Achishinganyeke hachuma chino: Tim anakuhema namasepa jenyi, kaha nase ngunja hanjanena yambala yinafu.

Nge yove, kachi unalingi ngachilihi?

KULI JIJILA JITATU:

1. Kuchina.

2. Kuvangijikila mukwenu.

3. Kulweza vavene vyuma unapihisa, nakwitavila kuvifweta.

Unahase kusakula Jila A. Oloze tachikiza ngwove chapwa chamwaza kulitavila kala vyuma unalingi.

1. Chapwa chamwaza kulitavila.

   Mbimbiliya yamba ngwayo: “Tuli nakusaka ngwetu tupwenga vakashishi muvyuma vyosena.”—WavaHepeleu 13:18.

2. Vatu veji kukonekelanga vaze veji kulitavilanga.

   Mbimbiliya yamba ngwayo: “Ou mwasweka milonga yenyi keshi kukafukilako, oloze ou mwalitavilayo nakuyiseza navakamutetela.”—Vishimo 28:13.

3. Chikumanyi Kalunga eji kwivwanga kuwaha.

   Mbimbiliya yamba ngwayo: “Yehova ahunga muka-kutangisa, oloze apwa sepa lyavaka-kusungama.”—Vishimo 3:32.

Karina wamyaka 20, avulumwine mulonga kutupokola wakutambukisa minyau mujila yayipi, oloze kambulwile kuli iseko. Jino omu mwahichile mwaka wamuundu, ise awanyine kalipapilo muzuvo yamwanenyi kaze vasonekele mulonga avulumwine. Karina jino apwile muukalu kuli ise.

Vyuma muka alinangwileho? Karina ambile ngwenyi: “Kusweka vyuma unapihisa cheji kulingisanga ukalu utohwe nakufweta vyavivulu kulutwe.”

Mbimbiliya yamba ngwayo: “Tuvosena tweji kulimbenjanga kakavulu.” (WaYakova 3:2, kwinyikila chamwishi) Nganomu tunamono, chapwa chamwaza kulitavila vyuma unalingi mwomwo chasolola nge watwama namangana kaha nawa uwakulinyisa.

Chuma chikwavo shina kulinangula kuvyuma wapihishile. Kanyike wapwevo Vera ambile ngwenyi: “Ngweji kufwilanga kumona vyuma nangulinangula kuvyuma ngwapihishile kunyima, vize navingukafwa ngukahone kukapihisa vyuma vyovimwe kulutwe.” Tutale omu unahase kulingilamo ngocho.

Kachi nge wambatanga kinga yavaiso kaha unayijihi, naulinga ngachilihi?

• Kuhola kulu nakushinganyeka ngwove vaiso kaveshi katachikizako.

• Kulweza hatoma vaiso chuma unajihi.

• Kulweza vaiso chuma chinafu oloze ngwove mukwenu ikiye achijihanga.

Kachi nge unafwele vyeseko kushikola mwomwo kawapwanga nakuhakako manganako, naulinga ngachilihi?

• Vyeseko vyakaluhwanga.

• Kulitavila ngwove kawahakangako manganako.

• Kuvangijikila mulongeshi wove ngwove akujinda.

 Achishinganyeke havyakutalilaho kanevi nakulifwanyisa ove ivene kupwa (1) iso, (2) mulongeshi. Iso namulongeshi wove navakumona ngachilihi nge walitavilanga vyuma wapihisanga? Navakumona ngachilihi nge waswekanga?

Achanuke vyuma vimwe wapihishile mwakawali nakukumbulula vihula vinakavangizaho.

Vyuma muka wapihishile? Wakumishile ngachilihi ukalu kana?

• Ngwaswekele.

• Ngwavangijikilile mutu weka.

• Ngwalitavilile.

Nge kawalitavilileko, kaha wevwile ngachilihi mukuhita chamakumbi?

• Ngwawahililile mwomwo kavangutachikijileko.

• Ngwapihililile mwomwo ngwalyongele.

Jila yeka muka yamwaza watelele kukumishilamo ukalu kana?

Vyuma muka walinangwile kuvyuma wapihishile?

Mwomwo ika vatu vamwe veji kuhonenanga kulitavila vyuma vanapihisa?

Vatu navakumona ngachilihi nge watwama nachijililo chakulihamikanga vyuma unalingi? Navakumona ngachilihi nge weji kulitavilanga vyuma unapihisa?—Luka 16:10.