TWAMBENGA ngwetu muli hakukunguluka chachihanda, kaha ndumbwetu wamukweze wamuchikungulwilo chenu ali nakuhoza chihande hautenda. Munakwivwa kuwaha chikuma, nakulikomokela hakumona omu Kalunga ali nakunangulanga vatu jenyi mangana vahanjike kanawa vihande. Namwanuka likumbi lyatete achikimine hakuhana chihande chakuputukilako muZuvo yenu yaWangana. Jino kufuma hakuhita muShikola yaMulimo wauPayiniya, nazovoloka chikuma. Kaha nawa kalinwaha ahitanga muShikola yaVaka-Kwambulula Wangana napuwenyi. Omu mwafuma hautenda, namumona vatu vali nakusakwilila kaha namushinganyeka omu Kalunga ali nakunangula vatu jenyi.

Mbimbiliya yahanjikile chimweza ngwayo vatu jaKalunga “navakavanangula kuli Yehova.” (Isa. 54:13) Tuli nakuyoyela mumakumbi unakutesamo upolofweto kana. Vali nakutunangula kuhichila mumikanda yetu, nahakukunguluka chachikungulwilo, nachachihanda, nachangalila, namashikola eka vatuwahishila muliuka lyaYehova. Muchihanda chino natushimutwila omu liuka linakutunangula, nakumona hatoma ngwetu Wangana waKalunga unakuyula.