Yehova mwakafumisako vyuma vyavipi vyosena vize aneha Satana. Yehova atongola Yesu kupwa Mwangana hamavu hosena. Muchiyulo chenyi, kano kaye nakakalumuka kupwa palachise.—Ndanyele 7:13, 14; Luka 23:43.

Yehova ashika vyumevi:

• VYAKULYA VYAKULISALA: “Mavu nawema jimbuto. Kalunga ketu mwatukisula.” “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 67:6; 72:16.

• KAKWESHI KUKAPWA JIJITAKO: “Twayenu mutale milimo nazate Yehova, omu nahundangana vyuma vyakukomwesa hamavu. Mwakumisa jijita hamavu hosena.”—Samu 46:8, 9.

• KAKWESHI KUKAPWA VATU VAVAPIKO: “Mwomwo vatu vavapi navakavafumisako . . . Kunasale kashimbu kakandende kaha, vaka-kuhuka kaveshi kupwako chekako. Naukatalatala kuze vapwanga, oloze kaveshi kukapwakoko.”—Samu 37: 9, 10.

• KAKWESHI KUKAPWA MISONGO, NAKULISHONA, NAKUFWAKO: “Halwola kana, meso atupuputa nawakatona, kaha matwitwi atujika matwitwi nawakajikuka. Halwola kana, vaka-kumbilikita  navakasambwojoka nge tupaji, malimi atumama nawakatwa jingunda.” —Isaya 35:5, 6.

  “Ivene Kalunga mwakapwanga navakiko hamwe. Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—Kusoloka 21:3, 4.

Yehova keshi kwongako, muka-kwonga apwa Satana navandemone jenyi. Vyuma vyosena eji kuhanjikanga Kalunga vyeji kutesangamo. (Luka 1:36, 37) Yehova amizanga, kaha asaka mukatwame muPalachise yize mwakaneha. Shikaho shimutwilenu naVinjiho jaYehova mangana mulinangule vyuma vyavivulu vyatwama muMazu aKalunga. Nge namuzachisa vyuma namulinangula mukuyoya chenu, kaha namusokoka kuvyuma vyamakuli, nakukupanda, nakuvyuma vyeka vyangana. Kulutwe namukasokoka muundungo washili nakufwa. Ngana muze ambile Yesu ngwenyi: “Namutachikiza muchano, kaha muchano naumilingisa kupwa vakulihehwa.”—Yowano 8:32.