Tuvosena tukwechi lisesa lyakulisakwila vyuma. Tunahase kusakula kuzachila Yehova chipwe Satana navandemone jenyi. Katweshi kuhasa kuzachila vosena vavaliko. Achishinganyekenu omu chawaha kuzachila Yehova.

Nganomu tunamono, vandemone veji kwivwanga kuwaha kulemeka vatu nakuvonga. Yehova kapwa ngochoko. Azanga vatu nganomu chisemi azanga vana venyi. Ikiye muka-kuhana “mawana amwaza osena namawana akukupuka osena.” (WaYakova 1:17) Kakweshi chuma chimwe mwahona kuhana vatuko, numba tuhu chuma kana chachilemu chikuma kuli ikiye.—Wavaka-Efwesu 2:4-7.

Achishinganyekenu havyuma alingile MwanaKalunga Yesu omu apwile hano hamavu. Okile tumama, natupuputa, navaka-mbumba, navitonji. Kaha nawa afumishilenga vandemone nakuka misongo yakulisezaseza yosena. Yesu azachishile ngolo jaKalunga nawa hakusangula vafu.—Mateu 9:32-35; 15:30, 31; Luka 7:11-15.

 Kalunga eji kuhanjikanga muchano lwola lwosena, kasaka kutwongako. Keshi kumbembejeka mutu numba umweko.—Kulava 23:19.

Ngana muze wandajilili weji kukwatanga jiji, navatu vavavulu vanakwachiwa kukupanda navyuma vyamakuli. Veji kwivwanga vafu woma. Veji kwivwanga vandemone woma. Veji kulizakaminanga havyangu, naviyovo, namikalo, navipandapanda. Vafwelela vyuma vyakutaka navisemwa vize vyapendamina hamakuli aSatana Liyavolo. Vangamba jaKalunga kavafwelela muvyuma kanevi akundwiza Satanako.

Yehova akwechi ngolo chikuma kuhambakana Satana. Nge namuzachila Yehova, kaha mwamikinga kuvandemone. (WaYakova 4:7) Wanga kaweshi kuhasa kumikwatako. Chakutalilaho, muNigeria, vimbanda vatatu vakukuluka malambu vasakile kulova Chinjiho chaYehova uze akanyine kufuma mumbaka yimwe. Omu wanga wavo wahonene kukwata uze Chinjiho, chimbanda umwe evwile woma, kaha ayile kuli uze Chinjiho nakulikonekela.

Nge vandemone vali nakumiyanjisa, sanyikenu Yehova halijina lyenyi kaha mwamikinga. (Vishimo 18:10) Oloze hakusaka Kalunga amikinge, mwatela kulihenda kuvyuma vyosena vize vyapandama kukupanda nakukulemesa vandemone. Vaka-kulemesa Kalunga muEfwesu yakushikulu valingile vene  ngocho. Vakungulwile mikanda yavo yosena yavisava nakuyocha. (Vilinga 19:19, 20) Namakumbi ano, vangamba jaKalunga vatela kulinga mwomumwe. Mbilenu mikalo, namizala, najipindo, navipandapanda, namikanda yavisava, nakala vyuma vyakupanda.

Nge muli nakusaka kwivwisa Kalunga kuwaha, kaha mwatela kwecha kulemesa chamakuli nakulitwamina  kulinga vyuma vyavipi. Mwatela nawa kuzata natwima milimo yasakiwa mukulemesa chamuchano. Mbimbiliya yasolola vyuma vyasakiwa:

Satana navandemone jenyi vakwechi vatu hano hamavu vaze veji kunangulanga nakulinga vyuma vyavipi. Yehova naikiye akwechi vatu jenyi. Vakiko Vinjiho jaYehova. (Isaya 43:10) Mukaye kosena, Vinjiho vanahambakana jimiliyoni 8. Vosena veji kwesekanga kulinga vyuma vyamwaza nakunangula vatu muchano. Mumafuchi amavulu, munahase kuvawana hajiZuvo jaWangana, haze navamisambilila nachisambo.

Mulimo wavo wapwa wakukafwa vatu mangana vazachile Kalunga. Navalinangula Mbimbiliya nayenu hembo lyenu, nakumikafwa mulinangule mwakulemesela Yehova mujila yakwoloka. Kaveshi kumifwetesako. Vinjiho veji kwivwanga kuwaha kunangula vakwavo muchano mwomwo vazanga vatu naYehova Kalunga.