Vatu vakushipilitu vosena vaze atengele Yehova vapwile vamwaza. Oloze kangelo umwe alumukile nakupwa wamupi. Ikiye Satana Liyavolo. Satana asakile vatu hano hamavu vamulemesenga ikiye mukutela kulemesa Yehova. Talenu vyuma vyasolokele:

Mumilemba yaEtene, mwapwile mitondo yayivulu yize yeminenga mihako yamwaza. Yehova alwezele Alama napuwenyi Eve ngwenyi vanahase tuhu kulya kumitondo kana. Oloze kwapwile mutondo umwe uze Kalunga ambile ngwenyi kanda navakalyakoko. Ambile ngwenyi nge navakalyako, kaha navakafwa chakufwa.—Kuputuka 2:9, 16, 17.

Likumbi limwe Eve apwile ukawenyi omu linoka ahanjikile kuli ikiye. Oloze keshi nge linoka ikiye apwile nakuhanjikako. Satana Liyavolo ikiye alingishile chisoloke nge linoka ikiye apwile nakuhanjika. Satana alwezele Eve ngwenyi nge mwalya kumuhako uze vavakanyishile, kaha mwapwa nge Kalunga. Ambile nawa ngwenyi Eve keshi kufwako. Vyuma vyosena evi ahanjikile Satana vyapwile vyamakuli. Chaluvinda, Eve etavilile Satana nakulya kumuhako kana. Kufumaho ahanyineko nalunga lyenyi Alama, kaha naikiye alile.—Kuputuka 3:1-6

Kweseka namujimbu kanou wamuchano, tuli nakulinangula nge Satana apwa muka-kulikanga, muka-makuli. Alwezele Eve ngwenyi nge mwalikanga kuli Kalunga, keshi kufwako. Awa apwile makuli. Eve afwile, kaha naAlama nawa afwile. Satana kafwile hahaze veneko, oloze kulutwe mwakafwa mwomwo avulumwine  shili. Oholyapwa achili wamutonyi, kaha achili lika nakuhungumwisa vatu. Apwa lika muka-makuli, kaha ali nakuhungumwisa vatu vahokole jishimbi jaKalunga.—Yowano 8:44.

Kutwala muze kwapwile vangelo vakwavo nawa valumukile nakupwa vavapi. Ava vangelo vamwene mapwevo vamwaza hano hamavu, kaha vasakile kulisavala navo. Ngocho vejile hamavu nakulyalumuna kupwa malunga. Kaha vambachile mapwevo. Vyumevi kavyayile mwaya kujina chaKalungako.—Kuputuka 6:1, 2; WaYuta 6.

Vyanehele nawa pindangano yayinene kuvatu. Mapwevo javava vangelo vasemene vana, oloze vana kana kavapwile nge omu vapwa vakwavoko. Vakolele nakupwa vilyanyi, vatu vakutaluka, vaukenya. Ngocho hamavu hazalile naulyanyi, kaha Yehova ajinyine kunongesa vatu vakuhuka nalivaji lyalinene. Mutu wakwoloka Nowa natanga yenyi vakiko kaha vayovokele kuLivaji.—Kuputuka 6:4, 11; 7:23.

Chipwe ngocho, vaze vangelo vakuhuka kavafwileko, vakindulukile mwilu. Oloze vavazangamishile. Kavavetavishile kuhiluka cheka mutanga yaKalunga yavangelo vakwolokako. Kaha nawa Yehova kavetavishile kuvwala cheka mijimba yautuko. Kulutwe navakafwa hakusopesa chachinene.—WaPetulu 2, 2:4; WaYuta 6.

Mu 1914, mwilu mwepukile jita. Mukanda waKusoloka wamuMbimbiliya walumbununa vyuma vyasolokele ngwawo: “Mwilu mwepukile jita: Mikayele [Yesu Kulishitu uze vasangwile] navangelo jenyi [vamwaza] valwile jita nayauze chazangombe [Satana], kaha uze chazangombe navangelo jenyi [vavapi] valwile jita, oloze vahonene kufungulula, kaha mwilu kavawanyinemo cheka chihela chavoko. Ngocho uze chazangombe wamunene vamumbilile hamavu, uze linoka wakushikulu, uze vavuluka ngwavo Liyavolo kaha nawa Satana, uze ali nakuhungumwisa vatu vosena hamavu. Vamumbilile hamavu, navangelo jenyi [vavapi] nawa vavambilile naikiye hamwe.”

Vyuma muka vyasolokele? Mujimbu watwalaho lika ngwawo: “Shikaho enu melu nayenu mwatwamamo, wahililenunga.” Vangelo vamwaza vawahililile chikuma mwomwo Satana navaze vangelo vavapi kavapwile cheka mwiluko. Nyi ngachilihi vatu hano hamavu? Mbimbiliya yamba ngwayo: “Lamba hamavu nahakalungalwiji, mwomwo Liyavolo neza kuli enu, ali namatoto amanene, mwomwo natachikiza ngwenyi ali kaha nakashimbu kakandende.”—Kusoloka 12:7-9, 12.

Chapundu vene, Satana navangelo jenyi vakuhuka vali nakuhungumwisa vatu hano hamavu nakuvanehela lamba. Ava vangelo vakuhuka vavavuluka ngwavo vandemone. Vapwa vaka-kole jaKalunga. Vosena vapwa vavapi.