuli etu kukavangiza elu lushimbi lwaluhya? Anukenu ngwenu Yesu ambile ngwenyi: “[Hazangi yenu yakulisuula hakiko] vatu vosena navakatachikiza ngwavo enu mwapwa mutumbaji twami.” Chikupu vene, zangi yakulisuula yeji kutulingisanga vatutachikize ngwavo twapwa tuvaka-Kulishitu vamuchano. Zangi kana tunahase kuyesekesa kukatachikijilo veji kuvwalanga vatu nge vali hakukunguluka changalila, chize veji kupwanga nacho Vinjiho jaYehova mwaka himwaka. Katachikijilo kana keji kulingisanga mutu nakavwale vamutachikize mwomwo keji kusololanga lijina lyenyi nalyeli lyachikungulwilo chenyi. Kusolwela vakwetu zangi yamwenemwene ‘hikatachikijilo’ kakwijivilaho vaka-Kulishitu vamuchano. Mujila yikwavo tunahase kwamba ngwetu, zangi tukwechi hali vakwetu yatela kusoloka hatoma kuvatu ngana mwakatachikijilo mangana vatachikize chikupu ngwavo, twapwa tuvaka-kukavangiza Kulishitu vamuchano. Tuvosena twatela kulihulisa mutu himutu ngwetu, ‘Kutala kuyoya chami cheji kusololanga nge ngukwechi “katachikijilo” kana kazangi yakulisuula tahi?’

12, 13. (a) Vyuma muka twatela kulinga mangana tusolwele vakwetu zangi yakulisuula? (b) Uno kulisuula chalumbununa ika?

¹² Hakupwa tuvaka-kukavangiza Yesu, twatela kulizanganga navakwetu ngana muze atuzangile ikiye. Echi chalumbununa nge twatela kulisuula kuzachila vandumbwetu. Uno vyuma muka twatela kulinga mangana tusolole zangi yakulisuula? Mbimbiliya yatulweza ngwayo: “Tunatachikiza zangi mwomwo ikiye echele mwono wenyi hali etu, kaha etu nawa twatela kwecha myono yetu hali vandumbwetu.” (WaYowano 1, 3:16) Nge chinahase, twatela kulisuula kufwila vakwetu ngana muze alingile Yesu. Nge kuli luyanjisa, tunahase kulisuula tufwenga muchishishisa chakusolola vandumbwetu kuli vaka-kole nakuhaka kuyoya chavo muponde. Mumafuchi muze mwatwama vikokojola vyakulitala havikova chipwe havisemwa, tunahase kulisuula tuhake kuyoya chetu muponde mangana tukinge vandumbwetu chamokomoko nachikova chipwe chisemwa chavo. Nge mafuchi ali nakulwa jita,  tunahase kulisuula vatukase tuhu mukamenga chipwe kutujiha muchishishisa chakukwata kuvitwa nakujiha vandumbwetu chipwe vatu vakulifuchi lyeka.—Yowano 17:14, 16; WaYowano 1, 3:10-12.

¹³ Kulisuula kuhana kuyoya chetu hali vandumbwetu keshi chikiko kaha cheji kusololanga nge twatwama nazangi yakulisuulako. Kuhanjika muchano, vavandende kaha veji kwingilanga muvyeseko kana nakulisuula mangana vafwile vakwavo. Shikaho, kachi nge twazanga vandumbwetu mujila yize nayitulingisa tulisuule kuvafwila, kutala kacheshi kupwa chakutamo kulisuula tuvakafwe namuvyuma vyavindende vize vali nakusaka oholyapwako tahi? Kulisuula chalumbununa kuhana vyuma vize twafwila chipwe vize twasaka mangana tunganyalise vakwetu. Twatela kuhaka muchima kuvyuma vali nakusakiwa nakuzakama chiyoyelo chavo kuhambakana chayetu vavene numba nge nachikaluwa kulinga ngocho. (Wavaka-Kolinde 1, 10:24) Mujijila muka tunahase kusolwelamo zangi yakulisuula?

14. (a) Vakulwane veji kulisuulanga muvyuma muka? (b) Mweji kwivwanga ngachilihi hakumona milimo veji kukilikitanga vakulwane muchikungulwilo chenu?

¹⁴ Vakulwane muchikungulwilo veji kulisuulanga muvyuma vyavivulu ‘hakufunga utanga.’ (WaPetulu 1, 5:2, 3) Numba tuhu vatwama namulimo wakuzakama jitanga javo, oloze veji kuwanangako lwola nachingoloshi chipwe kusongo yachalumingo lwakuzakama vyuma vyachikungulwilo, kuhakilako vene nakuwahisa vihande vyakukukunguluka, nakufunga mikoko, nakusopa milonga. Vakulwane vavavulu veji kulisuulanga nawa hakuzata milimo yeka yakufwana nge yahakukunguluka chachihanda nachechi changalila, nakuzata mujiKomiti jaKulivwasana naVipatela, namuMazavu Akumenekela Vaveji, kaha veka nawa vapwa Vaka-Kuzata Mulimo Wakulisakila muLipatimende lyaLDC. Enu vakulwane, anukenu ngwenu nge namuzachisa lwola lwenu, nangolo jenu, naluheto lwenu hakufunga utanga, kaha namusolola ngwenu muli nazangi yakulisuula. (Wavaka-Kolinde 2, 12:15) Yehova  navandumbwenu muchikungulwilo veji kumisakwililanga chikuma hakukilikita chenu.—Wavaka-Fwilipi 2:29; WavaHepeleu 6:10.

15. (a) Uno mapwevo javakulwane veji kulisuulanga muvyuma muka? (b) Mweji kwivwanga ngachilihi kumona mapwevo vaze veji kulisuulanga kwitavisa malunga javo vazate milimo yachikungulwilo?

¹⁵ Nyi ngachilihi mapwevo javakulwane, kutala navakiko veji kulisuulanga mangana vakundwize malunga javo vazakame utanga tahi? Veji kulisuulanga chikupu hakwitavisa malunga javo, vazate milimo yachikungulwilo halwola vatelanga kachi vapwenga hamwe natanga yavo. Achishinganyekenu nawa hamapwevo jatulama vakutambwojoka, vaze veji kulisuulanga kutambuka namalunga javo kufuma hachikungulwilo chimwe nakuya hachikungulwilo chikwavo, nakufuma nawa muchihanda chimwe nakuya muchihanda chikwavo. Veji kusezanga membo avo nakusavala pamo hatuhela vakulisezaseza chalumingo hichalumingo. Shikaho, mapwevo vaze veji kulisuulanga mangana vahake milimo yachikungulwilo kulutwe kuhambakana milimo yavo vatela kuvasangejeka hazangi yavo yakulisuula.—Wavaka-Fwilipi 2:3, 4.

16. Uno visemi vaka-Kulishitu veji kulisuulanga kulingila vana vavo vyuma muka?

¹⁶ Tunahase kusolola ngachilihi zangi yakulisuula mutanga? Enu visemi, mweji kulisuulanga muvyuma vyavivulu mangana muzakame vana venu nakuvalela “mukuvazangamisa namukuhuhumuna chakuli Yehova.” (Wavaka-Efwesu 6:4) Lwola lumwe mweji kuzatanga milimo yayikalu hajola jajivulu mangana muwanyine tanga yenu vyakulya, nakuzakama vana venu muvyuma vyakufwana nge kuvatondela uvwalo nazuvo yakusavala. Mweji kulisuulanga kuzakama chikuma vana venu kuhambakana kulizakama enu vavene. Mweji kukilikitanga nawa hakunangula vana venu, nakuyanga navo kukukunguluka nakuzata navo hamwe mumulimo wakwambulula. (Lushimbi lwamuchivali 6:6, 7) Zangi yenu yakulisuula yeji kwivwisanga kuwaha Uze ahakileko tanga, kaha nawa yinahase kulingisa vana venu vakayoye haya myaka yosena.—Vishimo 22:6; Wavaka-Efwesu 3:14, 15.

17. Uno Vaka-Kulishitu vaze vambata vanahase kulondezeza ngachilihi muchima waYesu wakulisuula?

 ¹⁷ Enu malunga mwambata, uno munahase kulondezeza ngachilihi Yesu hakusolola zangi yakulisuula? Mbimbiliya yakumbulula ngwayo: “Enu malunga, twalenuho lika kuzanganga mapwevo jenu, nganomu Kulishitu nawa azangile chikungulwilo nakulyecha ivene hachikiko.” (Wavaka-Efwesu 5:25) Nganomu tunamono, Yesu azangile chikuma vaka-kumukavangiza nakuvafwila. Muka-Kulishitu uze ambata eji kulondezezanga muchima wakulisuula waYesu uze “kalisuulwishile iveneko.” (Wavaka-Loma 15:3) Eji kulisuulanga kuzakama vyuma ali nakusaka puwenyi kuhambakana vyayivene. Keshi kufwila kulinga vyuma mujila nasake yivene kahako, oloze eji kusololanga muchima wauvwovu hakukavangiza vyuma ali nakusaka puwenyi chikalu kaha nge vyuma kana kavyalimbalakile najishimbi jamuMbimbiliyako. Lunga uze eji kusololanga zangi yakulisuula veji kumwivwilanga uselewa kuli Yehova kaha nawa veji kumuzanganga nakumuvumbika kuli puwenyi navana venyi.

18. Chuma muka chachilemu cheji kutulingisanga tukavangize lushimbi lwaluhya lwakulizanga navakwetu?

¹⁸ Kwononoka lushimbi lwaluhya lwakulizanga navakwetu kachapwa chachashiko, oloze kwatwama chuma chachilemu chatela kutulingisa twononokenga lushimbi kana. Paulu asonekele ngwenyi: “Zangi yize atwama nayo Kulishitu, yeji kutukunyulanga, mwomwo omu mukiko tunamono ngwetu, mutu umwe afwililile vosena, . . . . Kaha ikiye afwililile vosena mangana vaze vali nakuyoya vazenekenga kuliyoyela cheka vavene, oloze vamuyoyelenga uze avafwililile, uze nawa vasangwile.” (Wavaka-Kolinde 2, 5:14, 15) Hakuwana nge Yesu atufwililile, kutala katwatela kufwila kumuyoyela ikiyeko tahi? Tunahase kulinga ngocho hakukavangiza chakutalilaho chenyi chazangi yakulisuula.

19, 20. Wana muka waulemu atuhana Yehova, kaha tunahase kusolola ngachilihi ngwetu twawitavila?

¹⁹ Yesu kakakishile kaha vyuma hakwamba ngwenyi: “Naumwe wauchi ali nazangi yakuhambakana eyi, mutu kwecha mwono wenyi  hali masepa jenyi.” (Yowano 15:13) Kulisuula kuhana mwono wenyi chikiko chasolwele zangi yenyi yayinene atwama nayo hali etu. Chipwe ngocho, kuli nawa mutu weka atusolwela zangi yayinene chikuma yakuhambakana halyeyi. Yesu alumbunwine ngwenyi: “Mwomwo Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Kalunga atuzanga chikuma, vikiko atuhanyinyine Mwanenyi kupwa ndando yakutusokola kushili nakukufwa. (Wavaka-Efwesu 1:7) Numba tuhu ndando yakusokola yapwa wana waulemu wakufuma kuli Yehova, oloze katushinjila tuwitavileko.

²⁰ Twatela kulisakwila etu vavene kwitavila wana kanou. Mujila muka? ‘Hakufwelela’ Mwanenyi. Oloze katwatela kuhanjika kaha hakanwa ngwetu tukwechi lufweleloko. Twatela kusolola lufwelelo kana muvilinga namukuyoya chetu. (WaYakova 2:26) Tweji kusololanga ngwetu twafwelela Yesu Kulishitu hakumukavangizanga hakumbi hakumbi. Nge natulinganga ngocho, kaha navatukisula mwamunene oholyapwa nakulutwe ngana muze mwalumbununa kapetulu wamakumishilo wamumukanda uno.