1, 2. Vyuma muka valumwine muKaposhi Kakutalila waJanuary 1895, kaha vandumbwetu vevwile ngachilihi?

LIKUMBI limwe, John A. Bohnet uze apwile halizavu lyaVaka-Kulinangula Mbimbiliya atambwile Kaposhi Kakutalila waJanuary 1895, kaha awahililile chikuma havyuma amwene. Halipapilo lyahelu vasonekeleho vasona vavanene chikuma, kaha nawa hapwile muvwimbimbi wakaposhi uze vatungile kwakamwihi nakalwiji. Apwile namanongo aze amunyikile hameya namuutangatanga muze mwapwile milima. Muze mumangazini mwapwile chihande chize chalumbunwine uze muvwimbimbi wauhya ngwavo, “Omu Mukiko Nayisolokanga Mangazini Yetu.”

² Ndumbwetu Bohnet atumine mukanda kuli ndumbwetu Russell nakumulweza ngwenyi: “Ngunawahilila hakumona KAPOSHI anakusoloka kanawa.” Ndumbwetu weka John H. Brown asonekele nakusangejeka uze kaposhi ngwenyi: “Lipapilo kana linakusoloka kanawa. Kaposhi kana wakukola, chamokomoko namakimba anakulivetako.” Vyuma kanevi valumwine halipapilo lyahelu vyasolwele nge liuka nalyalumunangako vyuma vyeka. Kuheta muNovember, kwapwile cheka kwalumuka chikwavo chachinene chikuma.

3, 4. Ukalu muka valumbunwine muKaposhi Kakutalila waNovember 15, 1895, kaha vyuma muka vyavihya valumwine?

³ MuKaposhi Kakutalila waNovember 15, 1895, mwapwile chihande chachinene chize chalumbunwine kanawa ukalu wapwileko. Vatu muliuka lyaVaka-Kulinangula Mbimbiliya kavalivwasanyinengako. Vandumbwetu valikokojwesele hakufwila kuwana iya mwapwa twamina yavo. Ngocho muze mukaposhi mwapwile chihande chakuvahuhumuna vechenga kulikokojwesanga. Chihande kana chafwanyishile liuka lyetu kumbopolo. Chavulukile hatoma ngwacho, vaze vapwile nakutwaminyina vahonene kuhuhumuna vatu vyakwiza chapeho yayinene. Jino vyuma muka vatelele kulinga?

⁴ Chihande kana chahanjikile ngwacho, muka-kutambukisa mbopolo eji kumonanga ngwenyi vatu vanalizange kukala ponde yinahase kuvawana halwiji. Navaka-kutwaminyina muliuka vatelele kuwahisa vyuma mangana vikungulwilo vyosena vilizange kukala ponde yinahase kwiza. Hakusaka  vakumise ukalu kana, muze mukaposhi mwapwile chihande chalumwine vyuma. Chambile ngwacho, kuputuka vene lelo, “vatela kusakula vakulwane muchikungulwilo hichikungulwilo, vaze navatetekelanga utanga.”—Vili. 20:28.

5. (a) Mwomwo ika chapwilile chamwaza kuhakako vakulwane muvikungulwilo? (b) Vihula muka natushimutwila?

⁵ Kupwa navakulwane muchikungulwilo chalingishile vikungulwilo vizate kanawa. Chakafwile vandumbwetu vomike muukalu vahichilemo muJita yaKaye yatete. Mumyaka yakavangijileho, liuka lyawahishile vyuma vyeka vize vyakafwile vatu jaKalunga vazate kanawa milimo yaYehova. Uno upolofweto muka wahanjikile havyuma kana? Vyuma muka vanalumuna muliuka vize munamono? Munanganyala ngachilihi kukwalumuna kana?

6, 7. (a) Mazu ahali Isaya 60:17 alumbununa ika? (b) Mazu akwamba ngwavo “kalama” ‘namuka-kuhana milimo’ emanyinako ika?

⁶ Ngana muze twashimutwilanga muKapetulu 9, Isaya avulukile ngwenyi Yehova mwakakisula vatu jenyi, kaha navakavula. (Isa. 60:22) Yehova ashikile ngwenyi mwakavavulisa chikuma. Muupolofweto kana, ambile ngwenyi: “Nangukaneha ulu nakuushishisa muunengu, nangukaneha palata nakuyishishisa mufwelu, nangukaneha unengu nakuushishisa muvitondo, nangukaneha fwelu nakuyishishisa mumalolwa. Nangukatongola kuunda chikapwe kalama kove, nangukatongola kwoloka chikapwe muka-kukuhana milimo.” (Isa. 60:17) Upolofweto kana walumbununa ika? Mazu kana anakutesamo ngachililhi makumbi ano?

⁷ Awa mazu aIsaya avuluka ngwawo vyuma navakavishisa kuvyuma vikwavo. Echi chasolola nge vyuma vyamwaza navakavishisa kuvyuma vyamwaza chikuma. Kuneha ulu nakuushishisa muunengu chalumbunwine nge vyuma vinawahilako chikuma, kahomu mukiko chalumbununa nakuvyuma vikwavo vize vashishile. Echi chalumbunwine nge, Yehova avulukile ngwenyi vatu jenyi navakazovoloka chindende chindende. Uno kuzovoloka muka vapwile nakuhanjika? Hakuvuluka “kalama” ‘namuka-kuhana milimo,’ Yehova apwile nakulumbununa ngwenyi, vatu jenyi muliuka navakazovoloka chindende chindende nakuvazakama kanawa.

8. (a) Iya anakulingisa vyuma vavuluka muupolofweto waIsaya vizovoloke muliuka? (b) Uno tunanganyala ngachilihi kukwalumuka kana? (Talenu nawa lipwata “ [lya]Alitavilile Vamwolole.”)

⁸ Iya anakulingisa vyuma vizovoloke muliuka? Yehova ambile ngwenyi: “Nangukaneha ulu, . . . nangukaneha palata, . . . nangukatongola kuunda.” Chapundu vene, Yehova ikiye nalingisa vyuma muliuka vizovoloke, keshi vatuko. Kufuma vene haze Yesu vamuswanyishile haWangana, Yehova nalumuna vyuma vyavivulu muliuka kuhichila muli Mwanenyi. Uno tunanganyala ngachilihi kukwalumuka kana? Chisoneka kana chahanjika ngwavo vyumevi vinakwalumuka navineha “kuunda” “nakwoloka.” Omu natwitavila vyuma vinakwalumuka muliuka nakuvikavangiza, nachitukafwa tutwame mukuunda  navandumbwetu. Kaha natufwila nawa kwoloka chize nachitulingisa tuzachile kanawa Yehova uze kaposetolo Paulu avulukile ngwenyi “Kalunga wakuunda.”—Fwili. 4:9.

9. Lumbununenu vyuma vyeji kulingisanga vatu valinunge muchikungulwilo.

⁹ Paulu asonekele nawa vyaYehova ngwenyi: “Kalunga kapwa Kalunga waliuyako, oloze wakuunda.” (Koli. 1, 14:33) Nyingililenu ngwenu, Paulu hano ambile ngwenyi Kalunga apwa wakuunda keshi waliuyako. Mwomwo ika? Mwomwo liuya kalyeshi kuneha kuundako. Chakutalilaho, maswalale vanahase kuchaula mukulonga hakuya kujita, oloze kaveshi kuneha kuundako. Veji kunehanga jita, naponde naliuya havatu. Oloze etu vaka-Kulishitu twatela kwanuka ngwetu, hakusaka vyuma vyosena vanoneka vifukile, kwatela kupwa kuunda. Omu mukiko chapwa nakuunda chaKalunga, cheji kulingisanga vyuma vifukile. Twawahilila chikuma mwomwo liuka lyetu veji kulitwaminyinanga nakulitomesa kuli “Kalunga uze eji kuhananga kuunda.” (Loma 15:33) Echi kuunda chaKalunga chikiko cheji kutulingisanga tulinunge hamwe nakulivwisa kuwaha navandumbwetu vamuvikungulwilo mukaye kosena.—Samu 29:11.

10. (a) Vyuma muka vanalumunako muliuka lyetu mumyaka yakalinwaha? (Talenu lipwata “ [lya]Omu Vanalumunanga Vyuma muLiuka.”) (b) Vihula muka natushimutwila?

¹⁰ Lipwata “ [lya]Omu Vanalumunanga Vyuma muLiuka” lyalumbununa vyuma valumwine muliuka kunyima vize vyanehele kulonga nakuunda. Oloze vyuma muka ‘vinapu ulu vanashishisa muunengu’ vize Yehova nanehe kuhichila muli Mwangana mumyaka yakalinwaha? Kwalumuka kana chinalingisa ngachilihi vikungulwilo mukaye kosena vavitwaminyine mukuunda nakuneha kulinunga? Uno vinakumikafwa ngachilihi mangana muzachile “Kalunga wakuunda”?

11. (a) Vyuma vahehwojwele muVisoneka vyavakafwile valumune ika muliuka? (b) Lizavu lyakutwaminyina lyafwililile kulinga vyuma muka?

¹¹ Kufuma mu 1964 nakuneha mu 1971, lizavu lyakutwaminyina lyapwile nakuhehwojola omu vaka-Kulishitu vamulikulukaji lyamyaka lyakulivanga vatwaminyinyinenga chikungulwilo. * Vawanyine nge mulikulukaji lyamyaka lyakulivanga, chikungulwilo vachitwaminyinyinenga kulizavu lyavakulwane keshi kuli mukulwane umweko. (Tangenu Wavaka-Fwilipi 1:1; WaChimoteu 1, 4:14.) Ngocho vamwene jino ngwavo Mwangana wavo Yesu apwile nakuvatwaminyina mangana valumune vyuma muliuka. Kaha vavitavilile nakufwila kuvikavangiza. Valwezele vikungulwilo vikavangize jino vyuma kanevi vyamuVisoneka. Vyuma muka vimwe valumwine muliuka mumyaka yaji 1970?

12. (a) Vyuma muka valumwine mulizavu lyakutwaminyina? (b) Lumbununenu omu Lizavu Lyakutwaminyina linakuzata oholyapwa. (Talenu lipwata “ [lya]Omu Lizavu lyaKutwaminyina Lyeji Kutwaminyinanga Liuka,” halifwo 130.)

¹² Chatete, vyuma vyaputukile kwalumuka mulizavu lyakutwaminyina. Shimbu kanda kwalumuka kana, lizavu lyakutwaminyina lyapwile navandumbwetu vawavisa 7 vaze vatetekelelenga Watch Tower Bible and Tract Society of Pennsylvania. Oloze kuheta mu 1971, lizavu lyakutwaminyina  lyapwile jino navatu 11, kaha kavavavulukilenga cheka ngwavo vaka-kutetekelako. Vosena vatesekele hamwe ngolo, kaha mwaka himwaka vatongwelenga cheyamani weka hakachi kavo.

13. (a) Liuka vapwile nakulitetekela ngachilihi kufuma mu 1932 nakuheta mu 1972? (b) Mu 1972, Lizavu Lyakutwaminyina lyalingile vyuma muka?

¹³ Kufumaho kwalumuka kana chaputukile jino kuya muvikungulwilo. Vyuma muka valumwine? Kufuma mu 1932 nakuheta mu 1972, chikungulwilo hichikungulwilo vachitwaminyinyinenga kuli ndumbwetu umwe. Kufuma mu 1932 nakuheta mu 1936, uze ndumbwetu vamuvulukilenga ngwavo muka-kutwaminyina mulimo wamuwande. Mukuhita chamyaka vamuvulukile jino ngwavo muka-kuzachila chikungulwilo, kufumaho ngwavo ngamba wachikungulwilo, kutwala muze ngwavo kalama wachikungulwilo. Ndumbwetu hindumbwetu azachilenga mulimo kana azakaminenga utanga kushipilitu. Uze kalama wachikungulwilo alingilenga vyuma vyachikungulwilo chakuzeneka kuhulisa vakwavo vakulwane muchikungulwilo. Oloze kuheta mu 1972, Lizavu Lyakutwaminyina lyanehele kwalumuka chachinene muliuka. Vyuma muka vyalumukile?

14. (a) Vyuma muka valumwine haOctober 1, 1972? (b) Muka-kuwanyisa lizavu lyavakulwane eji kukavangizanga ngachilihi mazu atwama hali Wavaka-Fwilipi 2:3?

¹⁴ Muchishishisa chandumbwetu umwe kutwaminyina chikungulwilo, vandumbwetu veka vakuhya kushipilitu vavasakwile kupwa tulama kuzachisa Visoneka. Kaha vatungile lizavu lyavakulwane vaze vatalilenga jino hachikungulwilo. Kwalumuka kana chaputukile haOctober 1, 1972. Makumbi  ano, muka-kuwanyisa lizavu lyavakulwane kalimona kupwa wamulemu kuhambakana vakwavo vakulwaneko, oloze alimona “kupwa wamundende.” (Luka 9:48) Twatokwa hakupwa navandumbwetu kana vakulinyisa mukaye kosena.—Fwili. 2:3.

15. (a) Vyuma valumwine muchikungulwilo vyakupwa nalizavu lyavakulwane vinanehe nganyo muka? (b) Vyuma muka nalingi Mwangana wetu Yesu?

¹⁵ Vyuma valumwine muchikungulwilo kuli vakulwane vyakuzachilanga hamwe milimo muchikungulwilo vinavakafwe chikuma. Tuchitalenu havyuma vitatu vananganyala: Chatete, kwalumuna kana chinakafwe vakulwane vosena vazate kanawa mulimo wavo numba utohwa tuhu ngachilihi, hakutachikiza ngwavo Yesu ikiye Mutwe wachikungulwilo. (Efwe. 5:23) Chamuchivali, “vyuma navifukila nge vaka-kulweza mangana vanavulu.” (Vishi. 11:14) Omu vakulwane veji kushimutwilanga navakwavo havihande vyamuchikungulwilo nakulivwilila, cheji kuvakafwanga vakavangize kanawa jishimbi jamuMbimbiliya. (Vishi. 27:17) Yehova eji kukisulanga vyuma veji kulinganga, ngocho veji kufukilanga. Chamuchitatu, hakupwa natulama vavavulu muliuka chinavakafwe kuzakama kanawa mikoko nakuvafunga hakuwana nge vatu vanakuvulilako muliuka. (Isa. 60:3-5) Mu 1971 mukaye kosena mwapwile vikungulwilo vyakuzomboka 27,000, oloze kuheta mu 2013 vinavulu nakuheta ku 113,000. Chikupu vene, Mwangana wetu natongola tufunga vakukafwa vatu jenyi halwola lwakutamo.—Mika 5:5.

16. (a) Mulimo muka vatwama nawo tulama? (b) Vaka-Kulinangula Mbimbiliya vamwene ngachilihi mazu aYesu akwamba ngwavo, ‘Funganga mikoko vavandende’?

¹⁶ Putu vene mumakumbi aVaka-Kulinangula Mbimbiliya, vakulwane muchikungulwilo vatachikiza ngwavo vatwama namulimo wakukafwa vakwavo vaka-kwitava vatwaleho lika kupwa vangamba jaKalunga. (Tangenu Wavaka-Ngalesha 6:10.) Mu 1908, kwapwile chihande muKaposhi Kakutalila chize chahanjikile hamazu aYesu akwamba ngwavo: “Funganga mikoko jami vavandende.” (Yowa. 21:15-17) Echi chihande chahanjikile kuli tulama ngwacho: “Twatwama namulimo vatuhana kuli Mwata wakuzakama utanga, kaha twatela kuumona kupwa waulemu nakulisa mikoko jaMwata nakuvafunga.” Mu 1925, Kaposhi Kakutalila alumbunwine kulema chamulimo wakufunga hakulweza tulama ngwavo: “Chachi yapwa yaKalunga, . . . kaha mwakahula tulama hamilimo veji kuzachilanga vandumbwavo.”

17. Tulama vanavakafwe ngachilihi mangana vapwenga tufunga vamwenemwene?

¹⁷ Liuka lyaYehova linakafwe ngachilihi tulama vazovoloke mumulimo wavo wakufunga? Linalingi ngocho hakuvanangula. Mu 1959, vaputukile Shikola yaMulimo waWangana yakunangula tulama. Chihanda chimwe chahanjikile hamutwe wakwamba ngwavo, “Zakamenunga Mutu hiMutu.” Vandumbwetu vavakafwile “vanonekenga kanawa vyuma mangana vatambukilenga vaka-kwambulula hamembo avo.” Chihanda kana chasolwele jijila jakulisezaseza jize navazachisanga tulama mangana vakunyulenga vandumbwetu omu navavatambukilanga. Mu 1966, valumwineko vyuma vimwe muShikola yaMulimo waWangana. Mwapwile chihande chakwamba ngwavo, “Ovyo Chapwila Chachilemu Kufunga Utanga.” Vyuma muka vavakafwile? Vavakolezezele ngwavo vaze vanakutwaminyina “vatela kuzakama kanawa utanga waKalunga,  oloze nawa kavatela kusuvilila jitanga javo namulimo wamuwandeko.” Mumyaka yakalinwaha, kunapunga lika mashikola akunangula tulama. Vyuma muka vinafumu muli awa mashikola vanawahisanga muliuka lyaYehova? Makumbi ano, muvikungulwilo vyavaka-Kulishitu muli vandumbwetu vakuhya vavavulu vaze vanakuzata mulimo waufunga.

18. (a) Tulama vavahana mulimo muka waulemu? (b) Mwomwo ika Yehova naYesu vazangila tulama vaze veji kuzatanga nangolo?

¹⁸ Tulama muchikungulwilo vavahakako kuli Yehova kuhichila muli Mwangana wetu Yesu mangana vazate mulimo waulemu. Mulimo muka? Mulimo wakutwaminyina mikoko jaKalunga mulwola luno lwalukalu. (Efwe. 4:11, 12; Chimo. 2, 3:1) Yehova naYesu vazanga chikuma tulama vaze veji kuzatanga natwima mwomwo veji kwononokanga mazu amuVisoneka akwamba ngwavo: “Fungenunga utanga waKalunga uze vamihana kulama . . . nakulisuula . . . , mukulisakila . . . , pwenunga muvakutalilaho kuutanga.” (Petu. 1, 5:2, 3) Tushimutwilenuko kaha hajijila jivali jize najisolola omu tulama vaka-Kulishitu vapwila chakutalilaho kuutanga nakulingisa chikungulwilo chipwenga mukuunda nakuwahilila.

19. Tweji kwivwanga ngachilihi hakuzachila hamwe natulama mumulimo wamuwande?

¹⁹ Chatete, tulama veji kuzachilanga hamwe navandumbwavo muchikungulwilo. Luka avulukile Yesu ngwenyi: “Ayile nakutambwojoka munganda hinganda namulimbo hilimbo, nakwambulula nakuvilika mujimbu wamwaza waWangana waKalunga. Apwilenga hamwe navaze 12.” (Luka 8:1) Ngana muze Yesu ambulwilenga hamwe navaposetolo jenyi, natulama makumbi ano vatela kuzachilanga hamwe navandumbwavo muwande. Vatachikiza ngwavo echi nachikafwa  vatu muchikungulwilo vapwenga vakulinunga kushipilitu. Vatu muchikungulwilo veji kwivwanga ngachilihi hali tulama kana? Ndumbwetu wapwevo Jeannine, wamyaka kafwe 80 ambile ngwenyi: “Kuzachila hamwe nakalama mumulimo wakwambulula cheji kungukafwanga ngushimutwile nenyi nakufwila kumutachikiza kanawa.” Ndumbwetu Steven, wamyaka yamuji 30 ambile ngwenyi: “Nge kalama mwazachila hamwe nayami mumulimo wakuzuvo hizuvo, ngweji kumonanga ngwami anakufwila kungukafwa. Kungukafwa mujila kaneyi cheji kungwivwisanga kuwaha.”

20, 21. Tulama vanahase kulondezeza ngachilihi kafunga vavuluka muchishimo chaYesu? Hanenu chakutalilaho. (Talenu nawa lipwata “ [lya]Kuwaha Chakutambukila Vatu.”)

²⁰ Chamuchivali, liuka lyaYehova linanangula tulama vazakamenga navaze vazeya kushipilitu. (Hepe. 12:12) Mwomwo ika tulama vatela kukafwila vatu kana, kaha mujila muka? Chishimo ahanjikile Yesu chakafunga namukoko wakujimbala nachitukafwa tuwane mwakukumbulwila. (Tangenu Luka 15:4-7.) Uze kafunga omu atachikijile ngwenyi mukoko umwe najimbala, aputukile kumutondatonda, kwijiva nge ikiye kaha apwile nenyi. Tulama makumbi ano vanakulondezeza ngachilihi chakutalilaho chauze kafunga? Uze kafunga amwene mukoko ajimbalile kupwa wamulemu, ngocho natulama nawa vamona vandumbwavo vaze vanazeye kushipilitu kupwa vavalemu. Vamona mutu uze nazeye kushipilitu kupwa nge mukoko wakujimbala, kaha veji kumukafwanga. Ngana muze kafunga mwaya “nakutonda uze umwe najimbala palanga nomu mwamuwana,” natulama nawa veji kulisuulanga kutondatonda vaze vanazeye nakuvakafwa.

²¹ Vyuma muka alingile kafunga wamuchishimo chaYesu omu awanyine uze mukoko? Amuzundwile nakumuhaka “havifwiji vyenyi,” nakumutwala hautanga. Chochimwe nawa, vakulwane vatela kufwila kukafwa uze nazeye kushipilitu akinduluke kuchikungulwilo. Omu mukiko chapwile kuli Victor, ndumbwetu walunga wamuAfrica uze echele kulikata nachikungulwilo. Ahanjikile ngwenyi: “Hamyaka 8 yize ngwalitwaminyinyine kuya kuchikungulwilo, tulama vatwalileho lika kungutambukila nakungukafwa.” Vyuma muka vyamukwachile kumuchima? Ambile ngwenyi: “Likumbi limwe, John uze apwa kalama angutambukilile nakungutalisa jifwato jize twakopesele omu twapwile hamwe kuShikola yaMulimo wauPayiniya. Jize jifwato jangwanukishile omu ngwalivwishilenga kuwaha kuchikungulwilo, kaha ngwafwililile kukinduluka nakuzachila Yehova.” Nakushimbula chiku, Victor akindulukile kuchikungulwilo. Oholyapwa ou ndumbwetu apwa cheka payiniya. Chikupu vene, tulama vaka-Kulishitu veji kutukafwanga tupwenga vakuwahilila.—Koli. 2, 1:24. *

22. Uno kwoloka nakuunda cheji kunehanga ngachilihi kulinunga muchikungulwilo? (Talenu nawa lipwata “[lya]Twalikomokelele Chikuma.”)

²² Nganomu twashimutwilanga hakavanga, Yehova ahanjikile chimweza ngwenyi kwoloka nakuunda nachikapwanga lika muli vatu jaKalunga. (Isa. 60:17) Vyuma kanevi vinakafwe chikungulwilo chipwenga chakulinunga. Mujijila muka? Kutalisa kukwoloka, “Kalunga ketu ikiye Yehova umwe kaha.” (Lushi. 6:4) Vikungulwilo vyosena mukaye vyeji kukavangizanga jindongi jaKalunga jojimwe jakwoloka. Chikupu vene, jindongi jenyi japwa jojimwe, kaha veji kujikavangizanga “muvikungulwilo vyavaka-kujila vyosena.” (Koli. 1, 14:33) Shikaho chikungulwilo chinahase kufukila kuvanga kaha nge navakavangiza jishimbi jaKalunga. Kaha kutalisa kukuunda, Mwangana wetu kasaka kaha tulivwise kuwaha kuunda muchikungulwiloko, oloze asaka nawa tupwenga vatu “vaze veji kunehanga kuunda.” (Mateu 5:9) Shikaho, “tukavangizenunga vyuma vyakuneha kuunda.” Tweji kufwilanga kukumisa washi ukalu uze unahase kutuwana shimbu jimwe. (Loma 14:19) Kulinga ngocho cheji kunehanga kuunda nakulinunga muchikungulwilo.—Isa. 60:18.

23. Vyuma muka tunakulivwisanga kuwaha etu vangamba jaYehova makumbi ano?

²³ Omu Kaposhi Kakutalila waNovember 1895 ahanjikile vyakutongola tulama muvikungulwilo, vandumbwetu vaze vapwile nakuzata natwima vawahililile. Mwomwo ika? Mwomwo vafwelelele ngwavo echi kunoneka chachihya nachikafwa vatu jaKalunga “valinunge mulufwelelo.” Hakumona vyuma vinasoloka kunyima, tunawahilila hakutachikiza ngwetu vyuma nalumunanga Yehova chikoki chikoki kuhichila muli Mwangana wetu vinatukafwe tulinunge hamwe navandumbwetu hakulemesa Kalunga. (Samu 99:4) Shikaho, vatu jaYehova mukaye kosena makumbi ano vanakuwahilila hakutambuka “mwaya shipilitu yoyimwe,” nakukavangiza “mujitambo jojimwe,” ‘nakuzachila hamwe’ “Kalunga wakuunda.”—Koli. 2, 12:18; tangenu Zefwanyiya 3:9.