Chakutalilaho: Julia ali nakulitalila muchivanjilo, nakumona ngwenyi natoho chikuma. Kaha mwahanjika ngwenyi, “Ngwatela kukehesako mujimba mwomwo ngwatoho chikuma.” Oloze visemi jenyi namasepa jenyi veji kumusangejekanga ngwavo ali nakusoloka kanawa.

Julia ali nakufwila kukehesako mujimba wenyi, ngocho mwalitwamina kulya hamakumbi amavulu . . .

Nge weji kushinganyekanga ngana mwaJulia, kaha ika watela kulinga?

Kushinganyeka omu weji kusolokanga kachapwa chakuhengako. NaMbimbiliya yavuluka vatu vaze vapwile vamwaza kumujimba vakufwana nge Sala, Lakele, Avingayile, Yosefwe, naNdavichi. Mbimbiliya yahanjika nawa hali Avishange ngwayo apwile mwanapwevo “wamwaza chikuma.”—Vamyangana 1, 1:4.

Oloze vakweze vavavulu veji kulizakaminanga chikuma hakusoloka chavo. Chuma kana chinahase kuneha ukalu. Chakutalilaho:

• Mukuhehwojola chimwe, vawanyine nge vakweze vamapwevo vakuheta kujipaseti 58 vambile ngwavo vatohwele chikuma, oloze hakuvapima vawanyine kaha vatu vakuheta kujipaseti 17.

• Mukuhehwojola chikwavo nawa vawanyine nge mapwevo vakuheta kujipaseti 45 vaze kavatohwele chikumako vambile ngwavo vatohwele chikuma.

• Vakweze vamwe vanakulyanga nachileza hakufwila kuhokama, ngachize vali nakuviza misongo.

 Nge unaputuka kuviza mwomwo yakuhona kulya, kaha hulisa vakukafwe. Lwezako visemi jove chipwe kala mukulwane wafwelela. Mbimbiliya yahanjika ngwayo: “Sepa wamwenemwene eji kuzanganga sepa lyenyi shimbu yosena, kaha napu nge hindumbwenyi uze mwamukafwa mulwola lwavihuli.”—Vishimo 17:17.

Mutu wamukachi yikiye eji kusololanga mutu kupwa wamwaza chipwe chiku. Talenu chakutalilaho chaAvasalome mwana Mwangana Ndavichi. Mbimbiliya yamuvuluka ngwayo:

“MuIsalele mwosena kamwapwile lunga valishilenga hakuwaha chenyiko. . . . Kapwile nakatengako.”—Samwele 2, 14:25.

Oloze ou lunga apwile wakulivwimba, wakufwila ulemu, kaha nawa muka-kumbembejeka. Mbimbiliya kayavuluka Avasalome kupwa mutu wamwazako, oloze yamuvuluka ngwayo himutu wakuhona kushishika, kaha nawa wamupi muchima.

Ngocho, Mbimbiliya yatuhana jindongi ngwayo:

“Vwalenu mutu wamuhya.”—Wavaka-Kolose 3:10.

“Kuliwahisa chenu kanda chipwa chakuwelukako . . . , oloze chipwenga chakuwahisa mutu wakusweka wamumuchima.”—WaPetulu 1, 3:3, 4.

Numba tuhu kachapwa chakuhenga kufwila kusoloka kanawako, oloze chuma chachilemu shina vilinga vyamutu. Mwomwo mukuhita chalwola, vatu vanahase kuvulyama kuwaha chove chakumujimba, oloze navanukanga lika vilinga vyove vyamwaza. Phylicia ambile ngwenyi: “Kuwaha chakumujimba cheji kukunyulanga washi vatu, oloze omu wapwa mumuchima navilinga vyove vyamwaza vikiko navanukanga chikuma vatu.”

Kutala kakavulu weji kwivwanga kupihya omu weji kusolokanga tahi?

Kutala washinganyekaho lyehi vyakulyalumuna mweka hakuzachisa maji chipwe kuhona kulya mangana ukeheseko mujimba tahi?

Kachi nge wapwanga nangolo jakwalumunako vyuma vimwe kumujimba wove kweseka nomu weji kusolokanga, kachi unalumuna ika? (Sakula ovyo musaka.)

• KUSUHWA

• KUTOHWA

• JIKAMBU

• KUSOLOKA CHAMUJIMBA

• CHIHANGA

• CHIKOVA

Kachi nge unakumbulula ngwove eyo kuvihula vivali vyakulivanga, nakusakula nawa hatatu chipwe hahavulu hachihula chamuchitatu, kaha ijiva ngwove: Vatu veka kaveshi kushinganyeka nge omu weji kulishinganyekelanga ove lyaveneko. Oloze ove unahase kulizakamina nakushinganyeka chikuma hasolokeso yove.—Samwele 1, 16:7.