Dauda wakuSierra Leone ambile ngwenyi: “Ngwakolelele mungalila yimwe yayindende yakunote. Omu ngwapwile ngukanyike, kwepukile vikokojola vyakulizungila musenge hakachi katanga yetu natanga yeka. Tuvosena twalipikilile musenge kana. Hakusaka kukumisa vikokojola kanevi, vasanyikile chimbanda. Uze chimbanda ahanyine lunga umwe chivanjilo nakumufwika lihina litoma. Kapyapya kakandende, uze lunga vafwikile lihina aputukile kuchikima nakutukuchila. Omu atalile muchivanjilo, atambakanyine ngwenyi: ‘Ngunakumona kashinakaji walunga ali nakwiza. Navwale uvwalo utoma, wamusuku, ali najivwi kaha nawa wakufumbama nyima.’

“Apwile nakuvuluka kaka walunga. Jino evwile woma nakutetumuka ngwenyi: ‘Nge kamweshi nakwitavila vyuma ngunakuhanjikako, kaha twayenu mulimwene enu vavene!’ Oloze naumwe wauchi ahamukile nakuyako. Uze chimbanda amuunjishile hakumusapwila sopo jize japwile muchitenga.

“Kaka ahanjikile kuli uze lunga akwachile chivanjilo ngwenyi, uze musenge wapwile watanga yetu. Alwezele kaka wapwevo ngwenyi atela kulima musenge kana chakuhona kulizakamina. Yize tanga yeka yetavilile vyuma kana. Ngocho vize vikokojola vyakumine.”

 Mijimbu yakufwana ngana yavula chikuma kuWest Africa. Kuno kujingalila jetu najingalila jeka mukaye, vatu vavavulu vashinganyeka ngwavo mutu nge nafu eji kunungulukilanga kuchihela cheka, kuze nahase kumona, nakukafwa chipwe kulemeka vatu vavatonyi. Uno vyumevi vafwelela vatu vyamuchano tahi? Uno vafu chikupu vene vapwa vavatonyi nyi? Nge chiku, kaha veya vaze veji kulyonganga kupwa vakulu? Kutachikiza kanawa muvakumbulwila vihula kanevi chapwa chachilemu chikuma. Chihande kana chinahase kulingisa tukayoye chipwe kufwa.