1, 2. (a) Unjiho muka wasolola nge Mwangana wetu napunga nakuyula kufuma vene mu 1914? (b) Vyuma muka natushimutwila mukapetulu uno?

TUNALIVWISA kuwaha kulinangula vyuma unatesamo Wangana waKalunga muli vaka-kole jawo. (Samu 110:2) Mwangana wetu natongola vatu vavavulu kupwa vaka-kwambulula. Natomesa vaka-kumukavangiza kushipilitu nakuvakafwa vapwenga navilinga vyamwaza. Numba tuhu vaka-kole jaWangana vanafwilanga kutuhandununa, oloze twalinunga mukaye kosena. Evi vyuma unatesamo Wangana navyeka vyavivulu tunashimutwila vinakusolola hatoma nge Mwangana wetu napunga nakuyula muli vaka-kole jaWangana kufuma vene mu 1914.

² Kalinwomu ou Wangana ulinge vyuma vyeka vyakukomwesa. ‘Nawiza’ ‘nakuchika’ vaka-kole jawo ‘nakuvanongesa’ ndolokoto. (Mateu 6:10; Ndanye. 2:44) Oloze shimbu kanda lwola kanelu luhete, kuli vyuma vyeka vyakulipwila navisoloka. Vyuma muka vene ovyo? Kwatwama upolofweto wauvulu muMbimbiliya uze wakumbulula chihula kana. Tukekesenu upolofweto kana mangana tutachikize vyuma navikasoloka kulutwe.

3. Chuma muka chatete tuli nakuvandamina chisoloke?

³ Kuvilika kuunda. Mumukanda asonekelele vaka-Tesolonyika, kaposetolo Paulu avulukile chuma chatete tunakuvandamina chisoloke. (Tangenu Wavaka-Tesolonyika 1, 5:2, 3.) Mumukanda kana, Paulu avulukile “likumbi lyaYehova,” lize nalikaputuka hakunyemukila “Mbavilone Yayinene.” (Kuso. 17:5) Oloze shimbu kanda likumbi lyaYehova liputuke, vaka-mafuchi navakamba ngwavo, “Kuunda namukingo.” Awa mazu vanahase kukawahanjika kamwe chipwe mapapa kakavulu. Uno navatwamina vamukwitava navakazanamo nyi? Hakuwana nge vapwa muli vaka-kaye, navakiko navakalifutula navaka-mafuchi nakwamba ngwavo, “Kuli kuunda!” (Yele. 6:14; 23:16, 17; Kuso. 17:1, 2) Echi kuvilika kuunda namukingo nachikapwa hichinjikizo chakusolola nge likumbi  lyaYehova kalinwomu liputuke. Vaka-kole jaWangana waKalunga “kaveshi kukachinako.”

4. Kutachikiza omu walumbunukila upolofweto waPaulu wakuvilika kuunda namukingo nachitunganyalisa ngachilihi?

⁴ Kutachikiza omu walumbunukila ou upolofweto nachitunganyalisa ngachilihi? Paulu ambile ngwenyi: “Enu kamweshi mumilima numba likumbi lize likamikasumune nge omu nalikasumuna vejiko.” (Teso. 1, 5:3, 4) Etu tunejiva mwalumbunukila vyuma vinakusoloka oholyapwa, keshi nge vaka-kaye ava vali nakwijiva kupulyangila mumilimako. Ou upolofweto wakuvilika kuunda namukingo naukatesamo ngachilihi? Tuvandaminenu tumone vyuma navisoloka mukaye. Shikaho, “tutonenunga nakulama uhashi wetu wakushinganyeka kanawa.”—Teso. 1, 5:6; Zefwa. 3:8.

5. Chuma muka nachikasoloka chize nachikapwa maputukilo ‘aluyando lwalunene’?

⁵ Kunyemukila mauka akwitava. Anukenu ngwenu Paulu asonekele ngwenyi: “Heshoho navambila ngwavo, ‘Kuunda namukingo,’ kaha kunongesa chakuvakasumuna hinachivawana hahaze vene.” Nganomu muveso namukalateta vyeji kulikavasananga, ngocho naluvila lwakwamba ngwavo “Kuunda namukingo” nalukalikavasana ‘nakunongesa chakukasumuna.’ Uno vyuma muka navakanongesa? Chatete, navakanongesa “Mbavilone Yayinene” yize vavuluka nawa ngwavo “pwevo muka-ujila,” uze emanyinako mauka akwitava chamakuli amukaye kosena. (Kuso. 17:5, 6, 15) Echi kunongesa Kulishitendomu namauka eka akwitava chamakuli chikiko nachikapwa maputukilo ‘aluyando lwalunene.’ (Mateu 24:21; Teso. 2, 2:8) Vavavulu navakalikomokela omu navikasoloka vyumevi. Mwomwo ika? Mwomwo nahalwola kana, ou pwevo muka-ujila mwakalimona nge “mwangana” uze keshi ‘kukayanjiwa nakulishonako.’ Oloze mwakatachikiza ngwenyi alimbenjele kushinganyeka ngocho. Navakamufumisako washi kwijiva nge “halikumbi limwe kaha.”—Kuso. 18:7, 8.

6. Iya mwakanyemukila “Mbavilone Yayinene”?

⁶ Iya mwakanyemukila “Mbavilone Yayinene”? Weka wauchi shina ‘chisuma wajimbinga 10.’ Mukanda waKusoloka wasolola nge ou chisuma emanyinako liuka lyaUnited Nations (UN). Jimbinga 10 jemanyinako mauka amapolitiki osena aze anakukundwiza ou “chisuma uchila.” (Kuso. 17:3, 5, 11, 12) Uno navakayinongesa ngachilihi? Mafuchi atwama muliuka lyaUN nawakatambula luheto lwayou pwevo muka-ujila, nakumulya, ‘nakumwocha nakakahya.’—Tangenu Kusoloka 17:16. *

7. Uno mazu aYesu ahali Mateu 24:21, 22 ateselemo ngachilihi mulikulukaji lyamyaka lyakulivanga, kaha nawakatesamo ngachilihi kulutwe?

⁷ Makumbi kana navakawakehesa. Mwangana wetu asolola vyuma navikasoloka halwola kanelu lwaluyando lwalunene. Yesu ambile ngwenyi: “Mwomwo yavaze vasakula, aze makumbi navakawakehesa.” (Tangenu Mateu 24:21, 22.) Awa mazu aYesu ateselemo chatete mu 66 C.E. omu Yehova alingishile maswalale javaLoma valitwamine kunyemukila  Yelusalema hatando yayindende. (Mako 13:20) Echi chakafwile vaka-Kulishitu muYelusalema namuYuleya vayovoke. Uno vyuma muka navikasoloka haluyando lwalunene luli nakwiza? Yehova mwakazachisa Mwangana wetu ‘akakehese makumbi’ aze liuka lyaUnited Nations nalikanyemukila mauka akwitava, kuchina kwitava chamuchano navakachinongesela kumwe nakwitava chamakuli. Ngocho omu navakanongesa mauka akwitava osena, nakukasala liuka limwe kaha lyakwitava chamuchano. (Samu 96:5) Tushimutwilenu jino vyuma navikakavangizaho shimbu kanda luyando lwalunene lukume.

8, 9. Vyuma muka navikasoloka vize ahanjikile Yesu, kaha vatu navakalinga ngachilihi hakumona vyuma kana?

⁸ Upolofweto waYesu wakuvuluka makumbi akukuminyina wasolola nge nakukapwa vyuma vyavivulu navikasoloka shimbu kanda jita yaAlamangetone. Vyuma vivali vyatete natushimutwila vavivuluka muMikanda yaMujimbu Wamwaza yaMateu, naMako, naLuka.—Tangenu Mateu 24:29-31; Mako 13:23-27; Luka 21:25-28.

⁹ Vyuma vyamumelu. Yesu ambile ngwenyi: “Likumbi nalikelava wi, kaha kakweji keshi kukalovola myeji yenyiko, vatanganyika navakahosomoka mwilu.” Halwola kanelu vatu kaveshi kukatala kuli vatwamina vamukwitava mangana vavalweze mwakulingilako. Uno Yesu alumbunwine ngwenyi vyumevi navikalingiwa chikupu nyi? Pamo mukiko. (Isa. 13:9-11; Yowe. 2:1, 30, 31) Uno vatu navakalinga ngachilihi omu navakamona vyumevi? “Navakalyonyinga hakuhona kwijiva mwakulingila.” (Luka 21:25; Zefwa. 1:17) Enga, vaka-kole jaWangana waKalunga, ‘vamyangana navandungo’ vosena “navakalezumuka hakwivwa woma nahakutalilila nawa vyuma vize navikeza,” kaha navakachina. Oloze kaveshi kukawana uchinyino wamwenemwene wakuswama utenu waMwangana wetuko.—Luka 21:26; 23:30; Kuso. 6:15-17.

10. Kusopesa muka mwakasopesa Yesu, kaha vaka-kukundwiza Wangana waKalunga navaze vawimanyina nakole navakavalinga ngachilihi?

¹⁰ Kusopesa. Vaka-kole jaWangana waKalunga vosena navakamona chuma chize nachikavulisa vihuli vyavo. Yesu ambile ngwenyi: “Navakamona Mwanamutu ali nakwiza mumavwi nangolo jajinene naupahu.” (Mako 13:26) Echi chinjikizo changolo nachikasolola chikupu nge Yesu neza nakusopesa. Muupolofweto woumwe wakuvuluka makumbi akukuminyina, Yesu ahanjikile vyuma vyeka vyakusopesa echi nachikapwako halwola kana. Vyuma kana tweji kuviwananga muchishimo chamikoko navapembe. (Tangenu Mateu 25:31-33, 46.) Vaka-kukundwiza Wangana waKalunga vakushishika navakavavuluka ngwavo “mikoko,” kaha ‘navakandula mitwe yavo’ hakutachikiza ngwavo ‘kuyovoka chavo chili nakupandama kwakamwihi.’ (Luka 21:28) Oloze vaze vanakwimanyina Wangana nakole navakavavuluka ngwavo “vapembe,” kaha “navakalyonyinga”  hakutachikiza ngwavo kalinwomu ‘vavateteko haya myaka yosena.’—Mateu 24:30; Kuso. 1:7.

11. Vyuma muka twatela kutachikiza omu natushimutwila vyuma navikasoloka kulutwe?

¹¹ Omu Yesu mwakalinga hanasopesa lyehi “vaka-mafuchi osena,” nakukasoloka vyuma vyeka vyavilemu shimbu kanda jita yaAlamangetone. (Mateu 25:32) Tushimutwilenu vyuma vivali navikasoloka: Ngonge mwakanyemukila vatu jaKalunga, kaha vawavisa navakavakungulula. Omu natushimutwila vyumevi, tachikizenu ngwenu Mazu aKalunga kawalumbununa lwola luvene navikasoloka vyumeviko. Chasoloka nge, shimbu kanda chuma chimwe chikume, chikwavo nachikaputuka.

12. Lwola muka lwamakumishilo luze Satana mwakanyemukila Wangana waKalunga?

¹² Kunyemukila vatu jaKalunga. Ngonge wakuMangonge mwakanyemukila vasalaho vawavisa namikoko veka. (Tangenu Ezekele 38:2, 11.) Elu lukiko lwola lwamakumishilo Satana mwakanyemukila Wangana waKalunga hakuwana nge nanyemukilanga vasalaho vawavisa kufuma vene haze vamuhangile mwilu. (Kuso. 12:7-9, 17) Kufuma vene haze vawavisa vaputukile kuvakungulwila muchikungulwilo chavaka-Kulishitu, Satana nafwilanga kuvenyeka kushipilitu, oloze nahononga. (Mateu 13:30) Halwola kanelu, omu mauka akwitava chamakuli osena navakawafumisako, omu nawa vatu jaKalunga navakapwa nge vatu “vaze vali nakutwama mumembo akuzeneka jikembwe, natupachiso navikolo,” Satana mwakamona ngwenyi hilwola lwamwaza lwakuvanyemukila. Mwakakatula tuvihu twenyi mangana vakalukuke vaka-kukundwiza Wangana.

13. Yehova mwakalwila ngachilihi vatu jenyi?

¹³ Ezekele alumbununa vyuma navikasoloka. Upolofweto wahanjika hali Ngonge ngwawo: “Naukeza kufuma kuchihela chove, kujingalila jakunote jakusongosongo. Naukeza navatu veka naveka vavavulu vaka-kutambukila hatuvalu, liyongomena lyalinene lyavaka-kwasa jita. Naukanyemukila vatu jami.” (Ezeke. 38:15, 16) Uno Yehova mwakalinga ngachilihi? Mbimbiliya ngwayo, Yehova ‘mwakevwa matoto chikuma’ kaha mwakambata ‘poko yamukwale.’ (Ezeke. 38:18, 21; tangenu Zekaliya 2:8.) Yehova mwakalwila vangamba jenyi hano hamavu hakuneha jita yaAlamangetone.

14, 15. Vyuma vyeka muka navikasoloka omu Satana mwakanyemukila vatu jaKalunga kamakumishilo?

¹⁴ Shimbu kanda tushimutwile echi chishina chakulwila vatu jaYehova hajita yaAlamangetone, tuvangilenu kushimutwila chuma chikwavo chakulipwila nachikasoloka. Chuma kana nachikasoloka omu mwakalinga Satana nanyemukila lyehi vatu jaKalunga, oloze shimbu kanda Yehova avalwile hajita yaAlamangetone. Ngana muze twashimutwilanga mupalangalafu 11, echi chuma chikwavo nachikasoloka shina kukungulula vawavisa vaze navakasalaho hamavu.

¹⁵ Kukungulula vawavisa. Mateu naMako vasonekele mazu ahanjikile Yesu hali “vaze vasakula,” kulumbununa  vaka-Kulishitu vawavisa nashipilitu, ngwavo nakukapwa vyuma vimwe navikasoloka shimbu kanda jita yaAlamangetone. (Talenu palangalafu 7.) Yesu hakupwa Mwangana, apolofwetele ngwenyi: “Mwakatuma vangelo jenyi nakukungulwila hamwe vatu jenyi asakula kufuma kumitamba yiwana, kufuma kusongosongo yamavu mbwe nakusongosongo yalilu.” (Mako 13:27; Mateu 24:31) Uno kukungulula muka apwile nakuhanjika Yesu? Kapwile nakuhanjika vyakulamika tutachikijilo twamakumishilo vaka-Kulishitu vawavisa vaze navakasalahoko, mwomwo chuma kana nachikasoloka shimbu kanda luyando lwalunene luputuke. (Kuso. 7:1-3) Oloze Yesu apwile nakuhanjika havyuma vize navikasoloka halwola lwaluyando lwalunene. Shikaho, omu Satana mwakanyemukila vatu jaKalunga kamakumishilo, vawavisa vaze navakapwa hano hamavu navakavakungulula nakuvatwala mwilu.

16. Vawavisa navakazana mumulimo muka hajita yaAlamangetone?

¹⁶ Uno kukungulula vasalaho vawavisa chalikwatasana ngachilihi najita yaAlamangetone? Kukungulula kanechi chasolola nge vawavisa vosena navakapwa mwilu shimbu kanda Kalunga anehe jita yaAlamangetone. Vaze 144,000 navakayula hamwe naKulishitu navakavahana ngolo mangana vakakundwize Yesu omu mwakalwa jita “nambwechi yafwelu” hakunongesa vosena vaze veji kufumbukilanga Wangana waKalunga. (Kuso. 2:26, 27) Kaha vangelo navawavisa navakakavangiza Kulishitu Muka-kwasa jita wangolo omu mwakalukuka “liyongomena lyalinene lyavaka-kwasa jita” lize nalikanyemukila vatu jaYehova. (Ezeke. 38:15) Eyi yikiko nayikapwa jita yaAlamangetone.—Kuso. 16:16.

17. Vyuma muka navikasoloka kuli “vapembe” haAlamangetone?

¹⁷ Kunongesa. Jita yaAlamangetone yikiko nayikakukulula luyando lwalunene. Halwola kana, Yesu mwakazata mulimo weka waunene. Yesu apwa Muka-kusopesa “vaka-mafuchi osena,” kaha mwakapwa nawa Muka-kunongesa vaka-mafuchi, kulumbununa nge mwakanongesa vosena vaze mwakavuluka ngwenyi “vapembe.” (Mateu 25:32, 33) Ou Mwangana wetu ‘mwakajiha vaka-mafuchi napoko yamukwale yayisuku yakuvambuka.’ Vatu vosena vaze vapwa nge vapembe, ‘vamyangana navandungo,’ “navakavatetako haya myaka yosena.”—Kuso. 19:15, 18; Mateu 25:46.

18. (a) Vyuma muka navikasoloka kuli “mikoko”? (b) Yesu mwakakumisa ngachilihi kufungulula chenyi?

¹⁸ Vaze mwakavuluka Yesu ngwenyi “mikoko” navakalikomokela havyuma navikasoloka. Muchishishisa chakuvachika kuli Satana naliyongomena lyenyi ‘lyavapembe,’ “liyongomena lyalinene” ‘lyamikoko’ vaze navakasoloka kupwa nge kaveshi namukingoko, navakayovoka nakufuma “muluyando lwalunene.” (Kuso. 7:9, 14) Kahomu Yesu mwakafungulula nakufumisako vaka-kole jaWangana waKalunga vosena, mwakambila Satana navandemone jenyi muwina wakuzeneka  kukuma. Navakapwa muwina kana hamyaka 1,000, kaha kaveshi kukapwa nangoloko.—Tangenu Kusoloka 6:2; 20:1-3.

19, 20. Natukavangiza ngachilihi mazu ahali Isaya 26:20 na 30:21?

¹⁹ Vyuma muka twatela kulinga mangana tupwenga vakulizanga kuvyuma vyakwivwisa woma vinakwiza kulutwe? Kaposhi Kakutalila umwe ambile ngwenyi: “Kuyovoka chetu nachikapendamina hakwononoka.” Mwomwo ika? Kukumbulula tunahase kuchiwana kumazu aze Yehova ahuhumwine vaYuleya vaze vapwile muundungo muMbavilone. Yehova ahanjikile ngwenyi Mbavilone navakayinongesa. Jino vyuma muka vatelele kulinga vatu jaKalunga mangana vayovoke? Yehova ambile ngwenyi: “Enu vatu jami, yenunga mwingile mutupete twenu, lisokelelenumo. Swamenu hakapyapya kakandende, palanga nomu naukuma utenu.” (Isa. 26:20) Achitalenu mazu vanazachisa muvesi yino: “yenunga,” ‘yingilenu,’ “lisokelelenumo,” “swamenu.” Mazu kana apwa akulweza mutu kulinga vyuma vimwe. VaYuleya vaze vasakile kuyovoka vatelele kutwama mujizuvo javo, keshi kuhitangana haweluka haze hapwilenga maswalaleko. Ngocho vatelele kwononoka jindongi jaYehova numba vayovoke. *

²⁰ Vyuma muka natulinangulako? Ngana muze chapwile kuvangamba jaKalunga kunyima, nayetu nawa kuyovoka chetu havyuma vinakwiza kulutwe nachikapendamina hakwononoka jindongi jaYehova. (Isa. 30:21) Jindongi kana veji kutuhanangajo kukukunguluka. Shikaho twatela kwononoka jindongi veji kutuhananga. (Yowa. 1, 5:3) Nge natwononoka oholyapwa, kaha nachikapwa chachashi kwononoka nakulutwe numba vakatukinge kuli Setu Yehova naMwangana wetu Yesu. (Zefwa. 2:3) Chuma kana nachikatulingisa tukamone hatoma omu Wangana waKalunga naukafumisako vaka-kole jetu vosena. Chapundu vene, katweshi kukavulyama vyuma kaneviko.