KAPETULU 10
Mwangana Mwatomesa Vatu Jenyi Kushipilitu
1-3. Vyuma muka alingile Yesu omu awanyine vatu vanakulinga vyuma vyavipi hatembele?
YESU avumbikilenga chikuma tembele yamuYelusalema mwomwo atachikijile ovyo yemanyinyineko. Vatu vosena hano hamavu vayilenga kuze nakulemesa Kalunga wamuchano. Kulemesa kanechi valemeselenga Kalunga wajila Yehova chatelele kupwa chitoma. Achishinganyekenu omu evwile Yesu hakuheta hatembele haNyisane 10, 33 C.E., kuwana vatu vanakulingilaho vyavipi. Uno vyuma muka valingilenga?—Tangenu Mateu 21:12, 13.
2 Muchipango chatembele muze vavulukilenga ngwavo Chipango chaVaka-Mafuchi Eka, mwapwilenga vaka-kusekasana vaze valyapwilenga vaka-kulemesa Yehova vejilenga nakuhana mawana kuli Yehova. * Yesu ahangile “vosena vaze vapwile nakulanjisa navaze vapwile nakulanda. Akatumwine jimesa javaka-kutambasana jimbongo.” (Esekesenuko Nehemiya 13:7-9.) Atenukilile ava vatu valizangamina vaze valumwine zuvo yaIse kupwa nge “wina wakuswama vihwanga.” Asolwele hatoma ngwenyi avumbikile tembele novyo yemanyinyineko. Kulemesa chize valemeselenga Ise chatelele kupwa chitoma.
3 Omu mwahichile myaka kufuma haze vamuswanyishile haWangana waKalunga, Yesu atomesele cheka tembele yize vatu vanakulemesela Yehova makumbi ano. Uno tembele muka vene eyi?
Kutomesa “Vana vaLevi”
4, 5. (a) Vawavisa vavahehele nakuvatomesa ngachilihi kufuma mu 1914 nakuheta mu 1919? (b) Uno aha hakiko Yesu akumishile kuheha nakutomesa vatu jaKalunga tahi? Lumbununenu.
4 Nganomu twashimutwilanga muKapetulu 2, omu Yesu vamuswanyishile halitanda mu 1914, ejile hamwe naIse nakukekesa tembele yakushipilitu, yize yemanyinako kulemesa chamuchano. * Omu vakekesele eyi tembele, Mwangana Yesu amwene ngwenyi vaka-Kulishitu vawavisa, “vana vaLevi,” vasakiwile kuvaheha nakuvatomesa. (Mala. 3:1-3) Kufuma mu 1914 nakuheta mu 1919, Muka-kuheha Yehova, etavishile vatu jenyi vahite muvyeseko navihuli vyakulisezaseza mangana vatome. Kutwala muze, vawavisa vafumine muvyeseko kanevi valambwe, kaha vaputukile kukundwiza chikuma Mwangana Meshiya.
5 Uno aha hakiko akumishile kuheha nakutomesa vatu jaKalunga tahi? Nduma. Mumakumbi ano akukuminyina, Yehova nazachisanga Mwangana Meshiya atwaleho lika kukafwa vaka-kumukavangiza vapwenga vatoma mangana vamuzachilenga mutembele yakushipilitu. Muvihande vivali vinakavangizaho, natushimutwila omu Yesu natomesa vatu jenyi naliuka lyosena. Chatete, tushimutwilenu vyakutomesa chakushipilitu. Nachitukolezeza chikuma omu natushimutwila jijila jize Yesu nakafwilamo vaka-kumukavangiza vapwenga vatoma kushipilitu. Jijila jimwe tunalimwenangajo nameso, jeka nduma.
“Litomesenu”
6. Mazu aze Yehova alwezele vaYuleya muundungo atukafwa ngachilihi kwijiva omu chapwa kutoma kushipilitu?
6 Uno kutoma kushipilitu chalumbununa ika? Tukekesenu mazu ahanjikile Yehova kuli vaYuleya omu vapwile hakamwihi nakusokoka muufunge muMbavilone mulikulukaji lyamyaka lyakusokesa 6 B.C.E. (Tangenu Isaya 52:11.) Ava vafunge vapwile nakukinduluka kuYelusalema mangana vakatungulule tembele nakuputuka kulemesa chamuchano. (Ezela 1:2-4) Yehova asakile vatu jenyi vaseze vyuma vyosena vyakulemesa chamakuli muMbavilone. Avalwezele ngwenyi: “Kanda namukwata kuchuma chimwe chachipiko. Lovokenumo, litomesenu.” Kulemesa Yehova chitoma kavatela kuchichingasana nakulemesa chamakuliko. Natukukulula ngwetu ngachilihi? Kutoma kushipilitu chasakiwa kuhanduka kukunangula chamukwitava chamakuli nakuvyuma veji kulinganga.
7. Jila muka nazachisanga Yesu kukafwa vangamba jenyi vatome kushipilitu?
7 Omu Yesu vamuswanyishile haWangana, alongesela jila yakukafwilamo vaka-kumukavangiza vapwenga vatoma kushipilitu. Ahakileko ndungo wakushishika wakuzangama uze atongwele mu 1919. (Mateu 24:45) Halwola kanelu, Vaka-Kulinangula Mbimbiliya te vanambili lyehi kunangula chachivulu chamukwitava chamakuli. Oloze vapwile nakusakiwa lika kuvatomesa kushipilitu. Kulishitu nazachisanga ndungo wakushishika akafwe chikoki chikiko vaka-kumukavangiza vatachikize vilika navilinga vize vatela kumbila. (Vishi. 4:18) Tuchitalenu vyakutalilaho.
Vaka-Kulishitu Vatela Kulinga Kulisimasi Tahi?
8. Vaka-Kulinangula Mbimbiliya vatachikijile vyuma muka haKulisimasi, oloze valingilenga ika?
8 Putu vene kunyima, Vaka-Kulinangula Mbimbiliya vatachikijile ngwavo Kulisimasi yafuma kukwitava chamakuli, kaha Yesu kasemukile haDecember 25. Kaposhi Kakutalila waDecember 1881 ambile ngwenyi: “Vatu vavavulu vali muno muchachi vafuma mukwitava chamakuli. Vanalumuna majina kaha, mwomwo vapilishitu vamukwitava chamakuli vanapu jino vapilishitu vavaka-Kulishitu, kaha vilika vyavo vinapu jino vilika vyavaka-Kulishitu. Chilika chimwe shina Kulisimasi.” Chihande chakwamba ngwavo, “Likumbi Muka Asemukile Yesu?,” chize chapwile muKaposhi Kakutalila mu 1883 chambile ngwacho, Yesu asemukile kukuputuka chaOctober. * Oloze ava Vaka-Kulinangula Mbimbiliya vachipwile lika nakulinga chilika chaKulisimasi. Navaka-Mbetele muBrooklyn valingilenga chilika kana. Oloze kufuma mu 1926 vyuma vyalumukile. Mwomwo ika?
9. Vyuma muka vatachikijile jino Vaka-Kulinangula Mbimbiliya hachilika chaKulisimasi?
9 Omu Vaka-Kulinangula Mbimbiliya vakekesele kanawa, vatachikijile ngwavo chilika chaKulisimasi chafuma kuvatu vaze kavalemeselenga Kalungako. Chihande chakwamba ngwavo “Kwafuma Kulisimasi,” chize chapwile muTonenu! yaDecember 14, 1927 chambile ngwacho, Kulisimasi yapwa chilika chavatu vaze kavalemesa Kalungako, chavaka-viseke, navaka-kulemesa tuponya. Chahanjikile nawa ngwacho, Yesu katushikile tulingenga echi chilikako, kaha chakukulwile ngwacho: “Hakuwana nge echi chilika chaKulisimasi vachikundwiza kuli vaka-kaye, vafwila vyautu, naLiyavolo, . . . ngocho vaze valihana kumulimo waYehova namichima yavo yosena vatela kulihenda kuchilika kana.” Evi vikiko vyalingishile vaka-Mbetele valitwamine kulinga echi chilika.
10. (a) Vyuma muka vatachikijile kanawa haKulisimasi muDecember 1928? (Talenu nawa lipwata “ [lya]Kwafuma Kulisimasi Novyo Yemanyinako.”) (b) Vatu jaKalunga vavalwezele vyuma muka hamakumbi eka akunoka aze vatelele kulihendako? (Talenu lipwata “ [lya]Makumbi Eka Akunoka.”)
10 Mwaka wakavangijileho, Vaka-Kulinangula Mbimbiliya vatachikijile kanawa ovyo chapwilile chakuhenga kulinga Kulisimasi. HaDecember 12, 1928, Ndumbwetu Richard H. Barber, uze apwilenga hachikota chetu, ahanjikile chihande hachisaji chize chalumbunwine kanawa nge vatu vavapi vakiko vaputukile echi chilika. Uno vatu jaKalunga vakwile ngachilihi kuvyuma evi vavahuhumwine kufuma kuchikota chetu? Ndumbwetu Charles Brandlein natanga yenyi valitwaminyine kulinga Kulisimasi, kaha ambile ngwenyi: “Kachatukaluhwilile numba hahandende kulitwamina echi chilika chavaze kavalemesa Kalungako. . . . Twachimbilile, ngana muze mutu mwambila uvwalo wamajilo.” Ndumbwetu Henry A. Cantwell, uze apwile kalama wakutambwojoka mukuhita chamyaka ambile ngwenyi: “Twalisuwile kumbila vyuma vize vyapwile vyakuhenga nakusolola ngwetu twazangile Yehova.” Vaka-kukavangiza Kulishitu vakushishika valisuwile kwalumuna chiyoyelo chavo nakulitwamina kulinga Kulisimasi yize yafuma kukwitava chamakuli.[4]—Yowa. 15:19; 17:14.
11. Natusolola ngachilihi ngwetu tunakukundwiza Mwangana Meshiya?
11 Ava Vaka-Kulinangula Mbimbiliya vatusela chakutalilaho chamwaza chikuma. Omu natushinganyekanga hachakutalilaho chavo, tulihulisenu ngwetu: ‘Ngweji kumonanga ngachilihi jindongi jakufuma kuchikota chetu? Kutala ngweji kujitavilanga nakukavangiza vyuma veji kutunangulanga nyi?’ Nge natulisuula nakwononoka, kaha natusolola ngwetu tunakukundwiza Mwangana Meshiya uze anakuzachisa ndungo wakushishika atuhane kulya chakushipilitu halwola lwakutamo.—Vili. 16:4, 5.
Chakutamo Vaka-Kulishitu Kuzachisa Kulusu Tahi?
Muchama uze vahakile kulusu (Talenu palangalafu 12 na 13)
12. Hamyaka yayivulu, Vaka-Kulinangula Mbimbiliya vamwene ngachilihi kulusu?
12 Hamyaka yayivulu, Vaka-Kulinangula Mbimbiliya vamwenenga ngwavo chapwile chakutamo kuzachisa kulusu. Vatachikijile vene ngwavo chapwa chakuhenga kulemesa kulusu, mwomwo chapwa kulemesa makombelo. (Koli. 1, 10:14; Yowa. 1, 5:21) Kaposhi Kakutalila umwe mu 1883 ahanjikile hatoma ngwenyi “makombelo osena apwa aunyengwe kumeso aKalunga.” Chipwe ngocho, hakavanga vashinganyekelenga ngwavo kuzachisa kulusu mujijila jimwe chapwile tuhu kanawa. Chakutalilaho, vavwalilenga katachikijilo kamuchama nakulusu hauvwalo wavo. Katachikijilo kana kavanukishile vapwenga vakushishika palanga nakukufwa, numba vakatambule muchama wakuyoya. Kuputuka mu 1891, helu lyaKaposhi Kakutalila hapwilenga muchama nakulusu.
13. Vaka-kukavangiza Kulishitu vavalumbunwinyine vyuma muka hakuzachisa kulusu? (Talenu nawa lipwata “ [lya]Kuvalumbunwina Chikoki Chikoki vyaKulusu.”)
13 Vaka-Kulinangula Mbimbiliya vazangile chikuma eyi michama yakulusu. Oloze kuputuka muji 1920, vaka-kukavangiza Kulishitu vavalumbunwinyinenga kuhenga chakuzachisa kulusu. Ndumbwetu Grant Suiter uze apwile muLizavu Lyakutwaminyina anukile vyuma vyasolokele hakukunguluka chimwe chapwilile kuDetroit, Michigan, U.S.A. mu 1928 ngwenyi: “Hakukunguluka kana vatulumbunwinyine ngwavo chapwile chakuhenga kuvwala michama yakulusu, numba vene kuyizachisa.” Mumyaka yakavangijileho, muchano walumbunukile kanawa. Valumbunwine hatoma ngwavo vaka-kulemesa Kalunga vamuchano kavatela kuzachisa jikulusuko.
14. Uno vatu jaKalunga valingile ngachilihi omu vavakanyishile kuzachisa kulusu?
14 Uno vatu jaKalunga valingile ngachilihi omu vavakanyishile kuzachisa kulusu? Kutala vatwalileho lika kuvwala yize michama yakulusu yize vazangilenga chikuma tahi? Ndumbwetu Lela Roberts uze azachilile Yehova hamyaka yayivulu ambile ngwenyi: “Twayimbilile hahaze vene omu twatachikijile ngwetu chapwile chakuhenga kuyivwala.” Ndumbwetu weka wakushishika Ursula Serenco ambile ngwenyi: “Twatachikijile jino ngwetu kulusu yize twamwenenga kupwa hichinjikizo chakufwa chaMwata wetu nakulihana chayetu vaka-Kulishitu, yapwile yavaze kavalemeselenga Kalunga wamuchanoko. Kweseka naVishimo 4:18, twawahililile chikuma hakuwana nge musana wapwile lika nakututuka.” Vaka-Kulishitu vakushishika kavasakile kulinga vyuma vyamukwitava chamakuliko.
15, 16. Natusolola ngachilihi ngwetu tuli nakufwila kutomesa chipango chahamavu chatembele yaYehova yakushipilitu?
15 Omu mukiko tunakulinga namakumbi ano. Twatachikiza ngwetu Kulishitu anakuzachisa ndungo wakushishika wakuzangama mangana atukafwe tupwenga lika vatoma kushipilitu. Shikaho, nge vanatuhuhumuna kulihenda kuvilika, naviwanyino, navisemwa vyamukwitava chamakuli, kaha twatela kwononoka nakuvimbila hahaze vene. Ngana muze valingile vandumbwetu vakunyima, nayetu twatela kufwila kutomesa chipango chahamavu chatembele yaYehova yakushipilitu.
16 Mumyaka yino yakukuminyina, Kulishitu nakinginga nawa vikungulwilo vyavatu jaYehova kuvatu vaze vanasakenga kuvipihisa kushipilitu. Nalinginga ngachilihi ngocho? Tushimutwilenu hachuma kana.
Kuhandununa “Vaka-Kuhuka Kuli Vaka-Kwoloka”
17, 18. Muchifwanyisa chalyoji lyachikokela, chalumbununa ika (a) kufuta, (b) kukungulula “vaishi vamiyachi yosena, (c) kusakula vaishi vamwenemwene nakuvahaka mumitonga, (d) kumbila ‘vaishi vamokomoko’?
17 Mwangana Yesu Kulishitu eji kulamanga vikungulwilo vyavatu jaKalunga mukaye kosena. Kulishitu navangelo vanapunga nakuzata mulimo wakuhandununa, numba tuhu katweshi kuumona namesoko. Yesu alumbunwine ou mulimo muchifwanyisa chenyi chalyoji lyachikokela. (Tangenu Mateu 13:47-50.) Echi chifwanyisa chatalisa mulihi?
Lyoji lyachikokela lyemanyinako mujimbu waWangana ou vali nakwambulula mukaye kosena (Talenu palangalafu 18)
18 ‘Kufuta lyoji lyachikokela mukalungalwiji.’ Eli lyoji lyachikokela lyemanyinako mujimbu waWangana ou vanakwambulula mukaye kosena. Kukungulula “vaishi vamiyachi yosena.” Mujimbu wamwaza weji kukokanga vatu vakulisezaseza. Vamwe veji kwalumukanga nakupwa vaka-Kulishitu vamuchano, veka veji kusololanga kuwahilila hakavanga, oloze kutwala muze veji kulitwaminanga. * “Kusakula vaishi vamwenemwene nakuvahaka mumitonga.” Vatu vamichima yamwaza veji kuvakungululanga nakuvahaka muvikungulwilo muze veji kulemeselanga Yehova mujila yitoma. Kumbila ‘vaishi vamokomoko.’ Mumakumbi ano akukuminyina, Kulishitu navangelo vanapunga nakuhandununa “vaka-kuhuka kuli vaka-kwoloka.” * Kaha vatu vamichima yayipi, vaze vanakanenga kuseza vilinga vyakuhenga nakunangula chamukwitava chamakuli, kavavetavishile kupihisanga vikungulwiloko. *
19. Mweji kwivwa ngachilihi hakutachikiza omu Kulishitu anakukafwa vatu jaKalunga vapwenga vatoma kushipilitu nakukinga kulemesa chamuchano?
19 Tweji kwivwanga kuwaha chikuma hakutachikiza ngwetu Mwangana wetu Yesu Kulishitu eji kukinganga vatu jenyi, nyi mweka? Cheji kutukolezezanga hakutachikiza ngwetu noholyapwa Yesu afwila kutomesa kwitava chamuchano, navaka-kulemesa Kalunga vamuchano, ngana muze atomesele tembele mulikulukaji lyamyaka lyakulivanga. Tweji kusakwililanga chikuma hakutachikiza ngwetu Kulishitu nazatenga nangolo hakukafwa vatu jaKalunga vapwenga vatoma kushipilitu nakukinga kulemesa chamuchano kumajilo. Twatela kukundwiza Mwangana wetu naWangana wenyi hakulihenda kukwitava chamakuli chosena.
^ par. 2 Omu vaYuleya vakuvihela vyeka vejilenga kutembele, vatelele kutambasana jimbongo javo najimbongo jize vazachishilenga hakuhana mitelo kutembele. Oloze vaka-kutambasana jimbongo valyapwilenga vaze vaYuleya hakuvafwetesa jimbongo jajivulu. Vaze vangeji nawa pamo valanjilenga vimuna vakuhana mawana. Yesu avulukile ava vaka-kusekasana ngwenyi “vihwanga,” mwomwo vafweteselenga jimbongo jajivulu.
^ par. 4 Vatu jaYehova hano hamavu veji kumulemeselanga muchipango chahamavu chatembele yenyi yayinene yakushipilitu.
^ par. 8 Echi chihande chambile ngwacho, kunangula chakwamba ngwavo Yesu asemukile mungonde yavula “kachalitombola namujimbu watufunga vaze vatwaminenga muchipapa nakulama vimuna javoko.”—Luka 2:8.
^ par. 18 Ndumbwetu Frederick W. Franz asonekele mukanda haNovember 14, 1927 ngwenyi: “Uno mwaka katweshi kulinga Kulisimasiko. Vaka-Mbetele vanalikase ngwavo kaveshi kulinganga Kulisimasiko.” Omu mwahichile tukweji, ndumbwetu Franz asonekele mukanda weka haFebruary 6, 1928, ngwenyi: “Mwata anakututomesa chikoki chikoki kukunangula chaLiyavolo chamukwitava chaMbavilone.”
^ par. 18 Chakutalilaho, mu 2013 vaka-kwambulula vavulile nakuheta 7,965,954, kaha vaze vejile kuKwanuka Kufwa chaKulishitu vapwile 19,241,252.
^ par. 18 Kuhandununa vaishi vamwaza navaze vamokomoko kachalifwana nakuhandununa mikoko kuvapembeko. (Mateu 25:31-46) Kuhandununa mikoko kuvapembe nachikapwako hakusopesa chamakumishilo haluyando lwalunene luli nakwiza. Shimbu kanda luyando kana lwizenga, vaze vafwana nge vaishi vamwaza vanahase kukinduluka kuli Yehova nakuvakungulwila muvikungulwilo vyenyi.—Mala. 3:7.
Hakukuminyina, vaze vafwana vaishi vamokomoko navakavambila mulilungu lyakakahya, chikiko kunonga chamyaka yosena.
Pamo Nauzanga Nawa
KAPOSHI KAKUTALILA—MANGAZINI YAKULINANGULA
Kutala Mwatachikiza ‘Mwalumbunukila Visoneka’ Tahi?
Uno chifwanyisa chaYesu chamuka-kukuva mbuto nalyoji lyachikokela, namwana wakujimbala chalumbununa ika?
