Satana navandemone jenyi vapwa vikenya kaha nawa vilyanyi. Kushikulu Satana ajihile vimuna navangamba jalunga wakushishika Yopa. Kaha ajihile vana vaYopa 10 hakuzachisa “peho yanyamanganda” yenyeke zuvo yize vapwilemo. Kufumaho, Satana avetele Yopa “namahute amapi kufumisa muvilyachilo vyenyi swi namumbambamutwe.”—Yopa 1:7-19; 2:7.

Mumakumbi aYesu, vandemone valingishilenga vatu vamwe kupwa tumama natupuputa. (Mateu 9:32, 33; 12:22) Vayanjishile lunga umwe nakumulingisa alipulepule namalolwa. (Mako 5:5) Valingishile nawa mukweze umwe kutetumuka, nakulimbilanga hamavu, “nakumutunyisa chikuma.”—Luka 9:42.

Makumbi ano nawa, Satana navandemone jenyi chivajiha lika vatu nge muze valingilenga kunyima.  Milimo yavo yaukenya yinakuvulilako chikuma kufuma vene haze vavahangile mwilu. Mijimbu yamukaye kosena yili nakusolola ukenya wavo. Vali nakunehanga misongo kuvatu vamwe. Vali nakuyanjisanga vatu vamwe naufuku, hakuvahonesa kusavala tulo chipwe kuvalotesa vilota vyakwivwisa woma. Vali nakuyanjisanga nawa vatu vamwe hakuvasavalila kutulo. Kaha nawa vali nakulingisa vatu vamwe kupwa namatachi, nakuvajiha, chipwe kuvazondola valijihe vavene.

Lintina, uze atwama muSuriname, ambile ngwenyi ndemone chipwe ngwetu shipilitu wamupi, ajihile vausoko wenyi 16, nakumuyanjisa kumujimba namuvishinganyeka hamyaka 18. Vyuma ahichilemo vyamulingishile ambenga ngwenyi vandemone “veji kwivwanga kuwaha kuyanjisa vatu vaze vavahunga palanga nakukufwa.”

Oloze Yehova nahase kukinga vangamba jenyi kuchina kuvalukuka kuli Satana.—Vishimo 18:10.