Kuli Enu Vakwetu Vaka-Kwambulula Wangana:

ACHISHINGANYEKENU nayenu muli haMbetele lyaChitanu nachimene haOctober 2, 1914. Munatwame hachitwamo chenu kumesa mweji kutwamanga hakulya chachimene, kaha munakuvandamina Ndumbwetu C. T. Russell ezenga. Nakushimbula chiku, mwasokolola kuchikolo nakwingila. Ngana mwamakumbi osena, mwemana ndundulu nakumeneka vaka-Mbetele ngwenyi, “Menekenu mwane muvosena.” Oloze muchishishisa chakutwama hachitwamo chenyi, mwasakwilila jikushi nakuvilika ngwenyi: “Myaka yaVaka-mafuchi Eka navamyangana javo yinakumu.” Tunafwelela namuwahilila chikuma mwomwo munatalililanga vyuma kana hatando yayisuku. Enu navakwenu vaka-Mbetele namuwahilila chikuma nakuputuka kusakwilila.

 Munahichi myaka yayivulu kufuma haze Ndumbwetu Russell avilikile mujimbu kanou wakulipwila. Uno vyuma muka unalingi Wangana kufuma haze? Unalingi vyuma vyavivulu chikuma. Yehova nazachisanga ou Wangana nakutomesa vatu jenyi nakuvanangula. Mu 1914, vapwile vavandende kaha, oloze oholyapwa vanazomboka hajimiliyoni 8. Uno enu munanganyala ngachilihi kukunangula kana?

Makumbi ano vandumbwetu veji kwambanga ngwavo, “Litemba lyaYehova lyakushipilitu lili nakutambuka washiwashi.” Mukiko vene. Kufuma vene mu 1914, eli litemba, lize lyemanyinako chihanda chaliuka lyaYehova chakushipilitu, linapunga nakutambuka washiwashi chikuma nganomu natulinangula mumukanda uno. Hakufwila kwambulula mujimbu wamwaza mukaye kosena, vaka-kwambulula Wangana vanazachisanga jijila jakulisezaseza jakufwana nge mapapilo amijimbu, nakutalisa mivwimbimbi, najikati jamujimbu wamwaza, najifonongalafu, navisaji, naInternet, najijila jeka.

Yehova nakisula mulimo wetu, kaha oholyapwa tuli nakusoneka mikanda yahanjika haMbimbiliya mumalimi akuzomboka 670 nakuyihana kuvatu hawana wakanyombo. Vatu vakulisuula vanakukafwa kutunga jiZuvo jaWangana, najiZuvo jaKukunguluka Chachinene, namitango, mumafuchi aluheto namumafuchi akuhutwa. Kaha nawa nge kuchihela chimwe kunasoloka ukalu wakulijila, vandumbwetu veji kulahilangako nakukafwa vaze vanayande, ngocho veji ‘kukafwanga vakwavo mulwola lwavihuli.’—Vishi. 17:17.

Lwola lumwe, vatwamina vamukwitava navaka-kole jetu veji ‘kutuyanjisanga hakulyongela mujishimbi,’ oloze cheji kutukolezezanga chikuma hakumona omu luyanjisa kana lweji kulingisanga “mujimbu wamwaza uzovoloke.”—Samu 94:20; Fwili. 1:12.

Chapwa hikutokwa chachinene kulikata nayenu vakwetu “vaka-kuzata kuzuvo.” Tachikizenu ngwenu twamizanga chikuma muvosena. Tunafwelela ngwetu vihande vili mumukanda uno navimikafwa mutachikize nakusakwilila uswana wenu wakushipilitu.—Mateu 24:45.

Yehova atwaleho lika kumikisula.

Yetu vandumbwenu,

Lizavu Lyakutwaminyina lyaVinjiho jaYehova