1-3. (a) Uno Yesu asezele ngachilihi vaposetolo jenyi, kaha mwomwo ika kuya chenyi kachatelele kuvanehela ushonako? (b) Mwomwo ika twatela kulinangwila vyakuyoya chaYesu kufuma haze akindulukile mwilu?

 MALUNGA 11 vemanyine hapili. Vapwile nakushishika mutu vemanyine nenyi wakusokesa 12 uze vazangile chikuma nakuvumbika. Numba tuhu apwile nakusoloka ngana mwavatu vosena, oloze mutu kana apwile Yesu uze vasangwile kuvafu kaha nawa uze apwile jino nangolo chikuma havana vaYehova vosena vakushipilitu. Halwola kana, Yesu akungulwile vaposetolo jenyi mangana valiwane kamakumishilo haPili yaMilive.

² Pili kaneyi yalinungile najipili jikwavo jamalolwa atoma jize japwilile musali yaChinema chaKichilone kufuma kuYelusalema, yanukishile Yesu vyuma vyavivulu. Muvinema kana mukiko mwapwilile nganda yaMbetane muze Yesu asangwilile Lazalu. Mwahichile kaha vyalumingo vyavindende kufuma halwola Yesu afumine munganda yaMbetefwaje nakwingila muYelusalema mwamwangana. Pamo kuPili yaMilive kukiko kwapwilile nawa nalitepa lyaNgetesemane kuze apwile nakulyonyingila Yesu shimbu kanda vamukwate kuli vaka-kole jenyi. Aha vene hapili hakiko nawa Yesu asalishilile masepa jenyi azangile chikuma. Ahanjikile mazu akuvasalisa, kaha aputukile jino kuzezuka helu! Vaposetolo jenyi vemanyine ndundulu nakutala omu Mwata wavo vazangile apwile nakuzezuka muutangatanga. Kutwala muze mavwi amufwikile, ngocho kavapwile nakumumona chekako.—Vilinga 1:6-12.

³ Kutala muli nakushinganyeka ngwenu kuya chaYesu mwilu chalingishile tumbaji twenyi vevwenga ushona tahi? Nduma. Kweseka namazu vahanjikile vangelo vavali kuli vaposetolo, aha keshi hakiko hakuminyine mujimbu waYesuko. (Vilinga 1:10, 11) Omu ayile mwilu, aputukile kuzata milimo yayivulu chikuma.  Kaha nawa Mazu aKalunga atulumbunwina kanawa vyuma vyasolokele kuli Yesu omu ayile mwilu. Chapwa chachilemu chikuma kulinangula vyakuyoya chaYesu kufuma haze ayile mwilu. Mwomwo ika? Anukenu mazu ahanjikile Yesu kuli Petulu ngwenyi: “Ngukavangizenga lika.” (Yowano 21:19, 22) Tuvosena twatela kwononoka lushimbi kanelu mukuyoya chetu chosena keshi nge mukashimbu kakandende kahako. Hakusaka tulinge ngocho, twatela kutachikiza vyuma ali nakulinga Mwata wetu oholyapwa namilimo vamuhana mwilu.

4. Mbimbiliya yahanjikile ngachilihi chimweza vyuma navikasoloka omu Yesu mwakakinduluka mwilu?

⁴ Mbimbiliya kayahanjika havyuma vyasolokele kuli Yesu omu ahetele mwilu vyakufwana nge kumutambwokesa nakuwaha evwile hakuliwana cheka naIseko. Chipwe ngocho, Mbimbiliya yahanjikile chimweza havyuma vyasolokele hakukinduluka chenyi mwilu. Tachikizenu ngwenu hamyaka yakuhambakana 1,500, vaYuleya valingilenga chilika chajila. Kapilishitu wakulitulaho engililenga Muze Mwajila Chikuma mukapete katembele kamwe mumwaka, mangana asapwile manyinga avimuna vakulumba hachikasha chalushiko haLikumbi lyaKulinga Chakufwika haShili. Halikumbi kaneli, kapilishitu wakulitulaho emanyinyinengako Meshiya. Omu Yesu akindulukile mwilu, ateselemo vyuma chemanyinyineko chilika kanechi, kaha alingile ngocho kamwe kunahu. Engilile muze mwajila chikuma kulumbununa mwilu muvene nakwimana kumeso aYehova nakumuhana wana wandando yenyi yakusokola. (WavaHepeleu 9:11, 12, 24) Kutala Yehova etavilile ndando kana tahi?

5, 6. (a) Unjiho muka wasolola nge Yehova etavilile ndando yakusokola yaKulishitu? (b) Veya veji kunganyalanga kundando yakusokola, kaha mujila muka?

⁵ Tweji kuwananga kukumbulula hakukekesa vyuma vyasolokele omu mwahichile makumbi amandende kufuma haze Yesu ayile mwilu. Lizavu lyalindende lyavaka-Kulishitu kafwe 120 lyalikungulwile muYelusalema muzuvo yahelu, kaha kwapwile lushindo lwakukasumuna nge kuhuhwa chapeho yangolo  chikuma luze lwevwakanyine muzuvo yosena. Hamitwe yavo hapwile tumilangi twakakahya twakufwana nge malimi, kaha vosena vazalile nashipilitu yajila, kaha vaputukile kuhanjika mumalimi akulisezaseza. (Vilinga 2:1-4) Vyuma kana vyapwile hichinjikizo chakusolola kusemuka chamuyachi wauhya wavaIsalele vakushipilitu vaze vapwile ‘vatu vasakula’ kaha nawa ‘vapilishitu vawangana’ vaze vapwile namulimo wakulinga mwaya muchima waKalunga hano hamavu. (WaPetulu 1, 2:9) Chikupu vene, Yehova Kalunga etavilile nakutambula ndando yakusokola yaKulishitu. Kuhingunwina shipilitu yajila hali tumbaji chikiko chapwile kukisula chatete chize chejile mwomwo yandando yakusokola.

⁶ Kufuma vene halwola kanelu, ndando yakusokola yaKulishitu yinanganyalisanga vaka-kumukavangiza mukaye kosena. Tuvosena twanganyala kundando kana numba tupwa vawavisa vaze vapwa “utanga wamikoko waundende” vaze navakayula hamwe naKulishitu mwilu, chipwe “mikoko veka” vaze navakayula kuli Yesu hano hamavu. (Luka 12:32; Yowano 10:16) Ndando kana yikiko yatulingisa tupwenga nalutalililo lwakulutwe nakutukonekela jishili jetu. Nge natutwalaho lika ‘kufwelela’ mundando kaneyi nakukavangiza Yesu hakumbi hakumbi, kaha natupwa nachivezu chitoma nakupwa nawa nalutalililo lwamwaza lwakulutwe.—Yowano 3:16.

7. Ngolo muka vahanyine Yesu omu akindulukile mwilu, kaha munahase kumukundwiza ngachilihi?

⁷ Vyuma muka nalinginga Yesu mwilu kufuma vene haze akindulukile? Atwama nangolo jajinene. (Mateu 28:18) Yehova amutongwele kupwa mutwe wachikungulwilo chavaka-Kulishitu, kaha ali nakuzata mulimo kana muzangi nachiyulo. (Wavaka-Kolose 1:13) Nganomu vahanjikile chimweza, Yesu ahakako malunga vatongola mangana vazakame mikoko jenyi. (Wavaka-Efwesu 4:8) Chakutalilaho, asakwile Paulu apwenga ‘kaposetolo kuli vaka-mafuchi eka,’ kaha amutumine ayenga nakutandakanyisa mujimbu wamwaza kwalenga kaye kosena. (Wavaka-Loma 11:13; WaChimoteu 1, 2:7) Kumakumishilo alikulukaji lyamyaka lyakulivanga, Yesu atumine mazu akusangejeka, akuhuhumuna, nakukafwa vikungulwilo 7 vyamungalila yaLoma  muAja. (Kusoloka, kapetulu 2-3) Kutala mwafwelela ngwenu Yesu apwa mutwe wachikungulwilo chavaka-Kulishitu tahi? (Wavaka-Efwesu 5:23) Hakusaka mutwaleho lika kumukavangiza, mwatela kusolola chakutalilaho chamwaza hakupwa namuchima wakwononoka nakuzachila hamwe nachikungulwilo.

8, 9. Ngolo muka vahanyine Yesu mu 1914, kahechi chatela kutukafwa tulinge vyuma muka?

⁸ Yesu vamuhanyine nawa ngolo jikwavo mu 1914. Mumwaka kana mukiko vamutongwele kupwa Mwangana waWangana waYehova wauMeshiya. Omu aputukile kuyula, “mwilu mwepukile jita.” Vyuma muka vyafuminemo? Satana navandemone vavambilile hamavu. Aha hakiko haputukilile jino myaka yayikalu. Kuvula chajijita, nauhwanga, navyuma vyeka vyakwivwisa woma, namisongo, namindenda, najizala jakalombolombo vize vili nakuyanjisa vatu makumbi ano vyeji kusololanga hatoma nge Yesu ali nakuyula mwilu. Satana napu “muka-kuyula kano kaye” “[ha]kashimbu kakandende.” (Kusoloka 12:7-12; Yowano 12:31; Mateu 24:3-7; Luka 21:11) Chipwe ngocho, Yesu ali nakuzata nangolo mangana akafwe vatu vetavile chiyulo chenyi chipwe chiku.

⁹ Chapwa chachilemu kuli etu tuvosena kufwila kupwa kusali yaMwangana wauMeshiya. Mukala vyuma natulinga hakumbi hakumbi, twatela kufwila kulinganga vyuma navivwisa Kalunga kuwaha nakulihenda kukulinga mwaya vishinganyeka vyakaye kano kakapi. Omu “Mwangana wavamyangana, Mwata wavamyata” eji kutalanga hamavu, eji kumonanga vyuma vyeji kumwivwisanga kupihya navize vyeji kumwivwisanga kuwaha. (Kusoloka 19:16) Mwomwo ika?

10. Yesu apwa ngachilihi, kaha vyuma muka vyeji kulingisanga ou Mwata wetu apihilile?

¹⁰ Mwata wetu apwa wakuwahilila ngana mwaIse. (WaChimoteu 1, 1:11) Omu Yesu apwile hano hamavu, kashinyinyikilenga vatu chipwe kupwa wamukalu muchimako. Oloze makumbi ano kuli vyuma vyavivulu vili nakusoloka vize  vinakumulingisa apihilile. Eji kupihililanga namauka akwitava aze eji kulyonganga kumwimanyinako. Ahanjikile chimweza ngwenyi: “Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata uze ali mwilu. Vavavulu navakamba kuli ami halikumbi lize ngwavo: ‘Ove Mwata, Ove Mwata, kutala . . . [katwazachilenga] milimo yangolo yayivulu mulijina lyoveko numba?’ Kaha hahaze vene nangukamba kuli vakiko ngwami: ‘Ami kangwamitachikizako! Fumenu kuli ami, enu vaka-kulinga upapwoki!’”—Mateu 7:21-23.

11-13. Mwomwo ika vatu vamwe vanahase kulikomokela hamazu aYesu akukana vaze veji kuzatanga “milimo yangolo yayivulu mulijina” lyenyi, kaha mwomwo ika eji kupihililanga? Hanenu chakutalilaho.

¹¹ Vatu vavavulu makumbi ano vaze valivuluka kupwa vaka-Kulishitu vanahase kulikomokela hakwivwa mazu kana. Mwomwo ika Yesu mwahanjikila mazu akufwana ngana kuvatu vaze vanazatenga “milimo yangolo yayivulu mulijina” lyenyi? Jichachi javaka-Kulishitendomu jinakafwenga vaka-kuhutwa, nakutunga vipatela namashikola, nakukilikita milimo yeka yayivulu. Hakusaka mutachikize kanawa ovyo vyeji kulingisanga Yesu apihilile navo, talenu hachakutalilaho chino.

¹² Achishinganyekenu valunga napwevo vali nakusaka kuya ungeji, oloze kaveshi nakusaka kuya navana vavoko, shikaho hinavatonda ndeji avalamine vana vavo. Jino navashika uze ndeji ngwavo: “Tulamine kanawa vana vetu. Watela kuvahananga vyakulya, nakuvasanyisa nakuvakinga kujiponde.” Oloze hakukinduluka navawana vana vavo vanafu zala, vali namajilo, vali nakuviza oku nawa vanahombo. Kaha nawa vali nakulilila uze ndeji avazakame, oloze ikiye kwenyi pyaku namuchima wenyi wauchiko, nanyinyi handalo nakuwahisa jinjanena. Chikupu vene, ava visemi navapihilila chikuma nakumuhulisa avalumbunwine ovyo nahonena kuzakama vana vavo. Jino ou ndeji himwavakumbulula ngwenyi: “Achitalenu havyuma ngunakilikita! Jinjanena jili nakusoloka unyoji kaha nawa zuvo yenu ngunamiwahishilayo kanawa!” Kutala ava visemi navasuuluka hamilimo kaneyi nazate tahi? Kwakusukusuku! Vamulwezele avalamine  vana vavo keshi kuvazachila milimo kanako. Ngocho kuhona chenyi kukavangiza vyuma vamulwezele chikiko nachivalingisa vapihilile.

¹³ Omu mukiko vanalingi navaka-Kulishitendomu. Yesu ahanyine jindongi vaka-kumukavangiza vamulamine kanawa vatu jenyi kushipilitu hakuvanangula muchano wamuMazu aKalunga nakuvakafwa vapwenga vatoma kushipilitu. (Yowano 21:15-17) Oloze vaka-Kulishitendomu vanahono chikupu kukavangiza jindongi kana. Vanajihisa vatu kuzala yakushipilitu hakuhona kuvanangula muchano uvene wamuMbimbiliya. (Isaya 65:13; Amose 8:11) Numba tuhu vali nakukilikita mangana vawahise vyuma muno mukaye, oloze chinasoloka hatoma nge vanahono kwononoka vyuma ashikile Yesu. Kano kaye kaSatana kanafwane nge zuvo yize vali nakusaka kupuzula. Mazu aKalunga asolola hatoma nge kaye kalinwomu vakanongese.—WaYowano 1, 2:15-17.

14. Mulimo muka uli nakwivwisa Yesu kuwaha makumbi ano?

¹⁴ Yesu eji kwivwanga kuwaha chikuma hakumona vatu vavavulu hamavu vali nakutesamo mulimo wakutunga tumbaji uze ahanyine vaka-kumukavangiza shimbu kanda ayenga mwilu. (Mateu 28:19, 20) Chapwa hikutokwa chachinene kwazana mumulimo uze weji kwivwisanga kuwaha Mwangana wauMeshiya. Ngocho, tutwalenuho lika kukafwa “ndungo wakushishika wakuzangama.” (Mateu 24:45) Ou ndungo uze apwa lizavu lyalindende lyavaka-Kulishitu vawavisa, alihandununa navatwamina vamukwitava vamuKulishitendomu, mwomwo ikiye ononoka kutwaminyina mulimo wakwambulula nakulisa kanawa mikoko jaKulishitu.

15, 16. (a) Yesu eji kwivwanga ngachilihi havilinga vyakuhona zangi vinalisale makumbi ano, kaha twejiva ngachilihi ngocho? (b) Vyuma muka veji kulinganga vaka-Kulishitendomu vize vyeji kwivwisanga Yesu kupihya?

¹⁵ Twatachikiza chikupu ngwetu ou Mwangana eji kwivwanga kupihya hakumona vilinga vyakuhona zangi vize vinalisale hano hamavu. Anukenu omu vaFwaliseu vafwefulwilenga Yesu omu okile vatu halikumbi lyaSambata. Vapwilenga vavakalu michima, ngocho valumbunwinenga Jishimbi vahanyine Mose kweseka nomu mwayile vishinganyeka vyavo nakutunga jishimbi  javo. Vyuma vyakukomwesa alingilenga Yesu vyanganyalishile chikuma vatu mwomwo vyavakafwilenga, nakuzamisa lufwelelo lwavo nakuvalingisa vawahilile. Chipwe ngocho, vaFwaliseu vavimwene kupwa vyamokomoko. Uno Yesu evwile ngachilihi havatu kana? “Avatalile vosena namatoto oku nanyengetela chikuma mwomwo yakukakama chamichima yavo.”—Mako 3:5.

¹⁶ Makumbi ano, Yesu ali nakumona vyuma vyavivulu chikuma vize vili nakumulingisa ‘anyengetele.’ Vatwamina vamuKulishitendomu velava meso avishinganyeka vyavo mwomwo yakufwila kukavangiza visemwa nakunangula chize chalimbalaka naVisoneka. Kaha nawa veji kupihililanga hamujimbu wamwaza waWangana waKalunga uze veji kwambululanga vaka-Kulishitu vamuchano. Muvihela vyavivulu vyamuno mukaye, vatwamina vamukwitava chamakuli vananehenga luyanjisa hali vaka-Kulishitu vaze veji kufwilanga kwambulula mujimbu ambulwilenga Yesu. (Yowano 16:2; Kusoloka 18:4, 24) Kaha veji kushinjilanga nawa vatu javo vazane mujita nakujiha myono yavakwavo vatu nakushinganyeka ngwavo Yesu Kulishitu mwavevwila kuwaha.

17. Uno vaka-kukavangiza Yesu vamuchano veji kumwivwisanga ngachilihi kuwaha?

¹⁷ Vaka-kukavangiza Yesu vamuchano vafwila kusolwela zangi vakwavo vatu. Veji kwambulilanga “vatu vosena” mujimbu wamwaza ngana muze alingile Yesu chamokomoko nakuvafumbukila. (WaChimoteu 1, 2:4) Zangi veji kulisolwelanga yapwa yakulipwila, kaha yapwa hikatachikijilo kakanene kakuvatachikijilaho. (Yowano 13:34, 35) Kuzanga vakwavo vaka-Kulishitu, nakuvavumbika, nakuvamona kupwa vavalemu cheji kuvasololanga chikupu nge veji kukavangizanga Yesu uze apwa Mwangana wauMeshiya nakwivwisa muchima wenyi kuwaha.

18. Vyuma muka vyeji kwivwisanga kupihya Mwata wetu, kahetu tunahase kumwivwisa ngachilihi kuwaha?

¹⁸ Twatela nawa kwanuka ngwetu Mwata wetu eji kwivwanga kupihya nge vaka-kumukavangiza navahona kumika muvyeseko nakwechelela zangi yavo yakuzanga Yehova yihole nakulitwamina kumuzachila. (Kusoloka 2:4, 5) Oloze eji kuwahililanga navatu vaze veji kukakachilanga palanga nakusongo. (Mateu 24:13)  Shikaho, lwola lwosena twanukenunga lushimbi lwaKulishitu lwakwamba ngwavo: “Ngukavangizenga lika.” (Yowano 21:19) Tuchitalenu havyuma vimwe vyamwaza vize Mwangana wauMeshiya mwakalingila vaze navakakachila palanga nakusongo.

19, 20. (a) Uno kukavangiza Yesu cheji kunehanga nganyo muka makumbi ano? (b) Kukavangiza Kulishitu nachitukafwa ngachilihi tupwenga nasetu wamwaza?

¹⁹ Kukavangiza Yesu nachitunganyalisa chikuma makumbi ano. Nge natwitavila Kulishitu kupwa Mwata wetu nakukavangiza chakutalilaho chenyi navyuma mwatulweza, kaha natupwa naluheto luze vahona kuwana vaka-kaye. Natuzatanga mulimo uze nautulingisa tuwahilile mukuyoya chetu. Natupwa nawa mutanga yavandumbwetu vakulinunga hamwe muzangi, nakupwa nawa nachivezu chitoma nakulivwisa kuwaha kuunda chamwenemwene. Mukavatu natwamba ngwetu natupwanga tuvakuwahilila kaha nawa vakusuuluka mukuyoya chetu nakulivwisa kuwaha vyuma vyeka vyavivulu.

²⁰ Yehova ahana Yesu kupwa “Setu waHaya Myaka Yosena” kuli etu twatwama nalutalililo lwakukatwama hano hamavu haya myaka yosena. Yesu ikiye ashisa muli setu Alama uze engishile vana venyi vosena muukalu waunene. (Isaya 9:6, 7) Nge natwitavila Yesu kupwa “Setu waHaya Myaka Yosena” nakufwelela muli ikiye, kaha natupwa nalutalililo lwakukayoya haya myaka yosena. Kaha nawa natupandama chikuma kuli Yehova Kalunga. Nganomu tunalinangula, kufwila kukavangiza chakutalilaho chaYesu hakumbi hakumbi hijila yamwaza yakwononokelamo lushimbi vahwima kuli Kalunga lwakwamba ngwavo: “Londezezenunga Kalunga, hakupwa muvana venyi azanga.”—Wavaka-Efwesu 5:1.

21. Uno vaka-kukavangiza Kulishitu veji kumunyikanga ngachilihi mukaye kano kamilima?

²¹ Twatokwa chikuma kulondezeza Yesu naIse Yehova. Etu vaka-kukavangiza Kulishitu tweji kumunyikanga musana wakushipilitu mukaye kano kamilima muze Satana nahungumwisa vatu  vavavulu valondezeze vilinga vyenyi. Musana tweji kumunyikanga shina muchano wamuVisoneka, navilinga vyavaka-Kulishitu vyakufwana nge kuwahilila, nakuunda, nazangi yamwenemwene. Tweji kupandamanga nawa chikuma kuli Yehova, kahomu mukiko vatela kulinga vatu vosena.

22, 23. (a) Vyuma muka vyamwaza navakatambula vaze navatwalaho lika kukavangiza Yesu? (b) Vyuma muka twatela kufwila kulinga?

²² Achishinganyekenu nawa havyuma vize Yehova ajina kukamilingila kulutwe kuhichila muli Mwangana wauMeshiya. Mwangana kana kalinwaha alwenga jita nakaye kano kaSatana. Chikupu vene, Yesu mwakafungulula. (Kusoloka 19:11-15) Kufumaho, Kulishitu mwakaputuka jino kuyula muChiyulo chaMyaka  Likombakaji. Fulumende yenyi yamwilu nayikalingisa vatu vosena vakushishika vakapwe vakukupuka kuhichila mundando yakusokola. Achishinganyekenu munalikangula kumujimba, kaha muli nangolo nakusoloka lika ukweze oku nawa munakulivwisa kuwaha kuzachila hamwe navakwenu milimo yakwalumuna kano kaye kupwa palachise. Omu nayikakuma yize Myaka Likombakaji, Yesu mwakahana jino wangana kuli Ise. (Wavaka-Kolinde 1, 15:24) Nge namutwalaho lika kushishika hakukavangiza Kulishitu, kaha navakamikisula mwamunene nakumingisa “mukulihehwa chaupahu chavana vaKalunga.” (Wavaka-Loma 8:21) Chikupu vene, natukapwa navyuma vyamwaza vyosena vize vajimbalishile vaAlama naEve. Hakupwa tuvana vaYehova vamalunga navava vamapwevo vahano hamavu, natukalihehwa myaka yosena kuukalu uze weza mwomwo yashili yaAlama. Chamuchano vene “kufwa kacheshi kukapwako chekako.”—Kusoloka 21:4.

²³ Anukenu uze mukweze walunga muka-luheto twashimutwilile muKapetulu 1. Ou mukweze akanyine kukavangiza Yesu omu amulwezele ngwenyi: “Twaya upwenga umuka-kungukavangiza.” (Mako 10:17-22) Oloze enu kanda namukalimbenja kulinga chuma kanako. Itavilenu kumisanyika kuli Yesu. Shikaho, fwilenu kupwa vakumika nakutwalaho lika kukavangiza Kafunga Wamwenemwene hakumbi hakumbi, mwaka himwaka mangana mukamone omu mwakatesamo vyuma vyamwaza vyosena ajina Yehova.