Mwomwo ika Satana navandemone jenyi veji kuzachilanga chikuma nangolo mangana vongenga vatu? Mwomwo vasaka nayetu tulikange ngana mwavakiko. Vasaka nawa tuvalemesenga vakiko. Vasaka twitavile vyuma veji kutwonganga, nakulinga vyuma vize ahunga Yehova. Muvyuma kanevi mwaliweza navisemwa vyakutalisa kuvafu.

Kufwa chamutu twazanga cheji kukolanga chikuma kumuchima, kaha chapwa chakutamo kulishona nakulila. Yesu “asotwele masoji” omu afwile sepa lyenyi Lazalu.—Yowano 11:35.

Kwatwama visemwa vyavivulu vyakutalisa kukufwa, kaha vyalihandununa kweseka najingalila mukaye kosena. Visemwa vyavivulu kavyalimbalaka najishimbi jamuMbimbiliyako. Oloze vimwe vyakundwiza vishinganyeka vyakwamba nge vafu vapwa vavatonyi, kaha vanahase kumona vatu vavatonyi. Kunyingama havipeji, nakulila chakulitapwojola, navipeji vyauhando, navyuma vyeka vyasolola nge vatu veji kwivwanga woma wakufutwisa vakulu navafu. Oloze hakuwana nge vafu “kavatachikiza chuma numba chimweko,” ngocho vaze veji kulinganga vyumevi veji kukundwizanga makuli aSatana.—Muka-kwambulula 9:5.

 Visemwa navilika vimwe nawa vyakundwiza vishinganyeka vyakwamba ngwavo vafu vasaka kuvakafwa kuvatu vavatonyi, kaha vanahase kulemeka vavatonyi kachi nge kavavasuulwishileko. Mumafuchi amwe, mutu nge nafu mweji kuhitanga makumbi 40 chipwe mwaka wamuundu kaha navalinga chilika nakukombelela. Veji kulinganga ngocho mangana ngwavo vakafwe uze nafu alukile kuchihela chaujimu kuze kwatwama vakulu. Chisemwa chikwavo chalisala shina chakuhana vafu vyakulya navyakunwa.

Vyuma kanevi vyapwa vyakuhenga mwomwo vyeji kukundwizanga makuli aSatana kutalisa kuvafu. Uno Yehova nahase kutwivwila kuwaha kachi nge natulinga evi visemwa vyazama hakunangula chavandemone tahi? Nduma.—Wavaka-Kolinde 2, 6:14-18.

Vangamba jaKalunga wamuchano kavazana muvisemwa vize vyakundwiza makuli aSatanako. Oloze vahaka muchima kukukafwa vatu vavatonyi nakuvavendejeka. Vatachikiza ngwavo nge mutu nafu, Yehova ikiye kaha nahase kukamusangula.—Yopa 14:14, 15.

Vatu vamwe veji kulivwasananga navandemone vavene chipwe kuhichila muli muka-kutahisa. Echi vachivuluka ngwavo kupanda. Kukombelela kumiyombo, nauloji, nakutaha, nakulinga visava, nakulyongela upolofweto, nakwihula vafu vyosena vyapwa hikupanda.

Mbimbiliya yakanyisa vyuma vyosenevi, ngwayo: “Muli enu kanda mukapwa mutu . . . muka-kutaha ngombo, chipwe muka-kulinga visava, chipwe muka-kutahisa vitaho, chipwe muka-kupanda, chipwe muka-kuhelama vakwavo, chipwe muka-kutahisa vashipilitu, chipwe muka-kulweza vyuma vyakulutwe, chipwe muka-kwihula vafuko. Weshowo mwalinga vyuma kanevi napu waunyengwe kumeso aYehova.”—Lushimbi lwamuchivali 18:10-12.

Mwomwo ika Yehova atuhuhumwina tulihende kuvyuma kanevi?

 Yehova atuhuhumuna tulihende kukupanda chosena mwomwo asaka tuyoye kanawa. Azanga vatu nakuvazakama, kaha atachikiza ngwenyi vosena vaze veji kulikatanga navandemone veji kuyandanga.

Chakutalilaho, Nilda apwile muka-kutahisa muBrazil. Vandemone vamuyanjishile chikuma mukuyoya chenyi. Ambile ngwenyi: “Vashipilitu vavapi . . . vengilile muli ami, vangushinyinyikile ngulinge vyuma vasakilenga. Ngwapwilenga nakulezumuka-lezumuka, kaha ngwapwile nawa namatachi. Vandemone vanguyanjishilenga chikuma nakungulingisa ngulizakamine chikuma. Ngwanwinenga vitumbo vyatulo, nawala namakanya mukamwihi mukamwihi. Ngwayoyelenga chiyoyelo kanechi hamyaka yayivulu.”

Kutwala muze, Yehova naVinjiho jenyi hano hamavu vakafwile Nilda alitwamine kulikata navandemone, kaha ali jino nakuyoya chiyoyelo chamwaza, chakulikangula. Ambile ngwenyi: “Kanda namukeseka kulikata navashipilitu vakuhuka numba likumbi limweko.”