1, 2. Mbimbiliya yaKaye Kakahya yazezula ngachilihi lijina lyaKalunga?

LYACHIVALI nachimene haDecember 2, 1947, lizavu lyalindende lyavandumbwetu vawavisa vahaMbetele yamuBrooklyn, New York, vaputukile kuzata mulimo waunene chikuma. Mulimo kanou wapwile waukalu, kaha vauzachile hamyaka 12. Kuheta lyaSondo, March 13, 1960, vakumishile kuzata ou mulimo wakwalumuna Mbimbiliya. Omu mwahichile tukweji vatatu, haJune 18, 1960, Ndumbwetu Nathan Knorr alowele Mbimbiliya yaVisoneka vyaKaye Kakahya yosena yamuundu hakukunguluka changalila chapwililile munganda yaManchester, muEngland. Vatu vawahililile chikuma. Ou ndumbwetu ambile ngwenyi: ‘Likumbi lyalelo Vinjiho jaYehova mukaye kosena vanawahilila chikuma.’ Chuma chakulipwila chapwile muMbimbiliya eyi valumwine chize chalingishile vatu vawahilile shina, lijina lyaKalunga lize lyasolokelemo mapapa kakavulu.

² MujiMbimbiliya jajivulu kamwatwama lijina lyaKalungako. Oloze vangamba jaYehova vawavisa vahonesele kafuta kaSatana kakujimbangana lijina lyaKalunga mangana vatu vahone kulitachikiza. Mazu akujimbula amuMbimbiliya valowele likumbi lize ambile ngwawo: “Chuma chachinene chili muMbimbiliya eyi vanalumuna shina chakukindulwisa lijina lyaKalunga mujivesi muze lyatela kupwa.” Enga, Mbimbiliya yaKaye Kakahya yazachisa lijina lyaKalunga, Yehova, mapapa akuzomboka 7,000. Pundu vene eyi Mbimbiliya yinazezula lijina lyaSetu wamwilu Yehova.

3. (a) Vandumbwetu vatachikijile ngwavo lijina lyaKalunga lyalumbununa ika? (b) Mukanda waKulovoka 3:13, 14 walumbununa ika? (Talenu lipwata “ Mwalumbunukila Lijina lyaKalunga.”)

³ Kumyaka yakunyima, Vaka-Kulinangula Mbimbiliya vatachikijile ngwavo lijina lyaKalunga lyalumbununa “Ngwapwa mungwapwa.” (Kulo. 3:14, Luvale Bible 1970) Ngocho Kaposhi Kakutalila waJanuary 1, 1926 ambile ngwenyi: “Lijina Yehova lyalumbununa nge Kalunga alitengele ivene, . . . katwama namaputukilo chipwe namakumishiloko.” Oloze halwola vene luze vaka-kwalumuna Mbimbiliya yaKaye Kakahya vaputukile mulimo wavo, Yehova avakafwile vatachikize ngwavo lijina lyenyi kalyalumbununa kaha nge alitengele iveneko, oloze lyalumbununa nawa nge eji kujinanga vyuma nakuvilinga.  Vatachikijile ngwavo lijina lyaYehova lyalumbununa “Eji Kulingisanga Vyuma Kupwako.” Enga, alingishile melu namavu navyuma vyosena vyatwamaho vipwengako, kaha nawa anakutesangamo vyuma ajina. Jino mwomwo ika lijina lyaKalunga vatela kulizezwila, kaha nayetu tunahase kulizezula ngachilihi?

4, 5. (a) Nge natuvuluka mukulomba ngwetu: “Lijina lyove lipwenga lyajila,” kaha tunakulomba ika? (b) Kalunga mwakalingisa ngachilihi lijina lyenyi kupwa lyajila, kaha lwola muka?

⁴ Yehova asaka lijina lyenyi valizezule helu. Chuma chachinene ajina shina kulingisa lijina lyenyi lipwenga lyajila nge muze ahanjikile Yesu mukulomba ngwenyi: “Lijina lyove lipwenga lyajila.” (Mateu 6:9) Nge natuvuluka mazu kana mukulomba, kaha tunakulomba ika?

⁵ Ngana muze twalinangulanga muKapetulu 1 mumukanda uno, Yesu alombele ngwenyi, “Lijina lyove lipwenga lyajila.” Kaha mukulomba kana avulukilemo navyuma vikwavo vivali vyakuvuluka vyuma ajina Yehova. Vyuma vikwavo vivali alombele shina: “Wangana wove wizenga. Mwaya muchima wove mulingiwe.” (Mateu 6:10) Ngana muze tweji kulombanga Kalunga anehe Wangana wenyi, kaha nawa mwaya muchima wenyi mulingiwe, ngocho tweji kulombanga Yehova ajilike lijina lyenyi. Mujila yikwavo tweji kulombanga ngwetu, Yehova afumise kasautu kosena kaze vanasaulanga lijina lyenyi kufuma vene haze valikangile vatu muEtene. Uno Yehova eji kukumbululanga ngachilihi kulomba kanechi? Amba ngwenyi: “Nangujilika lijina lyami lyalinene lize munasaula muli vaka-mafuchi eka.” (Ezeke. 36:23; 38:23) Ngocho Yehova mwakalingisa lijina lyenyi kupwa lyajila kuvyuma vize atenga, omu mwakafumisako vaka-kuhuka vosena hajita yaAlamangetone.

6. Vyuma muka twatela kulinga mangana tulingise lijina lyaKalunga kupwa lyajila?

⁶ Putu vene kushikulu, Yehova netavisanga vangamba jenyi vazate mulimo wakulingisa lijina lyenyi kupwa lyajila. Twatela kwanuka ngwetu katweshi kuhasa kulingisa lijina lyaKalunga lipwenga lyajila chikumako mwomwo lyapwa lyehi lyajila. Jino tunahase kulilingisa ngachilihi kupwa lyajila? Isaya ambile ngwenyi: “Yehova wamayongomena ikiye mwatela kumona kupwa wajila.” Kaha Yehova ahanjikile hali vatu jenyi ngwenyi: “Navakajilika lijina lyami . . . , kaha navakevwanga woma Kalunga kaIsalele.” (Isa. 8:13; 29:23) Ngocho tweji kujilikanga lijina lyaKalunga hakulimona kupwa lyakulipwila, lyakulihandununa kumajina osena, nakuvumbika ovyo lyemanyinako, nakukafwa veka valimonenga kupwa lyajila. Chachinenenyi, tweji kusololanga ngwetu twevwa lijina lyaKalunga woma hakwitavila ngwetu Yehova ikiye Muka-kutuyula nakumwononokanga namichima yetu yosena.—Vishi. 3:1; Kuso. 4:11.

7, 8. (a) Mwomwo ika hahichilile shimbu yayisuku numba vatu jaKalunga vavavulukile lijina lyenyi? (b) Vyuma muka natushimutwila?

⁷ Vangamba jaKalunga vanazachisanga lijina lyaKalunga mumikanda yavo kufuma vene muji 1870. Chakutalilaho, Kaposhi Kakutalila waAugust 1879 namukanda wamyaso valowele mumwaka vene uze, vavulukilemo lijina lyaKalunga, Yehova. Chasoloka nge shimbu kanda Yehova etavise vatu jenyi valivulukile lijina lyenyi lyajila, asakile chatete vatesemo vyuma vyasakiwa. Uno Yehova akafwile ngachilihi vaze Vaka-Kulinangula Mbimbiliya vatengamo kuvavulukila lijina lyenyi?

⁸ Nge natukekesa vyuma vyasolokele kufuma muji 1800 nakuheta muji 1900, natumona omu Yehova akafwile vatu jenyi vatachikize kanawa muchano waulemu wakujila chalijina lyenyi. Tushimutwilenu jino havyuma vitatu vyamuchano kanou.

9, 10. (a) Mwomwo ika Kaposhi Kakutalila wakulivanga ahanjikilile chikuma hali Yesu? (b) Vyuma muka vyalumukile kufuma mu 1919, kaha vyuma muka vyafumineho? (Talenu nalipwata “ Omu Kaposhi Kakutalila Nazezula Lijina lyaKalunga.”)

⁹ Chatete, vatu jaYehova vatachikijile omu lyalema lijina lyaKalunga. Vaka-Kulinangula Mbimbiliya vakushishika vamwenenga chihande chandando yakusokola kupwa hichihande chachilemu chamuMbimbiliya. Evi vikiko Kaposhi Kakutalila ahanjikililenga chikuma hali Yesu. Chakutalilaho, mumwaka watete vaputukile kulovola eyi mangazini, vavulukilemo Yesu mapapa kakavulu kuhambakana Yehova. Kaposhi Kakutalila waMarch 15, 1976, ahanjikile hali Vaka-Kulinangula Mbimbiliya vakunyima ngwenyi, ‘vahanyinenga chikuma ulemu’ Yesu kuhambakana Yehova. Oloze mukuhita chalwola, Yehova avakafwile vatachikize ngwavo Mbimbiliya yamona lijina lyaKalunga kupwa lyalilemu chikuma. Jino Vaka-Kulinangula Mbimbiliya valingile ika? Ou Kaposhi Kakutalila ahanjikile ngwenyi, kufuma mu 1919 “vaputukile kuhana kavumbi Yehova uze apwa Ise yaMeshiya.” Kaha mumyaka 10 yakavangijileho kufuma mu 1919, Kaposhi Kakutalila avulukile lijina lyaKalunga mapapa akuzomboka 6,500.

¹⁰ Enga, vavumbikile lijina lyaKalunga, Yehova, kaha vasolwele chikupu ngwavo vazangile lijina kana. Ava vandumbwetu ‘vavilikile lijina lyaYehova,’ ngana muze alingile Mose kushikulu. (Lushi. 32:3; Samu 34:3) Kaha nganomu vyahanjika Visoneka, Yehova amwene zangi yavo vasolwele yakuzanga lijina lyenyi, kaha avevwililile uselewa.—Samu 119:132; Hepe. 6:10.

11, 12. (a) Mikanda yetu yalumukile ngachilihi kufuma mu 1919? (b) Yehova alwezele vatu jenyi vashinganyeke hamulimo muka, kaha mwomwo ika?

¹¹ Chamuchivali, vaka-Kulishitu vamuchano vatachikijile jino mulimo uze avahana Kalunga. Kufuma vene mu 1919, vandumbwetu vawavisa vaze vapwile nakutwaminyina vaputukile kukekesa upolofweto waIsaya. Kufumaho, vyuma vasonekelenga mumikanda yetu vyalumukile. Mwomwo ika natwambila ngwetu vyuma valumwine vyapwile ‘kulya halwola lwakutamo’?—Mateu 24:45.

¹² Shimbu kanda 1919, mangazini yaKaposhi Kakutalila kayahanjikile hamazu aIsaya akwamba ngwavo: “Yehova nambe  ngwenyi: ‘Enu munapu muvinjiho jami, yenu ngamba yami uze ngunasakula.’” (Tangenu Isaya 43:10-12.) Oloze kufuma mu 1919, mikanda yetu yaputukile kushindakanya hajivesi eji jamuMbimbiliya nakukolezeza vawavisa vosena vazane mumulimo ou avahana Yehova wakuvilika vyayikiye hakupwa vinjiho jenyi. Kufuma mu 1925 nakuheta mu 1931, kwapwile jimangazini jaKaposhi Kakutalila kafwe 57 jize jashimutwilile hali Isaya kapetulu 43, kaha kaposhi hikaposhi atalishile mazu aIsaya kuli vaka-Kulishitu vamuchano. Hamyaka kana, Yehova apwile nakukafwa vatu jenyi vatachikize mulimo uze vatelele kuzata. Mwomwo ika? Alingile ngocho mangana “vaveseke vavamone nge vanatemo.” (Chimo. 1, 3:10) Shimbu kanda Vaka-Kulinangula Mbimbiliya vavavulukile lijina lyaKalunga, vilinga vyavo vyatelele kusoloka hatoma kuli Yehova ngwavo vanatemo chikupu kuvavuluka ngwavo vinjiho jenyi.—Luka 24:47, 48.

13. Chihande muka chachilemu vahanjikile muMazu aKalunga?

¹³ Chamuchitatu, vatu jaYehova vatachikijile jino kulema chakulingisa lijina lyaKalunga kupwa lyajila. Mumyaka yaji 1920, vatu jaKalunga vatachikijile ngwavo chapwile chachilemu kulingisa lijina lyaKalunga kupwa lyajila. Mazu aKalunga ahanjika vyuma muka hachihande kana? Achitalenu havyakutalilaho vino vivali. Mwomwo ika Kalunga asokwele vaIsalele muEjipitu? Ambile ngwenyi: ‘Mangana ngulingise lijina lyami valivilike hamavu hosena.’ (Kulo. 9:16) Kaha nawa mwomwo ika Yehova atetelelele vaIsalele omu valikangilenga kuli ikiye? Alingile ngocho ‘mwomwo yalijina lyenyi, kuchina navalisaula kumeso avaka-mafuchi.’ (Ezeke. 20:8-10) Vyuma muka valinangwile Vaka-Kulinangula Mbimbiliya kumijimbu eyi nayeka yamuMbimbiliya?

14. (a) Kumyaka yakukokela ku 1930, vatu jaKalunga vatachikijile vyuma muka? (b) Vyuma vatachikijile Vaka-Kulinangula Mbimbiliya vyavakafwile ngachilihi mumulimo wakwambulula? (Talenu nawa lipwata lyakwamba ngwavo “ Vyuma Vyatulingisa Twambulule.”)

¹⁴ Omu vatu jaKalunga vahetele kumyaka yakukokela ku 1930, vatachikijile jino mwalumbunukilile vyuma ahanjikile Isaya myaka kafwe 2,700 kunyima. Isaya ahanjikile hali Yehova ngwenyi: “Omu mukiko walingile hakutwaminyina vatu jove, mangana ulitungile lijina lyamwaza.” (Isa. 63:14) Vaka-Kulinangula Mbimbiliya vatachikijile ngwavo chuma chachilemu chikuma shina kulingisa lijina lyaKalunga kupwa lyajila, keshi ulwilo wavoko. (Isa. 37:20; Ezeke. 38:23) Mu 1929, mukanda waProphecy wambile ngwawo: “Vyuma vyakutenga vyosena vyatela kumona lijina lyaYehova kupwa lyalilemu.” Kwalumuka kanechi chakafwile vangamba jaKalunga vambulule natwima vyaYehova nakufumisa katombo halijina lyenyi.

15. (a) Kuheta muji 1930, vandumbwetu vatachikijile vyuma muka? (b) Lwola muka lwahetele?

¹⁵ Kuheta muji 1930, vandumbwetu vatachikijile jino kulema chalijina lyaKalunga, namulimo avahanyine Kalunga kuzata, nachihande chachilemu vatelele kuvatula. Ngocho Yehova amwene ngwenyi lwola lwahetele jino lwakwitavisa vatu jenyi valiluke lijina lyenyi. Tukekesenu jino vyuma vyalingishile numba vatuvulukile lijina kana.

16. (a) Yehova azezwile ngachilihi lijina lyenyi? (b) Kalunga asakwile veya chatete kupwa vatu jenyi?

¹⁶ Jila yimwe yize Yehova eji kuzezwilangamo lijina lyenyi shina kupwa navatu hano hamavu vaze avulukila lijina lyenyi. Kufuma vene mu 1513 B.C.E., vaIsalele vakiko vapwile vatu jaYehova. (Isa. 43:12) Oloze vahonene kutesamo lushiko valishikile naKalunga, kaha mu 33 C.E. kavapwile cheka vatu jaKalungako. Yehova “alakanyine vaka-mafuchi eka lwola lwatete mangana ambatemo vamwe muli vakiko vapwenga vatu navavulukilanga lijina lyenyi.” (Vili. 15:14) Ava vatu vasakwile vavavulukile jino ngwavo “Isalele yaKalunga,” kaha vapwa vaka-Kulishitu vawavisa vakumafuchi akulisezaseza.—Ngale. 6:16.

17. Vyuma muka alingile Satana mangana vatu vahone kutachikiza muchano?

¹⁷ Kuheta mu 44 C.E., tumbaji twaKulishitu vavalukile ngwavo “vaka-Kulishitu kweseka nomu atwaminyinyine  Kalunga.” (Vili. 11:26) Hakavanga eyi vulukiso yatalishile kaha kuli vaka-Kulishitu vamuchano. (Petu. 1, 4:16) Oloze nganomu chasolola chifwanyisa chaYesu chatiliku namwila, Satana alingishile navaka-kwitava vamakuli valivuluke ngwavo vaka-Kulishitu. Kaha hamyaka yayivulu, vatu kavatachikijile chihandwa chapwile hali vaka-Kulishitu vamuchano navaze vamakuli. Oloze kuheta mu 1914 ‘mungonde yakwaha,’ vaka-Kulishitu vamuchano vaputukile kusoloka hatoma. Mwomwo ika? Mwomwo vangelo vaputukile kuhandununa vaka-Kulishitu vamakuli kuli vaka-Kulishitu vamuchano.—Mateu 13:30, 39-41.

18. Vyuma muka vyalingishile vandumbwetu vafwile kuliluka lijina lyeka?

¹⁸ Omu vatongwele ndungo wakushishika mu 1919, Yehova akafwile vatu jenyi vatachikize mulimo avahanyine uze vatelele kuzata. Vatachikijile ngwavo kwambulula kuzuvo hizuvo chikiko nachivahandula kuli vaka-Kulishitu vamakuli. Kufumaho vamwene nge kuvavuluka kaha ngwavo “Vaka-Kulinangula Mbimbiliya” kachatelemoko. Mwomwo mulimo wavo kawapwile wakulinangula kaha Mbimbiliyako, oloze wapwile wakuvilika lijina lyaKalunga nakulizezula helu. Jino lijina muka vatelele kuvaluka? Chihula kana vachikumbulwile mu 1931.

19, 20. (a) Vyuma muka vavilikile mu 1931 vize vyevwishile vatu kuwaha? (b) Vandumbwetu vevwile ngachilihi omu vavalwezele lijina lyavo lyalihya?

¹⁹ MuJuly 1931, Vaka-Kulinangula Mbimbiliya 15,000 vayile kukukunguluka changalila chapwile kuColumbus, Ohio, U.S.A. Vevwile kuwaha chikuma hakumona vasona vavanene J na W vaze vasonekele halipapilo lyahelu lyakunoneka chavihande. Valihulishile ngwavo, ‘Uno vasona kana vanemanyinako ika?’ Vaputukile kuhumikiza ulumbunwiso wakulisezaseza. Jino kuheta lyaSondo July 26, Ndumbwetu Joseph Rutherford avilikile ngwenyi: “Tuli nakusaka vatutachikize jino nakutuvuluka ngwavo yetu, Vinjiho jaYehova.” Halwola kana, vosena mulizavu vatachikijile jino mwalumbunukilile vaze vasona J na W ngwavo, Jehovah’s Witnesses. Eli lijina lyafumine hachisoneka chaIsaya 43:10.

²⁰ Vaze vakungulukile vatwile jingunda nakusakwilila hatando yayisuku kusolola nge vetavilile lijina kana. Kukunguluka kana chapwile nahavisaji vyapeho, kaha vachivwile nakumafuchi amavulu. Ndumbwetu Ernest Barber napuwenyi Naomi vakulifuchi lyaAustralia vambile ngwavo: “Omu vaputukile kusakwilila kuAmerica, vandumbwetu munganda yaMelbourne navakiko vaputukile kusakwilila chikuma nakulisamba. Katweshi kukavulyama likumbi kanako.” *

21. Lijina lyalihya valukile vandumbwetu lyavakafwile ngachilihi kwambulula mujimbu?

²¹ Omu vatu jaKalunga vavalukile lijina lyamuVisoneka lyaVinjiho jaYehova, vapwile jino natwima yakwazana mumulimo wakwambulula. Ndumbwetu Edward Grimes napuwenyi Jessie vapayiniya muUnited States vaze vapwile  kukukunguluka kana mu 1931 munganda yaColumbus, vambile ngwavo: “Twafumine hembo Vaka-Kulinangula Mbimbiliya, hakukinduluka twapwile tuVinjiho jaYehova. Twevwile kuwaha kutuluka lijina lize lyatukafwile tuzezule lijina lyaKalunga ketu.” Omu chakumine echi kukunguluka, Vinjiho vamwe vaputukile kuzachisa jila yayihya yakuzezwilamo lijina lyaKalunga. Hakuya nakwambulula, valijimbwilenga kuvatu hakuvahana kalipapilo vasonekele ngwavo: “Ami nguchinjiho chaYEHOVA, nguli nakwambulula vyaWangana waYEHOVA Kalunga ketu.” Enga, vatu jaKalunga vawahililile kuvavulukila lijina lyaYehova, kaha vavilikile eli lijina lyalilemu mukaye kosena.—Isa. 12:4.

22. Vyuma muka vyasolola nge vatu jaYehova vatwama nakatachikijilo kakulipwila?

²² Munahichi myaka yayivulu kufuma haze Yehova akafwile vandumbwetu vawavisa valiluke lijina lyakulipwila. Uno hamyaka yoseneyi yinahichimo, kutala Satana nahase kujimbangana vatu jaKalunga tahi? Kutala nalingisa vatu vahone kumona chihandwa chavaka-Kulishitu vamuchano navaze vamumauka akwitava chamakuli tahi? Nduma, kahashileko. Makumbi ano vatu vali nakumona chihandwa hali etu vinjiho jaKalunga kuhambakana muze chapwile kunyima. (Tangenu Mika 4:5; Malaki 3:18.) Vatu vavavulu vatutachikijila kulijina lyaKalunga, kaha vosena vaze veji kuhanjikanga lijina kana veji kuvamonanga ngwavo navakiko vapwa Vinjiho jaYehova. Muchishishisa chakulichingasana mukwitava chamakuli chize chinalisale mukaye, kulemesa chamuchano chaYehova ‘chinazame mbe helu lyajipili jikwavo.’ (Isa. 2:2) Makumbi ano kulemesa Yehova nalijina lyenyi lyajila vanavizezula helu chikuma.

23. Mazu muka akutukolezeza atwama hali Samu 121:5?

²³ Cheji kutukolezezanga chikuma hakutachikiza ngwetu Yehova mwatukinga lika kuli Satana uze afwila kutufumbukila. (Samu 121:5) Enga, natuhanjika ngana muze ahanjikile muka-kwimba jisamu ngwenyi: “Wawahilila muyachi uze ukwechi Kalunga kawo Yehova, vatu vaze nasakula kupwa luheto lwenyi.”—Samu 33:12.