TWAMBENGA ngwetu likumbi limwe hakuya kumilimo, namuvangila kumeneka mutu mwalihata nenyi, kaha mwetava. Namononga vilinga vyenu vyamwaza mweji kusololanga natanga yenu. Kaha himwamisanyika nakumihula ngwenyi: “Vyuma muka vyalingisa ove natanga yove mupwenga navilinga vyamwaza?” Enu hinamumukumbulula ngwenu: “Mwomwo ika unambila ngocho?” Ikiye himwamba ngwenyi: “Atela mwapwa muVinjiho jaYehova mwomwo vilinga vyenu vyalihandununa navakwenu vamukwitava cheka. Kamwazana mumakumbi akunoka, namuvihande vyamapolitiki namujijitako. Kamweshi kunwa makanyako, kaha nawa tanga yenu yatwama kanawa. Vyuma muka vyamilingisa mulihandunune navakwenu?”

Namukumbulula ngwenu: Veji kutuyulanga kuWangana waKalunga. Mwangana Yesu ikiye eji kutukafwanga tupwenga vatoma. Anakutukafwa mangana tutambuke mujitambo jenyi nakutulingisa tulihandunune kuvatu vavapi vamuno mukaye. Muchihanda chino, natumona omu Mwangana Meshiya nakafwenga vatu jaKalunga vapwenga vatoma kushipilitu, namuvishinganyeka, nakutomesa nawa liuka lyosena mangana lihane kavumbi Yehova.