1, 2. (a) Vatwamina vamukwitava valingile vyuma muka kumulimo wakwambulula, kaha vaposetolo valingile ngachilihi? (b) Mwomwo ika vaposetolo vakanyine kwononoka kulushimbi lwakuvakanyisa kwambulula?

OMU chikungulwilo chavaka-Kulishitu muYelusalema vachitungile haPendekoseta 33 C.E., mwahichile lwola lwalundende, kaha Satana aputukile kuchifumbukila mangana achikivise. Satana aputukile kusowangiza vatwamina vamukwitava mangana vakanyise mulimo wakwambulula Wangana. Oloze vaposetolo vatwalileho lika kwambulula, kaha vatu vavavulu “vetavile muli Mwata.”—Vili. 4:18, 33; 5:14.

² Kutwala muze, vaka-kole vapihililile kaha vakashile vaposetolo vosena nakuvahaka mukamenga. Oloze kuheta naufuku, kangelo kaYehova asokolwele vikolo vyakamenga, kaha lichako vaputukile kwambulula cheka. Vavakwachile cheka nakuvatwala kuli vaka-kuyula nakuvavangijikila ngwavo vahokwele jishimbi. Oloze vaposetolo vahanjikile nakumika ngwavo: “Twatela kwononoka Kalunga hakupwa ikiye muka-kuyula, kuhambakana vatu.” Kaha vaka-kuyula vapihililile chikuma nakusaka ‘kujiha’ vaposetolo vosena. Halwola kana Ngamalyele uze anangwilenga vatu Jishimbi ambile ngwenyi: “Zangamenu . . . kanda namuvalinga mumweko, vechenu.” Vaze vaka-kuyula vevwililile mazu ahanjikile Ngamalyele, kaha vavechele. Uno vaposetolo valingile ngachilihi omu vavechele? Vatwalileho lika kunangula vatu “nakwambulula mujimbu wamwaza wakuvuluka Kulishitu Yesu.”—Vili. 5:17-21, 27-42; Vishi. 21:1, 30.

3, 4. (a) Jila muka nazachisanga Satana hakufumbukila vatu jaKalunga? (b) Vyuma muka natushimutwila mukapetulu uno natupetulu vavali navakavangizaho?

³ Kutwala vaka-Kulishitu kuzango yakusopela mu 33 C.E. chikiko chapwile chatete, oloze kachapwile chamakumishiloko. (Vili. 4:5-8; 16:20; 17:6, 7) Makumbi ano Satana anakutwalaho lika kusowangiza vatu mangana vakunyule jifulumende jikanyise mulimo wakwambulula mujimbu wamwaza. Ava vaka-kole vanavangijikilanga vatu jaKalunga milonga yakulisezaseza. Chakutalilaho, veji kutuvangijikilanga ngwavo tuvaka-kuneha vikokojola. Veka ngwavo tuvaka-kufumbukila fulumende, kaha vakwavo ngwavo tuvaka-kusekasana. Vandumbwetu vanayinga kujizango jakusopela halwola lwakutamo nakulihakwila. Jino vyuma muka vinasolokanga? Uno  jila yize vaka-jizango vanavatwilangamo vihande vyetu yinakwate ngachilihi havihande vanatuvangijikilanga myaka yino? Tushimutwilenuko vihande vimwe vanasoponga mangana tumone omu vinatukafwenga “hakuhakwila mujimbu wamwaza nakuuzamisa najishimbi.”—Fwili. 1:7.

⁴ Mukapetulu uno natushimutwila omu tunalihakwilanga mangana vatwitavise kwambulula. Tupetulu vavali navakavangizaho natushimutwilamo vihande vimwe tunapinjinga navyo mujizango jakusopela, hakusaka tuhone kupwa muli vaka-kaye nakuzeneka kuhokola jishimbi jaKalunga.

5. Muji 1930, mwomwo ika vaka-kwambulula Wangana vavakashilile, kaha vaze vapwile nakutetekela vashinganyekele kulinga ika?

⁵ Muji 1930 jinganda jamuUnited States of America jalwezele Vinjiho jaYehova vatambule mukanda wakuvetavisa kwambulula mujimbu. Vandumbwetu kavetavilile kutambula mukanda kanako, mwomwo vatachikijile ngwavo fulumende yinahase kuvatambulawo kala lwola. Oloze vatachikijile ngwavo kakweshi fulumende yikwechi ngolo jakukanyisa vaka-Kulishitu kukavangiza lushimbi lwaYesu lwakwambululako. (Mako 13:10) Vandumbwetu vavavulu vavakashile hakwambulula mujimbu. Vandumbwetu vaze vatetekelelenga muliuka lyetu vatwalile chihande kana kujizango jakusopela. Vashinganyekele ngwavo vanatutambula lisesa vatuhana kufulumende lyakwambulula. Jino kuheta mu 1938 kwapwile chihande chachinene chepukile. Vyuma muka vyasolokele?

6, 7. Vyuma muka vyasolokele kutanga yaCantwell?

⁶ LyaChivali nachimene haApril 26, 1938, Newton Cantwell, wamyaka 60 napuwenyi Esther navana vavo vamalunga Henry, naRussell, naJesse vaze vapwile vapayiniya vakulipwila vatanu vayile nakwambulwila munganda yaNew Haven, Connecticut. Vashinganyekele ngwavo kaveshi kuhiluka likumbi vene lizeko, mwomwo vanahase kuvakasa hakuwana nge kunyima vavakashile mapapa kakavulu. Oloze vapwile lika napwipwi yakwambulula mujimbu numba tuhu vatachikijile ngwavo vanahase kuvakasa. Vakatukile nakuya munganda yaNew Haven mujiminyau javo jivali. Newton atambukishile minyau yize yambachile mikanda yahanjika haMbimbiliya najifonongalafu, kaha Henry wamyaka 22 apwile nakutambukisa minyau yavihungo vyakuhanjikila. Nakushimbula chiku, tupokola vavakwachile.

⁷ Vavangilile kukasa Russell, wamyaka 18, kaha vakashile Newton naEsther. Jesse wamyaka 16, amwene omu visemi jenyi vavakwachile nakuvakasa kutupokola. Henry apwile nakwambulwila munganda yeka, kaha Jesse vamusezele ukawenyi. Ambachile chisaji chafwonongalafu, kaha atwalilileho lika kwambulula. Vakulwane vavali vamuKatolika valwezele Jesse avavumishileko chihande chandumbwetu Rutherford  chakwamba ngwavo, “Vaka-kole.” Oloze omu vevwilile chize chihande, vapihilile kaha vasakile kuveta Jesse. Jesse akatukile nakuya, oloze tupokola vamukavile munyima nakumukwata. Jesse vamuhakile mukamenga. Tupokola vasuwile ndumbwetu Esther Cantwell, oloze lunga lyenyi Cantwell navana venyi vamalunga vavafwetesele likumbi vene lize nakuvalovolamo.

8. Mwomwo ika zango yahanyinyine mulonga Jesse Cantwell ngwavo muka-kuneha vikokojola?

⁸ Omu mwahichile tukweji vavandende, kuheta muSeptember 1938, tanga yaCantwell vayisanyikile kuzango yakusopela muNew Haven. Ngocho, Newton, naRussell, naJesse vavakashile nakwamba ngwavo vavawanyine namulonga wakwambulula chakuzeneka lisesa kufulumende. Ava vandumbwetu vatwalile chihande kana kuzango yayinene yaConnecticut, kaha zango kana yayulile nge Jesse apwile namulonga wakusowangiza vikokojola. Mwomwo ika? Mwomwo vaze vakulwane vaKatolika vavali vambile ngwavo chize chihande vevwilile chasawile mauka akwitava. Vandumbwetu vamwene ngwavo zango kana kayavatwile kanawa chihande kanako, ngocho vachitwalile kuzango yayinene mulifuchi lyaU.S.

9, 10. (a) Zango yayinene ya U.S. yasopele ngachilihi chihande chandumbwetu Cantwell natanga yenyi? (b) Tunanganyala ngachilihi hajila vavatwililemo chihande kana?

⁹ HaMarch 29, 1940, chambamilonga wamunene Charles E. Hughes navakwavo 8 vevwililile omu Ndumbwetu Hayden Covington apwile nakwaula chihande, uze apwile  lihako waVinjiho jaYehova. * Omu lihako wafulumende nayikiye awile chihande chenyi mangana asolole ngwenyi Vinjiho vapwa vaka-vikokojola, chambamilonga amuhulishile ngwenyi: “Uno unetavila ngwove mujimbu ambulwilenga Kulishitu Yesu kavawitavilile kuvatu vavavuluko tahi?” Uze lihako wafulumende akumbulwile ngwenyi: “Mukiko vene, kaha nawa Mbimbiliya yatulweza vyuma alingile Yesu hakwambulula.” Uno awa mazu akumbulwile asolwele ika? Uze lihako wafulumende ambile ngwenyi, Vinjiho vapwile hilizavu lyaYesu kaha vaze mahako jafulumende vapwile nge vaze vamufumbukilile. Kuheta haMay 20, 1940, eyi zango yavatwile chihande nakusambisa Vinjiho.

¹⁰ Uno jila yize zango yavatwililemo chihande yanehele vyuma muka? Yalingishile vandumbwetu vapwenga nalisesa lyakuzachila Kalunga chakuzeneka mutu chipwe fulumende kuvakanyisa. Kaha nawa zango yavatwile ngwayo Jesse “kapwile namulonga wakuneha vikokojolako.” Vambile ngwavo Vinjiho jaYehova kavapwa vakakuneha vikokojola kuvatuko. Vatu jaKalunga vevwile kuwaha chikuma hakuvahakwila. Uno tunakunganyala ngachilihi kujila kaneyi yamwaza vavatwililemo chihande? Lihako umwe uze apwa Chinjiho ambile ngwenyi: “Kutuhana lisesa lyakutwitavisa tuhanjikenga hatoma vyuma twafwelela chinatukafwe twambulwile vatu vyuma twafwelela.”

11. Mulimo muka wakulipwila vazachile vandumbwetu muCanada, kaha mwomwo ika?

¹¹ Muji 1940, Vinjiho jaYehova muCanada vavayanjishile chikuma. Kuheta mu 1946, hakusaka vandumbwetu valweze vatu vosena ngwavo vanavakanyisa mulimo wakwambulula, vaputukile mulimo wakulipwila vazachile hamakumbi 16 wakuhana vatu talakiti yamafwo awana yakwamba ngwavo Quebec’s Burning Hate for God and Christ and Freedom Is the Shame of All Canada. Eyi talakiti yasolwele hatoma omu vatwamina vamukwitava chamakuli, natupokola navatu veka vaze vayajishilenga vandumbwetu munganda yaQuebec. Yize talakiti yambile ngwayo: “Kukasa Vinjiho jaYehova chakuhona mulonga nachitwalaho lika. Kuli milonga 800 yize vanavangijikila Vinjiho jaYehova muGreater Montreal.”

12. (a) Vaka-kole valingile ika hatalakiti yize vandumbwetu vahanyine vatu? (b) Vandumbwetu vavatwikile mulonga muka? (Talenu nakwinyikila chamwishi.)

¹² Chilolo wamunganda yaQuebec, Maurice Duplessis, uze azachililenga hamwe navakulwane vamuliuka lyamuKatolika apihililile havyuma vavulukile muli yize talakiti. Kaha ambile ngwenyi “navazunga jita” naVinjiho. Vavawanyinyine jino milongo yayivulu, kaha yavulile kufuma ha 800 nakuheta ku 1,600. Payiniya umwe ambile ngwenyi: “Tupokola vatukashilenga kakavulu nakutuvangijikila milonga.” Vinjiho vaze vawanyinenga vali nakuhana jitalakiti kana, vavahanyine mulonga wakusoneka talakiti “yakufumbukila fulumende.” *

13. Veya vapwile vatete kusopesa hachihande chakuneha vikokojola, kaha zango yayulile ngachilihi?

 ¹³ Mu 1947, Ndumbwetu Aimé Boucher namwanenyi wapwevo Gisèle wamyaka 18, naLucille wamyaka 11, vapwile vatu vatete kukasa hachihande kana. Vahanyine talakiti yaQuebec’s Burning Hate kuvatu valihachile navo munganda yaQuebec, oloze chapwile chachikalu kuvamba ngwavo vaka-vikokojola. Ndumbwetu Boucher apwile wakulinyisa nakutwama mukuunda navakwavo, kaha ayilenga mumbaka nachimbulu chenyi. Chipwe ngocho vamuyanjishile natanga yenyi ngana muze vavulukile muli yize talakiti. Chambamilonga uze ahungile Vinjiho akanyine unjiho wakusolola nge Boucher kapwile namulongako. Etavilile vyuma vyamakuli vahanjikile hali yize talakiti, ngwavo yavundwile vikokojola, ngocho Boucher natanga yenyi vavahanyine mulonga. Shikaho ou chambamilonga akukulwile ngwenyi, chapwile chakuhenga kuhanjika muchano! Aimé naGisèle vavahanyine mulonga wakufumbukila fulumende, kaha Lucille asavalile mukamenga hamakumbi avali. Vandumbwetu vatwalile chihande chavo kuzango yayinene yakusopela yamuCanada, kaha vavetavilile.

14. Vandumbwetu muQuebec valingile ngachilihi hamyaka yize vavayanjishilenga?

¹⁴ Chipwe ngocho, vandumbwetu muQuebec vatwalileho lika kwambulula mujimbu waWangana numba tuhu vavemanyinyine nakole nakuvayanjisa. Myaka yiwana yakavangijileho kufuma hakuhana yize talakiti mu 1946, Vinjiho muQuebec vavulile kufuma ha 300 nakuheta ha 1,000. *

15, 16. (a) Zango yayinene muCanada yayulile ngachilihi chihande chandumbwetu Boucher natanga yenyi? (b) Kusamba kana chakafwile ngachilihi vandumbwetu navatu veka?

¹⁵ MuJune 1950, vachambamilonga 9 vamuzango yayinene muCanada, vevwililile kuchihande chandumbwetu Aimé Boucher. Omu mwahichile tukweji 6, haDecember 18, 1950, zango yatusambishile. Mwomwo ika? Ndumbwetu Glen How uze apwile lihako lyaVinjiho, alumbunwine ngwenyi zango yetavilile ngwayo vikokojola vyalumbununa kuneha ndombo naulyanyi kufulumende. Oloze yize talakiti “kayapwile namazu akwepula vikokojolako, ngachize vyuma vahanjikile kavyahokwele jishimbiko.” Ndumbwetu How ambile nawa ngwenyi: “Ngwamwene nameso ami kapu omu livoko lyaYehova lyatukafwile vatusambise.” *

¹⁶ Jila vavatwililemo echi chihande kuzango yayinene yasolwele nge Wangana waKalunga unafungulula. Yasokolwele jila yakuvatwilamo vihande vyeka 122 vize vavangijikilile Vinjiho muQuebec. Kaha nawa jila kaneyi yasolwele nge vatu muCanada namafuchi aze vayulilenga kulifuchi lyaBritain vapwile jino vakulihehwa kuhanjika vyeshovyo vanasake kufulumende. Kusamba mulonga kana chakumishile vikokojola muQuebec vize vaka-chachi vanehele hakusowangiza fulumende yiyanjise Vinjiho jaYehova. *

17. Jifulumende jimwe jinasakenga ngachilihi kuhonesa mulimo wetu wakwambulula?

¹⁷ Ngana muze chapwile kuli vaka-Kulishitu vakulivanga, vangamba jaYehova makumbi ano ‘kavapwa vaka-kusekasana  mazu aKalungako.’ (Tangenu Wavaka-Kolinde 2, 2:17.) Chipwe ngocho, jifulumende jimwe jeji kufwila kukanyisa mulimo wetu hakuzachisa jishimbi jakusekasana. Tuchishimutwilenu vihande vivali vasopele kuzango mangana tumone numba nge Vinjiho jaYehova vapwa vaka-kusekasana nyi nduma.

18, 19. Vaka-fulumende muDenmark vasakile kuhonesa ngachilihi mulimo wakwambulula?

¹⁸ Denmark. HaOctober 1, 1932, fulumende yahakileko lushimbi lwakuvuluka nge wapwile mulonga kulanjisa mikanda chakuzeneka kutambula mukanda wakuvetavisa. Vandumbwetu kavatambwile mukanda kanako. Lichako, vandumbwetu 5 vapwile nakwambulwila munganda yaRoskilde, yize yapwile kusulo yaCopenhagen kafwe jikilomita 30 kufuma munganda kaneyi. Kuheta kuchingoloshi, ndumbwetu August Lehmann kasolokeleko. Vamukwachile kutupokola mwomwo ngwavo kapwile namukanda wakumwitavisa kulanjisa mikandako.

¹⁹ HaDecember 19, 1932, ndumbwetu August Lehmann vamutwalile kuzango yakusopela. Ambile ngwenyi ahanyinenga vatu mikanda yahanjika haMbimbiliya oloze kalanjishilengako. Zango yakusopela yetavilila, kaha vambile ngwavo: “Ou mutu . . . eji kuhananga mikanda vatu, oloze keshi kuwanyinaho nganyoko. Eji kulizachilanga milimo yenyi nakuwana jimbongo jakulikafwa najo.” Kaha vahakwilile Vinjiho hakwamba ngwavo mulimo anakuzata Lehmann “kawapwa kusekasanako.” Chipwe ngocho, vaka-kole vapwile nakufwila kuhonesa mulimo wakwambulula wavatu jaKalunga. (Samu 94:20) Kaha vatwalile chihande kana kuzango yayinene mangana vavahonese. Uno vandumbwetu valingile ngachilihi?

20. Zango yayinene yamuDenmark yavatwile ngachilihi chihande, kaha vandumbwetu valingile ngachilihi?

²⁰ Omu kwasalile makumbi amandende nakuya kuzango yayinene, Vinjiho muDenmark vazanyine chikuma mumulimo wakwambulula. LyaChivali haOctober 3, 1933, eyi zango yavatwile chihande. Yetavilile vyuma vakukulwile vaka-zango yayindende ngwavo ndumbwetu August Lehmann kahokwele jishimbiko. Echi chasolwele nge Vinjiho vavetavishile vatwaleho lika kwambulula chakuzeneka kulizakamina. Hakusolola kusakwilila chavo kuli Yehova, vandumbwetu vatohwesele chikuma mulimo wavo wakwambulula. Kufuma vene haze, vandumbwetu mulifuchi lyaDenmark vanalizachilanga milimo yavo yakushipilitu chakuzeneka kuvakanyisa kufulumende.

21, 22. Zango yayinene muU.S. yavatwile ngachilihi chihande chaNdumbwetu Murdock?

²¹ United States. LyaSondo, February 25, 1940, ndumbwetu Robert Murdock, Jr., uze apwile payiniya navakwavo 7 vavakwachile omu vapwile nakwambulwila munganda yaJeannette, kwakamwihi naPittsburgh, muPennsylvania. Vavahanyine mulonga hakuhana mikanda chakuhona kutambula mukanda wakuvetavisa. Kaha vatwalile chihande chavo kuzango yayinene muU.S.

 ²² HaMay 3, 1943, eyi zango yayulile chihande kana nakuhakwila Vinjiho. Yambile ngwayo kutambula mukanda wakuvetavisa nachipwa “kuvafwetesa halisesa lize vavahana lyehi mujishimbi.” Eyi zango yayinene yakukulwile ngwayo chapwile chakuhenga “kukanyisa vatu kuhanjika havyuma vafwelela.” Kweseka navyuma vahanjikile vatu vavavulu muzango, Chambamilonga wamunene William O. Douglas ahanjikile ngwenyi mulimo veji kuzatanga Vinjiho jaYehova “wapwa wakwambulula mujimbu nakuhana vatu mikanda yakwitava.” Ambile nawa ngwenyi: “Vatu vatela kumona ou mulimo kupwa waulemu . . . ngana muze chapwa kuya kuchachi nakunangula.”

23. Milonga twasambile mu 1943 yinakutukafwa ngachilihi makumbi ano?

²³ Eyi zango yasambishile vatu jaKalunga hachihande chachinene. Echi chasolwele hatoma nge twapwa tuvaka-kwambulula Wangana, keshi tuvaka-kusekasanako. Vinjiho jaYehova vapwile navihande 13 kuzango, kaha halikumbi lize mu 1943, vasambile muvihande 12, kuhakilako vene nachize chandumbwetu Murdock. Jila vayulililemo vihande kana yinatukafwe tusambe muvihande vize tunasoponga kujizango navaka-kole jetu hakusaka cheka kutukanyisa kwambulula mujimbu waWangana hasanga nakuzuvo hizuvo.

24. Tweji kulinga ngachilihi nge fulumende yinakanyisa mulimo wetu wakwambulula?

²⁴ Etu vangamba jaYehova tweji kusakwililanga chikuma nge jifulumende najitwitavisa kwambulula mujimbu wamwaza. Oloze nge fulumende yinakanyisa mulimo wetu wakwambulula, tweji kuwanangako jijila jeka mangana tutwaleho lika kwambulula nge chinahase. Ngana muze chapwile kuli vaposetolo, nayetu “twatela kwononoka Kalunga hakupwa ikiye muka-kuyula, kuhambakana vatu.” (Vili. 5:29; Mateu 28:19, 20) Chipwe ngocho, tweji kutwalanga vihande kana kujizango mangana vatwitavise tutwaleho kuzata mulimo wetu. Tutalenu havyakutalilaho vivali.

25, 26. Vyuma muka vyalingishile Vinjiho vayenga kuzango yayinene muNicaragua, kaha chihande kana vachivatwile ngachilihi?

²⁵ Nicaragua. HaNovember 19, 1952, ndumbwetu Donovan Munsterman uze apwile kamishonali kaha nawa muka-kutwaminyina mutango, ayile kuofesi yatala hali vamwiza muManagua. Vamusanyikile kuli mukulwane waofesi kana, Arnoldo García. Uze mukulwane alwezele Donovan ngwenyi Vinjiho jaYehova vosena muNicaragua “vanavakanyisa kuzata mulimo wavo wakulweza vatu vyuma vafwelela.” Amuhulishile amulumbunwine ovyo vanavakanyishila, kaha ikiye amukumbulwile ngwenyi, fulumende kayetavishile Vinjiho kuzata mulimo wavo mulifuchi linoko, mwomwo vatu vavamwenenga nge vapwile vaka-kwazana muvihande vyalifuchi nachiyulo. Uno vatu muka vatuvangijikilile vyuma kana? Vapwile vatwamina vamukwitava chaKatolika.

²⁶ Hahaze vene, ndumbwetu Munsterman atwalile chihande kana kumutango watala vihande vyafulumende nakwitava nakuli twamina walifuchi Anastasio Somoza García, oloze kavamukafwileko. Kaha vandumbwetu valumwineko jila yakwambulwilamo. Kavakungulukililenga cheka muZuvo yaWanganako  oloze mutumazavu, kaha nawa kavayilenga nakwambulwila mumikwakwako, oloze vambulwilenga mukuswama. Chipwe ngocho, vasonekele mukanda kuzango yayinene yaNicaragua nakulomba lisesa lyakuvetavisa cheka vambulule. Kaha mumapapilo amijimbu vasonekelemo echi chihande chakukanyisa Vinjiho nauze mukanda vasonekele Vinjiho wakusaka kuvetavisa cheka. Ngocho zango yayinene yetavilile vasope chihande kana. Vyuma muka vyafuminemo? HaJune 19, 1953, zango yayinene yavatwile chihande kana nakuhakwila Vinjiho. Eyi zango yawanyine nge kuvakanyisa kwambulula chapwile kuhokola lushimbi vahana kuvatu lwakuhanjika hatoma vyuma vafwelela. Zango yambile nawa ngwayo fulumende yaNicaragua yatela kusuula Vinjiho vazate mulimo wavo nge muze chapwile hakavanga.

27. Mwomwo ika vatu vamulifuchi lyaNicaragua valikomokelele omu zango yavatwililemo chihande, kaha vandumbwetu vakukulwile ika?

²⁷ Vatu vamuNicaragua valikomokelele hakuwana nge zango yayinene yahakwililile Vinjiho. Mwomwo lwola lwosena zango yahakwililenga vatwamina vamukwitava hakufwila kutwama navo mukuunda. Oloze halwola kanelu vachambamilonga vahakwilile Vinjiho. Vandumbwetu vamwene ngwavo vasambile mulonga kana mwomwo Mwangana wavo avakingilenga omu vambulwilenga mujimbu wamwaza.—Vili. 1:8.

28, 29. Vyuma muka vyasolokele muZaire muji 1980?

²⁸ Zaire. Muji 1980, mulifuchi lyaZaire lize vanakuvuluka jino ngwavo Democratic Republic of Congo mwapwile Vinjiho 35,000. Kuzovoloka kana chalingishile liuka litavise kutungamo mutango mangana mulimo uyenga kulutwe. MuDecember 1985, munganda yaKinshasa mwapwile kukunguluka chamafuchi, kaha kwejile vatu 32,000 vakufuma kumafuchi amavulu mukaye kosena. Oloze kutwala muze, vangamba jaYehova vaputukile kumona ukalu. Ukalu muka?

²⁹ Ndumbwetu Marcel Filteau, kamishonali wakufuma kuQuebec muCanada, uze ahichile muluyanjisa mulifuchi lyavo kunyima ejile nakuzachila muZaire. Ahanjikile vyuma vyasolokele, ngwenyi: “HaMarch 12, 1986, vandumbwetu vapwile nakutwaminyina vatambwile mukanda wakuvalweza ngwavo vanasoko liuka lyaVinjiho jaYehova muZaire.” Mukanda kana vausonekele kuli twamina walifuchi Mobutu Sese Seko.

30. Komiti yaMutango yahunananyine hachihande muka, kaha vasakwile kulinga ika?

³⁰ Lichako, vavilikile hachisaji ngwavo: “Kufuma likumbi lyalelo, katweshi kevwa cheka Vinjiho jaYehovako muno muZaire.” Kufumaho, vaputukile kuvayanjisa. Vapuzwile jiZuvo jaWangana, kaha vandumbwetu vavapukwile vyuma, nakuvakwata, nakuvaveta nakuvatwala mutumenga. Navana vaVinjiho vavatwalile mutumenga. Kuheta haOctober 12, 1988, fulumende yatambwile vikumba vyosena vyaliuka, kaha maswalale natupokola vayile nakutwama haofesi yamutango. Vandumbwetu vasonekele mukanda nakuutuma kuli twamina walifuchi Mobutu mangana avetavise vakahanjike hachihande kana, oloze kavakumbulwileko. Shikaho Komiti yaMutango  yatwamine hamavu nakushinganyeka vyakulinga. Valihulishile ngwavo, “Tuyenga kuzango yayinene nyi tuvandamine?” Ndumbwetu Timothy Holmes, uze apwile kamishonali kaha nawa muka-kuwanyisa Komiti yaMutango halwola kana, ambile ngwenyi, “Twalombele kuli Yehova atukafwe.” Omu komiti yahunananyine nakulomba hachihande kana, vamwene ngwavo kalwapwile lwola lwakutamo kusopa chihande kanako. Shikaho vahakile jino muchima kukuzakama chikuma vandumbwavo nakutwalaho lika mulimo wakwambulula.

31, 32. Zango yayinene yayulile ngachilihi chihande muZaire, kaha echi chakafwile ngachilihi vandumbwetu?

³¹ Omu mwahichile myaka yayivulu, Vinjiho kavavayanjishilenga chikumako, kaha nawa vatu mulifuchi kana vavumbikilenga lisesa lyavatu. Ngachize, Komiti yaMutango yamwene ngwavo elu lwapwile jino lwola lwamwaza lwakutwala chihande chavo kuzango yayinene yakusopela muZaire. Kaha zango yetavilile kusopa chihande chavo. Kuheta haJanuary 8, 1993, myaka kafwe 7 kufuma haze twamina walifuchi akanyishile mulimo wetu, zango yakukulwile ngwayo fulumende yalimbenjele hakukanyisa Vinjiho jaYehova kuzata mulimo wakwambulula. Achishinganyekenu chuma kanechi valingile vachambamilonga! Vahakile kuyoya chavo muponde, hakukana vyuma ahanjikile twamina walifuchi. Ndumbwetu Holmes ambile ngwenyi, “Twamwene chikupu omu Yehova eji kwalumunanga vyuma.” (Ndanye. 2:21) Chuma kana chakolezezele lufwelelo lwavandumbwetu. Vatachikijile ngwavo Mwangana wavo Yesu, apwile nakutwaminyina vatu jenyi vatachikize lwola najila yamwaza yakukumishilamo chihande kana.

³² Omu vavetavishile, ofesi yamutango jino vayitavishile kuneha vamishonali, nakutunga mutango wauhya nakuneha  mikanda yahanjika haMbimbiliya mulifuchi. * Echi chinakutwivwisa chikuma kuwaha etu vangamba jaKalunga mukaye kosena hakumona omu Kalunga anakukingilamo vangamba jenyi kushipilitu.—Isa. 52:10.

33. Vyuma muka tunanganyala hakuhituluka muvihande vanasoponga vandumbwetu?

³³ Vihande vyakujizango tunashimutwila vinasolola hatoma nge Yesu natesengamo mazu enyi akwamba ngwenyi: “Ami nangukamihana mazu namangana aze navakahona vaka-kumimanyina nakole vosena kulingulula chipwe kuhamikako.” (Tangenu Luka 21:12-15.) Lwola lumwe Yehova nakatulanga vaNgamalyele vamakumbi ano mangana akinge vatu jenyi, chipwe kulingisa vachambamilonga namahako vahakwile vatu jaKalunga. Yehova nahonesanga vitwa vyavaka-kole jetu. (Tangenu Isaya 54:17.) Vaka-kole kaveshi kuhasa kuhonesa mulimo waKalungako.

34. Mwomwo ika kusamba chetu kujizango chinapwila chakulipwila, kaha chasolola ika? (Talenu nawa lipwata lyakwamba ngwavo, “ Vihande Vyavinene Twasambile Vize Vyalingishile Mulimo waKwambulula Uzovoloke.”)

³⁴ Mwomwo ika kusamba chetu kujizango chinapwila chakulipwila? Achishinganyekenu hachumechi: Vinjiho jaYehova kavapwa vavalemu chipwe kupwa nangolo jakuvunda vatuko. Chakutalilaho, katweshi kwazana muvihande vyamapolitiki vyamulifuchiko. Kaha nawa Vinjiho vavavulu vaze veji kutwalanga kujizango jakusopela vavamona kupwa “vatu vakuzeneka kulinangula kaha nawa hivatu vanganavene.” (Vili. 4:13) Shikaho, kweseka navishinganyeka vyavatu, vaka-jizango kavatela kutuhakwila etu nakupayisa mauka akwitwava navaka-mapolitikiko. Chipwe ngocho, kakavulu jizango jakusopela jinatuhakwilanga. Echi chinasolola nge tweji kutambukanga ‘kumeso aKalunga, nakulikata naKulishitu.’ (Koli. 2, 2:17) Ngocho tunetavila mazu ahanjikile kaposetolo Paulu ngwenyi: “Yehova ikiye muka-kungukafwa, kangweshi kwivwa womako.”—Hepe. 13:6.