Satana navandemone jenyi kaveshi kutwalaho lika kwonga vatuko. Yehova avafumisa lyehi mwilu. (Kusoloka 12:9) Kalinwomu ngana, Kalunga mwazangamisa Satana navandemone jenyi. Kalunga amwenesele kaposetolo Yowano chakumwenesa, kaha ambile ngwenyi: “Jino ngwamwene kangelo mwafuma mwilu nasapi yakuwina wakuzeneka kukuma, nalilenge lyalinene mulivoko lyenyi. Akwachile uze chazangombe, uze linoka wakushikulu, ikiye Liyavolo kaha nawa Satana, ngocho amukashile hamyaka 1,000. Kaha amumbilile muwina wakuzeneka kukuma, asokeleko nakulamika katachikijilo helu, mangana ahonenga kuhungumwisa cheka vaka-mafuchi palanga nomu nayikuma yize myaka 1,000.” (Kusoloka 20:1-3) Kufumaho Liyavolo navandemone jenyi navakavanongesa haya myaka yosena.—Kusoloka 20:10.

Vatu vavapi hano hamavu navakiko navakavanongesa.—Samu 37:9, 10; Luka 13:5.

Omu Yehova mwakafumisako Satana navandemone, mwakaneha jino kukisula chachinene kuvatu. Anukenu ngwenu vafu kaveshi vavatonyiko, kaveshikoko. Yesu afwanyishile kufwa kukusavala tulo twatuvulu chakuzeneka kulota. (Yowano 11:11-14) Alingile ngocho mwomwo atachikijile ngwenyi lwola luli nakwiza omu vosena vaze vanasavala tulo twakufwa navakahinduka nakuyoya cheka. Ambile ngwenyi: ‘Ola yili nakwiza omu vosena vaze vali muvimbumbe navakalovokamo.’—Yowano 5:28, 29; esekesenuko Vilinga 24:15.

Navakasanguka nakuyoyela hano hamavu. Katweshi kukevwa cheka mijimbu yakufwako, oloze natukevwanga kaha mijimbu yamwaza yavatu vaze navakasanguka. Ocho kuwaha kana natukevwa hakusambilila vatu twazanga vaze navakafuma kuvimbumbe!