1, 2. (a) Ika yakafwile vatu mulikulukaji lyamyaka lyakulivanga vatandakanyise mujimbu wamwaza muWangana wavaLoma wosena? (b) Vyuma muka vinasolola nge Yehova anakutukafwa makumbi ano? (Talenu lipwata “ [lya]Mujimbu Wamwaza muMalimi Akuzomboka 670.”)

LIKUMBI limwe vatu vejile muYelusalema valikomokelele havyuma vevwile. Vevwile vaka-Ngalileya vanakuhanjika kanawa malimi eka, kaha mujimbu vahanjikile wakwachile vatu kumichima. Vyumevi vyasolokele haPendekoseta mu 33 C.E., omu tumbaji vatambwile wana wakuhanjika mumalimi akulisezaseza, echi chasolwele nge shipilitu yaKalunga yavakafwilenga. (Tangenu Vilinga 2:1-8, 12, 15-17.) Mujimbu wamwaza vambulwile likumbi kana vawivwile kuvatu vakulisezaseza, kufumaho watandakanyine muWangana wavaLoma wosena.—Kolo. 1:23.

² Makumbi ano vatu jaKalunga kaveshi kuhanjika malimi akulisezaseza mujila yakukomwesako. Chipwe ngocho, vanakwalumuna mikanda yahanjika hamujimbu waWangana mumalimi akuzomboka 670. Ngocho vanakwambulula mumalimi amavulu kuhambakana muze chapwile mulikulukaji lyamyaka lyakulivanga. (Vili. 2:9-11) Vatu jaKalunga vanasonekanga mikanda yayivulu mumalimi amavulu, kahechi chinalingisa mujimbu waWangana utande mukaye kosena. * Echi chinakusolola hatoma nge Yehova anakuzachisa Mwangana Yesu Kulishitu atwaminyine ou mulimo wakwambulula. (Mateu 28:19, 20) Omu natushimutwila vinoma vimwe tunazachisanga hakuzata ou mulimo hamyaka 100 yinahichimo, talenu omu Mwangana natunangulanga chikoki chikoki tuzange vatu tweji kwambulilanga nomu natukafwe tupwenga vaka-kunangula Mazu aKalunga.—Chimo. 2, 2:2.

3. Mwomwo ika tweji kuzachishilanga vinoma vyakulisezaseza hakwambulula?

³ Yesu afwanyishile “mazu aWangana” kumbuto, kaha muchima wamutu kumavu. (Mateu 13:18, 19) Ngana muze njimi eji kuzachisanga vinoma vyakulisezaseza hakuwahisa mavu shimbu kanda atumbeho mbuto, navatu jaYehova vanazachisanga vinoma vyakulisezaseza vivakafwe vawahise michima yavatu vetavile mujimbu waWangana. Vinoma vimwe vavizachishile halwola lwalundende kaha. Oloze vinoma vyeka vyakufwana  nge mikanda najimangazini vichili nakuzata mulimo waulemu. Muchihande chinafumuho twashimutwilanga jijila twazachishilenga hakwambulila vatu vavavulu, oloze muchihande chino natushimutwila vinoma vize vinakafwe vaka-kwambulula Wangana vahanjike navatu meso nameso.—Vili. 5:42; 17:2, 3.

4, 5. Vihande vyakukopa vavizachishilenga ngachilihi, oloze kwambulula kana chahonenenga kulinga vyuma muka?

⁴ Vihande vyakukopa. Kuputuka muji 1930 nakutwala muji 1940, vaka-kwambulula vahakilenga vihande vyamuMbimbiliya vyakukopa havisaji. Evi vihande vyambachilenga minyutu kafwe 5, kaha lwola lumwe vyapwilenga namitwe yakufwana nge “Tulunga Vatatu,” “Pakatole,” chipwe “Wangana.” Uno evi vihande vavizachishilenga ngachilihi? Ndumbwetu Clayton Woodworth, Jr., uze vambapachishile mu 1930 muUnited States ambile ngwenyi: “Ngwambachilenga chisaji chafonongalafu, nachikungo, nakamukota kaze ngwasomekelenga kuchisaji mangana chiputuke kuvuma. Omu ngwahetelenga kuzuvo yamutu, ngwasokolwelenga chize chisaji nakusomeka kaze kamukota, numba jino ngungongomweze kuzuvo. Nge mwenyazuvo nalovoka, ngwambilenga ngwami, ‘Nguli namujimbu waulemu ngunaminehela.’” Uno vatu vakwileko ngachilihi? Ou ndumbwetu ambile ngwenyi: “Kakavulu vatu vevwilililenga kumujimbu wamwaza. Oloze vatu vamwe vakanyinenga. Veka vashinganyekelenga ngwavo ngwapwile nakulanjisa visaji.”

⁵ Kuheta mu 1940, kwapwile vihande vyakukopa vyakuzomboka 90 nakuvivwisa vatu vakuzomboka hamiliyoni yimwe. Ndumbwetu John E. Barr, uze apwile nakuzata upayiniya muBritain halwola kana, uze ejile nakupwa jino muLizavu Lyakutwaminyina ambile ngwenyi: “Kufuma mu 1936 nakuheta mu 1945, ngwatambukilenga lika nachisaji chafonongalafu. Kaha ngwevwilenga kupihya nge chisaji chauchi. Vatu vevwilenga kuwaha kwivwa lizu lyandumbwetu Rutherford nge  tuli muwande, mwomwo chapwile nge vanakumumona. Chipwe ngocho, eyi jila yakwambulwilamo kayahetelenga chikuma vatu hamichimako.”

6, 7. (a) Kuzachisa jikati jamujimbu wamwaza chatukafwile ngachilihi, kaha ukalu muka wafumineho? (b) Mujila muka Yehova ‘ahaka mazu mutunwa twetu’?

⁶ Jikati jamujimbu wamwaza. Kuputuka mu 1933, vaka-kwambulula vavakolezezele vazachisenga jikati jamujimbu wamwaza hakwambulwila kuzuvo hizuvo. Eji jikati japwile kafwe jisendimita 7.6 muwihi, kaha muusuku 12.7. Vasonekelengaho mujimbu wamuMbimbiliya mukavatu nakulumbununa mukanda wahanjika vyaMbimbiliya uze nahase kutambula mwenyazuvo. Vaka-kwambulula vahanyinenga mwenyazuvo kati nakumulweza atange. Ndumbwetu Lilian Kammerud uze apwile kamishonali mulifuchi lyaPuerto Rico naArgentina ambile ngwenyi: “Ngwevwile kuwaha kwambulula kuzachisa jikati.” Mwomwo ika? Ambile ngwenyi: “Etu vavavulu katwahashilenga kwambulula kanawako. Shikaho eji jikati jangukafwile kuhanjika navatu.”

⁷ Ndumbwetu David Reusch uze vambapachishile mu 1918 ambile ngwenyi, “Jikati jamujimbu wamwaza jakafwile vandumbwetu, mwomwo vamwe vamwene ngwavo kaveshi kuhasa kwambululako.” Oloze echi chinoma chapwile naukalu wacho. Ndumbwetu Reusch ambile ngwenyi: “Lwola lumwe vatu twambulilenga vashinganyekelenga ngwavo tutumama. Chasoloka nge vashinganyekele mwakwoloka, mwomwo etu vavavulu katwapwile nakuhanjikako. Oloze Yehova apwile nakutunangula twijilile kulihumangana navatu. Nakushimbula chiku, ahakile mazu enyi mutunwa twetu hakutunangula tuzachisenga Visoneka muwande. Atunangwile kuhichila muShikola yaMulimo waTeokalasi yize yaputukile kafwe mu 1940.”—Tangenu Yelemiya 1:6-9.

8. Vyuma muka mwatela kulinga mangana Kulishitu aminangule?

⁸ Mikanda. Kuputuka mu 1914, vatu jaYehova vanalovola mikanda yahanjika haMbimbiliya yakuzomboka 100. Mikanda yimwe yinapunga yakunangula vaka-kwambulula mangana vapwenga vakuhya mumulimo wavo. Ndumbwetu Anna Larsen wakuDenmark uze napunga muka-kwambulula hamyaka 70 ambile ngwenyi: “Yehova natukafwe tupwenga vaka-kwambulula vakwipangweji kuhichila muShikola yaMulimo waTeokalasi namikanda yakuzachisa mushikola kana. Ngunakwanuka mukanda watete uze valowele mu 1945 vavulukile ngwavo, Theocratic Aid to Kingdom Publishers. Kaha mu 1946 valowele mukanda vavulukilenga ngwavo, “Equipped for Every Good Work.” Oholyapwa tuli nakuzachisa mukanda waNganyalenu Kukunangula chaShikola yaMulimo waTeokalasi uze valowele mu 2001.” Pundu vene, Shikola yaMulimo waTeokalasi namikanda tunazachisanga mushikola kaneyi vinazate mulimo waunene, mwomwo Yehova “natulingisa tutengamo” kupwa vaka-kwambulula. (Koli. 2, 3:5, 6) Kutala mwalisonekesa muShikola yaMulimo waTeokalasi tahi? Uno mweji kumbatanga mukanda wenu waShikola yaMulimo chalumingo hichalumingo kukukunguluka  nakukavangiza omu cheyamani wakukunguluka chachiyoyelo mwamilweza mupandumune mukanda kana nyi? Nge mukiko, kaha munakwitavila Kulishitu aminangule mupwenga muvaka-kunangula vakwipangweji.—Koli. 2, 9:6; Chimo. 2, 2:15.

9, 10. Mikanda yinakafwe ngachilihi mumulimo wakutumba nakutukumwina mbuto jamuchano?

⁹ Yehova natukafwe nawa hakulingisa liuka lyenyi lisoneke mikanda yakukafwa vaka-kwambulula valumbunune kanawa vyuma yanangula Mbimbiliya. Mukanda umwe wakafwile chikuma vatu shina waMuchano Uli Nakutetekela Kumwono Wamyaka Yosena uze valowele chatete mu 1968. Mulimo waWangana waNovember 1968 wambile ngwawo: “Vatu vavavulu vanakusaka chikuma mukanda waMuchano, ngocho kuputuka muSeptember vaka-kuzachila kumakina akusoneka mikanda muBrooklyn vanakuzata jino ufuku namusana.” Wambile nawa ngwawo: “MuAugust kwapwanga nakusakiwa mikanda yamuMuchano yakuzomboka 1,500,000.” Kuheta mu 1982, vasonekele jikope jakuzomboka jimiliyoni 100 mumalimi 116. Myaka 14 yahichilemo kufuma mu 1968 nakuheta mu 1982, mukanda kana wakafwile vatu vakuzomboka miliyoni yimwe vapwenga vaka-kwambulula Wangana. *

¹⁰ Mu 2005, kwalovokele mukanda weka waUno Chikupu Mbimbiliya Yanangula Vyuma Muka? Kufuma vene mumwaka ou, vanalovola mikanda kana yakuzomboka jimiliyoni 200 mumalimi 256. Ou mukanda unazate mulimo muka? Mumyaka 7 kaha, kufuma mu 2005 nakuheta mu 2012, vatu kafwe 1,200,000 vanapu vaka-kwambulula mujimbu wamwaza. Mumyaka vene eyi, kuvula chavatu vanakulinangula Mbimbiliya chinafumu ha 6,000,000 nakuheta ku 8,700,000. Pundu vene, Yehova anakukisula mulimo wetu wakutumba nakutukumwina mbuto jamuchano jaWangana.—Tangenu Wavaka-Kolinde 1, 3:6, 7.

11, 12. Kweseka navisoneka vanenyikilako, jimangazini veji kujisonekelanga veya?

¹¹ Jimangazini. Hakavanga Kaposhi Kakutalila vamusonekelelenga “utanga wamikoko waundende” vaze ‘vasanyika mwilu.’ (Luka 12:32; Hepe. 3:1) HaOctober 1, 1919, liuka lyaYehova lyalowele mangazini yeka yize vasonekelele vatu vamuchivulu. Eyi mangazini vayizangile chikuma kuvatu vamuchivulu hamwe kaha naVaka-Kulinangula Mbimbiliya, ngocho vatu vavavulu vayitangilenga kuhambakana Kaposhi Kakutalila. Hakavanga mangazini kana vayivulukilenga ngwavo The Golden Age. Kaha mu 1937 vayivulukile ngwavo Consolation. Jino mu 1946 vayivulukile ngwavo Tonenu!

¹² Hamyaka yinahichimo, vanalumunanga jila yakusonekelamo Kaposhi Kakutalila naTonenu!, oloze mulimo wajo wakuvilika Wangana waKalunga nakukafwa vatu vafwelele Mbimbiliya kawalumukileko. Makumbi ano, kuli Kaposhi Kakutalila wakulinangula nawavatu vosena. Mangazini yakulinangula veji kuyisonekelanga “vaka-kuzata kuzuvo,” kulumbununa “utanga wamikoko waundende” “namikoko veka.” * (Mateu 24:45; Yowa. 10:16) Mangazini yavatu vosena veji kuyisonekelanga chikumanyi vaze kanda vatachikize muchano, oloze vavumbika  Mbimbiliya naKalunga. (Vili. 13:16) Kaha Tonenu! veji kuyisonekelanga vaze kavatachikiza kanawa Mbimbiliya naKalunga wamuchano Yehovako.—Vili. 17:22, 23.

13. Mwomwo ika jimangazini jetu japwila jakulipwila? (Shimutwilenu nachati “ [ya]Kuvula chaMikanda Mukaye Kosena.”)

¹³ Kuputuka mu 2014, kakweji hikakweji vali nakulovola Tonenu! jimiliyoni 44, naKaposhi Kakutalila jimiliyoni 46. Mangazini yaTonenu! vali nakuyalumuna mumalimi 100, kaha Kaposhi Kakutalila mumalimi akuzomboka 200. Kakweshi jimangazini jeka vali nakwalumuna hano hamavu jinazomboka kuvula cheji jimangazini jivaliko. Katwatela kulikomokela havyumevi vinakusolokako. Eji jimangazini jikwechi mujimbu uze Yesu ambile ngwenyi navakawambulula hamavu hosena.—Mateu 24:14.

14. Vyuma muka tunapangilanga kuvatu, kaha mwomwo ika?

¹⁴ Mbimbiliya. Mu 1896, Ndumbwetu Russell namasepa jenyi vashinganyekele kusoneka lizu Mbimbiliya havulukiso yaliuka lyamujishimbi lize vazachishilenga hakusoneka mikanda, ngocho liuka kana valivulukilenga jino ngwavo Watch Tower Bible and Tract Society. Vulukiso kana yawahile mwomwo Mbimbiliya yapwa chinoma chachinene tweji kuzachisanga hakutandakanyisa mujimbu wamwaza waWangana. (Luka 24:27) Kweseka neyi vulukiso yaliuka lyamujishimbi, vangamba jaKalunga vanapangilanga vatu jiMbimbiliya nakuvakolezeza vajitangenga. Chakutalilaho, mu 1926, twazachishile makina etu nakupulita Mbimbiliya yaVisoneka VyachiHelase vyaVaka-Kulishitu yaThe Emphatic Diaglott yize vasonekele kuli Benjamin Wilson. Kuputuka mu 1942, twapulitilenga nakupangila vatu jikope 700,000 jaMbimbiliya yaKing James Version. Omu mwahichile myaka yivali, twaputukile kupulita Mbimbiliya yaAmerican Standard Version, yize yapwile nalijina lyaYehova mapapa kafwe 6,823. Kuheta mu 1950, twapangilile vatu jiMbimbiliya jakuzomboka 250,000.

15, 16. (a) Mweji kwivwa ngachilihi haMbimbiliya yaKaye Kakahya? (Shimutwilenu lipwata “ [lya]Kwalumuna Mbimbiliya.”) (b) Mazu aYehova anahase kumiheta ngachilihi kumuchima?

¹⁵ Mu 1950 valowele Mbimbiliya yaVisoneka vyaKaye Kakahya VyachiHelase vyaVaka-Kulishitu. Kaha Mbimbiliya yaVisoneka vyaKaye Kakahya yamuundu vayilowele mu 1961. Eyi Mbimbiliya yavumbika Yehova hakusoneka cheka lijina lyenyi hajivesi haze lyapwilenga muvisoneka vyakulivanga vyachiHepeleu. Lijina lyaKalunga lyasoloka nawa mapapa 237 muVisoneka VyachiHelase vyaVaka-Kulishitu. Mbimbiliya yaKaye Kakahya vanayisonononanga mapapa kakavulu, hakusaka yipwenga yakwoloka kaha nawa yayashi kutanga, kaha vayisonononanga nawa mu 2013. Kufumaho, Mbimbiliya kana vanayisoneka yamuundu chipwe yachihanda kuzomboka jimiliyoni 201 mumalimi kafwe 121.

¹⁶ Vatu vamwe vanevunga ngachilihi hakutanga Mbimbiliya yaKaye Kakahya mumalimi avo? Lunga umwe ahanjika lilimi lyaNepali ambile ngwenyi: “Mbimbiliya tunazachisanga hamyaka yayivulu mulilimi lyetu yinapunga yayikalu, mwomwo mazu atwamamo amakalu. Oloze makumbi ano tunakwivwishisa Mbimbiliya, mwomwo yazachisa mazu amashi.” Omu pwevo umwe wamulifuchi lyaCentral African Republic aputukile  kutanga Mbimbiliya kaneyi mulilimi lyaSango, aputukile kulila nakwamba ngwenyi, “Eyi Mbimbiliya yili nakunguheta kumuchima.” Ngana mwayou pwevo, tuvosena twatela kutanganga Mazu aYehova hakumbi hakumbi mangana atuhete kumuchima.—Samu 1:2; Mateu 22:36, 37.

17. Munahase kusolola ngachilihi ngwenu mwasakwilila havinoma vamihana navyuma veji kuminangulanga, kaha vyuma muka navifumamo?

¹⁷ Uno mweji kusakwililanga Mwangana Yesu Kulishitu havinoma natuhane nahavyuma natunangulanga nyi? Kutala mweji kutanganga mikanda yize vanakutusonekela kuliuka lyaKalunga, nakuyizachisa mukafweko vatu veka tahi? Nge mukiko, kaha namwitavila mazu ahanjikile ndumbwetu Opal Betler uze vambapachishile haOctober 4, 1914. Ambile ngwenyi: “Ami nalunga lyami [Edward] twazachishilenga chisaji chafonongalafu najikati jamujimbu wamwaza hamyaka yayivulu. Twambulwililenga kuzuvo hizuvo kuzachisa mikanda, natumikanda, najimangazini. Twazanyinenga mumulimo wakulipwila wakupangila vatu mikanda yakulisezaseza. Kutwala muze vatunangwile mwakukindulukila kuvatu, nakulinangula Mbimbiliya navatu vakuwahilila. Tunalivwisa kuwaha kuzata ou mulimo natwima mukuyoya chetu.” Yesu ashikile ngwenyi vatu jenyi navakalivwisanga kuwaha kuzachila hamwe mulimo wakutumba nakwaha. Ngana mwandumbwetu Opal, vinjiho vavavulu vanakwitavila ngwavo mazu ashikile Yesu anakutesamo.—Tangenu Yowano 4:35, 36.

18. Kutokwa muka twatwama nacho?

¹⁸ Vatu vavavulu vaze kavapwa vangamba jaMwangana Yesuko, veji kumonanga vatu jaKalunga kupwa “vakuzeneka kulinangula kaha nawa hivatu vanganavene.” (Vili. 4:13) Oloze achishinganyekenu hachumechi. Mwangana nakafwenga ava vatu jenyi vasoneke mikanda yayivulu yize vanakwalumuna nakuyihana chikuma kuvatu. Chachinenenyi, natunangula nakutukolezeza tuzachise evi vinoma mangana tutandakanyise mujimbu wamwaza kuvatu vakumafuchi osena. Chapundu vene, twapwa vakutokwa kuzachila hamwe naKulishitu mumulimo wakutumba mbuto jamuchano nakwaha tumbaji.