1, 2. Mulimo muka waulemu ahanjika Yesu, kaha chihula muka chachilemu twatela kulihulisa?

KAKAVULU vatwamina vamapolitiki veji kufwelelesanga vatu vyuma vize kaveshi kutesamoko. Navatwamina vaze vakwechi michima yakuzata vyuma kana, kaveshi kuvitesamoko mwomwo yaukalu. Oloze Yesu Kulishitu uze apwa Mwangana waWangana waKalunga eji kutesangamo vyuma vyosena eji kuhanjikanga.

² Omu Yesu aswanyine haWangana mu 1914, afwililile kutesamo upolofweto uze ahanjikile myaka 1,900 kunyima. Shimbu kanda afwenga, ambile ngwenyi: “Ou mujimbu wamwaza waWangana navakawambulula hamavu hosena.” (Mateu 24:14) Kutesamo chamazu awa chapwile hichinjikizo chakusolola nge Yesu aputukile kuyula mwilu. Jino tulihulisenu ngwetu: Uno Mwangana ahashile ngachilihi kulongesa lizavu lyavaka-kwambulula vakulisuula mumakumbi akukuminyina aze azala navatu valizanga vavene, vaze kavazanga vyuma vyamukwitavako? (Mateu 24:12; Chimo. 2, 3:1-5) Chapwa chachilemu kuli vaka-Kulishitu vosena kutachikiza muvakumbulwila chihula kana.

3. Yesu afwelelele vyuma muka, kaha ika yamulingishile afwelele ngocho?

³ Tuchitalenu cheka hamazu ahanjikile Yesu. Uno Yesu hakuhanjika ngwenyi mujimbu “navakawambulula,” apwile nakuhuhwasana tahi? Nduma. Yesu afwelelele chikupu ngwenyi vatu navakalisuula kuzata mulimo kana mumakumbi akukuminyina. Vyuma muka vyamulingishile ahone kuhuhwasana? Atachikijile kanawa omu apwa Ise. (Yowa. 12:45; 14:9) Shimbu kanda ezenga hano hamavu, Yesu amwene omu Yehova afwelelele vaka-kumulemesa vakulisuula. Tutalenu omu Yehova asolwele ngwenyi afwelela vangamba jenyi vakulisuula.

4. Mulimo muka Yehova ahanyine vaIsalele, kaha valingile ngachilihi?

⁴ Anukenu vyuma vyasolokele omu Yehova alwezele Mose atunge tavanaku chipwe ngwetu mbalaka yize yapwile chihela chize vaIsalele valemeselelenga Yehova. Yehova alwezele Mose akolezeze vatu vosena vazate ou mulimo. Kaha Mose avalwezele ngwenyi: “Mutu himutu uze mwalisuula namuchima wenyi  wosena atela kuneha wana uno kuli Yehova.” Jino vatu vakwile ngachilihi? “Vanehelenga lika mawana akulisakila chimene hichimene.” Mawana kana avulile chikuma, kaha vavalwezele ngwavo: “Kanda namuneha cheka mawana ajilako.” (Kulo. 35:5; 36:3, 6) VaIsalele valisuwile namichima yavo yosena ngana muze ashinganyekele Yehova.

5, 6. Kweseka naSamu 110:1-3, Yehova naYesu vafwelelele ngwavo vatu navapwa namuchima muka mumakumbi ano akukuminyina?

⁵ Uno Yehova ashinganyekele ngwenyi nakukapwa vangamba jenyi vakulisuula mumakumbi akukuminyina tahi? Eyo. Kafwe myaka 1,000 shimbu kanda Yesu asemuke hano hamavu, Yehova ahwiminyine Ndavichi asoneke vyuma navikasoloka omu Meshiya mwakaputuka kuyula. (Tangenu Samu 110:1-3.) Asonekele ngwenyi, omu Yesu navakamuswanyisa hawangana, vaka-kole navakamufumbukila. Oloze mwakapwa naliyongomena lyavatu navakamukundwizanga nakulisuula kumuzachila. Vanyike navakweze navakiko navakalihana namichima yavo yosena. Navakavula chikuma nakuvafwanyisa kulyume lize lyeji kufwikanga hamavu nachimene. *

⁶ Yesu atachikijile ngwenyi upolofweto vasoneka hali Samu 110 wavulukile ikiye. (Mateu 22:42-45) Evi vikiko vyamulingishile afwelele chikupu ngwenyi mwakapwa navatu vakulihana vaze navakambulula mujimbu wamwaza kumavu kwosena. Uno mijimbu yakunyima yasolola ika? Uno Mwangana nakungulula lizavu lyavaka-kwambulula makumbi ano tahi?

7. Omu Yesu vamuswanyishile haWangana, vyuma muka alingile hakukafwa vatu jenyi vazate mulimo?

⁷ Omu Yesu alingile hivanamuswanyisa lyehi haWangana, aputukile kukafwa vaka-kumukavangiza vazate kanawa mulimo wakwambulula. Nganomu twashimutwilanga  muKapetulu 2, akekesele nakutomesa vatu jenyi kufuma mu 1914 nakuheta mu 1919. (Mala. 3:1-4) Kaha mu 1919, Yesu atongwele ndungo wakushishika wakuzangama mangana atwaminyine vaka-kumukavangiza. (Mateu 24:45) Kufuma vene haze, ou ndungo aputukile kuwahisa kulya chakushipilitu kuhichila mumikanda namuvihande vyahakukunguluka chachinene. Echi kulya chakushipilitu chakolezezele vaka-Kulishitu vosena vazate chikuma mulimo wakwambulula.

8-10. Kukunguluka chachinene chakundwijile ngachilihi mulimo wakwambulula? Hanenu chakutalilaho. (Talenu nawa lipwata lyakwamba ngwavo, “ Kukunguluka Chachinene Chize Chakunywile Vatu Vambulule.”)

⁸ Vihande vyahakukunguluka chachinene. Vaka-Kulinangula Mbimbiliya vejile kukukunguluka chatete kufuma haJita yaKaye yatete chize chapwililile kuCedar Point, Ohio, U.S.A., kufuma haSeptember 1 nakuheta ha 8, 1919. Kaha halikumbi lyamuchivali, Ndumbwetu Rutherford ahanjikile muchihande chenyi ngwenyi: “Vaka-Kulishitu vosena hano hamavu vakwechi mulimo wakuvilika mujimbu wawangana waMwata.”

⁹ Kuheta halikumbi lyamuchitanu, Ndumbwetu Rutherford ahanjikile chihande chakwamba ngwavo, “Kuli Vakwetu Mutwazachila Mulimo,” chize chalovokele namuKaposhi Kakutalila hamutwe wakwamba ngwavo, “Kuvilika Wangana.” Avulukile ngwenyi: “Muka-Kulishitu atela kulihulisa ngwenyi, Ngunakulinga ika hano hamavu? Atela kulikumbulula ngwenyi, Mwata nangulingisa kupwa ngumuluwa wenyi ngwambulule mujimbu uze naulingisa vatu mukaye vapwenga masepa jaKalunga. Ngwatokwa hakunguhana mulimo wakuvilika mujimbu kanou.”

¹⁰ Ndumbwetu Rutherford ahanjikile ngwenyi nakulovokanga mangazini yayihya yaTonenu! yize nayikafwa vatu vatachikize ngwavo Wangana waKalunga ukiko naukakumisa ukalu wosena wavatu. Ahulishile vaze vapwile mulizavu vahanjike nge vanetavila kuya nakuhana eyi mangazini kuvatu. Mujimbu wakukunguluka chosena wambile ngwawo: “Vatu vosena 6,000 vemanyine nakulitavila namichima yavo yosena.” * Pundu vene, Mwangana apwile navatu vakulisuula vaze valitavilile kuvilika Wangana wenyi.

11, 12. Kaposhi Kakutalila wamu 1920 avulukile lwola muka vatelele kuzata mulimo uze ahanjikile Yesu?

¹¹ Mikanda. Kaposhi Kakutalila ahanjikilenga hatoma ngwenyi vatu jaKalunga vatela kuzata mulimo wakwambulula mujimbu waWangana uze avalwezele Yesu. Tushimutwilenu vyakutalilaho vimwe vyasolokele kufuma mu 1920.

¹² Mujimbu muka vatelele kuvilika hakutesamo Mateu 24:14? Lwola muka vatelele kuputuka kuzata ou mulimo? Kaposhi Kakutalila waJuly 1, 1920, apwile nachihande chakwamba ngwavo, “Mujimbu Wamwaza waWangana.” Chihande kana chalumbunwine ngwacho: “Mujimbu wamwaza twatela kuvilika shina wakuvuluka Wangana waMeshiya, nakukuma chatulingilo twamyaka yino.” Echi chihande chavulukile  ngwacho: “Ou mujimbu vatela kuwambulula kufuma vene haJita yaKaye yatete palanga ‘nakuluyando lwalunene.’” Chambile nawa ngwacho: “Luno lukiko lwola . . . lwakuvilika ou mujimbu wamwaza kuli vaka-Kulishitendomu.”

13. Kaposhi Kakutalila mu 1921 akolezezele ngachilihi vaka-Kulishitu vawavisa?

¹³ Uno vatu jaKalunga vavakanjikijile kuzata ou mulimo ahanjikile Yesu tahi? Nduma. Chihande chakwamba ngwavo “Umikenu” chize chapwile muKaposhi Kakutalila waMarch 15, 1921, chakolezezele vaka-Kulishitu vawavisa valisuule kwambulula. Mutu himutu vamulwezele alihulise ngwenyi: “Uno nayami ngwamona ou mulimo wakwambulula kupwa waulemu tahi?” Chahanjikile nawa ngwacho: “Tachikizenu ngwenu nge namumona mulimo wakwambulula kupwa waulemu, kaha namwivwa ngana muze evwile Yelemiya uze ambile ngwenyi mazu aMwata apwile ‘nge kakahya kaze vanasokelela muvifuwa vyenyi.’ Kahechi chamulingishile ahanjike muchishishisa chakuhola kaha.” (Yele. 20:9) Echi chihande chasolwele hatoma nge Yehova naYesu vafwelelele vaka-kwambulula Wangana vakushishika.

14, 15. Mu 1922, Kaposhi Kakutalila akolezezele vaka-Kulishitu vawavisa vazate mulimo muka?

¹⁴ Uno vaka-Kulishitu vamuchano vahashile kwambulila ngachilihi vatu mujimbu waWangana? Chihande chachihi chakwamba ngwavo “Kwambulula Chinakusakiwa” chize chapwile muKaposhi Kakutalila kaAugust 15, 1922, chakolezezele vaka-Kulishitu vawavisa “vatwalilenga vatu mikanda nakushimutwila navo hamembo avo, nakuvambulila ngwavo wangana wamwilu unapandama hakamwihi.”

¹⁵ Kufuma vene mu 1919, Kulishitu nazachisanga ndungo yenyi wakushishika wakuzangama akolezeze vaka-Kulishitu vosena vamone ngwavo vatokwa hakuvahana mulimo wakuvilika mujimbu waWangana. Uno Vaka-Kulinangula Mbimbiliya vakulivanga vakwileko ngachilihi omu vavakolezezele vazanenga mumulimo wakuvilika Wangana?

16. Vakulwane vamwe vevwile ngachilihi hamulimo wakwambulula?

¹⁶ Muji 1920 namuji 1930, vandumbwetu vamwe vakanyine hakuvalweza ngwavo vaka-Kulishitu vawavisa vosena vatela kuyanga nakwambulula. Kaposhi Kakutalila waNovember 1, 1927 alumbunwine vyuma vyasolokele ngwenyi: “Makumbi ano, tulama vamwe muchikungulwilo . . . vanakukana kukolezeza vandumbwavo vazane mumulimo wakwambulula, kaha vakiko nawa kavate kuzata mulimo kana. . . . Kavate kuyanga kuzuvo hizuvo nakwambulila vatu mujimbu waKalunga, naMwangana nawangana wenyi.” Echi chihande chahanjikile hatoma ngwacho: “Lwola lunahete jino lwakulihenda kuvatu vanakukana kwambulula, nakuvalweza ngwetu kaveshi kuvatongola kupwa vakulwaneko.” *

17, 18. Vatu vavavulu muvikungulwilo vakavangijile ngachilihi mazu afumine kuchikota, kaha vavavulu vanalisuula ngachilihi hamyaka 100 yinahichimo?

¹⁷ Oloze vatu vavavulu muvikungulwilo vakavangijile jindongi jafumine kuchikota. Vamwene ngwavo chapwile hikutokwa  kwazana mumulimo wakwambulula mujimbu waWangana. Kaposhi Kakutalila waMarch 15, 1926 ambile ngwenyi: “Vatu vakushishika navalisuula . . . kuya nakwambulula ou mujimbu kuvatu.” Enga, vateselemo mazu aupolofweto ahali Samu 110:3 hakulisuula kukundwiza Mwangana waWangana waKalunga.

¹⁸ Hamyaka 100 yinahichimo, vatu vavavulu vanalisuula kuzata mulimo wakuvilika Wangana. Mutupetulu vanakavangizaho, natushimutwila jijila navinoma vanazachisanga hakwambulula, navyuma vinafumumo. Chatete, tuchishimutwilenu ovyo vinalingisa vatu vavavulu valisuule kwambulula mujimbu waWangana, numba tuhu vatwama mukaye muze vatu valizanga vavene. Omu natushimutwila vyumevi, lihulisenu ngwenu, ‘Mwomwo ika ngweji kwambulwilanga mujimbu wamwaza?’

19. Mwomwo ika tweji kukavangijilanga mazu aYesu akwamba ngwavo “tondenunga lika chatete wangana”?

¹⁹ Yesu alwezele vaka-kumukavangiza ‘vatondenga lika chatete Wangana.’ (Mateu 6:33) Mwomwo ika tweji kukavangizanga mazu kana? Mwomwo twatachikiza ngwetu Wangana ukiko naukatesemo vyuma ajina Kalunga. Nganomu twashimutwilanga mukapetulu nafumuho, shipilitu yajila yinasololanga chikoki chikoki muchano wakuvuluka Wangana. Omu muchano waWangana weji kutuhetanga hamichima, cheji kutulingisanga tutonde chatete Wangana.

20. Chifwanyisa ahanjikile Yesu chaluheto lwakuswama chasolola ngachilihi omu vaka-kumukavangiza navakakula kumazu enyi akutonda chatete Wangana?

²⁰ Yesu atachikijile ngwenyi vaka-kumukavangiza navononoka mazu avalwezele ngwenyi vatondenga chatete Wangana. Achitalenu chifwanyisa ahanjikile chaluheto lwakuswama. (Tangenu Mateu 13:44.) Hakuzata milimo yenyi yahakumbi hakumbi, njimi wamuchifwanyisa echi awanyine luheto lwakuswama, kaha hahaze vene atachikijile kulema chalwo. Uno alingile ika? “Mwomwo yakuwahilila chikuma, ayile nakulandulula vyuma vyosena apwile navyo nakulanda chize chipapa.” Vyuma muka natulinangulaho? Omu tweji kuwananga muchano waWangana nakutachikiza kulema chawo, tweji kuwahililanga chikuma nakulisuula kulinga kala chuma nachisakiwa mangana tuhake kulutwe Wangana mukuyoya chetu. *

21, 22. Vaka-kukundwiza Wangana vakushishika vasolola ngachilihi ngwavo veji kutondanga chatete Wangana? Hanenu chakutalilaho.

²¹ Vaka-kukundwiza Wangana vakushishika vasolola hatoma ngwavo veji kutondanga chatete Wangana. Veji kuzachisanga kuyoya chavo, nauhashi wavo, naluheto lwavo kumulimo wakwambulula Wangana. Vavavulu vanalisuulanga mangana vazate mulimo washimbu yosena. Ava vaka-kwambulula vakulisuula vanalimwena nameso avo kapu ngwavo Yehova eji kukisulanga vaze veji kuhakanga Wangana kulutwe mukuyoya chavo. Tuchitalenu chakutalilaho chavandumbwetu vamwe kunyima.

 ²² Ndumbwetu Avery Bristow napuwenyi Lovenia vazachile upayiniya kusulo yaUnited States kuputuka muji 1920. Omu mwahichile myaka, Lovenia ambile ngwenyi: “Ami nalunga lyami tunalivwisa kuwaha kuzachila hamwe upayiniya. Kakavulu katwatachikijilenga kwakuwana jimbongo jakulikafwa najoko. Oloze Yehova atuzakaminenga, kaha twatwalileho lika kuzata mulimo wetu. Lwola lwosena twapwilenga navyuma vyakulikafwa navyo mukuyoya.” Ou ndumbwetu anukile likumbi limwe omu vapwile nakuzachila munganda yaPensacola muFlorida ngwenyi kavapwile najimbongo navyakulyako. Oloze omu vakindulukile hembo lyavo vawanyine jinjeke jivali javyakulya, namukanda uze vasonekele ngwavo, “Etu vaka-chikungulwilo chaPensacola tunamihane vyumevi mwomwo twamizanga.” Hakushinganyeka myaka yosena yize vazachile mulimo washimbu yosena, ou ndumbwetu ambile ngwenyi: “Yehova keshi kusuvilila vatu jenyiko. Keshi kwivwisa sonyi mutu uze namufwelelako.”

23. Mweji kwivwanga ngachilihi hamuchano munalinangula, kaha vyuma muka munakufwila kulinga?

²³ Keshi nge tuvosena tunahase kwambulula seteko yajola jojimweko mwomwo chiyoyelo chalihandununa. Oloze tuvosena twatela kuzata ou mulimo wakwambulula mujimbu wamwaza namichima yetu yosena. (Kolo. 3:23) Hakuwana nge twamona ou muchano waWangana twalinangula kupwa waulemu chikuma, ngocho twalisuula kulinga kala vyeshovyo vyasakiwa mangana twazane ou muchano navakwetu. Uno omu mukiko mwafwila nayenu nyi?

24. Chuma muka chachinene unatesamo Wangana makumbi ano akukuminyina?

²⁴ Hamyaka 100 yinahichimo, Mwangana natesangamo mazu enyi aupolofweto vasoneka hali Mateu 24:14. Nakunyulanga vatu vazate ou mulimo chakuzeneka kuvashinjila. Numba tuhu vanayoyelanga mukaye kano kanazale navatu valizanga vavene, vaka-kumukavangiza vanalisuulanga kwambulula. Mulimo wavo wakwambulula mujimbu wamwaza mukaye kosena hichinjikizo chakusolola nge Yesu anakuyula muWangana, kaha nawa hichuma chachinene chize Wangana unakutesamo mumakumbi ano akukuminyina.