1, 2. Chuma muka chakulipwila chasolokele kunyima, kaha mwomwo ika vatu vahonene kuchimona?

KUNYIMA kunasolokanga vyuma vyakulipwila. Vatu vavavulu veji kushinganyekanga ngwavo kachi kuvapwile halwola kana. Kutala omu mukiko mweji kushinganyekanga nayenu tahi? Oloze nge kumwapwile, kutala kachi mwatachikijile vyumevi vyakulipwila tahi? Pamo kachi kamwavitachikijileko. Vyuma vize vyeji kwalumunanga kuyoya chavatu vize nawa veji kusonekanga mumikanda kakavulu vatu kaveshi kuvitachikiza kanawako. Kaveshi kuvitachikizako mwomwo vyeji kusolokelanga kupenge, kwakufwana nge mutupete twajizuvo, mujiofesi jafulumende, nakuvihela vyeka vyakuhengama. Oloze vyeji kukwatanga hakuyoya chavatu vavavulu.

² Kushikulu kwasolokele chuma chachinene chakulipwila chize kanda chisolokengaho lyehi, kaha chakwachile hakuyoya chavatu vavavulu. Chuma kana chasolokele mwilu, kaha vatu kavachimweneko. Halwola kana Wangana waKalunga waputukile kuyula. Wangana kana wapwa fulumende yaMeshiya yize kalinwaha yinongese viyulo vyamukaye vyosena. (Tangenu Ndanyele 2:34, 35, 44, 45.) Hakuwana nge vatu kavamwene omu Wangana waputukile kuyulako, uno twatela kwamba ngwetu Yehova aswekelele vatu chuma kana nyi? Uno akafwile vatu jenyi vakushishika vatachikize ngwavo Wangana kalinwomu uputuke kuyula tahi? Tushimutwilenu jino vyuma kana.

3-5. (a) Iya apwile “muluwa walushiko” vavuluka hali Malaki 3:1? (b) Vyuma muka vyasolokele shimbu kanda “muluwa walushiko” ezenga kutembele?

³ Putu vene kushikulu, Yehova akafwilenga vatu jenyi mangana vatachikize lwola luze Wangana waMeshiya naukaputuka kuyula. Chakutalilaho, upolofweto wahali Malaki 3:1 wamba ngwavo: “Talenu! Nangukatuma muluwa wami, kaha mwakanguwahishila jila. Jino Mwata wamuchano uze muli nakutondatonda mwakeza kutembele yenyi. Muluwa walushiko uze mweji kwivwilanga kuwaha, mwakeza.”

⁴ Kweseka nakutesamo chaupolofweto kana makumbi ano, lwola muka “Mwata wamuchano” Yehova ejile nakukekesa vaze vapwile nakuzachila muchipango chahano hamavu chatembele yenyi yakushipilitu? Ou upolofweto walumbununa ngwawo, Yehova ejile ‘namuluwa walushiko.’ Uno ou  muluwa walushiko apwa iya? Apwa Yesu Kulishitu Mwangana waWangana waKalunga. (Luka 1:68-73) Hakuwana nge apwile Muka-kuyula wamuhya, akekesele nakutomesa vatu jaKalunga hano hamavu.—Petu. 1, 4:17.

⁵ Uno uze “muluwa” mukwavo vavuluka hali Malaki 3:1 ikiye iya? Ou muluwa vavuluka muupolofweto atelele kupwako shimbu kanda Mwangana waWangana waKalunga aputuke kuyula. Uno shimbu kanda 1914, kwapwileko umwe ‘awahishilile jila’ Mwangana waWangana waKalunga tahi?

6. Iya emanyinyineko “muluwa” vahanjikile muupolofweto, uze akafwile vatu jaKalunga vatachikize vyuma vyapwile nakwiza kulutwe?

⁶ Mumukanda uno natuwana omu vanakumbulula vihula kanevi hakukekesa mijimbu yakunyima yavatu jaYehova vamakumbi ano. Mijimbu kana yasolola nge kusongo yalikulukaji lyamyaka lyakusokesa 19, kwapwile lizavu lyalindende lyavaka-Kulishitu vakushishika, numba tuhu halwola kana kwapwile vaka-kwitava vamakuli vavavulu. Lizavu kana valivulukile ngwavo Vaka-Kulinangula Mbimbiliya. Charles T. Russell namasepa jenyi vaze vapwile nakutwaminyina lizavu kana vemanyinyineko “muluwa” uze vavulukile muupolofweto, mwomwo vapwile nakutetekela vatu jaKalunga nakuvakafwa vatachikize vyuma vyapwile nakwiza kulutwe. Tushimutwilenu jijila jiwana jize azachishile ou “muluwa” hakutwaminyina vatu.

7, 8. (a) Muji 1800, veya vaputukile kulweza vatu ngwavo kunangula chamwono wakuzeneka kufwa chapwa chamakuli? (b) Kunangula muka chikwavo chamakuli chize asopolwele C. T. Russell namasepa jenyi?

⁷ Ava Vaka-Kulinangula Mbimbiliya valombelenga, nakuhehwojola vihande, nakuvishimutwila, nakuvitavila mangana vavisoneke mumikanda. Putu vene kunyima, mauka aKulishitendomu anapunga lika mumilima yakushipilitu, kaha ananangulanga vatu vyuma vyamakuli. Chakutalilaho, vanangwilenga ngwavo mwono kaweshi kufwako. Jino kuheta mumyaka yaji 1800, vaka-kulinangula Mbimbiliya vakushishika vahehwojwele hakunangula kana, kaha vawanyine nge kachafumine muMazu aKalungako. Mwata Henry Grew, naGeorge Stetson, naGeorge Storrs vasonekele mikanda nakulweza vatu ngwavo kunangula kana chapwile chamakuli. * Vyuma vasonekele nakunangula vyakundwijile vihande anangwilenga C. T. Russell namasepa jenyi.

⁸ Lizavu lyaVaka-Kulinangula Mbimbiliya lyawanyine nge nakunangula chikwavo chakwamba ngwavo vatu vamwaza vosena veji kuyanga mwilu nge vanafu, nachakwamba ngwavo Kalunga eji kuyekelesanga vatu mukakahya kahelo, chapwile chamakuli. Russell namasepa jenyi vasolwele hatoma nge kunangula kana chapwile chamakuli, kaha vihande kana vavisonekelenga mumikanda, namujitalakiti, nahamapapilo eka amijimbu.

9. Kaposhi umwe ahanjikile vyuma muka hakunangula chaTulunga vatatu?

⁹ Vaka-Kulinangula Mbimbiliya nawa vasolwele hatoma ngwavo kunangula chaTulunga Vatatu chapwile chamakuli. Kaposhi Kakutalila wamu 1887 (Zion’s Watch Tower) ambile  ngwenyi: “Visoneka vyasolola hatoma nge Yehova naMwata Yesu vapwa vatu vavali, ise namwana.” Ou Kaposhi ahanjikile nawa ngwenyi, “chinapu chaluvinda hakuwana nge vatu vavavulu vanakwitavila nakutandakanyisa kunangula kanechi chakwamba ngwavo Kalunga apwa mutatu, chipwe ngwavo tulunga vatatu mukalunga umwe. Hakuwana nge jichachi jili nakutandakanyisa kunangula kanechi chamakuli, chinasolola hatoma nge Satana ikiye ali nakuvatwaminyina.”

10. Kaposhi Kakutalila ahanjikile vyuma muka hamwaka wa 1914?

¹⁰ Eyi mangazini yahanjikilenga chikuma haupolofweto wakupwako chaKulishitu. (Zion’s Watch Tower and Herald of Christ’s Presence) Vaka-Kulishitu vawavisa vakushishika vaze vasonekelenga eyi mangazini venjikijile ngwavo upolofweto waNdanyele wakuvuluka “jitando 7” wapwile nakwinyikila kulwola naukaputuka kuyula Wangana waMeshiya kweseka nakujina chaKalunga. Muji 1870 vahanjikile ngwavo mumwaka wa 1914 mukiko najikakuma jize jitando 7. (Ndanye. 4:25; Luka 21:24) Numba tuhu kavatachikijile vyuma vyavivulu vyasolokele mumwaka kanako, oloze vavilikile mukaye kosena vyuma vejivile halwola kana vize vyakafwile jino vatu vavavulu.

11, 12. (a) Ndumbwetu Russell alishile iya hamuchano anangwile? (b) Mulimo azachile Russell navakwavo wapwile ngachilihi waulemu kumwaka wa 1914?

 ¹¹ Ndumbwetu Russell namasepa jenyi kavalisashile nakwamba ngwavo ou muchano wamuVisoneka vauwanyine mwomwo yakunangakana chavoko. Ndumbwetu Russell alishile vakwavo veka vaze vapwileko shimbu kanda ikiye apwengako. Oloze chachinenenyi, alishile Yehova Kalunga uze eji kunangulanga vatu jenyi vyuma vatela kutachikiza halwola lwakutamo. Pundu vene, Yehova akafwile Russell namasepa jenyi vahandunune kunangula chamuchano kukunangula chamakuli. Mukuhita chamyaka, hapwile chihandwa chachinene hali vakiko navaka-Kulishitendomu.

¹² Mulimo vahundanganyine ava malunga vakushishika wakuwana muchano muVisoneka mumyaka yakukokela ku 1914 wapwile wakukomwesa chikupu. Kaposhi Kakutalila waNovember 1, 1917 ambile ngwenyi: “Vatu vavavulu makumbi ano vanasokoka kuwoma wakunangula chakuyekelesa vatu mukakahya kahelo chipwe kunangula cheka chamakuli . . . Kunangula chamuchano chize chaputukile kafwe myaka 40 kunyima chinakutanda lika swi nomu nachikaheta kumavu kwosena. Kaha nawa vaka-kole vanakufwila kuhonesa kunangula kanechi chamuchano, oloze kaveshi kuhasako ngana muze mutu mwahona kwimika meya amuta.”

13, 14. (a) Uno “muluwa” awahishile ngachilihi jila yaMwangana Meshiya? (b) Vyuma muka natulinangula kuli ava vandumbwetu vakunyima?

¹³ Achishinganyekenu hachumechi: Kachi nge vatu kavatachikijile chihandwa chatwama hali Yesu naIse Yehovako, uno kachi valizangile nakutachikiza vyakupwako chaKulishitu nyi? Nduma. Kachi nge vafwelelele ngwavo Kalunga eji kuyekelesanga vatu mukakahya kahelo, kaha nawa ngwavo vatu vakushishika vosena nge vanafu veji kuyanga mwilu nakutambula mwono wakuzeneka kufwa, kachi kavalizangileko. Twatela kwanuka ngwetu wana kanou wakuya mwilu wapwa wavaka-kukavangiza Kulishitu vavandende kaha. Pundu vene, ou “muluwa” awahishilile jila Mwangana waWangana waKalunga.

¹⁴ Nyi ngachilihi etu makumbi ano? Vyuma muka natulinangula kuli ava vandumbwetu vakunyima? Nayetu twatela kutanganga Mazu aKalunga hakumbi hakumbi. (Yowa. 17:3) Hakuwana nge vatu vavavulu mukaye vali nakufwa zala yakushipilitu, yetu twatela kulya vyakulya vyakushipilitu vanakutuhana.—Tangenu WaChimoteu 1, 4:15.

15. Vaka-Kulinangula Mbimbiliya vatachikijile vyuma muka hakuhita chalwola? (Talenu nawa kwinyikila chamwishi.)

¹⁵ Vaka-Kulinangula Mbimbiliya vanangwilenga ngwavo chapwile chachilemu kufuma mujichachi. Mu 1879, Kaposhi Kakutalila ahanjikile “vyachachi yaMbavilone.” Uno ou kaposhi apwile nakuvuluka vyaPopu naChachi yaKatolika tahi? Hamyaka yayivulu, jichachi jaPolotesitati janangwilenga ngwavo Mbavilone vavuluka muMbimbiliya yemanyinako vyuma vimwe. Kutwala muze, Vaka-Kulinangula Mbimbiliya vatachikijile ngwavo jichachi jaKulishitendomu josena  jemanyinyineko “Mbavilone.” Mwomwo ika? Mwomwo jichachi josena janangwilenga vyuma vyamakuli vyakufwana nge evi tunavuluka lyehi. * Kutwala muze, mikanda yetu yahanjikile hatoma vyuma vatelele kulinga vatu vamichima yamwaza vaze vapwile mujichachi jaMbavilone.

16, 17. (a) Kaposhi namukanda ukwavo vasonekele wahuhumwine ngachilihi vatu vafume mukwitava chamakuli? (b) Vyuma muka vyalingishile vatu vahone kukavangiza kuhuhumuna kana? (Talenu kwinyikila chamwishi.)

¹⁶ Chakutalilaho, mukanda umwe vasonekele mu 1891 (Millennial Dawn Volume III) wahanjikile ngwawo Kalunga akanyine hatoma Mbavilone. Wambile ngwawo: “Jichachi jaMbavilone josena vanajikane.” Kaha watwalileho ngwawo, “vosena vaze vanakane kunangula chaMbavilone navyuma eji kulinganga vatela kulihandula kuli ikiye.”

¹⁷ MuJanuary 1900, Kaposhi Kakutalila ahuhumwine vaze kavajimishile majina avo mumikanda yamujichachi jaKulishitendomu, nakwamba ngwavo, “Ngwazanga muchano, oloze ngweji kuyanga kujichachi jeka hamwe nahamwe.” Ou kaposhi ahanjikile ngwenyi: “Kutala chakutamo kulinga lihinji limwe muMbavilone, lihinji likwavo mukwitava chamuchano nyi? Uno omu mukiko azanga Kalunga tulingenga tahi? Nduma. Mutu eji kulishikanga lushiko naliuka lize nengilamo nakwononoka kujindongi jaliuka kana palanga nomu . . . mwakahanjika hatoma ngwenyi nafumu muliuka kana.” Vatwalileho lika kukolezeza vatu valihandule kukwitava chaMbavilone. * Ngocho vangamba jaYehova vatela kulihandula chikupu kukwitava kanechi chamakuli.

18. Mwomwo ika vatu vatela kufuma muMbavilone Yayinene?

¹⁸ Kachi nge vaka-Kulishitu kavavahuhumwine kuswa kumwe vafume muMbavilone Yayineneko, kutala omu Kulishitu vamuswanyishile haWangana kachi awanyine vawavisa vanalizange nyi? Nduma, mwomwo vaka-Kulishitu vaze valihandula kuMbavilone vakiko kaha vanahase kulemesa Yehova “mushipilitu namumuchano.” (Yowa. 4:24) Kutala nayetu makumbi ano tuli nakufwila kulihandula kukwitava chamakuli tahi? Twononokenu lika lushimbi lwakwamba ngwavo: “Enu vatu jami, fumenu muli ikiye.”—Tangenu Kusoloka 18:4.

19, 20. Uno Kaposhi Kakutalila akolezezele ngachilihi vatu valikungulwilenga hamwe nakulemesa Kalunga?

¹⁹ Vaka-Kulinangula Mbimbiliya vanangwilenga ngwavo vaka-kwitava vatela kulikungulwilanga hamwe nakulemesa Kalunga. Vaka-Kulishitu vamwenemwene kaveshi kukumina kaha hakufuma mukwitava chamakuliko. Oloze vatela kwazana nawa mukulemesa chamuchano. Putu vene kunyima, Kaposhi Kakutalila nakolezezanga vatu valikungulwilenga hamwe nakulemesa Kalunga. Chakutalilaho, muJuly 1880, Ndumbwetu Russell ahanjikile hakuwaha chakulikungulwila hamwe, kweseka navyuma akawanyine haungeji ayile. Jino akolezezele vaka-kutanga vatumenga mapapilo akusolola kuzovoloka chavo, kaha mijimbu yimwe vatumine vayisonekelenga muKaposhi Kakutalila. Mwomwo ika? Ou Ndumbwetu ambile ngwenyi: “Tuli nakusaka tutachikize . . . omu Mwata  anakumikisula, nakutachikiza nawa nge munakutwalaho kulikungulwila hamwe navandumbwenu.”

²⁰ Kuheta mu 1882, muKaposhi Kakutalila mwapwile chihande chakwamba ngwavo, “Kulikungulwilanga Hamwe.” Echi chihande chakolezezele vaka-Kulishitu valikungulwilenga hamwe mangana ‘valinangule, nakulikolezeza, nakulijikijisa umwe namukwavo.’ Echi chihande chambile ngwacho: “Likungulwilenunga hamwe muvosena, vaze vaya kumashikola ahelu navaze kavatanga chikumako. Mutu himutu ambatenga Mbimbiliya yenyi, nalipapilo nasonekeso, nakwivwilila kanawa kuvyuma vanakuminangula. Sakulenu chihande chimwe, lombenu Kalunga amihane shipilitu yenyi mangana chihande kana chimilumbunukile. Kufumaho tangenu, shinganyekenu, esekesenu chisoneka chimwe kuchikwavo, kaha muchano naumilumbunukila chikupu.”

21. Chikungulwilo chapwile muAllegheny, Pennsylvania, chahanyine ngachilihi chakutalilaho chamwaza hakulikungulula hamwe nahakufunga vatu?

²¹ Chikota chaVaka-Kulinangula Mbimbiliya chapwililile munganda yaAllegheny, Pennsylvania, U.S.A. Vatu vapwilenga hachikota vahanyine chakutalilaho chamwaza hakulikungulwilanga hamwe kweseka namazu vahwima atwama hali WavaHepeleu 10:24, 25. (Tangenu.) Omu mwahichile myaka, ndumbwetu wakashinakaji Charles Capen anukile  lwola apwile nakuyanga kukukunguluka kana omu apwile kanyike. Asonekele ngwenyi: “Nguchili nakwanuka chisoneka chimwe valamikile hambango yazuvo twapwile nakukungulukila. Echi chisoneka chambile ngwacho, ‘Mwata wenu apwa umwe kaha, kahenu muvosena mwapwa muvandumbu.’ Chisoneka kana ngweji kuchanukanga lika, mwomwo muliuka lyavatu jaYehova kamwatwama vamyatako.” (Mateu 23:8) Ndumbwetu Capen anukile nawa omu valivwishilenga kuwaha kukunguluka nakulikolezeza umwe namukwavo, nomu Ndumbwetu Russell azachilenga nangolo hakufunga mutu himutu muchikungulwilo.

22. Vaka-Kulishitu vakwile ngachilihi omu vavalwezele kupwanga kukukunguluka, kaha vyuma muka natulinangulako?

²² Vaka-Kulishitu vakushishika vononokele jindongi vavahanyine nakukavangiza chakutalilaho kana. Vatungile vikungulwilo mujinganda jajivulu jakufwana nge Ohio, Michigan, nakuNorth America kwosena, nakumafuchi eka. Achishinganyekenu: Kachi nge vatu vakushishika kavavanangwile kwononoka mazu vahwima akulikungulwilanga hamwe nakulemesa Kalunga, kutala kachi valizangile vyakupwako chaKulishitu nyi? Nduma. Nyi ngachilihi etu makumbi ano? Twatela kupwanga kukukunguluka chavaka-Kulishitu lwola lwosena, mangana tulemeselenga hamwe Kalunga nakulikolezeza navandumbwetu kushipilitu.

23. Kaposhi Kakutalila asolwele ngachilihi nge vaze vawavisa vatwama namulimo wakwambulula mujimbu wamwaza?

²³ Vaka-Kulinangula Mbimbiliya vanangwilenga ngwavo vawavisa vosena vatela kwambululanga mujimbu wamwaza. Mu 1885, Kaposhi Kakutalila ambile ngwenyi: “Twatela  kwanuka ngwetu vaka-Kulishitu vawavisa vosena vatwama namulimo wakwambulula mujimbu (Isa. 61:1).” Kaposhi alovokele mu 1888 ahanjikile hatoma ngwenyi: “Mulimo vatuhana twautachikiza kanawa . . . Kachi nge natuuliula chipwe kukana kuuzata, nachisolola nge tuvovwa kaha katwatelemo kupwa tuvaka-Kulishitu vawavisako.”

24, 25. (a) Ndumbwetu Russell namasepa jenyi valingile vyuma muka omu vakolezezele vakwavo vambulule mujimbu? (b) Payiniya umwe alumbunwine ngachilihi mulimo azachilenga halwola luze kakwapwile jiminyauko?

²⁴ Ndumbwetu Russell namasepa jenyi vakolezezelenga vakwavo vambululenga mujimbu, kaha navakiko valingilenga ngocho. Vaputukile kulovola jitalakiti jajivulu. (Bible Students’ Tracts, jize vavulukilenga jino ngwavo Old Theology Quarterly) Vaka-kutanga Kaposhi Kakutalila vatambwilenga eji jitalakiti nakujihana kuvatu hawana wakanyombo.

²⁵ Vaze vazachilenga jola jajivulu mumulimo wakwambulula vavavulukilenga ngwavo vapayiniya. Ndumbwetu Charles Capen uze twavulukanga lyehi nayikiye apwile payiniya. Ambile ngwenyi: “Ngwazachishilenga jimapu jafulumende yaUnited States jingukafwe ngwambulwile kujingalila josena jamuPennsylvania. Eji jimapu jasolwele mikwakwa yosena, kaha jangukafwile ngwambulwile kujingalila josena. Lwola lumwe nge ngunatambuka makumbi atatu hakuya nakuhana vatu mukanda waStudies in the Scriptures, kaha ngwakumwinenga litemba nakavalu mangana ngutwale mikanda kuvatu. Kakavulu ngwasavalililenga hakachi mumande navanjimi. Halwola kana kakwapwile jiminyauko.”

26. (a) Mwomwo ika vandumbwetu vatelele kwazana mumulimo wakwambulula hakutachikiza ngwavo Kulishitu ali nakuyula? (b) Vihula muka twatela kulihulisa?

²⁶ Pundu vene, kwambulula mujimbu wamwaza halwola kana chasakiwile kumika nakupwa vatwima. Kachi nge vaka-Kulishitu vamuchano kavavanangwile kulema chatwama hakwambulula mujimbuko, kutala kachi vatachikijile ngwavo Kulishitu naputuka kuyula tahi? Nduma. Mulimo kanou wapwile hichinjikizo chimwe chakupwako chaKulishitu. (Mateu 24:14) Vatu jaKalunga vatelele kupwa vakulizanga numba vahake kulutwe mulimo kanou wakuyovola vatu. Nayetu makumbi ano twatela kulihulisa ngwetu: ‘Uno ngwahaka kulutwe mulimo wakwambulula tahi? Kutala ngweji kulisuula mangana ngwazanenga chikuma mumulimo kanou tahi?’

27, 28. Vyuma muka kaposetolo Yowano amwene muchakumwenesa, kaha Satana navandemone jenyi valingile ika omu vamwene Wangana unaputuka kuyula?

²⁷ Mwaka waulemu wa 1914 wahetele jino. Ngana muze twahanjikanga kumaputukilo achihande chino, kakwapwile mutu numba umwe amwene vyuma vyakulipwila vyasolokele mwiluko. Chipwe ngocho, kaposetolo Yowano vamumwenesele vyuma kana mujila yachifwanyisa. Amwene “chinjikizo chachinene” mwilu. “Pwevo” lyaKalunga uze emanyinako liuka lyenyi lyavangelo mwilu, emichile kaha asemene mwana walunga. Vatulweza ngwavo, ou mwana wachifwanyisa kalinwomu ‘afunge vaka-mafuchi osena namukombo wafwelu.’ Oloze omu asemukile, “vamuhukwile nakumutwala kuli Kalunga  nakulitanda lyenyi.” Mwilu mwafumine lizu ngwalyo: “Kuneza jino ulwilo, nangolo, naWangana vyakuli Kalunga ketu, nawata waKulishitu yenyi.”—Kuso. 12:1, 5, 10.

²⁸ Chakuzeneka kukakasana, Yowano amwene omu wasemukile chipwe ngwetu waputukile kuyula Wangana waMeshiya. Chuma kana chapwile chakukomwesa chiyovo, oloze kachasuulwishile vatu vosenako. Satana navandemone jenyi valwile jita navangelo vakushishika vaze eji kutwaminyinanga Mikayele chipwe ngwetu Kulishitu. Vyuma muka vyasolokele? Mbimbiliya ngwayo: “Uze chazangombe wamunene vamumbilile hamavu, uze linoka wakushikulu, uze vavuluka ngwavo Liyavolo kaha nawa Satana, uze ali nakuhungumwisa vatu vosena hamavu. Vamumbilile hamavu, navangelo jenyi nawa vavambilile naikiye hamwe.”—Kuso. 12:7, 9.

29, 30. Kufuma vene haze waputukile kuyula Wangana waMeshiya, vyuma vyapwile ngachilihi (a) hamavu? (b) mwilu?

²⁹ Shimbu kanda 1914, Vaka-Kulinangula Mbimbiliya vambile ngwavo mumwaka kana mukiko vihuli navikaputuka. Oloze kavatachikijile mashina namasongo omu navikapwa vyuma kanako. Kweseka navyuma vamumwenesele Yowano, Satana aputukile kuyanjisa vatu hano hamavu. Mbimbiliya yamba ngwayo: “Lamba hamavu nahakalungalwiji, mwomwo Liyavolo neza kuli enu, ali namatoto amanene, mwomwo natachikiza ngwenyi ali kaha nakashimbu kakandende.” (Kuso. 12:12) Mu 1914, jita yakaye yakulivanga yaputukile, kaha vyuma kana vyasolwele hatoma nge Kulishitu naputuka kuyula. Kaha “makumbi akukuminyina” akatwamino kamyaka yino aputukile jino.—Chimo. 2, 3:1.

³⁰ Oloze mwilu mwapwile kuwahilila. Satana navandemone jenyi vavahangilemo. Yowano asonekele ngwenyi: “Enu melu nayenu mwatwamamo, wahililenunga.” (Kuso. 12:12) Hakuwana nge mwilu vatomeselemo, kaha nawa Yesu vamuswanyishile haWangana, ngocho kwapwile jino Wangana wakukafwa vatu jaKalunga hano hamavu. Vyuma muka walingile? Ngana muze twamonanga kumaputukilo achihande chino, Kulishitu hakupwa “muluwa walushiko” avangilile kutomesa vangamba jaKalunga hano hamavu. Kulumbununa ika?

31. Vyuma muka apolofwetele Malaki halwola lwakutomesa, kaha upolofweto kana wateselemo ngachilihi? (Talenu nawa kwinyikila chamwishi.)

³¹ Malaki apolofwetele ngwenyi lwola lwakutomesa nalukapwa lwalukalu. Asonekele ngwenyi: “Iyaze mwakahasa kumika halikumbi mwakeza? Iyaze mwakahasa kwimana omu mwakasoloka? Mwomwo ikiye mwakapwa nge kakahya kamuka-kuheha, nge njapau yavaka-kukosa uvwalo.” (Mala. 3:2) Mazu kana ateselemo. Kuputuka vene mu 1914, vatu jaKalunga vahichile muvyeseko vyavinene navihuli vyavivulu. HaJita yaKaye yakulivanga, Vaka-Kulinangula Mbimbiliya vavavulu vavayanjishilenga nakuvakasa mutumenga. *

32. Ukalu muka wapwile hali vatu jaKalunga mu 1916?

³² Muliuka namukiko mwapwile chimbalanganyi. Mu 1916, Ndumbwetu Russell afwile te ali namyaka yakusemuka  64, kaha vatu jaKalunga vavavulu vasalile mulihayihayi. Chuma kana chasolwele nge vatu vamwe vajikile lufwelelo lwavo hali ikiye. Numba tuhu Ndumbwetu Russell kasakile vatu vajike lufwelelo hali ikiye nakumumona nge hikalunga, oloze vatu vamwe valingilenga ngocho. Shikaho omu afwile, vavavulu vashinganyekele ngwavo naumwe wauchi mwavalumbunwinanga muchano wamuVisoneka, kaha vamwe vambile ngwavo naliuka vene lifwenga. Echi chalingishile vatu vamwe vasosoloke kulufwelelo nakuseza liuka.

33. Vatu jaKalunga vapwile mucheseko muka omu vyahonene kutesamo vyuma vatalililile?

³³ Ukalu ukwavo vamwene shina kuhona kutesamo chavyuma vatalililenga. Numba tuhu Kaposhi Kakutalila avulukile hatoma ngwenyi mu 1914 mukiko nalukakuma Lwola lwaVaka-Mafuchi Eka, oloze vandumbwetu kavatachikijile kanawa vyuma vyosena vyatelele kusolokako. (Luka 21:24) Vashinganyekele ngwavo mu 1914, Kulishitu mwambata vaka-Kulishitu vawavisa nakuya navo mwilu vakayule hamwe. Chaluvinda vyuma kana kavyasolokeleko. Kuheta mu 1917, Kaposhi Kakutalila avilikile ngwenyi mulimo wakwaha uze wambachile myaka 40 naukuma kuchivatuko chavula chamumwaka wa 1918. Oloze mulimo wakwambulula kawakumineko. Watwalileho kufukila namumakumbi akavangijileho. Kaposhi kana ambile nawa ngwenyi mulimo wakwaha wakumine vene, kwasalile kaha mulimo wakuhuhwojola. Chipwe ngocho, kunangula kanechi chafutwishile vavavulu, kaha valitwaminyine kuzachila Yehova.

34. Cheseko muka chachinene chejile mu 1918, kaha mwomwo ika vaka-kwitava chamakuli vashinganyekele ngwavo liuka linafu?

³⁴ Kuheta mu 1918 kwapwile jino cheseko chachinene. Ndumbwetu J. F. Rutherford uze ashishile C. T. Russell hamulimo wakutwaminyina vatu jaKalunga vamukwachile navandumbwetu veka 7 nakuvahaka mukamenga. Vavalwezele ngwavo navapika njele hamyaka yayivulu, kaha vavatwalile munjele yayipi yakuAtlanta, muGeorgia, U.S.A. Halwola kana, mulimo wavatu jaKalunga wasolokele nge unakumu. Vatwamina vamukwitava chamakuli vawahililile chikuma. Vashinganyekele ngwavo omu vanakase ‘vatwamina’ javo, nakusoka chikota chavo muBrooklyn, namulimo wavo wakwambulula muAmerica namuEurope, liuka lyaVaka-Kulinangula Mbimbiliya linafu. (Kuso. 11:3, 7-10) Oloze liuka kalyafwileko.

35. Mwomwo ika Yesu etavishilile vaka-kumukavangiza vahite muvihuli, kaha vyuma muka alingile mangana avalwile?

³⁵ Ava vaka-kole kavatachikijile ngwavo Yesu etavishile vatu jenyi vamone evi vihuliko, mwomwo Yehova atwamine “nge muka-kuheha, nge muka-kutomesa palata.” (Mala. 3:3) Yehova naMwanenyi vejivile ngwavo vaka-Kulishitu vakushishika navahita muvyeseko kanevi vyavikalu nakufumamo valambwe ngana muze palata yeji kulovokanga mukakahya yalambwe, mangana vazate kanawa mulimo waMwangana wavo. Kuheta kukuputuka cha 1919, shipilitu yaKalunga yalingile chuma chize kavashinganyekele vaka-kole  javoko. Vaka-Kulishitu vakushishika vaputukile cheka mulimo wavo. (Kuso. 11:11) Halwola kana, Kulishitu ateselemo chinjikizo chachinene chakusolola nge makumbi akukuminyina aputukile jino. Atongwele “ndungo wakushishika wakuzangama” kulumbununa lizavu lyalindende lyamalunga vawavisa vaze navatwaminyinanga vatu jenyi mangana vavahane kulya chakushipilitu halwola lwakutamo.—Mateu 24:45-47.

36. Vyuma muka vyasolwele nge vatu jaKalunga vaputukile kufukila kushipilitu?

³⁶ Ndumbwetu Rutherford namasepa jenyi vavafumishile mukamenga haMarch 26, 1919. Hahaze vene, vanonekele vyakukunguluka changalila muSeptember. Vaputukile nawa kusoneka Tonenu! (The Golden Age) Eyi mangazini hamwe kaha naKaposhi Kakutalila vajihanyinenga vatu muwande. * Mumwaka kana vaputukile nawa kusoneka mukanda waBulletin, uze tuli nakuvuluka jino ngwetu mukanda waChiyoyelo naMulimo waVaka-Kulishitu. Kufuma vene haze, ou mukanda unakafwenga vaka-kwambulula vazate kanawa mulimo wamuwande. Enga, kufuma vene mu 1919 mulimo wakwambulwila vatu kuzuvo hizuvo unazovoloka.

37. Vatu vamwe vasolwele ngachilihi kulikanga chavo kufuma mu 1919?

³⁷ Mulimo wakwambulula watwalileho lika kuheha vangamba jaKulishitu, mwomwo vaze vapwile vakulivwimba vakanyine  kuzata mulimo kana. Vaze vakanyine kwazana mumulimo kana vafumine muliuka. Kufuma mu 1919, vaka-Kulishitu vakuhona kushishika valikangile nakukundwiza vaka-kole mangana vafumbukile vangamba jaYehova vakushishika.

38. Uno kuzovoloka chavaka-Kulishitu nakufungulula vyeseko chasolola vyuma muka?

³⁸ Chamokomoko nakuvafumbukila kuli vaka-kole, vaka-kukavangiza Kulishitu vatwalileho lika kuzovoloka kushipilitu. Kuzovoloka kana chasolwele hatoma nge Wangana waKalunga wapwile nakuyula. Enga, vatu vakuhona kukupuka vanafungululanga vyeseko vyaSatana nakaye kano kakuhuka, mwomwo yakuvakafwa nakuvakisula kuli Yehova kuhichila muli Mwanenyi naWangana wenyi.—Tangenu Isaya 54:17.

39, 40. (a) Vyuma muka vili mumukanda uno? (b) Vyuma muka namunganyala hakulinangula mukanda uno?

³⁹ Mutupetulu navakavangizaho, natushimutwila vyuma unalingi Wangana waKalunga hano hamavu hamyaka 100 kufuma haze waputukile kuyula. Chihanda hichihanda chamukanda uno nachishimutwila mulimo umwe unatesamo ou Wangana hano hamavu. Mukapetulu hikapetulu, muli lipwata lyakuhituluka lize nalitukafwa tulikekese etu vavene numba nge twamona Wangana kupwa hifulumende nahayo. Kaha mutupetulu vamakumishilo, natukashimutwila vyuma tunakutalilila omu Wangana nawiza kalinwomu nakunongesa kano kaye kakuhuka nakuneha jino palachise hano hamavu. Uno vyuma muka namunganyala hakulinangula mukanda uno?

⁴⁰ Satana anakufwila kumitangula muhone kufwelela Wangana waKalunga. Oloze Yehova anakusaka kujikijisa lufwelelo lwenu mangana muzame mbe. (Efwe. 6:16) Shikaho tuli nakumikolezeza mutange nakulinangula mukanda uno. Lihulisenu ngwenu, ‘Uno ngwafwelela ngwami Wangana waKalunga kuwatwama chikupu tahi?’ Kachi nge mwafwelela ngwenu kuwatwama, kaha namutwalaho lika kushishika palanga nomu vatu vosena navaketavila ngwavo Wangana waKalunga kuwatwama, kaha unakuyula.