1, 2. Yehova najimbulanga ngachilihi vyuma ajina kulingila vatu?

VISEMI vaze vazanga vana vavo veji kushimutwilanga navo vihande vyamutanga. Veji kuvalwezanga kaha vyuma vize vanamono ngwavo navahasa kwivwishisa kanawa vana vavo kweseka namyaka vali nayo.

² NaYehova nawa najimbwilanga vatu jenyi vyuma ajina chikoki chikoki. Oloze navalwezenga vyuma kana omu lunahetenga lwola lwakulinga ngocho. Tuchishimutwilenu mukavatu omu Yehova najimbulanga muchano wakuvuluka Wangana hamyaka eyi yinahichimo.

3, 4. Uno Yehova atongwelele chimweza vyuma vyatela kusoloka kuvatu tahi? Lumbununenu.

³ Hakuputuka Yehova kajinyine kupwenga Wangana waMeshiyako. Mwomwo ika? Mwomwo Yehova kajinyine ngwenyi vatu vakalikange kuchiyulo chenyiko. Oloze avatengele mangana vavene valisakwilenga vyakulinga. Alwezele Alama naEve vyuma ajinyine ngwenyi: “Semenunga muvule chikuma, muzalise hamavu, nakuwalamanga.” (Kupu. 1:28) Yehova avalwezele nawa vyuma vatela kulinga navize kavatela kulingako. (Kupu. 2:16, 17) Alama naEve vapwile nalisesa lyakulisakwila kwononoka Kalunga chipwe nduma. Kachi nge vakiko navana vavo vasemene vononokele kulushimbi lwaKalunga, kachi kakwatwama Wangana vayula kuli Kulishitu utesemo vyuma ajina Kalungako. Oholyapwa kachi mukaye kosena mwazala navatu vakukupuka vaze veji kulemesanga Yehova kaha.

⁴ Kulikanga chaSatana, naAlama, naEve kachalingisa Yehova ahone kutesamo vyuma ajina vyakuzalisa hamavu navatu vakukupukako. Yehova awanyineko jila yeka yakuteselamo vyumevi ajina. Yehova kafwana nge masuwa yize yazachisa jila yimwe kaha, yize nawa vanahase kuyichelewesa nge kunasoloka vyuma vimweko. Nge Yehova nahanjika vyuma najinyi, kakweshi mutu chimwe chuma chinahase kuhonesa vyuma kana vitesemoko. (Tangenu Isaya 55:11.) Kachi nge kuli chuma chinajiki mujila, Yehova eji kuwanangako jila yeka. * (Kulo. 3:14, 15) Eji kulwezanga vatu jenyi vakushishika jila yayihya nasakula mangana atesemo vyuma ajina.

5. Yehova alingile ngachilihi omu vatu valikangile muEtene?

 ⁵ Omu vatu valikangile muEtene, Yehova ajinyine kuhakako Wangana. (Mateu 25:34) Halwola luze, Yehova aputukile kulumbununa jila yize mwakazachisa hakulwila vatu nakufumisako ukalu anehele Satana mwomwo yakufwila kuyula. (Kupu. 3:14-19) Chipwe ngocho, Yehova kalumbunwine mijimbu yosena yaWangana halwola lwolumweko.

6. Yehova ashikile vyuma muka, kaha ahonene kusolola ika hatoma?

⁶ Muupolofweto watete, Yehova ashikile ngwenyi mwakatuma “muka-tanga” uze mwakachika linoka. (Tangenu Kuputuka 3:15.) Oloze uze muka-tanga navaka-tanga yalinoka kavavulukile halwola luzeko. Mwahichile myaka 2,000 numba Yehova alumbunune vyuma kana. *

7. Mwomwo ika vasakwilile Apalahama, kaha echi chasolola ika?

⁷ Kutwala muze, Yehova alwezele Apalahama ngwenyi mutanga yenyi mukiko namukafuma uze muka-tanga. Apalahama vamusakwile mwomwo ‘evwililenga mulizu lyaYehova.’ (Kupu. 22:18) Echi chinasolola nge Yehova eji kujimbulanga vyuma ajina kuli vatu vaze vamwivwa woma.—Tangenu Samu 25:14.

8, 9. Vyuma muka vyakuvuluka muka-tanga vize Yehova asolwele kuli Apalahama naYakova?

⁸ Omu Yehova ahanjikile nasepa lyenyi Apalahama kuhichila muli kangelo, avulukile halwola lwatete muchano waulemu wakuvuluka muka-tanga walushiko. Ambile ngwenyi: Ou muka-tanga mwakapwa mutu. (Kupu. 22:15-17; Yako. 2:23) Uno ou mutu mwakachika ngachilihi linoka? Iya apwile linoka? Vihula kana vavikumbulwile mukuhita chamyaka.

⁹ Yehova ajinyine ngwenyi ou muka-tanga ashikile mwakasemukila mutanga yamuzukulu lyaApalahama, Yakova uze afwelelele chikuma muli Kalunga. (Kupu. 28:13-22) Kufumaho Yehova alwezele Yakova ngwenyi, Ou Vashika mwakasemukila mutanga yamwanenyi Yuta. Yakova apolofwetele ngwenyi ou mutu mwakafuminyina mutanga yaYuta, mwakatambula “mbwechi,” kulumbununa ngolo jakuyula, kaha nawa ngwenyi “vatu navakamwononokanga ikiye.” (Kupu. 49:1, 10) Shikaho kweseka nou upolofweto, Yehova asolwele ngwenyi Ou Vashika mwakapwa mwangana, muka-kuyula.

10, 11. Mwomwo ika Yehova alwezele Ndavichi naNdanyele vyuma ajinyine?

¹⁰ Omu mwahichile myaka 650 kufuma hali Yuta, Yehova ahanjikile vyuma ajinyine kuli Mwangana Ndavichi uze afumine mutanga yaYuta. Yehova avulukile Ndavichi ngwenyi apwile ‘mutu uze evwilile kuwaha kumuchima.’ (Samwe. 1, 13:14; 17:12; Vili. 13:22) Hakuwana nge Ndavichi evwilenga Kalunga woma, ngocho Yehova alishikile nenyi lushiko nakumufwelelesa ngwenyi muka-tanga yenyi mwakayulanga haya myaka yosena.—Samwe. 2, 7:8, 12-16.

¹¹ Omu mwahichile myaka 500, Yehova alwezele kapolofweto Ndanyele avuluke mwaka uvene mwakasoloka Meshiya uze Vawavisa. (Ndanye. 9:25) Yehova amwene Ndanyele  kupwa “wamulemu chikuma.” Mwomwo ika? Mwomwo Ndanyele avumbikilenga Yehova nakumuzachila lwola lwosena.—Ndanye. 6:16; 9:22, 23.

12. Ndanyele vamulwezele kulinga vyuma muka, kaha mwomwo ika?

¹² Numba tuhu Yehova azachishile vapolofweto jenyi vakushishika vakufwana nge Ndanyele, vasoneke upolofweto wauvulu wakuvuluka muka-tanga ashikile, Meshiya, oloze Yehova amwene ngwenyi kalwapwile lwola lwakulweza ava vangamba jenyi mwalumbunukilile vyuma vize avahwiminyine vasonekeko. Chakutalilaho, omu Ndanyele vamumwenesele chakumwenesa chakusolola omu navakazamisa Wangana waKalunga, vamulwezele ngwavo alamike katachikijilo kuupolofweto kana palanga nakulwola atongwele Yehova. Halwola kana, chinyingi chamwenemwene “nachikavula.”—Ndanye. 12:4.

13. (a) Iya apwile muka-tanga vashikile? (b) Yesu alumbunwine ngachilihi upolofweto wahali Kuputuka 3:15?

¹³ Yehova alumbunwine hatoma ngwenyi Yesu ikiye apwile muka-tanga ashikile, mwakafuma kutanga yaNdavichi uze mwakapwa Mwangana. (Luka 1:30-33; 3:21, 22) Omu Yesu aputukile mulimo wenyi, vatu vatachikijile jino kanawa vyuma ajina Kalunga, kaha chapwile nge musana wavamunyikilile. (Mateu 4:13-17) Chakutalilaho, Yesu alumbunwinyine vatu ngwenyi uze “linoka” vavuluka hali Kuputuka 3:14, 15 apwile Liyavolo uze apwa “muka-kujiha vatu” kaha nawa “ise yamakuli.” (Yowa. 8:44) Kaha muchakumwenesa chize amwenesele Yowano, Yesu avulukile ngwenyi “uze linoka wakushikulu” apwile “Liyavolo kaha nawa Satana.” * (Tangenu Kusoloka 1:1; 12:9.) Muchakumwenesa kana, Yesu hakuwana nge ikiye uze muka-tanga vashikile, asolwele omu mwakatesamo upolofweto vahanjikile muEtene wakunongesa Satana.—Kuso. 20:7-10.

14-16. Uno tumbaji vamulikulukaji lyamyaka lyakulivanga vevwishishile vyuma vyosena ahanjikile Yesu tahi? Lumbununenu.

¹⁴ Nganomu twashimutwilanga muKapetulu 1 mumukanda uno, Yesu ahanjikile chikuma vyaWangana. Oloze kalwezele tumbaji twenyi vyuma vyosena vasakile kutachikizako. Navyuma vimwe ahanjikile kavyavalumbunukilile hahaze veneko. Hahichile myaka yayivulu numba jino vaka-kukavangiza Kulishitu vaputuke kutachikiza mwalumbunukilile muchano umwe ahanjikile Mwata wavo. Achitalenu vyakutalilaho vimwe.

¹⁵ Mu 33 C.E., Yesu alumbunwine hatoma ngwenyi vaze mwakayula navo mwilu muWangana waKalunga navakavafumisa hamavu nakuvatwala mwilu muze navakapwa jino vatu vakushipilitu. Oloze tumbaji twenyi kavatachikijile mwalumbunukilile vyuma kanako. (Ndanye. 7:18; Yowa. 14:2-5) Mumwaka woumwe, Yesu ahanjikile vifwanyisa vize vyasolwele nge Wangana kaveshi kuuzamisa hahaze veneko, kuvanga nakinduluka mwilu kaha nawa nge munahichi myaka yayivulu.  (Mateu 25:14, 19; Luka 19:11, 12) Chochimwe, tumbaji kavevwishishile echi chishinako mwomwo omu Yesu asangukile vamuhulishile ngwavo: “Uno wangana nauukindulwisa kuli vaIsalele halwola luno tahi?” Oloze Yesu kasakile kuvalumbunwina muchano kana halwola luzeko. (Vili. 1:6, 7) Yesu anangwile nawa ngwenyi nakukapwa “mikoko veka” vaze kaveshi kukapwa halizavu lyavaze vapwa “utanga wamikoko waundende” vaze navakayula nenyi mwilu. (Yowa. 10:16; Luka 12:32) Tumbaji twaKulishitu kavatachikijile kanawa awa mazavu avaliko palanga nomu Wangana waputukile kuyula mu 1914.

¹⁶ Yesu asakile kulweza tumbaji twenyi vyuma vyavivulu omu apwile hano hamavu, oloze atachikijile ngwenyi kaveshi kuhasa kuvivwishisako. (Yowa. 16:12) Kuheta mulikulukaji lyamyaka lyakulivanga, vasolwele muchano wauvulu wakuvuluka Wangana. Oloze chinyingi kachavulile chikuma halwola kanako.

17. Vyuma muka twatela kulinga numba twivwishise muchano waWangana, kaha vyuma muka vyasakiwa?

¹⁷ Yehova alwezele Ndanyele ngwenyi ‘hamakumbi akukuminyina, vatu vavavulu navakatambwojokanga noku noku, kaha chinyingi chamwenemwene’ chakuvuluka vyuma ajina Kalunga nachikavula. (Ndanye. 12:4) Vosena vaze navakasaka kutachikiza chinyingi kana vatela kukazata nangolo. Mukanda umwe wamba ngwawo lizu lyachiHepeleu lyakwamba ngwavo, “navakatambwojokanga” lyalumbununa mutu uze anakutanga mukanda nakuhunananaho. Oloze numba tuhu natutanga Mbimbiliya nakuhunananaho, tachikizenu ngwenu katweshi kuhasa kwijiva muchano waWanganako kuvanga kaha Yehova natulumbunwinawo.—Tangenu Mateu 13:11.

18. Vatu vaze vevwa woma Yehova vanasololanga ngachilihi lufwelelo nakulinyisa?

 ¹⁸ Ngana muze Yehova ajimbwilenga muchano waWangana chikoki chikoki mumyaka yakunyima shimbu kanda 1914, namakumbi ano akukuminyina anakulinga mwomumwe. Nganomu natushimutwila muKapetulu 4 na 5, hamyaka eyi 100 yinahichimo, vatu jaKalunga vanalumunangako ulumbunwiso wavisoneka. Uno echi chalumbununa nge Yehova keshi nakuvakafwako nyi? Nduma, anakuvakafwa. Mwomwo ika tunambila ngocho? Mwomwo ava vangamba jenyi vanasololanga vilinga vize azanga, lufwelelo nakulinyisa. (Hepe. 11:6; Yako. 4:6) Vangamba jaYehova vafwelela ngwavo vyuma vyosena atushika Kalunga muMazu enyi navikatesamo. Veji kusololanga muchima wakulinyisa omu veji kulitavilanga ngwavo kavevwishishile kanawa mwalumbunukila upolofweto halwola kanako. Muchima wavo wakulinyisa vausolwele mumazu vasonekele muKaposhi Kakutalila waMarch 1, 1925 ngwavo: “Tunatachikiza ngwetu Mwata ikiye eji kulumbununanga vyuma, kaha mwalumbununa Mazu enyi kuvatu jenyi mujila nasake, halwola namono ivene ngwenyi lwakutamo.”

19. Yehova natukafwe twivwishise vyuma muka, kaha mwomwo ika?

¹⁹ Omu Wangana waputukile kuyula mu 1914, vatu jaKalunga kavatachikijile kanawa omu naukatesamo upolofweto waWanganako. (Koli. 1, 13:9, 10, 12) Lwola lumwe tunalumbununanga vyuma mujila yakuhenga mwomwo yakusaka jishiko jaKalunga jitesemo washi. Oloze mukuhita chamyaka, twamwene muchano wamazu vasonekele muKaposhi Kakutalila tunavuluka lyehi, akwamba ngwavo: “Twatela kutachikiza ngwetu, upolofweto unahase kutulumbunukila kuvanga kaha nge unatesamo lyehi chipwe unakutesamo.” Hakuwana nge tunakuyoyela jino mumakumbi akukuminyina, upolofweto wauvulu waWangana unakutesamo kaha ukwavo unatesamo lyehi. Yehova natukafwenga tutachikize kanawa vyuma ajina mwomwo twapwa vakulinyisa kaha tweji kwitavilanga vatwolole. Chinyingi chamwenemwene jino chinavulu chikuma.

²⁰ Lwola lumwe cheji kutukaluhwilanga nge Yehova nalumunako ulumbunwiso wavyuma vimwe twafwelela. Uno lufwelelo nakulinyisa vyeji kutukafwanga twitavile vyuma kana nyi? Vaka-Kulishitu vamulikulukaji lyamyaka lyakulivanga navakiko vapwile muukalu kana. Chakutalilaho, achishinganyekenu kachi nayenu mwapwile muvaka-Kulishitu vavaYuleya kunyima. Kaha mwavumbikile Jishimbi jaMose nakumona chisemwa chenu kupwa chachilemu. Jino hinamutambula mikanda yakufuma kuli kaposetolo Paulu ngwenyi Jishimbi jaMose kajeshi nakuzatako jino, ngwenyi Yehova nakane lyehi vaIsalele, kaha ali nakukungulula vaYuleya naVaka-mafuchi Eka vaze navapwa vaIsalele vakushipilitu. (Loma 10:12; 11:17-24; Ngale. 6:15, 16; Kolo. 2:13, 14) Kachi mwalingile ngachilihi?

²¹ Vaka-Kulishitu vakulinyisa vetavilile vyuma asonekele Paulu, kaha Yehova avakiswile. (Vili. 13:48) Chaluvinda, veka vakanyine echi kunangula chachihya, vasakile kukakachila kuvyuma vyamwaka. (Ngale. 5:7-12) Vosena vaze kavasakile kwalumuna vishinganyeka vyavoko, Kalunga kavetavishile vakayule hamwe naKulishituko.—Petu. 2, 2:1.

22. Mweji kwivwanga ngachilihi nge vanalumunako vyuma vimwe twafwelela?

²² Mumyaka eyi yinahichimo, Yehova nalumunangako vyuma vimwe vyaWangana twafwelela. Chakutalilaho, natukafwe tutachikize kanawa lwola luze vatu vaze naukayula Wangana navakavahandununa kuvatu vakuhuka, ngana muze mikoko veji kuvahandununanga kuvapembe. Natunangula nawa tutachikize omu nambala yavaze 144,000 nayikatamo, nomu vyalumbunukila vifwanyisa vyaWangana vize ahanjikile Yesu, nalwola luze mutu wamakumishilo vawavisa mwakaya mwilu. * Uno mweji kwivwanga ngachilihi havyuma kanevi vanalumunanga? Kutala lufwelelo lwenu lunazame nyi? Uno munamono ngwenu kwalumuka kana chinasolola nge Yehova anakunangula vatu jenyi vakulinyisa tahi? Mijimbu namulinangula mumukanda uno nayimikafwa mwijive ngwenu Yehova anakunangula chikoki chikoki vatu jenyi vaze vamwivwa woma vatachikize vyuma ajina.