1-3. Yesu atandakanyishile ngachilihi mulimo wakwambulula, kaha vihula muka natulihulisa?

YESU ambulwilile muNgalileya hamyaka yivali. (Tangenu Mateu 9:35-38.) Anangwilenga vatu nakwambulula mujimbu wamwaza waWangana mujinganda, namumembo, namujisunanangonga. Kweshokwo ambulwililenga, mayongomena avatu ejile kuli ikiye. Ngocho Yesu ambile ngwenyi, “mulimo wakwaha unatoho,” kaha kwapwile nakusakiwa vaka-kuzata vavavulu.

² Yesu awahishile vyuma mangana mulimo wakwambulula utandakane. Mujila muka? Hakutuma vaposetolo jenyi 12 vayenga “nakwambulula Wangana waKalunga.” (Luka 9:1, 2) Vaposetolo kavatachikijile kanawa mwakuzachila ou mulimoko. Shimbu kanda avatume, Yesu avanangwile ngana muze Ise wamwilu amunangwile ikiye.

³ Tulihulisenu ngwetu: Uno Yesu vamunangwile vyuma muka kuli Ise? Vyuma muka Yesu anangwile vaposetolo jenyi? Uno makumbi ano Mwangana Meshiya nanangulanga vaka-kumukavangiza mangana vazate kanawa mulimo wavo nyi? Nge mukiko, kaha nalingi ngachilihi ngocho?

4. Yesu vamunangwililile kulihi kuli Ise, kaha lwola muka?

⁴ Yesu ahanjikile hatoma ngwenyi vamunangwile kuli Ise. Omu apwile nakuzata mulimo wenyi, Yesu ambile ngwenyi: “Ngweji kuhanjikanga vyumevi nganomu vene angunangwile Tata.” (Yowa. 8:28) Yesu vamunangwililile kulihi, kaha lwola muka? Vamunangwile kuputuka vene haze vamutengele kupwa MwanaKalunga watwatwa. (Kolo. 1:15) Omu apwile naIse mwilu hamyaka yayivulu, evwililenga nakulinangula kuli Ise uze apwa ‘Muka-kunangula Wamunene.’ (Isa. 30:20) Ngocho alinangwile chikupu vilinga vyaIse, namilimo yenyi, navyuma ajina.

5. Yehova akafwile ngachilihi Mwanenyi azate kanawa mulimo wakwambulula?

⁵ Kutwala muze, Yehova anangwile Mwanenyi mulimo uze ejile nakuzata hano hamavu. Achitalenu haupolofweto uze wasolola kulinunga chaMuka-kunangula Wamunene naMwanenyi watwatwa. (Tangenu Isaya 50:4, 5.) Ou upolofweto  ngwawo, Yehova ahindwilenga Mwanenyi “chimene hichimene” nakumunangula. Echi chatwanukisa mulongeshi uze mwahindula muka-shikola chimene mangana aputuke kumunangula. Mukanda umwe wahanjika vyaMbimbiliya wamba ngwawo: “Chinafwane nge Yehova . . . atwalile mwanenyi kushikola nakumunangula mujimbu atela kwambulula nomu atela kuwambulwila.” Mushikola kaneyi yachifwanyisa yamwilu, mukiko Yehova anangwilile Mwanenyi ‘vyuma ambulwilenga navyuma ahanjikilenga.’ (Yowa. 12:49) Yehova alwezele nawa Mwanenyi mwakunangwila. * Omu apwile hano hamavu, Yesu azachishile vyuma vamunangwile hakuzata mulimo wenyi nakunangula vaka-kumukavangiza vazate kanawa mulimo wavo.

6, 7. (a) Yesu anangwile vaposetolo jenyi vyuma muka, kaha vyavakafwile ngachilihi? (b) Yesu natunangula ika makumbi ano?

⁶ Nganomu twahanjika hakavanga, vyuma muka Yesu anangwile vaposetolo jenyi? Kweseka namukanda waMateu kapetulu 10, avahanyine jindongi jamwakwambulwila mujimbu jakufwana nge: kwakuya nakwambulwila (vesi 5, 6), namazu akuhanjika (vesi 7), nakupendamina hali Yehova (vesi 9, 10), namwakuhanjikila navatu (vesi 11-13), nomu vatela kulinga nge mutu nakane (vesi 14, 15), nomu vatela kulinga nge navavayanjisa (vesi 16-23). * Vyuma kanevi Yesu anangwile tumbaji twenyi vyavakafwile vatandakanyise mujimbu wamwaza mulikulukaji lyamyaka lyakulivanga.

⁷ Nyi ngachilihi makumbi ano? Yesu uze apwa Mwangana waWangana waKalunga nahane vaka-kumukavangiza mulimo waulemu chikuma wakwambulula “mujimbu wamwaza waWangana . . . hamavu hosena, nakupwa unjiho kuli vaka-mafuchi osena.” (Mateu 24:14) Uno Mwangana natunangula mwakuzachila ou mulimo waulemu tahi? Eyo, natunangula. Natunangula mwakwambulwila mujimbu wamwaza kuvatu namwakuzachila milimo yakulipwila yamuchikungulwilo.

8, 9. (a) Shikola yaMulimo waTeokalasi vayihakilileko ika? (b) Kukunguluka chamukachi kachalumingo chinamikafwe ngachilihi muwande?

⁸ Liuka lyaYehova linanangulanga vatu jaKalunga mwakuzachila mulimo wavo kuhichila mukukunguluka chachihanda, nachangalila, nachachikungulwilo. Kuputuka muji 1940, vandumbwetu vapwile nakutwaminyina hachikota chetu valongesele mashikola akunangula vatu.

⁹ Shikola yaMulimo waTeokalasi. Nganomu twashimutwilanga muchihande chinafumuho, eyi shikola yaputukile mu 1943. Uno yapwile kaha yakunangula vaka-shikola mwakuhanjikila kanawa vihande hakukunguluka chachikungulwilo nyi? Nduma. Chuma chachinene vayihakilileko shina kunangula vatu jaKalunga vazachise wana wavo wakuhanjika nakwalisa Yehova muwande. (Samu 150:6) Eyi shikola yakafwile vandumbwetu vosena vaze valisonekesele vapwenga  vaka-kwambulula Wangana vakwipangweji. Makumbi ano vali nakutunangula kuhichila mukukunguluka chamukachi kachalumingo.

10, 11. Veya vatela kuya kuShikola yaNgileyate, kaha yeji kuvanangula ika?

¹⁰ Shikola yaNgileyate Yakulinangula Mbimbiliya. Shikola yaNgileyate Yakulinangula Mbimbiliya yaputukile lyaMande, February 1, 1943. Hakavanga vayihakilileko kunangula vapayiniya navandumbwetu veka vazata mulimo washimbu yosena mangana vayenga nakuzata umishonali kumafuchi eka. Oloze kuputuka muOctober 2011, shikola kana yinakunangula kaha vapayiniya vakulipwila, natulama vakutambwojoka namapwevo javo, navaka-Mbetele, navamishonali vaze kanda vachiyengaho lyehi kushikola kana.

¹¹ Mwomwo ika vahakilako Shikola yaNgileyate? Ndumbwetu umwe nanangulanga shikola kana hamyaka yayivulu ambile ngwenyi: “Eyi shikola yapwa yakunangula vaka-shikola Mazu aKalunga mangana vazamise lufwelelo lwavo nakuvakafwa vapwenga namihako yakushipilitu yize nayivakafwa vahonese ukalu navamona mumulimo wavo. Yeji kuvakafwanga nawa vazange chikuma mulimo wakwambulula.”—Efwe. 4:11.

12, 13. Shikola yaNgileyate yinalingisa ngachilihi mulimo wakwambulula uzovoloke? Hanenu chakutalilaho.

¹² Shikola yaNgileyate yinalingisa ngachilihi mulimo wakwambulula uzovoloke? Kufuma mu 1943, vananangula vandumbwetu vakuzomboka 8,500, * kaha vamishonali kana vanazachilanga mumafuchi akuzomboka 170 mukaye kosena. Vamishonali vanazachisanga vyuma vanavanangulanga kushikola kana hakuzata natwima mumulimo wakwambulula nakukafwa vakwavo. Kakavulu vamishonali vanavatumunga kujingalila kuze kakwatwama vaka-kwambululako, chipwe kuze kwatwama vavandende.

¹³ Achitalenu vyuma vyasolokele muJapan. HaJita yaKaye yamuchivali, mulimo wakwambulula wemanyine. MuAugust 1949, muJapan mwapwile kaha vaka-kwambulula 10. Jino kusongo yamwaka kanou, vatuminemo vamishonali 13 vakufuma kushikola yaNgileyate, kaha vaputukile kwambulula natwima. Mukuhita chamakumbi, vatuminemo vamishonali vakwavo. Hakavanga, vambulwilile kaha mujinganda jajinene, kaha kutwala muze vayilenga nakujinganda jeka jajindende. Vakolezezelenga vilongesa vyavo navandumbwavo veka valisonekese upayiniya. Echi chinalingisa mulimo uzovoloke. Oholili, muJapan muli vaka-kwambulula Wangana vakuzomboka 216,000, kaha muli nawa vapayiniya vavavulu. *

14. Mashikola amuliuka anakusolola unjiho muka? (Talenu nawa lipwata “ [lya]Mashikola Akunangula Vaka-Kwambulula Wangana,” lifwo 188.)

¹⁴ Mashikola eka amuliuka. Shikola yaMulimo wauPayiniya, naShikola Yakulinangula Mbimbiliya yaVaka-Kulishitu Valimbata, naShikola Yakulinangula Mbimbiliya yaVandumbwetu vaMalunga vaVajike anakafwenga vandumbwetu  vanahichimo vazame kushipilitu nakwambulula natwima. * Awa mashikola anasolola hatoma nge Mwangana wetu nanangulanga vatu jenyi vazate kanawa mulimo wavo.—Chimo. 2, 4:5.

15. Mujila muka vandumbwetu vaze vatwama namilimo muliuka vatela kulondezezelamo Yesu?

¹⁵ Anukenu upolofweto waIsaya uze wahanjikile ngwawo Yesu vamunangwile kuli Kalunga. Mushikola yachifwanyisa yamwilu, Yesu alinangwile “mazu amwaza akukumbulula vaze vanazeye.” (Isa. 50:4) Yesu akavangijile vyuma vamunangwile, kahomu apwile hano hamavu, ahizumwinenga vaze vapwile “nakufulyangila nakulemuwa naviteli.” (Mateu 11:28-30) Vandumbwetu vaze vatwama namilimo muliuka vatela kulondezeza Yesu nakuhizumunanga vandumbwavo. Ngocho kuli mashikola akuvakafwa mangana vatachikize mwakukafwila kanawa vakwavo vaka-kwitava.

16, 17. Mwomwo ika vahakilako Shikola yaMulimo waWangana? (Talenu nawa kwinyikila chamwishi.)

¹⁶ Shikola yaMulimo waWangana. Shikola yatete yaputukile haMarch 9, 1959, muSouth Lansing, New York. Tulama vakutambwojoka navaka-kuwanyisa mazavu avakulwane  vavasanyikile kushikola kaneyi yambachile kakweji wamuundu. Hakavanga shikola kana yapwilenga kaha muChingeleshi, oloze kutwala muze yapwile jino namumalimi eka, kaha vaputukile kunangula vandumbwetu mukaye kosena. *

¹⁷ Mukanda waYearbook wa 1962 wahanjikile vyashikola kaneyi ngwawo: “Hakuwana nge vatu vali namilimo chikuma makumbi ano, kalama muchikungulwilo chaVinjiho jaYehova atela kulongesa kanawa vyuma mukuyoya chenyi mangana azakame vosena muchikungulwilo nakuvakafwa. Tuyokutuyoku nawa, katela kusuvilila tanga yenyi mwomwo yakuzakama chikungulwiloko, oloze atela kushinganyeka mwamangana. Shikaho vakulwane muvikungulwilo vyosena mukaye vatokwa chikuma hakuvawahishila Shikola yaMulimo waWangana yize nayivanangula nakuvakafwa vazate kanawa mulimo wavo nganomu yahanjika Mbimbiliya.”—Chimo. 1, 3:1-7; Chitu. 1:5-9.

18. Vatu jaKalunga vosena vanakunganyala ngachilihi kuShikola yaMulimo waWangana?

 ¹⁸ Vatu jaKalunga vosena vanakunganyalanga kuShikola yaMulimo waWangana. Mujila muka? Omu vakulwane navaka-kuzachila veji kuzachisanga vyuma veji kulinangulanga kushikola kaneyi, veji kuhizumunanga vakwavo vaka-kwitava ngana muze alingile Yesu. Kutala kamweshi kwivwa kuwaha omu vakulwane chipwe vaka-kuzachila veji kumikolezezanga, chipwe kumivwilila kanawa, chipwe kumitambukila hembo lyenu nakumikafwa tahi? (Teso. 1, 5:11) Chapundu vene, ava malunga vakunanguka veji kukolezezanga vandumbwetu vosena muchikungulwilo.

19. Mashikola muka akwavo veji kutwaminyinanga kuKomiti Yakunangula, kaha vawahahilako ika?

¹⁹ Mashikola eka amuliuka. Komiti Yakunangula yamuLizavu Lyakutwaminyina yeji kutwaminyinanga mashikola eka aze eji kunangulanga vandumbwetu vaze vatwama namilimo muliuka. Mashikola kana anakukafwanga vakulwane muvikungulwilo, natulama vakutambwojoka, navandumbwetu vamuKomiti yaMutango mangana vahase kuzata kanawa milimo yavo. Awa mashikola eji kunangulanga jindongi jamuMbimbiliya, kaha eji kukafwa vandumbwetu vapwenga vakuhya kushipilitu nakukavangiza jindongi jamuVisoneka hakuzakama mikoko jaYehova vaze vavahana kulama.—Petu. 1, 5:1-3.

20. Mwomwo ika Yesu ambile ngwenyi tuvosena ‘vatunangula kuli Yehova,’ kaha vyuma muka munakufwila kulinga?

²⁰ Pundu vene, Mwangana Meshiya nawahisanga vyuma mangana anangule vaka-kumukavangiza. Nganomu tunamono, Yehova anangwile Mwanenyi mwilu, kaha Mwanenyi nawa nanangulanga vaka-kumukavangiza. Shikaho Yesu ambile ngwenyi tuvosena ‘vatunangula kuli Yehova.’ (Yowa. 6:45; Isa. 54:13) Tufwilenu kukavangiza vyuma vanakutunangula kuli ou Mwangana wetu kuhichila mumashikola vatuwahishila, nakutachikiza ngwetu mashikola kana vawahakako mangana tuzame kushipilitu nakuzata kanawa mulimo wetu wakwambulula.