Chakutalilaho: Karen ali hamwe navakwavo nakulihizumuna. Omu munahichi kapyapya kakandende, himwevwa sepa lyenyi kunyima mwamwamba ngwenyi:

Omu Karen mwatala kunyima, mwamona sepa lyenyi Jessica nakwate mitumwa yivali yawala yakusokolola lyehi. Kaha Jessica mwahana Karen mutumwa umwe nakwamba ngwenyi, “Unakolo sepa, huvilako tuwala mangana tulihizumune kanawa.”

Karen mwasaka kukana, oloze keshi nakusaka kwivwisa sepa lyenyi sonyi nakumumona nge kazanga kulihizumunako. Karen amona Jessica kupwa sepa lyenyi wambwende. Karen mwahanjika mumuchima wenyi ngwenyi, kachi nge Jessica anakunwa, kahanyi kunwa wala chili tuhu kanawa. Mwakukulula jino ngwenyi, ‘Wala wapwa kulya, kawapwa nge lyambako.’

Nge yove wapwanga Karen, kachi unalingi ngachilihi?

Hakusaka mangana usakule kanawa vyakulinga, watela kutachikiza kanawa omu wapwa ove livene. Echi chalumbununa nge watela kupwa nachivezu chize nachikwanukisanga vyuma vyamwenemwene watela kulinga, mangana usakulenga kanawa vyakulinga muchishishisa chakwechelela vakwenu vakusakwilenga vyakulinga.—Wavaka-Kolinde 1, 9:26, 27.

Uno unahase kulinga ngachilihi ngocho? Kumbulula vihula vinakavangizaho mangana vikukafwe.

Nge nautachikiza omu wapwa, kaha naulifwelela chikuma.

CHAKUTALILAHO CHAMUMBIMBILIYA: Kaposetolo Paulu asonekele ngwenyi: “Numba tuhu kangweshi nauhashi wakuhanjikako, olozenyi ngukwechi chinyingi.” (Wavaka-Kolinde 2, 11:6) Paulu omikile muvyeseko mwomwo atachikijile chikuma Visoneka. Ketavishile vatu vaze vahanjikilenga vyavipi vamuhombese nakumuzeyesako.—Wavaka-Kolinde 2, 10:10; 11:5.

LIKEKESE OVE LIVENE: Soneka mwishi milimo watachikiza kanawa.

Lumbununa vilinga vyamwaza watwama navyo. (Chakutalilaho, kutala wazakama vatu tahi? wapwa umuka-kuhana tahi? vatu vakufwelela tahi? kutala wazata vyuma mulwola tahi?)

Nge nauhaka chikuma muchima kututenga twove, kaha natukufungulula nakukuzeyesa.

CHAKUTALILAHO CHAMUMBIMBILIYA: Paulu ejivile tutenga twenyi, kaha asonekele ngwenyi: “Ami ngweji kwivwilanga kuwaha chikupu jishimbi jaKalunga kweseka namutu wami wamutulo, oloze ngunamono lushimbi lweka mumujimba wami luze luli nakulwa nalushimbi elu lwamuvishinganyeka vyami nakungutwalanga muufunge walushimbi lwashili.”—Wavaka-Loma 7:22, 23.

LIKEKESE OVE LIVENE: Katenga muka watwama nako kaze uli nakufwila kufungulula?

Kutala unahase kunyina mumunyau nakulweza nyamutekenya akujingulwise mapapa kakavulu hachihela chimwe palanga nomu maji nawakuma mumunyau tahi? Nduma, kacheshi kupwa chamangana kulinga ngochoko, mwomwo nawenyeka jimbongo.

Vyuma muka naulinangula kuchakutalilaho kana? Nge unasakula vyuma vyakulinga, kaha vakwenu kaveshi kuhasa kukuhungumwisako mwomwo unatachikiza vyuma watela kulinga mukuyoya chove.

CHAKUTALILAHO CHAMUMBIMBILIYA: Paulu asonekele ngwenyi: “Ami kangweshi nakulaha chakuzeneka kutachikiza okwo nguli nakuyako.” (Wavaka-Kolinde 1, 9:26) Ketavilile vyuma vyamukuyoya vimuhungumwiseko, oloze asakwile vyuma vyakulinga nakuyoya kweseka navyuma kana.—Wavaka-Fwilipi 3:12-14.

LIKEKESE OVE LIVENE: Soneka vyuma vitatu unakufwila kutesamo mwaka nawizaho.

Nge kawejivile vyuma wafwelelako, kaha mupwa uchipumbu-mwitavila. Nawitavila kala vyuma navakulweza vakwenu, ngana muze chongono eji kwalumukanga ulombo kweseka noho ali. Echi nachisolola nge kawatachikiza omu wapwako.

Oloze nge mulinga vyuma kweseka nomu wafwelela, kaha kaweshi kwalumukako chamokomoko navyuma navakulweza vakwenu.

CHAKUTALILAHO CHAMUMBIMBILIYA: Omu kapolofweto Ndanyele apwile mukweze “ajinyine mumuchima wenyi” ngwenyi mwononokanga jishimbi jaKalunga numba tuhu apwile kwakusuku natanga yenyi. (Ndanyele 1:8) Ngocho Ndanyele alamine mazu enyi, kulumbununa nge akavangijile vyuma afwelelele.

LIKEKESE OVE LIVENE: Vyuma muka wafwelela? Chakutalilaho: Kutala wafwelela muli Kalunga tahi? Nge mukiko, kaha mwomwo ika? Vyuma muka vyakulingisa ufwelele ngwove Kalunga kwatwama?

Kutala wetavila ngwove jishimbi jaKalunga jinahase kukukafwa tahi? Nge mukiko, kaha mwomwo ika?

Kweseka navyuma kanevi, uno musakula kupwa ngana mwalifwo linakupekumuka napeho nyi ngana mwamutondo unazame mumavu uze nauhona kukinduka napeho? Nge mutachikiza kanawa omu wapwa, kaha naupwa ngana mwamutondo wakuzama. Echi nachikukafwa ukumbulule chihula chino chakwamba ngwavo, Ngwapwa Ngachilihi?