CHIHANDA 2
Kwambulula Wangana—Kwambulula Mujimbu Wamwaza Mukaye Kosena
ACHISHINGANYEKENU munahinduka chimenemene nakuliwahisa muyenga muwande halikumbi lyakunoka kumilimo. Oloze jino munakwivwa kuzeya, kaha munakushinganyeka kuhwimako. Namulomba Yehova amikafwe, ngocho namukatuka nakuya. Namuzata nandumbwetu wamukulwane wapwevo, kaha mwamikolezeza halikoji nakumika chenyi. Omu namwambulwila kuzuvo hizuvo namwanuka jino ngwenu navandumbwetu mukaye kosena vali nakwambulula mujimbu woumwe, nakuhana jimangazini jojimwe, nakulinangula jindongi jojimwe. Kahomu namukinduluka kwimbo namuwahilila nakuzama kushipilitu.
Makumbi ano, mulimo wakwambulula ukiko mulimo waulemu unakuzata Wangana waKalunga. Yesu ahanjikile ngwenyi mulimo wakwambulula ukiko navakazata chikuma mumakumbi akukuminyina. (Mateu 24:14) Uno mazu kana anakutesamo ngachilihi? Muchihanda chino, natushimutwila havatu vanakuzata mulimo kana, najila vanakuzachilamo, navinoma vanakuzachisa vize vinakukafwa vatu vavavulu valinangule vyaWangana waKalunga.
MUCHIHANDA CHINO
KAPETULU 6
Vaka-Kwambulula—Vaka-kuzata Veji Kulisuulanga
Mwomwo ika Yesu afwelelele ngwenyi mwakapwa navatu navakamukundwizanga makumbi ano akukuminyina? Namusolola ngachilihi ngwenu munakutonda chatete Wangana?
KAPETULU 7
Jijila Jakwambulwilamo—Kuzachisa Jijila Jakulisezaseza Hakwambulwila Vatu
Linangulenu jijila vanazachisanga vatu jaKalunga hakwambulwila vatu mujimbu wamwaza shimbu kanda kukuma chizenga.
KAPETULU 8
Vinoma Vanazachisanga Hakwambulula—Kulovola Mikanda Yakuzachisa
Mulimo wakwalumuna mikanda unasolola ngachilihi nge Yesu anakututwaminyina? Mikanda tunalovolanga yinasolola ngachilihi nge Wangana unakuyula?
KAPETULU 9
Vatu Vanakwakula kuMujimbu Wamwaza—“Mande . . . Anatomasana Lyehi, Anatemo Kwaha”
Yesu anangwile tumbaji twenyi vishina vivali vyavilemu vyakwaha chakushipilitu. Vishina kana vyakwata ngachilihi hali etu makumbi ano?
