1, 2. (a) Putu vene kushikulu, vangamba jaYehova vanalivwisanga kuwaha kulinga vyuma muka? (b) Vyuma muka amona Yehova kupwa vyavilemu chikuma?

PUTU vene kushikulu, vangamba jaYehova vakushishika vanatungunga jizuvo jinanehenga kavumbi halijina lyaKalunga. Chakutalilaho, vaIsalele valisuwile kuhana vyuma vyakutungisa tavanaku nakuyitunga.—Kulo. 35:30-35; 36:1, 4-7.

² Yehova kamona vyuma veji kuhananga vatu vyakukundwiza mulimo wakutunga kupwa vyavilemu chikuma chipwe kumunehela chikuma kavumbiko. (Mateu 23:16, 17) Oloze chuma amona kupwa chachilemu chikuma shina muchima wavangamba jenyi wakufwila kumulemesa, kuhakilako nakulisuula chavo chakumuzachila natwima. (Kulo. 35:21; Mako 12:41-44; Chimo. 1, 6:17-19) Mazu kana apwa amuchano. Mwomwo ika? Mwomwo jizuvo veji kutunganga jeji kupuzukanga. Chakutalilaho, tavanaku natembele vize vatungile kavyatwamako makumbi anoko. Oloze Yehova kavulyama vangamba jenyi vakushishika vaze vazachile nangolo hakutunga vyuma kanako.—Tangenu Wavaka-Kolinde 1, 15:58; WavaHepeleu 6:10.

3. Vyuma muka natushimutwila mukapetulu uno?

³ Vangamba jaYehova vamakumbi ano navakiko vanazatenga nangolo kutunga vihela vyakulemesela Kalunga. Kaha vyuma tunatesamo hakututwaminyina kuli Mwangana wetu Yesu Kulishitu vinapu vyakulipwila. Chapundu vene, Yehova nakisula milimo yetu. (Samu 127:1) Mukapetulu uno natushimutwila hamilimo tunazate nomu yinanehe kavumbi halijina lyaYehova. Natwivwa nawa vyuma vanahanjika vandumbwetu vamwe vanazananga mumulimo kanou wakutunga vihela vyakulemesela Kalunga.

4. (a) Mwomwo ika kunakusakiwila vihela vyavivulu vyakulemesela Kalunga? (b) Mwomwo ika jiofesi jamitango jimwe vanajisokela? (Talenu lipwata “ [lya]Kutunga Mitango Kweseka Nakwalumuka chaVyuma.”)

⁴ Ngana muze twashimutwilanga muKapetulu 16, Yehova asaka tulikungulwilenga hamwe nakumulemesa. (Hepe. 10:25) Kukunguluka cheji kujikijisanga lufwelelo lwetu nakutukunyula tufwile chikuma kwambulula mujimbu. Hakuwana nge tuli kusongo yamakumbi akukuminyina, Yehova  ali nakutukundwiza tuzate chikuma mumulimo wakwambulula. Echi chinakulingisa vatu vavavulu vezenga kuliuka lyenyi mwaka himwaka. (Isa. 60:22) Hakuwana nge vatu vanakuvulilako, ngachize kunakunasakiwa jizuvo jajivulu jakusoneka mikanda yahanjika haMbimbiliya. Kunakusakiwa nawa vihela vyakulemesela Kalunga vyavivulu.

5. Mwomwo ika zuvo yakulemesela Kalunga yatamo kuyivuluka ngwetu Zuvo yaWangana? (Talenu nalipwata “ [lya]Chachi yaKumunyika Chachihya.”)

⁵ Hakavanga Vaka-Kulinangula Mbimbiliya vamwene kulema chakutunga vihela vyakulemesela Kalunga. Chasoloka nge chihela chatete vatungile chapwile muWest Virginia, U.S.A., mu 1890. Kuheta muji 1930 vatu jaYehova vatungile nakutungulula jizuvo jajivulu, oloze kavajilukile lijinako. Mu 1935 Ndumbwetu Rutherford ayile kuHawaii kuze vapwile nakutunga zuvo kwakamwihi naofesi yamutango. Vamuhulishile ngwavo, “Eyi zuvo natuyivuluka ngwetu ika?” Ndumbwetu Rutherford avakumbulwile ngwenyi: “Ngunashinganyeka ngwami tuyivuluke ngwetu ‘Zuvo yaWangana,’  mwomwo tunakwambulula mujimbu wamwaza waWangana.” (Mateu 24:14) Lijina kana likiko jino veji kuvulukanga jizuvo veji kukungulukilanga vatu jaYehova mukaye kosena.

6, 7. JiZuvo jaWangana vatungile muwashiwashi jahanyine unjiho muka?

⁶ Kuheta muji 1970 jiZuvo jaWangana japwile nakusakiwa chikuma. Vandumbwetu muUnited States valinangwile jila yayashi yakutungilamo washi jizuvo jaulangaji hamakumbi amandende kaha. Kuheta mu 1983 vatungile jiZuvo jaWangana kafwe 200 muUnited States namuCanada. Hakusaka kutesamo mulimo, vandumbwetu vatungile jikomiti jakutungisa jamungalila. Jila kaneyi yawahile chikuma, kaha mu 1986 Lizavu Lyakutwaminyina lyetavishile jila kana, ngocho mu 1987 vatungile jiKomiti Jakutungisa JamuNgalila 60 muUnited States. * Kuheta mu 1992 eyi komiti vayitongwele namuArgentina, Australia, France, Germany, Japan, Mexico, South Africa, namuSpain. Chikupu vene twatela kukundwiza ava vandumbwetu vanakutunganga jiZuvo jaWangana najiZuvo jaKukunguluka Chachinene mwomwo milimo kana yapwa yajila.

⁷ Eji jiZuvo jaWangana vatungile muwashiwashi jahanyine unjiho kuvatu mungalila. Chakutalilaho, mulipapilo limwe lyamijimbu muSpain mwapwile chihande chakwamba ngwavo, “Lufwelelo Lweji Kututula jiPili.” Eli lipapilo lyavulukile haZuvo yaWangana vatungile mumbaka yaMartos ngwalyo: “Vatu vanahase kulisuula ngachilihi vafume kujingalila javo nakwiza kuno kuMartos, mangana vatunge zuvo  yipwaha yaulangaji muwashiwashi ngana mukaye kano kanazale navatu valizanga vavene?” Lize lipapilo lyapwile namazu ahanjikile Chinjiho umwe ngwalyo: “Tunakulinga ngocho mwomwo twapwa tuvatu vanangula kuli Yehova.”

8. Mu 1999 Lizavu Lyakutwaminyina lyawahishile jila muka yayihya, kaha mwomwo ika?

⁸ Mumyaka yakukokela ku 2000, mumafuchi akuhutwa vatu vejile chikuma muliuka lyaYehova. Vandumbwetu muvikungulwilo vazachile nangolo nakutunga vihela vyakukungulukila. Oloze mumafuchi amwe, vandumbwetu vavasehelenga nakuvahenda mwomwo yakukungulukila mujiZuvo jaWangana jaupukuvele. Kuputuka mu 1999 Lizavu Lyakutwaminyina lyawahishile jila yakwanguhwishilamo jila yakutungilamo jiZuvo jaWangana mumafuchi akuhutwa. Vandumbwetu vamumafuchi aluheto vatumine jimbongo mangana vakafwe vandumbwavo ‘vateseke hamwe.’ (Tangenu Wavaka-Kolinde 2, 8:13-15.) Kaha nawa vandumbwetu vakumafuchi osena valisuwile kwazana mumulimo wakutunga.

9. Mulimo muka wasolokele nge waunene chikuma, kaha vauteselemo ngachilihi?

⁹ Hakavanga mulimo kana wasolokele nge waunene chikuma. Kuheta mu 2001, vawanyine nge kunakusakiwa jiZuvo jaWangana jakuzomboka 18,300 mumafuchi 88. Milimo kana yinatwashiwila kuyizata mwomwo shipilitu yaKalunga naMwangana wetu Yesu Kulishitu vanatukafwenga. (Mateu 19:26) Mumyaka kafwe 15, kufuma mu 1999 nakuheta mu 2013, vatu jaKalunga vanatungu jiZuvo jaWangana  jakuheta ku 26,849. * Yehova anakutwalaho lika kukisula mulimo wakwambulula, mwomwo kuheta mu 2013 kuchapwile lika nakusakiwa jiZuvo jaWangana kafwe 6,500 mumafuchi kana, kaha kuchili nakusakiwa lika jiZuvo jaWangana jikwavo.

10-12. JiZuvo jaWangana jinakunehanga ngachilihi kavumbi halijina lyaYehova?

¹⁰ Uno eji jiZuvo jaWangana vatungile janehele ngachilihi kavumbi halijina lyaYehova? Ofesi yamutango muZimbabwe yambile ngwayo: “Mukakweji umwe kaha uze vatutungililile Zuvo yaWangana, vatu vavulile chikuma.” Mumafuchi amavulu vatu kaveshi kukasunuka kwiza nakukunguluka nayetuko kuvanga kaha nge vanamono Zuvo yaWangana yamwaza. Nge Zuvo yaWangana yayihya vanayitungu, vatu veji kuvulanga chikuma, kaha kweji kusakiwanga cheka yikwavo. Chuma cheji kukokanga vatu kwiza kuli Yehova keshi ulangaji wazuvo kahako, oloze nazangi yakufuma kumuchima yize veji kusololanga vaka-kutunga. Tushimutwilenu havyakutalilaho vimwe.

¹¹ Indonesia. Omu lunga umwe atachikijile ngwenyi vaze vapwile nakutunga Zuvo yaWangana vapwile vaka-kuzata mulimo wakulisakila, ambile ngwenyi: “Enu vatu munangukomwesa. Muvosena munasuuluka nakuzata nangolo numba tuhu kaveshi kumifwetako. Kakweshi liuka lyeka lyakwitava natwesekesa kuliuka lyenuko.”

¹² Ukraine. Pwevo umwe uze ahichilenga kuze vapwile nakutunga Zuvo yaWangana atachikijile ngwenyi vaka-kutunga vapwile Vinjiho jaYehova, kaha vapwile nakutunga Zuvo yaWangana. Ambile ngwenyi: “Songo yami apwa Chinjiho, kaha eji kuhanjikanga chikuma hali Vinjiho jaYehova. Hakumona ou mulimo munakukilikita, nayami ngunakusaka kupwa mutanga kaneyi yakushipilitu. Ngunamono omu munakusolola zangi yamuchano.” Ou pwevo etavilile chilongesa chaMbimbiliya, kaha kuheta mu 2010 vamumbapachishile.

13, 14. (a) Vyuma muka munalinangula kumazu vahanjikile valunga napwevo hakumona Zuvo yaWangana vapwile nakutunga? (b) Vyuma muka mwatela kulinga mangana chihela chenu chakulemesela Kalunga chinehe kavumbi halijila lyaYehova?

¹³ Argentina. Lunga umwe namuka-mahyenyi vayile kuli ndumbwetu uze apwile nakutwaminyina mulimo wakutunga. Lunga amuhulishile ngwenyi, “Tunamimononga omu munapunga nakutunga, kaha . . . tunakusaka kulinangula vyaKalunga muzuvo yino.” Kaha ambile ngwenyi, “Ika twatela kulinga numba tutengamo kwizanga nakukunguluka nenu?” Vavalwezele vaputuke chilongesa chaMbimbiliya, oloze vambile ngwavo kuvanga kaha kuvanangula natanga yavo yosena. Uze ndumbwetu etavilile.

¹⁴ Pamo kamwazanyine mumulimo wakutunga Zuvo yenu yaWanganako. Chipwe ngocho munahase kulingako vyuma vimwe mangana chihela kana chinehe kavumbi halijina lyaYehova. Chakutalilaho, muhase kulanyako vilongesa  vyenu vyaMbimbiliya, navatu vaze mweji kukindulukilanga, navatu veka mangana mukunguluke navo hamwe haZuvo yaWangana. Kaha nawa munahase kwazana mumulimo wakuwahisa Zuvo yenu yaWangana. Munahase nawa kunoneka vyuma mangana muhaneko jimbongo jakukundwiza mulimo wakuwahisa Zuvo yenu yaWangana chipwe jakukafwa kutunga jiZuvo jaWangana kuvihela vyeka mukaye. (Tangenu Wavaka-Kolinde 1, 16:2.) Vyuma vyosenevi vyeji kwalisanga Yehova.

15-17. (a) Veya veji kuzatanga chikuma mumulimo wakutunga? (b) Vyuma muka munalinangula kumazu avandumbwetu vaze vanazananga mumulimo wakutunga mumafuchi amavulu?

¹⁵ Vandumbwetu muvikungulwilo veji kulisuulanga kutunga jiZuvo jaWangana, najiZuvo jaKukunguluka Chachinene namitango. Chipwe ngocho veji kuvakafwanga kuli vandumbwetu vakufuma kumafuchi eka vaze vapwa vasachitetahundu mumulimo wakutunga. Ava vandumbwetu vakulisuula veji kusungamisanga vyuma mangana vazate mulimo kana havyalumingo vyavivulu. Veka vanalisuula kuzata hamyaka yayivulu kuvihela vyakulisezaseza.

¹⁶ Numba tuhu vandumbwetu vaze veji kuyanga nakuzachila kumafuchi eka veji kumonanga ukalu, oloze veji kulivwisanga kuwaha. Chakutalilaho, Timo naLina vayile nakutunga jiZuvo jaWangana, jiZuvo jaKukunguluka Chachinene najiofesi jamitango kuAsia, Europe, nakuSouth America. Timo ambile ngwenyi, “Hamyaka 30 vananguhanenga kuzata milimo yakulisezaseza.” Puwenyi Lina uze natwame nenyi muulo hamyaka 25 ambile ngwenyi: “Ngunazachilanga hamwe nalunga lyami mumafuchi 10. Chasakiwa  lwola nakulihana numba tuhase kwijilila vyakulya vyakulifuchi kana, nalilimi, namwakwambulila vatu, nakutunga masepa.” * Uno vananganyala hakulisuula tahi? Lina ambile ngwenyi: “Ukalu twamwenenga unatunehela kuwahilila. Vandumbwetu vanatusolwelanga zangi nazumbu, kaha tunamono ngwetu Yehova atuzanga. Tunamono nawa omu anatesamo mazu ahali Mako 10:29, 30 aze Yesu ahanjikile kuli tumbaji twenyi. Chapundu vene, tunawane vandumbwetu vamalunga navava vamapwevo, navisemi jetu vavavulu.” Timo nawa ngwenyi, “Cheji kutwivwisanga kuwaha chikuma kuzachisa uhashi wetu kumulimo waulemu chikuma wakutohwesa vyuma vyaMwangana.”

¹⁷ Darren naSarah vaze vazanyine mumulimo wakutunga muAfrica, Asia, Central America, Europe, South America, namuSouth Pacific vamona ngwavo vananganyala vyuma vyavivulu kuhambakana vize vanaseze. Chamokomoko naukalu vanamononga, Darren ambile ngwenyi: “Chinapu hikutokwa kuzachila hamwe navandumbwetu vakumafuchi akulisezaseza. Ngunamono ngwami chikupu vene vatu jaYehova vapwa vakulinunga mukaye kosena.” Sarah ambile ngwenyi: “Ngunalinangula vyavivulu kuli vandumbwetu vavisemwa vyakulisezaseza. Hakumona muchima wavo wakufwila kuzachila Yehova cheji kungulingisa nguzate chikuma.”

18. Upolofweto wahali Samu 110:1-3 vanakuutesamo ngachilihi?

¹⁸ Mwangana Ndavichi apolofwetele ngwenyi numba tuhu vatu vaze vayula kuWangana waKalunga navamonanga ukalu, oloze “navakalihana” kuzachila Wangana. (Tangenu Samu 110:1-3.) Vosena vaze vanakuzata milimo yakukundwiza Wangana vanakutesamo mazu aupolofweto kana. (Koli. 1, 3:9) Jiofesi jamitango, najiZuvo jaKukunguluka Chachinene, najiZuvo jaWangana vanakutunga mukaye kosena hiunjiho wakusolola nge Wangana waKalunga unakuyula. Ocho kutokwa kana vayaya chakuzachila Mwangana Yesu Kulishitu mulimo uze nauneha kavumbi halijina lyaYehova!