Mbimbiliya yamba ngwayo Satana “ali nakuhungumwisa vatu vosena hamavu.” (Kusoloka 12:9) Satana navandemone jenyi kavasaka etu vatu twitavile Mazu aKalunga, Mbimbiliyako. Vasaka kulingisa vatu vetavile ngwavo vafu vapwa vavatonyi kuchihela chaujimu. Tutalenu omu veji kulingilangamo ngocho.

Mukwitava chachivulu veji kunangulanga ngwavo mutu atwama namwono uze weji kunungulukilanga kuchihela cheka hanyima yakufwa chamujimba. Veji kwambanga ngwavo mujimba weji kufwanga oloze mwono kawafwako. Veji kwambanga nawa ngwavo mwono kaweshi kuhasa kufwako.

Oloze Mazu aKalunga kawanangula ngochoko. Mbimbiliya yanangula ngwayo mwono wapwa mutu ivene, keshi chuma chize chatwama mukachi kamutuko. Chakutalilaho, Mbimbiliya yavuluka omu vatengele Alama ngwayo: “Yehova Kalunga atengele mutu nalukungu lwahamavu, kaha afutumwinyine kuhwima chakuyoya mumazulu enyi, kaha apwile jino mutu [mwono] wakuyoya.” (Kuputuka 2:7) Ngocho Alama kavamuhanyine mwonoko, oloze ivene ikiye apwile mwono.

Tunyama navakiko vavavuluka kupwa myono.—Kuputuka 1:20, 21, 24, 30.

 Hakuwana nge lizu “mwono” muMbimbiliya lyalumbununa mutu ivene, ngocho katwatela kulikomokela hakwivwa nge mwono weji kufwangako. Visoneka vyamba ngwavyo:

• “Mwono uze nauvulumuna ukiko naufwa.”—Ezekele 18:4.

• “Kanda namwivwa woma vaze navajiha mujimba, oloze navahona kujiha mwonoko. Oloze ivwenu woma uze nahase kunongesa mwono namujimba muNgehena.”—Mateu 10:28.

• “Uno chimwe chilihi vetavisa kulinga haSambata, kulinga mwamwaza nyi kulinga mwamupi, kulwila mwono nyi kuujiha?”—Mako 3:4.

Visoneka vyeka vyasolola nge mwono vanahase kuujiha (Kuputuka 17:14, kwinyikila chamwishi), nakuujiha napoko yamukwale (Yoshuwa 10:37, kwinyikila chamwishi). Ngocho mwono weji kufwanga.

Nge namutanga Mbimbiliya kufuma kusongo nakusongo, kamweshi kuwanamo mazu akwamba ngwavo “mwono wakuzeneka kufwako.” Mwono kawapwa mutu wakushipilituko. Kunangula chakwamba ngwavo mwono kawafwako kachapwa chamuMbimbiliyako. Chapwa kunangula chaSatana navandemone jenyi. Yehova ahunga kunangula chamakuli chosena chamukwitava.—Vishimo 6:16-19; WaChimoteu 1, 4:1, 2.

Jila yikwavo Satana ali nakuhungumwishilamo vatu shina kuhichila muli vaka-kutahisa. Muka-kutahisa apwa mutu uze eji kutambulanga mijimbu kufuma kuvatu vakushipilitu. Vatu vavavulu kuhakilako vene navaka-kutahisa vashinganyeka ngwavo mijimbu kana yeji kufumanga kuvakulu. Oloze nganomu tunamono muMbimbiliya, echi kacheshi kuhashiwako.—Muka-kwambulula 9:5, 6, 10.

Uno mijimbu kana yeji kufumanga kuli veya? Kuli vandemone. Vandemone vanahase kushishika mutu shimbu achili wamutonyi, nakwijiva hanjikiso yenyi, nomu eji kusolokanga, navyuma eji kulinganga, navyuma atachikiza. Ngocho chapwa chachashi kuli vakiko kulondezeza mutu kana nge nafu.—Samwele 1, 28:3-19.

Jila yikwavo Satana eji kukundwijilangamo makuli akutalisa kuvafu yapwa kuhichila mumijimbu yakutaka. Mijimbu kana kakavulu yeji kulingisanga vatu vahone kwitavila muchano wamuMbimbiliya.—WaChimoteu 2, 4:4.

MuAfrica mwatwama vihande vyakutaka vyavivulu vyakuvuluka vatu vaze vafwile lyehi ngwavo vali nakuvamonanga vavatonyi. Kakavulu vatu kana ngwavo veji kuvamwenanga kuvihela vyeka, keshi kuze vafwililileko. Oloze lihulisenu ngwenu: ‘Uno kachi nge mutu apwile nangolo jakuhinduka kuvafu, kutala kachi mwahindukila kuchihela chili kwakusuku natanga yenyi namasepa jenyi tahi?’

Tuyokutuyoku nawa, mutu uze vanamono kuchihela cheka pamo alifwana kaha namutu uze afwile. Chakutalilaho, mulifuchi limwe vaka-Kulishitu vavali vaze vapwile nakwambulula mujimbu wamwaza vamwene kashinakaji walunga ali nakuvakavangiza. Hakumwihula, avalwezele ngwenyi hali vaze vaka-Kulishitu vavali hapwile songo yenyi uze afwile lyehi. Ou kashinakaji alimbenjele, oloze akanyine kwitavila ngwenyi nalimbenje. Achishinganyekenu mujimbu wamakuli akambulwile ou kashinakaji kumasepa jenyi navakwavo muvatungila.

Pamo nayenu munatachikiza vyuma vimwe vyakukomwesa vize vatu vanamononga, nakwivwa, chipwe kulota. Vyuma kanevi kakavulu vyeji kwivwisanga vatu woma. Marein uze atwaminenga kuWest Africa, evwilenga lizu lyakaka yenyi wapwevo uze afwile lyehi mwamusanyika naufuku. Marein evwilenga woma chikuma, atetumukilenga, nakuhindula vakuzuvo yenyi. Kutwala muze azalukile.

Jino nge chikupu vene vafu vavatonyi, kutala nachipwa chamangana kwivwisa woma vausoko namasepa tahi? Kacheshi kupwa chamanganako. Mazu kana eji kufumanga kuli vandemone.

Nyi ngachilihi mazu aze eji kusolokanga kupwa akukafwa nakuvendejeka? Chakutalilaho, Gbassay wakuSierra Leone avijile. Alotele mbozo ise neza. Ise amulwezele ayenga kumutondo umwe, akambateko lifwo nakulihaka mumeya, anwenga. Oloze shimbu kanda alinge ngocho katelele kuhanjikisa mutuko. Alingile vene ngocho, kaha ayoyele.

Pwevo weka nawa ambile ngwenyi lunga lyenyi uze afwile lyehi asolokele kuli ikiye ufuku umwe. Ambile ngwenyi lunga lyenyi asolokele kanawa kaha nawa avwalile uvwalo wamwaza.

Mazu navyakumwenesa kana vyeji kusolokanga kupwa vyamwaza kaha nawa vyanganyo. Uno vyeji kufumanga kuli Kalunga tahi?  Nduma, kavyeshi kufuma kuli ikiyeko. Yehova apwa “Kalunga wamuchano.” (Samu 31:5) Kalunga kasaka tufutako, kaha nawa keshi kuhasa kutwongako. Oloze vandemone vakiko vafwila kulinga ngocho.

Uno kwatwama vandemone vamwaza tahi? Nduma. Numba tuhu shimbu jimwe vanahase kusoloka kupwa vaka-kukafwa, oloze vosena vapwa vavapi. Omu Liyavolo ahanjikile naEve, asolokele nge himutu wamwaza. (Kuputuka 3:1) Oloze vyuma muka vyafuminemo omu Eve evwililile Satana nakulinga vize ahanjikile? Eve afwile.

Mwatachikiza ngwenu kakavulu mutu wamupi asaka kulisolola kupwa mutu wamwaza kuli mutu uze ali nakusaka kwonga nakulyapula. Ndangwishi yimwe ngwayo, “Mazo vifuhwa.” Mazu aKalunga nawa amba ngwawo: “Satana eji kulyalumunanga ivene kupwa kangelo kamusana.”—Wavaka-Kolinde 2, 11:14.

Makumbi ano Kalunga keshi nakuhanjika navatu hano hamavu kuhichila muvilota, navyakumwenesa, chipwe mazu akufuma kukala chumako. Eji kuvatwaminyinanga nakuvanangula kuhichila muMbimbiliya, yize yeji kulingisanga mutu apwenga “wakulizanga lyehi mwosena kuzata milimo yamwaza yosena.”—WaChimoteu 2, 3:17.

Ngocho Yehova eji kutuhuhumunanga kutufuta twaLiyavolo mwomwo atuzanga. Atachikiza ngwenyi vandemone vapwa vaka-kole vaukenya chikuma.