1. Ika vatambwile tumbaji omu valikungulwile hamwe, kaha yavakafwile ngachilihi?

OMU tumbaji vatachikijile ngwavo Yesu nasanguka, valikungulwile hamwe nakulikolezeza umwe namukwavo. Valisokelelele muzuvo mwomwo vevwilenga woma vaka-kole javo. Omu Yesu asolokele mukachi kavo vevwile nakumuchima hwo, kaha avalwezele ngwenyi: “Tambulenu shipilitu yajila.” (Tangenu Yowano 20:19-22.) Mukuhita chamakumbi, ava tumbaji valikungulwile cheka, kaha Yehova avahingunwinyine shipilitu yajila yize yavazamishile hakuzata mulimo wakwambulula.—Vili. 2:1-7.

2. (a) Yehova eji kutuhananga ngachilihi ngolo, kaha mwomwo ika twasakiwila ngolo kana? (b) Mwomwo ika Kulemesa Kalunga mwaTanga chapwila chachilemu? (Talenu kwinyikila chamwishi nalipwata lyakwamba ngwavo “ Kulemesa Kalunga mwaTanga,” lifwo 175.)

² Nayetu tuli nakumona ukalu ngana muze chapwile kuli vandumbwetu mulikulukaji lyamyaka lyakulivanga. (Petu. 1, 5:9) Lwola lumwe, nayetu tunahase kwivwa woma vatu. Twasakiwa ngolo jakufuma kuli Yehova numba tumike nakutwalaho lika kwambulula. (Efwe. 6:10) Yehova eji kutuhananga ngolo kana kuhichila mukukunguluka chetu. Twatwama nakukunguluka chivali muchalumingo, Kukunguluka chaLikungumbuwa naChilongesa chaKaposhi Kakutalila, nakukunguluka chaChiyoyelo naMulimo waVaka-Kulishitu. * Tweji kulivwisanga nawa kuwaha kukunguluka cheka chiwana mumwaka, kukunguluka changalila, nakukunguluka chivali chachihanda, nachilika chaKwanuka Kufwa chaKulishitu. Mwomwo ika chapwila chachilemu kupwanga kukukunguluka chosenechi? Uno echi kukunguluka chaputukile ngachilihi? Twamona kukunguluka kana kupwa chachilemu tahi?

3, 4. Vyuma muka Yehova asaka kuvatu jenyi? Hanenu vyakutalilaho.

³ Putu vene kushikulu, Yehova nasakenga vatu jenyi valikungulwilenga hamwe nakumulemesa. Chakutalilaho, mu 1513 B.C.E., Yehova ahanyine Jishimbi kuli vaIsalele. Lushimbi lumwe lwavalwezele kulinganga Sambata chalumingo hichalumingo mangana tanga hitanga yilemese Kalunga nakulinangula Jishimbi. (Lushi. 5:12; 6:4-9) Omu vaIsalele vakavangijilenga elu lushimbi, jitanga jazamine kushipilitu kaha muyachi wosena wapwile wajila. Oloze omu muyachi walitwaminyinyine kukavangiza eji Jishimbi, nakusuvilila kulikungulwilanga  hamwe nakulemesa Yehova, Kalunga kavevwilile cheka uselewako.—Levi 10:11; 26:31-35; Miji. 2, 36:20, 21.

⁴ Achitalenu nawa chakutalilaho atusela Yesu. Ayilenga kusunangonga chalumingo hichalumingo halikumbi lyaSambata. (Luka 4:16) Omu Yesu afwile nakusanguka, tumbaji twenyi vatwalileho lika kulikungulwilanga hamwe numba tuhu kavapwile jino nakukavangiza lushimbi lwaSambatako. (Vili. 1:6, 12-14; 2:1-4; Loma 14:5; Kolo. 2:13, 14) Hakukunguluka kana, hakiko ava vaka-Kulishitu vamulikulukaji lyamyaka lyakulivanga valinangwilenga jindongi, nakulikolezeza, nakwalisa Kalunga kuhichila mukulomba, namazu vahanjikilenga, namyaso.—Kolo. 3:16; Hepe. 13:15.

5. Mwomwo ika tweji kuyilanga kukukunguluka chachikungulwilo, nachachihanda nachangalila? (Talenu nawa lipwata “ [lya]Kukunguluka chaMumwaka Chize Cheji Kununganga Vatu jaKalunga,” lifwo 176.)

⁵ Namakumbi ano, tweji kuyanga kukukunguluka chachikungulwilo, nachachihanda nachangalila mangana vakatuzamise kushipilitu, nakulikolezeza navakwetu, nakusolola ngwetu twakundwiza Wangana waKalunga. Chachinenenyi, tweji kulemesanga Yehova kuhichila mukulomba, nahakuhanjikaho nakwimba myaso. Numba tuhu jila tweji kukungulukilangamo yalihandununa nayize yavaIsalele, navaka-Kulishitu vamulikulukaji lyamyaka lyakulivanga, oloze nachikiko chapwa chachilemu. Uno kukunguluka chamakumbi ano chinazovoloka ngachilihi?

6, 7. (a) Kukunguluka chetu vachihakilako ika? (b) Kukunguluka chapwile ngachilihi kulizavu hilizavu?

⁶ Omu Ndumbwetu Charles Taze Russell aputukile kutondatonda muchano wamuMazu aKalunga, amwene ngwenyi chapwile chachilemu kulikungululanga navakwavo vaze vapwile navishinganyeka vyovimwe. Mu 1879, ou ndumbwetu asonekele ngwenyi: “Ami navakwetu muPittsburgh tweji  kulikungululanga lyaSondo nakuhehwojola Visoneka.” Vaka-kutanga Kaposhi Kakutalila vavakolezezele valikungulwilenga hamwe, kaha mu 1881 kwapwilenga kukunguluka haSondo hiSondo nahaChitatu hiChitatu muPittsburgh, namuPennsylvania. Kaposhi Kakutalila kaNovember 1895 ahanjikile ngwenyi chuma chachinene valikungulwililenga shina “kulikata navakwavo vaka-Kulishitu, nakulisolwela zangi, nakulitunga” nakulikolezeza.—Tangenu WavaHepeleu 10:24, 25.

⁷ Hamyaka yayivulu, lizavu hilizavu lyaVaka-Kulinangula Mbimbiliya vanonekelenga jila yakukungulukilamo namapapa vatelele kuliwana muchalumingo. Chakutalilaho, mukanda umwe wafumine kulizavu limwe muUnited States mu 1911 wambile ngwawo: “Tweji kukungulukanga mapapa katanu muchalumingo.” Vakungulukilenga lyaMande, naChitatu, naChitanu, kaha lyaSondo vakungulukilenga kavali. Mukanda weka wafumine kulizavu lyamuAfrica mu 1914 wambile ngwawo: “Tweji kukungulukanga kavali mukakweji, kaha tweji kukungulukanga kufuma lyaChitanu swi nahaSondo.” Oloze mukuhita chamyaka, vaputukile kukunguluka nganomu tunakulinga oholyapwa. Tushimutwilenu jino omu chaputukile kukunguluka chosena.

8. Mitwe yavihande muka vahanjikilenga kunyima?

⁸ Kukunguluka chaLikungumbuwa. Mu 1880, mwaka wakavangijileho kufuma haze ndumbwetu Russell aputukile kusoneka mangazini yaKaposhi Kakutalila, alondezezele chakutalilaho chaYesu kaha ayile nakwambulula kujingalila jakulisezaseza. (Luka 4:43) Omu apwile haungeji kana, ndumbwetu Russell aputukile kukunguluka tunakuvuluka oholyapwa ngwetu Kukunguluka chaLikungumbuwa. Kaposhi Kakutalila umwe ahanjikile ngwenyi, ndumbwetu Russell “evwilenga kuwaha kuhanjika chihande kulikungumbuwa ‘haVyuma vyakupandama kuwangana waKalunga.’” Mu 1911, omu vatungile vikungulwilo vyavivulu mumafuchi akulisezaseza, chikungulwilo hichikungulwilo vachilwezele chisakule vaka-kuhanjika vihande vakuhya nakuvatuma kujingalila jahakamwihi vakahanjike vihande 6 vyahanjikilenga hakusopesa nahandando yakusokola. Hakukumisa chihande, vavilikilenga mutwe wachihande wachalumingo nachikavangizaho nandumbwetu mwakachihanjika.

9. Kukunguluka chaLikungumbuwa chinalumukanga ngachilihi mumyaka yinafumuho, kaha namuchikundwiza ngachilihi?

⁹ Mu 1945, Kaposhi Kakutalila ahanjikile ngwenyi nakupwanga jino Kukunguluka chaLikungumbuwa mukaye kosena, chize nachihanjikanga havihande vyaMbimbiliya 8 vize “navishindakanyanga haukalu nausolokanga.” Hamyaka yayivulu vandumbwetu vahanjikilenga vihande vize vavatuminyinyinenga kuli ndungo wakushishika navize vawahishilenga vavene. Mu 1981, vaka-kuhanjika vihande vavalwezelenga vahanjike kaha vihande vize vavatuminyinyinenga kuchikungulwilo. * Vihande vimwe vavishimutwilenga nalizavu chipwe  kulinga vimweso, oloze kuheta mu 1990 vihande vyalikungumbuwa vavihanjikilenga chakuzeneka kushimutwila navatu. MuJanuary 2008 vihande vyalikungumbuwa vavihanjikilenga jino muminyutu 30 muchishishisa chakuvihanjika muminyutu 45. Numba tuhu vanakehesako lwola, oloze vihande vize vanawahisa kanawa vyeji kutukafwa tufwelele muMazu aKalunga nakutunangula vyaWangana waKalunga. (Chimo. 1, 4:13, 16) Uno mweji kulanyanga vatu vaze mweji kwambulwilanga naveka mangana vezenga nakwivwilila kuvihande kanevi vyaMbimbiliya tahi?

10-12. (a) Vyuma muka vanalumunanga muchilongesa chaKaposhi Kakutalila? (b) Vihula muka mwatela kulihulisa?

¹⁰ Chilongesa chaKaposhi Kakutalila. Mu 1922, ofesi yamutango yatumine vandumbwetu vaze vapwile vapayiniya kuvikungulwilo vakahane vihande, nakutwaminyina mulimo wakwambulula, nakuvalweza nge vatela kupwanga nachilongesa chaKaposhi Kakutalila chalumingo hichalumingo. Vandumbwetu vetavilile vyuma vavalwezele, mwomwo hakavanga chilongesa chaKaposhi Kakutalila vachilingilenga mukachi kachalumingo chipwe lyaSondo.

¹¹ Kaposhi Kakutalila waJune 15, 1932 avulukile jila yakulingilamo chilongesa kana. Vavalwezele ngwavo vatelele kukavangiza muze valingilenga vaka-Mbetele, kaha ndumbwetu umwe ikiye atelele kutwaminyina chilongesa kana. Vandumbwetu vatatu vatwamine hautenda nakulishisashisa kutanga jipalangalafu. Halwola kana vihande kavyapwile navihulako, kaha uze atwaminyinyinenga ahulishilenga vali mulizavu vatunge vihula kufuma hamujimbu vanatange. Kaha uze muka-kutwaminyina alwezele vaze vapwile mulizavu vakumbulule. Nge kuli vyakuhakilaho, kaha muka-kutwaminyina avihanjikilenga “mukavatu.”

¹² Halwola kana chikungulwilo hichikungulwilo chasakwilenga chihande mumangazini chize vasakile vavavulu  kulinangula. Oloze Kaposhi Kakutalila waApril 15, 1933 alwezele vikungulwilo vyosena vilinangule vihande vize vyapwilenga mukaposhi wakalinwaha. Mu 1937 vavalwezele valinangulengavyo lyaSondo. Kaposhi Kakutalila waOctober 1, 1942 alwezele vandumbwetu vatwaminyinenga chilongesa kana nganomu tunakulinga makumbi ano. Ahanjikile ngwenyi, kwishi yajipalangalafu nakupwanga vihula vize vatela kuzachisa, kaha chilongesa chatela kumbata ola yimwe. Akolezezele nawa vandumbwetu vakumbululenga “mumazu avo,” keshi kutanga mazu amupalangalafuko. Kaposhi Kakutalila hichinoma chize ndungo wakushishika ali nakuzachisa hakutuhana kulya chakushipilitu halwola lwakutamo. (Mateu 24:45) Mutu himutu atela kulihulisa ngwenyi: ‘Kutala ngweji kuliwahishilanga chimweza vyachilongesa chaKaposhi Kakutalila chalumingo hichalumingo tahi? Kutala ngweji kukumbululangaho tahi?’

13, 14. Chilongesa chaMbimbiliya chaChikungulwilo chaputukile ngachilihi, kaha vyuma muka mweji kulivwisanga kuwaha hakukunguluka kana?

¹³ Chilongesa chaMbimbiliya chaChikungulwilo. Omu valingile vanalovola lyehi mikanda yayivulu yaMillennial Dawn, kuheta muji 1890, ndumbwetu H. N. Rahn, uze apwilenga munganda yaBaltimore, Maryland, U.S.A., avalwezele vandumbwetu valikungululenga mumazavu nakulinangula Mbimbiliya, chize vavulukile ngwavo “Dawn Circles.” Hakavanga, valikungulwililenga kujizuvo javandumbwetu. Kaha muSeptember 1895 vandumbwetu mujinganda jamuUnited States josena valivwishilenga kuwaha kukunguluka kana. Kaposhi Kakutalila akolezezele vaka-kulinangula Mbimbiliya valikungululenga hamwe. Ahanjikile nawa nge vaze vatwaminyinyine chilongesa kana vatelele kupwa vaze vatachikiza kutanga kanawa. Kaha atelele kutanga mukuku nakuhulisa lizavu lihanjikeho. Hakukumisa kutanga palangalafu yosena nakushimutwilaho, atelele kutanga visoneka vyapwilemo. Nge kapetulu nakumu, vatu vosena vahanjikilenga mukavatu vishina valinangwileho.

¹⁴ Kukunguluka kana vachivulukilenga majina akulisezaseza. Vachivulukilenga nawa ngwavo Chilongesa chaMbimbiliya chavaka-Mbeleya, kufwanyisa kuli vaka-Mbeleya vamulikulukaji lyamyaka lyakulivanga vaze vakekeselenga kanawa Visoneka. (Vili. 17:11) Kutwala muze vachivulukilenga ngwavo Chilongesa chaMukanda chaChikungulwilo. Makumbi ano vanakuchivulukanga jino ngwavo Chilongesa chaMbimbiliya chaChikungulwilo, kaha nawa vandumbwetu vosena veji kulikungulwilanga haZuvo yaWangana keshi mutumazavuko. Hamyaka yayivulu vanazachisanga mikanda, jimbuloshuwa naKaposhi Kakutalila. Kunyima vosena vaze vapwilenga kukuliwana kana vavakolezezele vakumbululengaho. Echi kukunguluka chinatukafwe kwivwishisa kanawa Mbimbiliya. Uno mweji kuwahisanga kanawa vyakukunguluka kana nakukahanjikaho tahi?

15. Mwomwo ika vahakilileko Shikola yaMulimo waTeokalasi?

 ¹⁵ Shikola yaMulimo waTeokalasi. Ndumbwetu Carey Barber uze azachililenga hachikota chetu muBrooklyn, New York ambile ngwenyi: “LyaMande naufuku haFebruary 16, 1942, vandumbwetu vamalunga vosena vahaMbetele yamuBrooklyn vavalwezele valisonekese mushikola yize vavulukilenga jino ngwavo Shikola yaMulimo waTeokalasi.” Ou ndumbwetu Barber uze apwile jino muLizavu Lyakutwaminyina ambile ngwenyi, eyi shikola “yapwile jila yakulipwila yakusolola omu Yehova nakafwe vatu jenyi makumbi ano.” Shikola kana yakafwile vandumbwetu vapwenga nauhashi wakwambulula nakunangula, ngocho mu 1943 kwalovokele kamukanda kakwamba ngwavo, Course in Theocratic Ministry kaze vatumine kuvikungulwilo vyosena. Kaposhi Kakutalila waJune 1, 1943 ambile ngwenyi, Shikola yaMulimo waTeokalasi vayihakileko mangana yikafwe vatu jaKalunga “valinangule kupwa vaka-kwambulula Wangana vakuhya.”—Chimo. 2, 2:15.

16, 17. Shikola yaMulimo waTeokalasi yanangwilenga vatu vyuma muka? Lumbununenu.

 ¹⁶ Hakavanga vandumbwetu vavavulu vachiwanyine kupwa chachikalu kuhanjika kulizavu lyavatu. Ndumbwetu Clayton Woodworth, Jr., uze ukwechi ise vakashile mukamenga hamwe nandumbwetu Rutherford naveka mu 1918, ahanjikile omu evwile halwola lwatete alisonekesele mushikola mu 1943. Ambile ngwenyi: “Changukaluhwilile chikuma kuhanjika vihande. Lilimi lyapwile lyalilemu, mukanwa mwomine chau, kaha lizu nawa lyanjonjomene.” Oloze omu azovolokele ahanjikilenga vihande vyavivulu kumazavu. Shikola kana yamunangwile kupwa nauhashi wakuhanjika vihande. Yamunangwile nawa kupwa wakulinyisa nakufwelela muli Yehova. Ambile ngwenyi, “Ngwatachikijile jino ngwami muka-kuhana chihande kapwa wamulemuko, oloze chachilemu shina nge mwawahisa chihande chenyi kanawa nakufwelela muli Yehova mangana vatu valivwise kuwaha kwivwilila kuchihande kana nakunganyala.”

¹⁷ Mu 1959 vandumbwetu vamapwevo navakiko vavalwezele valisonekese mushikola. Ndumbwetu Edna Bauer  evwile omu vavilikile chuma kana hakukunguluka chachihanda. Ambile ngwenyi: “Vandumbwetu vamapwevo vawahililile chikuma, hakuvahakilako kutokwa chikwavo.” Hamyakeyi vandumbwetu vamalunga navamapwevo valisonekesele muShikola yaMulimo waTeokalasi nakuvanangula kuli Yehova. Namakumbi ano veji kutunangulanga hakukunguluka kanechi.—Tangenu Isaya 54:13.

18, 19. (a) Makumbi ano tweji kutambulanga ngachilihi jindongi jakutukafwa mumulimo wakwambulula? (b) Mwomwo ika tweji kwimbilanga myaso hakukunguluka chetu? (Talenu lipwata lyakwamba ngwavo “ Kwimba Myaso yaMuchano.”)

¹⁸ Kukunguluka chaMulimo. Kuputuka mu 1919, kwapwilenga kukunguluka chakuliwahisa vyamumulimo wamuwande. Halwola kana, vandumbwetu vamwe kavejilenga kukukunguluka kanako shina vaze kaha vayilenga muwande nakuhana vatu mikanda. Kuheta mu 1923, Kukunguluka chaMulimo vachilingilenga kamwe mukakweji, kaha vatu vosena vavalwezele vapwengangako. Mu 1928, vikungulwilo vavilwezele vipwenganga naKukunguluka chaMulimo chalumingo hichalumingo. Mu 1935, Kaposhi Kakutalila akolezezele vikungulwilo vyosena nge haKukunguluka chaMulimo vatela kuzachisanga vihande vyamuDirector (yize vavulukilenga jino ngwavo Informant, kutwala muze ngwavo, Mulimo Wetu waWangana). Vikungulwilo vyosena vyapwilenga jino nakukunguluka kana.

¹⁹ Makumbi ano tweji kutambulanga jindongi kukukunguka kanechi chamukachi kachalumingo mangana jitukafwe mwakwambulwila. (Mateu 10:5-13) Nge munatemo kutambula mukanda wakukunguluka, kutala mweji kuutanganga nakukavangiza vyuma vasonekamo omu mweji kuyanga mumulimo wakwambulula nyi?

20-22. (a) Mwomwo ika tweji kwanukilanga kufwa chaYesu? (b) Vyuma muka mweji kunganyalanga hakupwa kuchilika kana mwaka himwaka?

²⁰ Yesu alwezele vaka-kumukavangiza vanukenga kufwa chenyi palanga nomu mwakeza. Chilika chaKwanuka Kufwa chaKulishitu tweji kuchilinganga kamwe mumwaka ngana muze valingilenga Paseka. (Koli. 1, 11:23-26) Kuchilika kana kweji kwizanga vatu vavavulu chikuma. Chilika kana cheji kwanukisanga vawavisa kutokwa vatwama nacho chakukayula muWangana. (Loma 8:17) Cheji kukafwanga nawa mikoko veka vasolole ngwavo vavumbika Mwangana waWangana waKalunga nakupwa vakushishika kuli ikiye.—Yowa. 10:16.

²¹ Ndumbwetu Russell namasepa jenyi vatachikijile kulema chakulinganga chilika chaKulya chaMwata chaChingoloshi, kaha vejivile ngwavo vatela kuchilinga kamwe mumwaka. Kaposhi Kakutalila kaApril 1880 ambile ngwenyi: “Hamyaka yayivulu etu vavavulu muPittsburgh . . . tunalinginga chilika chaPaseka [Kwanuka Kufwa chaMwata] nakulya vifwanyisa vyamujimba namanyinga aMwata wetu.” Kutwala muze, kukunguluka changalila vachilingililenga hamwe nachilika chaKwanuka Kufwa chaMwata. Halwola lwatete valingile ngocho  mu 1889, kwakungulukile vatu 225 kaha vambapachishile vatu 22.

²² Makumbi ano, chilika chaKwanuka Kufwa chaMwata katweshi kuchilingila hamwe nakukunguluka changalilako, oloze tweji kulanyanga vatu mujingalila jetu vezenga kuchilika kana haZuvo yaWangana chipwe kweshokwo natulikungulwila. Mu 2013, vatu vakuzomboka hajimiliyoni 19 vejile kuchilika chakwanuka kufwa chaYesu. Ocho kutokwa kana twatwama nacho chakupwanga kuchilika kanechi chajila nakulanya vakwetu vapwengako! Kutala mweji kulanyanga vatu vavavulu kuchilika chaKwanuka Kufwa chaMwata mwaka himwaka nyi?

23. Mwamona ngachilihi kulikungulula chetu hamwe?

²³ Vangamba jaYehova vakushishika kavamona kulikungulwila hamwe kupwa hichiteliko. (Hepe. 10:24, 25; Yowa. 1, 5:3) Chakutalilaho, Mwangana Ndavichi azangilenga kuya kuzuvo yaYehova nakumulemesa. (Samu 27:4) Alivwishilenga kuwaha kulikungulwilanga hamwe navaze vazangile Kalunga. (Samu 35:18) Achishinganyekenu nawa hali Yesu. Nahalwola apwile kanyike, azangile chikuma kupwa muzuvo yaIse nakumulemesa.—Luka 2:41-49.

24. Tweji kunganyalanga ngachilihi hakupwa kukukunguluka?

²⁴ Nge natuya kukukunguluka, kaha natusolola ngwetu twazanga Yehova nakufwila kukolezeza vakwetu. Natusolola nawa ngwetu twasaka vatunangule mwakukatwamina muWangana waKalunga, mwomwo evi vikiko vyuma vyavilemu veji kutunangulanga hakukunguluka chachikungulwilo, nachachihanda, nachangalila. Kukukunguluka chetu veji kutunangulanga mwakupwila nauhashi namwakumikila muukalu omu natutwalaho lika kuzata mulimo waulemu unakutesamo Wangana waKalunga makumbi ano, wakunangula vatu vapwenga tumbaji vaMwangana Yesu Kulishitu. (Tangenu Mateu 28:19, 20.) Chikupu vene, muchima wetu wakufwila kulikungulwila hamwe wasolola nge twamona ngwetu Wangana waKalunga unakuyula. Shikaho tumonenu kukunguluka chetu kupwa chachilemu.