CHIHULA 3
Ngunahase Kuhanjika Ngachilihi naVisemi Jami?
NAULINGA NGACHILIHI?
Chakutalilaho: LyaChitatu nachingoloshi, Geoff wamyaka yakusemuka 17, nakumisa kuzata milimo vamuhananga hazuvo. Ngocho mwasaka jino kutwama ahwime nakulihizumuna. Mwamunyika TV nakutwama muchitwamo chenyi.
Hahaze vene Ise mweza nakwimana muchikolo oku napihilila.
Mwamba ngwenyi, “Ove Geoffrey, ika unatwamina nakutala TV muchishishisa chakukafwako songo yove milimo yakushikola vamuhananga? Ove mwana kawevwako!”
Geoff mwahanjikila kumiliu ngwenyi, “Ukalu uneza cheka.”
Ise mwatenuka ngwenyi, “Ngwove ika ove mwana?”
Geoff mwalishishimuna nakwamba ngwenyi, “Vyauchi.”
Oloze Ise napihilila chikuma nakwamba ngwenyi, “Kanda kukahanjika cheka nayami mazu kanako!”
Kachi nge yove wapwanga Geoff, kachi unahonesa ngachilihi ukalu kanou?
SHINGANYEKA
Kushimutwila navisemi jove chinafwane nge kutambukisa munyau. Nge nauwana mujila vanalumbikamo malolwa, kaha unahase kuzachisa jila yeka.
CHAKUTALILAHO:
Leah kanyike wapwevo ambile ngwenyi, “Cheji kungukaluhwilanga kushimutwila navatata. Shimbu jimwe nge ngunakuhanjika navo veji kwambanga ngwavo, ‘Kumana uli nakuhanjika nayami, ngwove ika?’”
LEAH MWASAKULA HAJIJILA JITATU.
-
Kutenukila ise.
Leah mwatambakana ngwenyi, “Vyuma ngunakumilweza vyavilemu, ivwililenu!”
-
Kulitwamina kushimutwila naise.
Leah mwalitwamina kuhanjika naise haukalu wenyi.
-
Kuvandamina lwola lwamwaza numba alweze ise.
Leah mwawana lwola lwamwaza nakutwama nakushimutwila naise haukalu wenyi, chipwe kumusonekela mukanda.
Jila muka yamwaza atela kuzachisa Leah?
NYINGILILA: Ise yaLeah anakushinganyeka vyuma vyeka, kaha keshi nakwivwa ovyo anakumulweza mwanenyiko. Nge Leah mwasakula Jila A, kaha keshi kutachikiza ukalu wenyiko. Ise keshi kumwivwililako, kaha nawa keshi jila yakalemesako. (Wavaka-Efwesu 6:2) Jila kana keshi yamwazako.
Ngana muze muhita jila yeka nge yize wasakanga kuhita vanayijiki, mukiko unahase kuwana jila yeka yakuhanjikilamo navisemi jove
Numba tuhu Jila B yayashi oloze nayikiko keshi yamwazako. Mwomwo ika? Mwomwo hakusaka ukalu ukume, Leah atela kulweza ise. Echi chikiko nachilingisa ise atachikize ukalu ali nawo. Shikaho kuhola kacheshi kukumisa ukaluko.
Jila C yamwaza, mwomwo Leah keshi kulitwamina kushimutwila naiseko. Mwashimutwila naise ukalu wenyi halwola lwamwaza. Kaha nge mwasonekela ise mukanda, kaha mwasuuluka hahaze vene.
Kusoneka mukanda nachimukafwa nawa asoneke vyuma vyosena vili kumuchima wenyi. Omu ise mwatanga uze mukanda, mwatachikiza vyuma asakanga kumulweza mwanenyi, echi nachimukafwa kutachikiza ukalu anakumona mwanenyi. Ngocho, Jila C nayikafwa Leah naise. Numba ahanjika nenyi halwola lweka, chipwe kumusonekela mukanda, kusakula jila kaneyi nachisolola nge mutu nakavangiza mazu amuMbimbiliya akwamba ngwavo, “tukavangizenunga vyuma vyakuneha kuunda.”—Wavaka-Loma 14:19.
Jijila jeka muka nahase kusakula Leah?
Shinganyekako jila yimwe. Kaha shinganyeka vyuma navifumaho hakusakula jila kana.
LUMBUNUNA KANAWA VYUMA UNAKUSAKA
Tachikiza ngwove visemi jove vanahase kwivwila mujila yeka vyuma muhanjika.
CHAKUTALILAHO:
Visemi jove vanahase kukuhulisa ovyo unahombela. Kahove muvakumbulula ngwove, “Kangweshi nakusaka kumilwezavyoko.”
Visemi jove vanahase kukukulula ngwavo, ‘kaweshi nakusaka kuvalwezavyoko mwomwo kawavafwelelako, oloze unakusaka kuvilweza masepa jove.’
Achishinganyeke uli naukalu umwe, kaha visemi jove vanakusaka kukukafwa. Nge mwamba ngwove, “Ukalu wauchi, nanguukumisa ami lyavene.”
-
Visemi jove vanahase kukukulula ngachilihi?
-
Jila muka yamwaza unahase kuvakumbulwilamo?
