Chakutalilaho: David ali nakuya naminyau yenyi kuchihela kuze katachikizako, kaha najimbala. Naseze jila atelanga kuya.

Nge yove wapwanga David, kachi unalingi ngachilihi?

Unahase kulinga vyuma vyakufwana nge:

1. Kuhulisa.

2. Kutala hamapu.

3. Kuya lika ngwove pamo muwana jila yeka.

Chapundu vene, kaweshi kusakula Jila C koko.

Jila yatete yinahase kupwa yakwoloka. Oloze Jila B yikiko yakwoloka chikuma mwomwo haungeji wove wosena unapunga namapu kana mulivoko.

Mbimbiliya yinahase kukukafwa mujila kaneyi.

Mukanda kanou naukukafwa

• muukalu wamukuyoya

• utachikize muchima wove nakupwa umutu wamwaza

• omu unahase kuyoya kanawa

Vanyike veji kuhulisanga vihula vyakufwana nge:

• Likumbi lyeji kuyanga kulihi?

• Iya atengele vatanganyika?

Kahomu navakola veji kuhulisanga vihula vyakufwana nge:

• Mwomwo ika vyuma vyavipi vyeji kusolokelanga?

• Mwomwo ika vatu veji kufwilanga?

Namulinga ngachilihi nge navamilweza ngwavo vihula kana vavikumbulula muMbimbiliya?

Vatu vavavulu vashinganyeka ngwavo Mbimbiliya himukanda wakushikulu, yayikalu kwivwishisa, kaha nawa kayeshi kuhasa kuvakafwako. Uno Mbimbiliya yikiko yili naukalu tahi, nyi vatu vavahungumwisa navyuma vavalweza?

Chakutalilaho, vatu vashinganyeka ngwavo Mbimbiliya yamba ngwayo Kalunga ikiye ali nakuyula kano kaye. Uno omu mukiko tahi? Muno mukaye muli nakusoloka vyuma vyavipi chikuma. Vatu vanakuviza, nakuyanda, nakufwa, kaha uhutu nawa unavulu. Uno Kalunga wazangi nahase kuneha vyuma kana tahi?

Uno uli nakusaka kutachikiza muvakumbulwila chihula kana tahi? Unahase kulikomokela hakutachikiza vyuma yahanjika Mbimbiliya.

Vyuma vanashimutwila muno mumbuloshuwa vinafumu muMbimbiliya. Vinjiho jaYehova vafwelela ngwavo Mbimbiliya yapwa himukanda wamwenemwene mwomwo ‘vauhwima kuli Kalunga, kaha wawahila kunangula, nakuhanjikila, nakwolola vyuma.’ (WaChimoteu 2, 3:16, 17) Shikaho, mutu himutu atela kulisakwila ivene kutanga Mbimbiliya.