CHIHULA 6
Nangufungulula Ngachilihi Vaze Vali Nakungushinjila?
NAULINGA NGACHILIHI?
Chakutalilaho: Omu Brian amwene masepa jenyi vali nakwiza, evwile namuvifuhwa keke. Muchalumingo vene chize, vamushinjilile kavali ngwavo anwenga lyamba. Aka jino kakiko nakapwa kamuchitatu.
Watete mwamba ngwenyi:
“Nalelo uli uka wove? Mana ngukulweze sepa lyami mukwavo.”
Omu navaswenya kuli uze sepa lyenyi, mwengisa livoko musweko nakulovola musanga walyamba nakuhana Brian.
Brian jino mwevwa namuvifuhwa keke hakumona uze musanga.
Brian mwavalweza ngwenyi: “Ngwamilwezanga lyehi ngwami ami kangwanwa makanyako . . . ”
Uze kanyike mukwavo mwamuvatuwiza nakwamba ngwenyi: “Tambula kaha pwako nge ulunga!”
Brian mwamba ngwenyi: “Kangute, ngunamilweze lyehi!”
Uze kanyike mukwavo mwakwata Brian hachifwiji nakwamba ngwenyi: “Elunga kokako kaha chindende.”
Uze kanyike wakavanga mwaswenyesa musanga kukanwa kaBrian nakumulembejeka ngwenyi: “Katweshi kulweza mutu numba umweko.”
Nge yove wapwanga Brian, kachi unalingi ngachilihi?
SHINGANYEKA
Uno ava masepa jaBrian vanatachikiza kanawa mwalumbunukila vyuma vanakulinga tahi? Kutala vanasakula vyuma vyakwoloka vyakulinga tahi? Nduma. Vanakulinga kaha vyuma vize vanavalweze kulinga masepa javo, mwomwo vanakusaka vasuulwise vaze masepa javo.
Nge yove wapwanga mucheseko kana, kachi unalingi ngachilihi mangana uhonese cheseko kana?
-
MWENA CHIMWEZA PONDE
Mbimbiliya yamba ngwayo: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.”—Vishimo 22:3.
Kakavulu unahase kumona ngwove okwo uli nakuya kuli ponde. Chakutalilaho, unahase kumona lizavu lyavakwenu vaka-shikola vanalikungulwila hamwe nakunwa lyamba. Echi chatela kukukafwa ushinganyeke chimweza vyakulinga.
-
SHINGANYEKA
Mbimbiliya yamba ngwayo: “Pwenunga nachivezu chamwaza.”—WaPetulu 1, 3:16.
Lihulise ngwove, ‘Nangwivwa ngachilihi nge nangwitavila vyuma vanakungushinjila kulinga?’ Chapundu vene, masepa jove vanahase kukuzanga nge nawitavila vyuma vanakusaka ulinge. Oloze kulutwe mukevwa kuwaha tahi, nyi kupihya? Kutala unahase kulinga vyuma vyavipi mangana usuulwise vakwenu kaha tahi?—Kulovoka 23:2.
-
SAKULA VYAKULINGA
Mbimbiliya yamba ngwayo: “Mutu wamangana apwa wakuvanguluka.”—Vishimo 14:16.
Mukuhita chamakumbi twatela kulisakwila etu vavene vyakulinga. Nge twasakula vyamwaza kaha natulivwisa kuwaha, oloze nge tunasakula vyavipi kaha natumonanga ukalu. Mbimbiliya yatulweza malunga vaze vasakwile vyuma vyamwaza, vakufwana nge Yosefwe, Yopa naYesu. Yavuluka nawa Kena, Esau naYuta vaze vasakwile vyuma vyavipi. Uno yove mulinga ngachilihi?
Mbimbiliya yamba ngwayo: “Pwakonga uwakushishika.” (Samu 37:3) Nge unashinganyeka lyehi ukalu unahase kufuma havyuma navakushinjila, chinahase kupwa chachashi kuvalweza ovyo unakanyina. Echi nachikunganyalisa.
Kawatela kuhanjika vyavivuluko, oloze unahase kuvalweza kaha ngwove NDUMA. Chipwe unahase kwamba kaha ngwove:
-
“Yami ngufumisenuho!”
-
“Yami kangwalinga vyuma kanako!”
-
“Nayenu mwejiva ngwenu ami kangwazanamoko!”
Chuma chachilemu shina kuhamuka nakukumbulula washi. Nge naulinga ngocho, kaha vakwenu navalitwamina kukushinjila kulinga vyuma vyavipi.
VIWATELA KULINGA NGE NAVAKUSEKELEKA
Nge mwitavilanga vyuma navakushinjila vakwenu, kaha mupwa nge uchisaji chavo navachuna kala lwola
Watela kulinga ngachilihi nge vakwenu navakusekeleka nakukwamba ngwavo, “Watwama nawoma yove!” Kusekeleka changana cheji kwivwisanga kupihya chikuma. Uno watela kukumbulula ngachilihi? Unahase kuzachisa jijila jino jivali.
-
Watela kukumbulula ngwove: (“Ngunakwivwa woma vene.” Kaha valweze ovyo unakanyina.)
-
Watela kulikomokela nakuvalweza ngwove: (“Ami ngwashinganyeka ngwami vatu vakuhuka kaha vakiko vatela kunwa lyamba!”)
Nge navatwalaho lika kukusekeleka, kaha vaseze nakuliyila kwove. Anuka ngwove, nge mupwa lika navo, kaha navatwalaho lika kukusekeleka. Nge muvaseza, kaha musolola hatoma ngwove kawasaka vakwenu vakushinjilenga vyuma vyakulingako.
Chapundu vene, watela kutachikiza ngwove luyanjisa lwatwama kwosena. Oloze unahase kulisakwila vyuma vyakwoloka, nakukana vyuma vyakuhenga vize vakwenu vanahase kukushinjila ulinge. Anuka ngwove watwama nangolo jakulisakwila vyakulinga ove livene.—Yoshuwa 24:15.
