Mukanda waVisoneka Vize Navikafwa Vaka-Kulishitu naumikafwa muwane jivesi jamuMbimbiliya namijimbu yatwamamo yize nayimikafwa mulipike naukalu muli nakumona. Naumikafwa nawa muwane mijimbu yamuMbimbiliya yakutamo yize nayikolezeza vakwenu nakuvakafwa vasakule kanawa vyakulinga vize navineha kavumbi hali Yehova. Sakulenu chihande muli nakusaka. Chihande hichihande chili navihula vize navimikafwa namijimbu yamuMbimbiliya yize vanalumbununa kanawa mukavatu. (Talenu lipwata lyakwamba ngwavo “ Mwakuwanyina Vyuma Vili muMukanda Uno.”) Namuwanamo visoneka vyakumihuhumuna nakumitwaminyina mukuyoya chenu nakumivendejeka. Namuwanamo cheka vishina vize munahase kuzachisa mangana mukafwe vakwenu nakuvakolezeza.

Chihande hichihande chili muno mumukanda chikwechi visoneka vyavivulu, oloze mukanda uno kawavulukile visoneka vyosena kutalisa kuchihande hichihandeko. Chipwe ngocho, unapu himukanda wamwaza uze naumikafwa kuhehwojola. (Vis 2:​1-6) Hakusaka mulinangule vyakujiminyina, zachisenu vyuma vanenyikilako navishina vyakulinangula vyamuMbimbiliya yaVisoneka vyaKaye Kakahya yaChingeleshi. Zachisenu Chinoma Chakukafwa Vinjiho jaYehova Kuhehwojola chipwe mukanda waWatch Tower Publications Index mangana mulinangule vyavivulu kutalisa kuulumbunwiso wavisoneka, chipwe kutalisa kujila munahase kuzachishilamo visoneka kana mukuyoya chenu. Kekesenu mumone vyuma vanalovola kalinwomu mangana mumone chikupu ngwenu munatachikiza muchano wauhya wamuVisoneka.

Shikaho tunafwelela ngwetu mukanda waVisoneka Vize Navikafwa Vaka-Kulishitu naumikafwa muwane mangana, nachinyingi, nakunangakana chamuVisoneka Vyajila. Omu namuzachisa mukanda uno, namukunyuka chikupu ngwenu “mazu aKalunga apwa amatonyi, kaha atwama nangolo.”—Hep 4:12.