1, 2. (a) Mwomwo ika chinahase kutukaluhwila kushinganyeka ngwetu nakukapwa Palachise chikupu? (b) Vyuma muka navitukafwa tufwelele chikuma jishiko jaKalunga?

ACHISHINGANYEKENU ndumbwetu wakushishika neza kukukunguluka. Nazeye mwomwo nafuminyina kumilimo, kuze mukulwane wenyi apwanga nakumushinyinyika azate lika. Nalizakamina nawa mwakulamina tanga yenyi napuwenyi uze anakuviza. Oloze omu mwevwa mwaso wakuputuka kukunguluka, mwevwa nakumuchima hwo, nawahilila kupwa haZuvo yaWangana hamwe navandumbwenyi. Mwaso kana uli nakuhanjika omu nachikapwa chiyoyelo muPalachise, nakumulweza ashinganyeke ali nakutwama muPalachise. Mwaso kana auzanga chikuma, ngocho omu anakwimba hamwe natanga yenyi naumuvendejeka.

² Uno nayenu mwevwaho lyehi ngocho nyi? Etu vavavulu twevwaho lyehi ngocho. Kuhanjika muchano, chiyoyelo mukaye kano chinakaluhwa chikuma, ngocho chinahase kutukaluhwila kushinganyeka ngwetu nakukapwa Palachise chikupu. Tuli nakuyoyela ‘mulwola lwalukalu,’ mukaye kano kanazale naukalu. (Chimo. 2, 3:1) Vyuma muka navitukafwa twinjikize ngwetu vyuma twatalilila navikatesamo? Uno twejiva ngachilihi ngwetu kalinwomu Wangana waKalunga uyule vatu vosena hano hamavu? Tushimutwilenu upolofweto umwe uze Yehova alwezele vatu jenyi uze wateselemo kushikulu. Kufumaho natumona omu upolofweto kana naweka unakutesamo makumbi ano. Chamakumishilo natushimutwila omu naukatesamo kulutwe.

3. Lushiko muka lwavendejekelenga vaYuleya vaze vapwile muufunge muMbavilone?

³ Achishinganyenu chiyoyelo vapwile nacho vaYuleya omu vapwile muufunge muMbavilone mu 500 B.C.E. Vavavulu vakolelele nakusema vana muze muufunge, kaha chiyoyelo chakaluhwile. Vaka-Mbavilone vavatolekelenga hakufwelela Yehova. (Samu 137:1-3) Oloze hamyaka yosena yize yahichilemo, vaYuleya vakushishika vafwelelele ngwavo, Yehova ashikile ngwenyi mwakakungulula vatu jenyi nakuvakindulwisa kwimbo lyavo. Yehova avafwelelesele ngwenyi navakalivwisa  kuwaha kuyoya omu navakakinduluka mulifuchi lyaYuta. Afwanyishile lifuchi kana kumilemba yaEtene yize yapwilenga palachise. (Tangenu Isaya 51:3.) Jishiko kaneji javendejekele vatu jaKalunga nakuvajikijisa vahone kulizakamina nakuhomba. Mujila muka? Achitalenu haupolofweto ou.

4. Vyuma muka Yehova afwelelesele vaYuleya omu navakakinduluka kwimbo lyavo?

⁴ Mukingo. Ava vaYuleya vapwile muufunge kavakindulukile mulifuchi lize lyapwile nge palachiseko, oloze vakindulukile mulifuchi lize lyasalile ngundu hamyaka 70, kaha vavavulu lyapwile lyaungeji. Kushikulu visuma vakufwana nge vandumba, natungunge, navisupa vavulile chikuma. Shikaho malunga vamwe pamo valihulishilenga ngwavo, ‘Uno nangukahasa ngachilihi kukinga puwami navana vami? Uno nangukakinga ngachilihi mikoko navangombe jami kuvisuma?’ Mutu wosena nahase kulizakamina havyumevi. Jino achishinganyekenu lushiko lwaKalunga vasoneka hali Isaya 11:6-9 nomu lwavendejekele vaYuleya. (Tangenu.) Pundu vene, Yehova afwelelesele ava vatu jenyi vapwile muufunge ngwenyi navakapwa vakukingiwa hamwe kaha navimuna javo. Vandumba navakalyanga mwila, kulumbununa nge kaveshi kukalya vimuna javaYuleyako. Ava vatu vakushishika kaveshi kukevwa woma visuma kanako. Yehova ashikile ngwenyi mwakakinga vatu jenyi omu navakakinduluka kulifuchi lyavo lyaYuta, numba mupambo chipwe muchipapa.—Ezeke. 34:25.

5. Upolofweto muka wakafwile vaYuleya vafwelele ngwavo Yehova mwakavazakama omu navakakinduluka kulifuchi lyavo?

⁵ Vyuma vyakulisala. Vatu pamo valizakaminyine havyuma vyeka nawa. Pamo valihulishilenga ngwavo: ‘Nangukahasa kulisa tanga yami omu natukakinduluka tahi? Uno natukatwama kulihi? Natukazatanga milimo muka? Uno milimo kana nayikalihandununa nayeyi tunakuzata muno muundungo nyi?’ Yehova akumbulwile vihula kana muupolofweto wenyi. Ashikile vatu jenyi vakwononoka ngwenyi mwakanokesa vula, ngocho mavu nawakalovola vyakulya ‘vyavivulu vyamaji.’ (Isa. 30:23) Avafwelelesele vyajizuvo namilimo ngwenyi: “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo mangana veka vakatwamengamoko, kaveshi kukalima mangana veka vakalyenga vyuma vanalimiko.” (Isa. 65:21, 22) Enga, navakatwama kanawa kuhambakana muze vatwaminenga muufunge muMbavilone. Nyi ngachilihi vyaukalu wavo waunene uze wavalingishile vavatwale muufunge?

6. Vatu jaKalunga vavijile musongo muka kushipilitu, kaha avafwelelesele ika omu navakakinduluka?

⁶ Kulikangula kushipilitu. Shimbu kanda vavakwate ufunge, vatu jaKalunga vapwile nakuviza kushipilitu. Yehova ahanjikile hali vatu jenyi kuhichila muli kapolofweto Isaya ngwenyi: “Mutwe wosena uli nakuviza, muchima wosena uli namusongo.” (Isa. 1:5) Vapwile tupuputa kushipilitu, kaha nawa tujika matwitwi, mwomwo kavasakile kwivwilila kuvyuma  avahuhumwinenga Yehova chipwe kumona vyuma avasolwelelengako. (Isa. 6:10; Yele. 5:21; Ezeke. 12:2) Kachi nge vaze vakindulukile navakiko vapwile naukalu woumwe, kaha kachi Yehova kavakingileko, chipwe kuvevwila uselewa. Oloze Yehova avafwelelesele ngwenyi: “Halikumbi lize, tujika matwitwi navakevwa mazu amumukanda, kaha meso atupuputa nawakamona mumilima.” (Isa. 29:18) Enga, Yehova ashikile ngwenyi mwakoka vatu jenyi vapihilile nakwalumuka. Avashikile kuvatwaminyina nakuvanangula chikalu kaha kuvanononoka.

7. Jishiko jaKalunga ashikile vatu jenyi jateselemo ngachilihi, kahechi nachitukafwa ngachilihi?

⁷ Uno Yehova ateselemo jishiko jenyi tahi? Vyuma vyasolokele vyasolola nge ateselemo chikupu. VaYuleya vaze vakindulukile kwimbo lyavo vatwaminenga mukuunda, vapwile navyuma vyakulisala, kaha nawa valikangwile kushipilitu. Chakutalilaho, Yehova avakingile kuvatu vavavulu vangolo vaze vavajingilikile. Visuma nawa kavalalishile vimuna javoko. Ava vaYuleya vamwene omu wateselemo upolofweto wakuvuluka palachise uze asonekele Isaya, naYelemiya naEzekele. Numba tuhu kawateselemo mwosenako, oloze vyuma vamwene vyavakolezezele. Kushinganyekanga havyuma vize Yehova alingilile vatu jenyi kushikulu cheji kuzamisanga lufwelelo lwetu. Hakuwana nge vatu vawahililile omu wateselemo upolofweto kana, nyi ngachilihi omu naukatesemo cheka kulutwe? Achitalenu vyuma natulingila Yehova makumbi ano.

8. Vatu jaKalunga makumbi ano vanakutwama mulifuchi muka lyakushipilitu?

⁸ Vatu jaYehova kavapwa muyachi umweko chipwe kutwama mulifuchi limweko. Oloze vaka-Kulishitu vawavisa vapwa muyachi wakushipilitu, “Isalele yaKalunga.” (Ngale. 6:16) “Mikoko veka” valinunga hamwe navakiko, kaha veji kulemeselanga hamwe Yehova Kalunga. Vafwila kulinga ngocho mukuyoya chavo chosena. (Yowa. 10:16; Isa. 66:8) Uno lifuchi muka lyakushipilitu atuhana Yehova? Atuhana palachise yakushipilitu. Jishiko jaKalunga jakulingisa mavu kupwa palachise jinakutesamo mupalachise kaneyi yakushipilitu. Tutalenu havyakutalilaho vimwe.

9, 10. (a) Upolofweto wahali Isaya 11:6-9 unakutesamo ngachilihi makumbi ano? (b) Vilinga muka vyamwaza vali navyo vatu jaKalunga oholyapwa?

⁹ Mukingo. Muupolofweto vasoneka hali Isaya 11:6-9, tweji kutanganga omu vatu navimuna javo navakatwamanga mukuunda natunyama vaukenya. Uno upolofweto kana unakutesamo namakumbi ano tahi? Eyo, unakutesamo kushipilitu. Vesi 9 yatulweza ovyo tunyama kana navakahonena kulyana, ngwavo: “Mwomwo hamavu hosena nahakazala nachinyingi chakumutachikiza Yehova nge muze kalungalwiji azala nameya.” Uno “chinyingi chakumutachikiza Yehova” chinahase kwalumuna vilinga vyatunyama nyi? Nduma, vatu vakiko veji kwalumukanga hakutachikiza Kalunga  Wakulitulaho nahakukavangiza jijila jenyi jakuunda. Oholyapwa tuli nakumona omu unakutesamo upolofweto kana mupalachise yakushipilitu. Vaka-kukavangiza Kulishitu vanakumbila utenu navilinga vyaunyama, kaha vanakutwama mukuunda nakulinunga navandumbwavo mwomwo yakuvayula kuWangana.

¹⁰ Chakutalilaho, mumukanda uno tunalinangula omu Visoneka vinakafwe vaka-Kulishitu valihende kukwazana muvihande vyalifuchi nachiyulo nomu vanavayanjisanga hakulinga ngocho. Cheji kutukolezezanga hakumona nge mukaye kaze kanazale navatu vaulyanyi, vatu jaYehova vanakukana kwazana muvilinga vyaulyanyi numba tuhu veji kuvashinyinyikanga. Chapundu vene, vatu vaze vanakuyula kuli Meshiya vanakulivwisa kuwaha kuunda vavuluka muupolofweto waIsaya. Yesu ahanjikile ngwenyi vaka-kumukavangiza navakavatachikijila hazangi yakulizanga navandumbwavo. (Yowa. 13:34, 35) Kulishitu anakuzachisa “ndungo wakushishika wakuzangama” muchikungulwilo chenyi mangana anangule vaka-Kulishitu vamuchano vosena vapwenga namuchima wauvwovu, wakuunda nazangi.—Mateu 24:45-47.

11, 12. Zala muka yili mukaye makumbi ano, kaha Yehova anakulisa ngachilihi vatu jenyi?

¹¹ Vyuma vyakulisala. Kaye kali muzala yakushipilitu. Mbimbiliya yatulweza ngwayo: “Mwata Wakulitulaho Yehova  nambe ngwenyi, ‘Talenu! Makumbi ali nakwiza omu nangukaneha zala yakalombolombo mulifuchi, kangweshi kukaneha zala yavyakulyako, chipwe lipwila lyameyako, oloze nangukaneha zala nalipwila lyamazu aYehova.’” (Amo. 8:11) Uno vatu vayula kuWangana waKalunga navakiko vanakufwa zala tahi? Yehova ahanjikile vyuma navikasoloka kuvatu jenyi nakuli vaka-kole jenyi, ngwenyi: “Vangamba jami navakalyanga, oloze enu namukafwanga zala. Talenu! Vangamba jami navakanwanga, oloze enu namukafwanga lipwila. Talenu! Vangamba jami navakawahililanga, oloze enu namukevwanga sonyi.” (Isa. 65:13) Uno munakumona omu mazu kana anakutesamo tahi?

¹² Makumbi ano vanakwijiva kutuhingunwina vyakulya vyakushipilitu. Mukaye kano kazala yakushipilitu, vali nakutuhana vyakulya vyakushipilitu kuhichila mumikanda, jivindiyo, kukunguluka chachikungulwilo nachangalila navihande vyeka vinakupwanga hakeyala yetu ya jw.org. (Ezeke. 47:1-12; Yowe. 3:18) Kutala kamweshi nakwivwa kuwaha omu unakutesamo upolofweto waYehova wakutuhana vyakulya vyavivulu vyakushipilitu tahi? Uno munakulyanga vyakulya kana lwola lwosena tahi?

13. Uno munamono ngachilihi kutesamo chajishiko jaYehova jakutonesa meso atupuputa nakujikula matwitwi atujika matwitwi?

¹³ Kulikangula kushipilitu. Upuputa naumama wakushipilitu unalisale makumbi ano. (Koli. 2, 4:4) Oloze Kulishitu ali nakuka misongo kaneyi mukaye kosena. Uno munakumona omu vatu vanakuvatonesa meso tahi? Kutala munamononga vatu navalinangula muchano wamwenemwene waYehova, nakuseza kunangula chamakuli chize chavalingishile vapwenga tupuputa kushipilitu tahi? Nge mukiko kaha munamono kutesamo chaupolofweto wakwamba ngwavo: “Halikumbi lize, tujika matwitwi navakevwa mazu amumukanda, kaha meso atupuputa nawakamona mumilima.” (Isa. 29:18) Mwaka himwaka, mayevuyevu avatu vali nakuvoka upuputa wakushipilitu. Vatu vaze vanakuseza Mbavilone Yayinene nakwiza nakulinunga hamwe nayetu mupalachise yakushipilitu vanakusolola hatoma nge jishiko jaYehova jinakutesamo.

14. Vyuma muka twatela kushinganyekaho vize navizamisa lufwelelo lwetu?

¹⁴ Kapetulu hikapetulu mumukanda uno nasolola hatoma nge Kulishitu nanehe vaka-kumukavangiza mupalachise yakushipilitu mumakumbi ano akukuminyina. Shikaho, tutwalenuho lika kushinganyeka havyuma vyavivulu anakutulingila Yehova mupalachise kaneyi yakushipilitu. Nge natulinga ngocho, kaha natufwelela chikuma mujishiko jaYehova jize najikatesamo kulutwe.

15. Mwomwo ika twafwelela ngwetu ano mavu nawakapwa palachise?

¹⁵ Yehova afwila kukalingisa kaye kosena kakapwe palachise. Omu atengele Alama naEve, avahakile mulitepa  lyapalachise nakuvakisula vaseme nakuzalisa hamavu nakulama vyuma vyatwamaho. (Kupu. 1:28) Oloze Alama naEve valondezezele Satana nakulikanga kuli Yehova, kahechi chinalingisa vatu vosena vahone kukupuka, nakuswana shili nakufwa. Chipwe ngocho vyuma ajina Kalunga kavyalumukileko. Nge Yehova nahanjika mazu kuvanga atesemo. (Tangenu Isaya 55:10, 11.) Ngocho twatela kufwelela ngwetu vana vaAlama naEve navakazalisa hano hamavu nakuwalama, nakuzakama vyuma atenga Yehova mupalachise. Halwola kana, upolofweto wakuvuluka palachise uze valwezele vaYuleya vapwile muufunge naukatesamo mujila yakulipwila. Achitalenu vyakutalilaho vino.

16. Mbimbiliya yahanjika vyuma muka hamukingo naukapwa muPalachise?

¹⁶ Mukingo. Kulutwe mazu vasoneka hali Isaya 11:6-9 nawakatesamo chikupu. Malunga, mapwevo, navanyike navakatwama mukuunda nakupwa vakukingiwa kweshokwo navakaya. Kakweshi kukapwa kanyama chipwe mutu mwakaneha pondeko. Achishinganyekenu kuwaha namukevwa omu namukamona kano kaye kosena kanapu palachise. Namukahemenanga mutulwiji, namutulungalwiji, namumisenge, nakujipili chakuhona kwivwa woma. Kamweshi kukevwa woma naufukuko. Mazu ahali Ezekele 34:25 nawakatesamo, kaha vatu jaKalunga navakatwamanga “mupambo nakusavala muchipapa mukuunda.”

17. Mwomwo ika tunafwelela ngwetu Yehova mwakatuhana vyuma vyakulisala omu Wangana wenyi naukayula hamavu hosena?

¹⁷ Vyuma vyakulisala. Achishinganyekenu muli nakutwama mukaye kakuzeneka uhutu, nazala, najijita. Kulya chakushipilitu chakulisala chize vanakutambula vatu jaKalunga makumbi ano hiunjiho wakusolola nge kulutwe Mwangana Meshiya mwakahana vatu jenyi vyuma vyosena vasaka. Omu Yesu apwile hano hamavu, asolwele vyuma vize mwakalinga kulutwe hakulisa vatu vavavulu najimbolo jajindende navayishi. (Mateu 14:17, 18; 15:34-36; Mako 8:19, 20) Omu Wangana waKalunga naukayula hamavu hosena, upolofweto wakufwana nge ou naukatesamo: “Mwakanokesa vula hambuto munatumbu, kaha vyakulya vize navikafuma mumavu navikavula, navikapwanga vyamaji. Halikumbi lize, vimuna jenu navakalila kumaulilo amanene.”—Isa. 30:23.

18, 19. (a) Upolofweto vasoneka hali Isaya 65:20-22 walumbununa ika? (b) Mujila muka makumbi etu nawakapwila “nge makumbi amutondo”?

¹⁸ Vatu vavavulu makumbi ano kaveshi najizuvo jamwazako, kaha nawa kaveshi nakuzata milimo yakuvasuulwisako. Mukaye kano kanazale navilinga vyavipi, vatu vavavulu vali nakuzata chikuma oloze nevi vanakuwana vyambwende vyakulikafwa najitanga javo vyauchi. Vaka-luheto vanakupichilako lika, kaha vaka-kuhutwa vanakuhutwilako lika. Achishinganyekenu kuwaha namukevwa omu naukatesamo upolofweto wakwamba ngwavo: “Navakatunga jizuvo javo, kaha navakatwamangamo, navakalimanga mande amivinyo, kaha navakalyanga mihako yayo. Kaveshi kukatunga jizuvo javo  mangana veka vakatwamengamoko, kaveshi kukalima mangana veka vakalyenga vyuma vanalimiko. Mwomwo makumbi avatu jami nawakavula nge makumbi amutondo, vaze ngwasakula navakalivwisanga kuwaha milimo yamavoko avo.”—Isa. 65:20-22.

¹⁹ Uno mazu akwamba ngwavo makumbi etu nawakapwa “nge makumbi amutondo” alumbununa ika? Nge munemana mumutondo waunene, kutala mweji kushinganyekanga myaka unatwame mutondo kana tahi? Mitondo yimwe yinatwame myaka namyaka. Yeka nayipwako lika, enu namufwa nakuyiseza. Yehova atushika ngwenyi muPalachise yinakwiza natukayoya myaka yayivulu kuhambakana namutondo. (Samu 37:11, 29) Mupalachise natukamonanga mitondo nayisoka nakutwama myaka yayivulu nakufwa, oloze etu hanga chituyoya myaka namyaka.

20. Vyuma muka natukalivwisa kuwaha omu navakatuyula kuWangana?

²⁰ Kulikangula chamwenemwene. Makumbi ano tunakulipika namisongo nakufwa. Tuvosena tuvaveji, twaviza musongo vavuluka ngwavo shili. Vitumbo vyakutuka shina ndando yakusokola yaKulishitu. (Loma 3:23; 6:23) Muchiyulo chaKulishitu chamyaka likombakaji, Yesu navaze mwakayula navo navakazachisa ndando yakusokola nakukafumisa shili havatu chikoki chikoki. Upolofweto waIsaya naukatesamo wakwamba ngwavo: “Mulifuchi lize kamweshi kukapwa mutu mwakamba ngwenyi: ‘Nguli nakukola.’ Mwomwo vatu vaze navakatwamangamo navakavakonekela jishili javo.” (Isa. 33:24) Achishinganyekenu kuwaha natukevwa omu kakweshi kukapwa tupuputa, natujika matwitwi navitonji. (Tangenu Isaya 35:5, 6.) Yesu mwakoka misongo yosena yakumujimba nayakuwongo. Vatu navakayula kuWangana navakalikangula.

21. Vyuma muka navikasoloka kukufwa, kaha lushiko kana lweji kumivendejekanga ngachilihi?

²¹ Nyi ngachilihi kufwa chize cheza mwomwo yashili? Kufwa chize chapwa “muka-kole wakukuminyina,” chize chinakuyanjisa vatu vosena kacheshi kukapwako chekako. (Koli. 1, 15:26) Uno Yehova nayikiye amona kufwa kupwa muka-kole tahi? Talenu vyuma ahanjikile Isaya ngwenyi: “Mwata Wakulitulaho Yehova mwakamina kufwa haya myaka yosena, mwakahunda masoji kumeso avatu vosena.” (Isa. 25:8) Achishinganyekenu havyumevi. Kakweshi kukapwa vipeji, chipwe mafuka, chipwe kulila, chipwe kulishonako. Oloze natukasotola masoji akuwahilila omu Yehova mwakatesamo lushiko lwenyi lwakusangula vafu. (Tangenu Isaya 26:19.) Kukola naushona tunakwivwanga nge tunafwisa nachikakuma.

22. Vyuma muka navikasoloka omu Mwangana Meshiya mwakamanyisa kulinga mwaya muchima waKalunga hano hamavu?

²² Kumakumishilo amyaka likombakaji, Wangana naukatesamo vyuma vyosena ajina Kalunga kulinga hano hamavu, kaha Kulishitu mwakakindulwisa chiyulo kuli Ise. (Koli. 1, 15:25-28) Halwola kana, vatu navakakupuka mwosena kaha navakalizanga kuveseka chamakumishilo omu Satana navakamufumisa muze muwina. Kufumaho, Kulishitu mwakachika  ou linoka wakushikulu navaka-kumukundwiza vosena. (Kupu. 3:15; Kuso. 20:3, 7-10) Oloze vosena vaze navakashishika kuli Yehova navakatwama haya myaka yosena. Mbimbiliya kaha yikiko yalumbununa kanawa vyuma natukalivwisa kuwaha halwola kana. Yatushika ngwayo vatu vakushishika navakengila “mukulihehwa chaupahu chavana vaKalunga.”—Loma 8:21.

23, 24. (a) Mwomwo ika twafwelela ngwetu jishiko jaKalunga najikatesamo? (b) Vyuma muka munakufwila kulinga?

²³ Jishiko jaYehova kajapwa nge vilotako, oloze najikatesamo chikupu. Mwomwo ika? Anukenu mazu aYesu aze twashimutwilile mukapetulu wakulivanga. Alwezele vaka-kumukavangiza valombenga Yehova ngwavo: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:9, 10) Wangana waKalunga kawapwa nge chilotako, oloze kuwatwama. Oholyapwa unakuyula mwilu. Hamyaka 100 yinahichimo, tunalimwena nameso kapu omu unatesangamo jishiko jaYehova muchikungulwilo chavaka-Kulishitu. Ngocho tunafwelela ngwetu jishiko jaYehova josena najikatesamo omu Wangana waKalunga naukayula hamavu hosena.

²⁴ Twatachikiza ngwetu Wangana waKalunga naukeza. Twafwelela ngwetu jishiko jaYehova josena najikatesamo. Mwomwo ika? Mwomwo WANGANA WAKALUNGA UNAKUYULA. Tuvosena twatela kulihulisa ngwetu, ‘Uno Wangana uli nakunguyula tahi?’ Tuvosena tukilikitenu oholyapwa mangana tupwenga lika vakushishika, numbanyi tukalivwise kuwaha kuyoya hakutuyula kuWangana kanou haya myaka yosena namijimba yakukupuka.