CHIHULA 7
Nangulinga Ngachilihi Nge Vanangushinjila Ngulinge Ujila?
NAULINGA NGACHILIHI?
Chakutalilaho: Heather kanyike wapwevo napunga nakushimutwila nakanyike walunga Mike hatukweji vavali. Vanapunga nakulitumina mijimbu hashinga nakushimutwilanga halwola lwaluvulu, kaha vanalijilila chikuma.
Hatukweji ava vavali vanashimutwilanga, Mike naHeather vanalikwatenga kumavoko nakulipakata mukasamba. Mike anakusaka valinge ujila, oloze Heather keshi nakusakako. Tuyokutuyoku nawa, Heather keshi nakusaka Mike amujinde mwomwo eji kumusuulwisanga. Kaha nawa eji kumulwezanga ngwenyi, ‘Ngwakuzanga chikuma . . . ’
Kachi nge wapwanga Heather, kaha nawa unahete haseteko yakusomboka, kachi unalingi ngachilihi?
SHINGANYEKA
Kalunga ikiye ahakileko ulo, kaha kulinga ujila chapwa kuhokola jishimbi jenyi. Nge mutu mwalinga ujila, kaha chinafwane nge nambate chikovelo chamwaza vamuhananga nakuchihunjisa majilo
Kachi nge munyina kumutondo nakusaka kutuka nge kajila, nauholoka hamavu nakulivulumuna. Omu mukiko chapwa nakuhokola lushimbi lwamuMbimbiliya lwakwamba ngwavo: ‘Lihendenu kuujila.’—Wavaka-Tesolonyika 1, 4:3.
Ukalu muka unahase kumona hakuhokola lushimbi kanelu? Mbimbiliya yamba ngwayo: “Weshowo mwalinga ujila ali nakulinga shili kumujimba wenyi ivene.” (Wavaka-Kolinde 1, 6:18) Uno echi chalumbununa ika?
Vaka-kuhehwojola vamba ngwavo vanyike vaze vanalinginga ujila veji kumonanga ukalu wauvulu.
-
KULYONYINGA. Vakweze vavavulu vaze valingaho lyehi ujila veji kuliveyanga chikuma mukuyoya chavo.
-
KUHONA KULIFWELELA. Vakweze vavavulu nge vanalingi lyehi ujila, veji kuhuhwasananga mutu kana nakwamba ngwavo, ‘Atela alingaho lyehi ujila namutu weka.’
-
KULINYENGA. Vanyike vamapwevo vavavulu veji kusakanga mutu uze mwavakinga keshi uze anakusaka kaha kuvenyekako. Vanyike vamalunga nawa vamona ngwavo vavazanga chikuma kumapwevo vaze kanda valisavale lyehi navo kuhambakana vaze valisavala navo.
-
Anuka ngwove: Nge mulinga ujila mupihisa lijina lyove, kaha nawa vatu kaveshi kukulemesangako. (Wavaka-Loma 1:24) Wapwa uwamulemu, kaha kawatela kulisawisako.
Pwako uwakumika nakusolola hatoma ngwove wasaka ‘kulihenda kuujila.’ (Wavaka-Tesolonyika 1, 4:3) Nge mulinga ngocho, kaha omu mukakola mukengila jino muulo wakalemesa. Mukalivwisa jino kutwama hamwe namuka-mahyove, kaha kaweshi kukalizakamina, nakulyonyinga, nakusauka ngana muze cheji kupwanga kuvanyike vaze veji kulinganga ujilako.—Vishimo 7:22, 23; Wavaka-Kolinde 1, 7:3.
UNASHINGANYEKA NGACHILIHI?
-
Kutala mutu uze akuzanga nahase kukulweza ulinge vyuma vize navikunehela ukalu tahi?
-
Kutala mutu uze akuzakama nahase kukulweza ulinge vyuma vize navyenyeka usoko wove naKalunga tahi?—WavaHepeleu 13:4.
