Kwatwama vatu vakushipilitu. Vatu kana katwavamona namesoko, vamwe vapwa vamwaza veka vapwa vavapi. Uno vapwa vatu vaze vayoyelele hano hamavu nakufwa tahi?

Nduma, keshi ngochoko. Nge mutu nafu, keshi kunungulukila kuchihela chaujimu nganomu vashinganyeka vatu vavavuluko. Twatachikiza ngachilihi ngocho? Mwomwo omu mukiko yahanjika Mbimbiliya. Mbimbiliya yapwa mukanda wamuchano wakufuma kuli Kalunga umwe kaha wamuchano, ukwechi lijina lyenyi ikiye Yehova. Yehova atachikiza kanawa vyuma vyeji kusolokanga kumutu nge nafu mwomwo ikiye atengele vatu.—Samu 83:18; WaChimoteu 2, 3:16.

Mbimbiliya yahanjika ngwayo Kalunga atengele mutu watete Alama “nalukungu lwahamavu.” (Kuputuka 2:7) Kalunga amuhakile muPalachise, mumilemba yaEtene. Kachi nge Alama ononokele lushimbi lwaYehova, kachi kafwileko, kachi noholyapwa kwachili wamutonyi hano hamavu. Oloze omu Alama ahokwele lushimbi lwaKalunga mukulisakila, Kalunga ambile kuli ikiye ngwenyi: “Naukakinduluka cheka kumavu, mwomwo kukiko vene wafumine. Mwomwo unapu ulukungu, kaha naukakinduluka cheka kulukungu.”—Kuputuka 3:19.

Echi chalumbununa ika? Uno Alama apwile kulihi shimbu kanda Yehova achimutenge nalukungu? Kapwile numba kumweko. Kapwile mutu wakushipilitu mwiluko. Kapwilekoko. Ngocho omu Yehova ambile kuli Alama ngwenyi “naukakinduluka cheka kumavu,” alumbunwine nge Alama mwakafwa. Omu  Alama afwile, kalumukile nakupwa mutu wakushipilituko. Alama kapwile nakuyoyako, apwile wauchiko. Kufwa chalihandununa nakuyoya.

Nyi ngachilihi vatu veka vanafunga? Uno navakiko nawa vauchiko tahi? Mbimbiliya yakumbulula ngwayo:

• “Vosena [vatu natunyama] veji kuyanga kuchihela chochimwe. Vosena vafuma kulukungu, kaha nawa vosena veji kukindulukanga kulukungu.”—Muka-kwambulula 3:20.

• “Vafu kavatachikiza chuma numba chimweko.”—Muka-kwambulula 9:5.

• “Zangi yavo, nachijindo chavo, nalwiso lwavo vinanongo lyehi.”—Muka-kwambulula 9:6.

• “MuFuka [muSheyole] nauya kamweshi milimo, chipwe kujina, chipwe chinyingi, chipwe manganako.”—Muka-kwambulula 9:10.

• “[Mutu] eji kukindulukanga kumavu. Vishinganyeka vyenyi vyeji kunonganga halikumbi vene lize.”—Samu 146:4.

 Uno chili nakumikaluhwila kwitavila evi visoneka tahi? Nge mukiko, kaha achishinganyekenu hachumechi: Mujitanga jajivulu, lunga ikiye eji kuwananga jimbongo jakukafwa vaka-tanga yenyi. Nge uze lunga nafu, vaka-tanga yenyi kakavulu veji kuyandanga. Shimbu jimwe puwenyi navana veji kuhonanga jimbongo jakulanda vyakulya. Lwola lumwe veji kuvayanjisanga nakuli vaka-kole jauze lunga nafu. Jino lihulisenu ngwenu: ‘Kachi nge uze lunga wamutonyi kuchihela chimwe, mwomwo ika ali nakuhonena kuzakama vaka-tanga yenyi? Mwomwo ika keshi nakukinga vaka-tanga yenyi kuvatu vavapiko?’ Echi chili ngocho mwomwo visoneka vyahanjika mwakwoloka. Lunga kana keshi nakuyoyako, keshi kuhasa kulinga chuma numba chimweko.—Samu 115:17.

Uno echi chili nakulumbununa nge vafu kaveshi kukasangukako tahi? Nduma, kachalumbununa ngochoko. Chihande chakusanguka natuchishimutwila kulutwe. Oloze chili nakulumbununa nge vafu kavatachikiza vyuma mweji kulingangako. Kaveshi kuhasa kumimonako, nakumivwa, chipwe kumihanjikisako. Kamwatela kuvevwa womako. Kaveshi kuhasa kumikafwa chipwe kumilemekako.—Muka-kwambulula 9:4; Isaya 26:14.