1, 2. Mazu muka ahanjikile Yehova yivene kuli vaposetolo jaYesu vatatu, kaha valingile ngachilihi?

NGE Yehova Kalunga yivene namilweze kulinga chuma chimwe, kutala namuchilinga tahi? Chikupu vene, namwitavila kulinga kala chuma mwamilweza numba tuhu chipwa chachikalu ngachilihi.

² Omu hahichile makumbi amandende kufuma haPaseka mu 32 C.E., vaposetolo jaYesu vatatu vaPetulu, naYakova, naYowano vavalwezele kulinga vyuma vimwe kuli Yehova. (Tangenu Mateu 17:1-5.) Omu vapwile “helu lyapili yayisuku” naMwata wavo, vamwene chakumwenesa chize chasolwele Yesu ali halitanda lyaWangana mwilu. Chakumwenesa kana chakunywile Petulu nakumulingisa ahanjikeho. Omu apwile nakuhanjika, livwi lyavafwikile, kaha vevwile lizu lyaYehova. Vatu vavandende kaha vakiko vevwilenga lizu lyaYehova yivene. Yehova avalwezele ngwenyi Yesu apwa Mwanenyi, kaha nawa ngwenyi: “Mwivwililenunga.” Ava vaposetolo vakavangijile awa mazu vavalwezele. Vevwilililenga vyuma anangwilenga Yesu nakukolezeza vakwavo valinge mwomumwe.—Vili. 3:19-23; 4:18-20.

3. Mwomwo ika Yehova asaka twivwilile kuli Mwanenyi, kaha chihande muka natukekesa?

³ Mazu akwamba ngwavo, “Mwivwililenunga” vawasoneka muMbimbiliya mangana tulinanguleko vyuma vimwe. (Loma 15:4) Mwomwo ika? Mwomwo Yesu apwa muka-kuhanjikilako Yehova, kaha lwola lwosena anangwilenga vatu vyuma vize Ise asakile vatu vatachikize. (Yowa. 1:1, 14) Hakuwana nge Yesu ahanjikilenga chikuma vyaWangana waKalunga uze wapwa fulumende yamwilu navakayula kuli Kulishitu Yesu navaze 144,000, twatela kukekesa kanawa hachihande kana. (Kuso. 5:9, 10; 14:1-3; 20:6) Chakavanga tukekesenu vyuma vyalingishile Yesu ahanjike chikuma haWangana waKalunga.

4. Yesu asolwele ngachilihi nge vihande vyaWangana vikiko vyazalile mumuchima wenyi?

⁴ Vihande vyaWangana vikiko vyazalile mumuchima waYesu. Mwomwo ika tunambila ngocho? Mwomwo vyuma vyeji kufumanga mukanwa kamutu vikiko vyeji kusololanga vili mumuchima wenyi. Yesu ambile ngwenyi: “Kanwa keji kuhanjikanga vyuma vinavulu mumuchima.” (Mateu 12:34) Kakavulu omu Yesu apwile nakwambulila vatu, ahanjikilenga vyaWangana. Mumikanda yiwana yamujimbu wamwaza, vavulukamo Wangana mapapa akuzomboka 100 chikumanyi havihande  ahanjikile Yesu. Omu ambulwilenga, ahanjikilenga chikuma haWangana waKalunga. Ambile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.” (Luka 4:43) Nomu vamusangwile, Yesu atwalileho lika kuhanjika vyaWangana kuli tumbaji twenyi. (Vili. 1:3) Chapundu vene, mumuchima waYesu mwazalile vihande vyaWangana waKalunga vize ahanjikilenga.

5-7. (a) Twatachikiza ngachilihi ngwetu vihande vyaWangana vikiko vyazala mumuchima waYehova? Lumbununenu. (b) Natusolola ngachilihi ngwetu vihande vyaWangana waKalunga vikiko vyazala mumuchima wetu?

⁵ Vihande vyaWangana vikiko nawa vyazala mumuchima waYehova. Mwomwo ika tunambila ngocho? Yehova ikiye atumine Mwanenyi umwe kaha wakulipwila hano hamavu, kaha nawa ikiye kasulu kavyuma vyosena vize Mwanenyi ahanjikilenga nakunangula. (Yowa. 7:16; 12:49, 50) Apwa nawa kasulu kavyuma vyosena vize vasoneka mumikanda yiwana yamujimbu wamwaza, muze vasoneka vyachiyoyelo chaYesu namilimo azachile hano hamavu. Achitalenu hachakutalilaho chino.

⁶ Twambenga ngwetu muli najifwato jajivulu jize munakusaka kuhaka mumukanda wajifwato, oloze jino mukanda kana waundende. Uno namulinga ngachilihi? Chapundu vene namusakula kaha jifwato jize jamwaza nakujihakamo. NaMikanda yaMujimbu Wamwaza yapwa nge mukanda wajifwato uze wazala namijimbu yaYesu. Yehova kahwiminyinyine vaka-kusoneka Mikanda yaMujimbu Wamwaza vasoneke vyuma vyosena vize alingile Yesu hano hamavu navize ahanjikileko. (Yowa. 20:30; 21:25) Oloze avatwaminyinyine nashipilitu yenyi yajila vasoneke vyuma vyavilemu vize vyatukafwa twivwishise kanawa mulimo wakwambulula azachile Yesu navyuma vize Yehova amona kupwa vyavilemu. (Chimo. 2, 3:16, 17; Petu. 2, 1:21) Hakuwana nge muMikanda yaMujimbu Wamwaza mwazala navyuma anangwilenga Yesu haWangana waKalunga, chatela kutulingisa jino tukukulule ngwetu vihande vyaWangana vikiko vyazala mumuchima waYehova. Pundu vene, Yehova asaka etu tutachikize kanawa Wangana wenyi.

⁷ Tuvosena twatela kulihulisa ngwetu: ‘Uno vihande vyaWangana waKalunga vikiko vyazala mumuchima wami tahi?’ Nge mukiko, kaha natufwila kwivwilila kuvyuma anangwilenga Yesu navize ahanjikilenga haWangana, nakutachikiza kulema chawo, najila naukejilamo, nalwola naukeza.

8. Yesu alumbunwine ngachilihi kulema chaWangana?

⁸ Tushimutwilenu hakulomba chaYesu chakutalilaho. Yesu azachishile mazu amashi nakulumbununa kulema chaWangana navyuma nautesamo. Mukulomba kana vavulukamo vyuma 7. Vyuma vitatu vyakulivanga vyavuluka vyuma ajina Yehova, lijina lyenyi kupwa lyajila, nakwiza chaWangana wenyi, namwaya muchima wenyi valingemo hamavu namwilu. (Tangenu  Mateu 6:9, 10.) Vyuma kanevi vitatu vyalifwana. Wangana waMeshiya ukiko mwakazachisa Yehova hakulingisa lijina lyenyi kupwa lyajila nakutesamo mwaya muchima wenyi.

9, 10. (a) Wangana waKalunga naukeza nakulinga yika? (b) Vyuma muka vatushika muMbimbiliya vize muli nakufwila kukalivwisa kuwaha?

⁹ Wangana waKalunga naukeza nakulinga yika? Omu tweji kulombanga ngwetu, “Wangana wove wizenga,” tweji kulombanga Kalunga anehe Wangana wenyi mangana ulinge vyuma vimwe hano hamavu. Omu naukeza, naukafumisaho vilinga vyavipi vyosena najifulumende javatu, nakulingisa lifuchi likapwe lyamwaza. (Ndanye. 2:44; Petu. 2, 3:13) Kaha hamavu hosena nahakapwa palachise. (Luka 23:43) Vatu vaze eji kwanukanga Kalunga navakavasangula nakulinunga hamwe navausoko namasepa javo. (Yowa. 5:28, 29) Vatu vakwononoka navakapwa jino vakukupuka nakulivwisa kuyoya haya myaka yosena. (Kuso. 21:3-5) Hamavu hosena nahakapwa kuunda ngana mwilu, kaha vatu navakalinga mwaya muchima waYehova Kalunga. Kutala namusaka mukalivwise vyuma kanevi vatushika muMbimbiliya tahi? Anukenu ngwenu, kala lwola namulomba ngwenu Wangana waKalunga wizenga, muli nakulomba vyuma kanevi vitesemo.

¹⁰ Oholyapwa chinasoloka hatoma nge Wangana waKalunga kanda “wizenga” nakutesamo kulomba kanechi. Mwomwo jifulumende javatu jichili nakuyula, kaha kaye kakahya kanda kezenga. Oloze twatela kwanuka ngwetu, Wangana waKalunga kuuli lyehi nganomu natushimutwila mukapetulu mwakavangizaho. Tushimutwilenu jino vyuma ahanjikile Yesu vyakuvuluka lwola waputukile kupwako Wangana waKalunga nalwola naukeza.

11. Yesu avulukile vyuma muka halwola Wangana waKalunga watelele kupwako?

¹¹ Yesu avulukile ngwenyi, Wangana waKalunga kawaputukile mulikulukaji lyamyaka lyakulivangako, numba tuhu tumbaji twenyi vamwe vashinganyekele ngwavo naupwako halwola kana. (Vili. 1:6) Tushimutwilenu havishimo vivali atele halwola lwakulihandununa.

12. Uno chishimo chatiliku namwila chasolola ngachilihi nge Wangana waKalunga kawapwileko mulikulukaji lyamyaka lyakulivanga?

¹² Chishimo chatiliku namwila. (Tangenu Mateu 13:24-30.) Yesu atele chishimo kana pamo kuchivatuko chavula mu 31 C.E., achilumbunwinyine tumbaji twenyi. (Mateu 13:36-43) Alumbunwine ngwenyi: Omu navakafwa vaposetolo, Liyavolo mwakeza nakutumba mwila (vaka-Kulishitu vamakuli) mutiliku (“vana vaWangana,” chipwe ngwetu vaka-Kulishitu vawavisa). Kaha tiliku namwila navakavyecha vikakolele hamwe swi nakulwola lwakwaha luze lwemanyinako “chikukulwishi chakatwamino kamyaka yino.” Omu nalukaheta lwola lwakwaha, navakavangila kutukulamo mwila, kufumaho jino numba vakakungulwile hamwe tiliku. Chishimo kana chalumbunwine nge Wangana kawatelele kupwako mulikulukaji lyamyaka lyakulivangako, swi nomu jimbuto jakolele. Kaha lwola lwakwaha jino lwaputukile mu 1914.

13. Chishimo muka azachishile Yesu chakusolola nge kavamutongwele kupwa Mwangana hahaze vene ayile mwiluko?

 ¹³ Chishimo chajimina. (Tangenu Luka 19:11-13.) Yesu atele chishimo kana mu 33 C.E. omu apwile nakuya kuYelusalema halwola lwamakumishilo. Vaka-kumwivwilila vashinganyekele ngwavo mwaya nakuhakako Wangana omu mwaheta kuYelusalema. Oloze hakusaka kwolola vishinganyeka vyavo nakuvalumbunwina nge Wangana waKalunga kaveshi kuuhakako halwola luzeko, Yesu alifwanyishile yivene kuli “mutu umwe wamulemu ayile kulifuchi lyapwile kwakusuku mangana akatambule ngolo jawangana.” * Hakwamba ngwenyi “kulifuchi lyapwile kwakusuku,” Yesu apwile nakwamba ngwenyi mwaya mwilu mangana vakamuhane ngolo jaWangana kuli Ise. Oloze atachikijile ngwenyi kaveshi kumutongola kupwa Mwangana hahaze vene ayile mwiluko. Mwakatwama kulivoko lyachilyo lyaKalunga swi nomu nalukaheta lwola lwakumutongola. Shikaho avandaminyine hamyaka yayivulu numba vamutongole.—Samu 110:1, 2; Mateu 22:43, 44; Hepe. 10:12, 13.

14. (a) Yesu akumbulwile ngachilihi chihula vamuhulishile vaposetolo jenyi vawana? (b) Uno kutesamo chaupolofweto avulukile Yesu chatulweza vyuma muka hakupwako chenyi naWangana?

¹⁴ Shimbu kanda Yesu afwenga, tumbaji twenyi vamuhulishile ngwavo: “Chinjikizo muka chakukatachikijilaho kupwako chove nachikukulwishi chakatwamino kamyaka yino?” (Mateu 24:3; Mako 13:4) Yesu avakumbulwile hakuvalweza upolofweto vasoneka hali Mateu kapetulu 24 na 25. Avalwezele nawa vyuma navikasoloka vize navikasolola chinjikizo ‘chakupwako chenyi.’ Kupwako chenyi nakuputuka chaWangana navikaputukila halwola lumwe. Kahomu nalukakuma lwola lwakupwako  chenyi hakiko jino naukeza Wangana waKalunga. Kuli vyuma vyavivulu vinakusolola nge upolofweto avulukile Yesu unatesangamo kufuma vene mu 1914. * Shikaho mwaka kana ukiko waputukile Wangana waKalunga nalwola lwakupwako chenyi.

15, 16. Mazu akwamba ngwavo “chisemunwino chino” atalisa kuli veya?

¹⁵ Jino lwola muka naukeza Wangana waKalunga? Yesu kahanjikile likumbi naukezako. (Mateu 24:36) Oloze atulweza vyuma vize vyasolola nge kalinwomu wizenga. Yesu asolwele ngwenyi Wangana naukeza omu “chisemunwino chino” nachikamona kutesamo chaupolofweto kanou. (Tangenu Mateu 24:32-34.) Uno echi “chisemunwino” chemanyinako veya? Tuhunananenu jino mwalumbunukila lizu kana.

¹⁶ “Chisemunwino chino.” Uno Yesu apwile nakuhanjika vyavatu vakuzeneka kufwelela tahi? Nduma, achitalenu vatu apwile nakuhanjika navo. Yesu apwile nakuhanjika upolofweto kanou kuli vaposetolo jenyi vavandende vaze “vapandamine kuli ikiye kwauka wavo.” (Mateu 24:3) Vaposetolo kana vapwile hakamwihi nakuvawavisa nashipilitu yajila. Tutalenu nawa halwola apwile nakuhanjika vyuma kana. Shimbu kanda ahanjike ‘vyachisemunwino chino,’ Yesu ambile ngwenyi: “Linangulenu chishina chino kuchifwanyisa chamukuyu: Omu weji kusokanga mitango yayihya nakusokolokela mafwo, mweji kutachikizanga ngwenu ngonde yanonga yili kwakamwihi. Nayenu nawa omu namukamona vyuma vyosena evi, katachikizenu ngwenu ali kwakamwihi, kuvikolo.” Chasoloka hatoma nge Yesu kapwile nakuhanjika kuli vatu vakuzeneka kufwelelako. Mwomwo tumbaji vaYesu vawavisa vakiko vatelele kumona kutesamo chaupolofweto kanou wakuvuluka nge Yesu “ali kwakamwihi, kuvikolo.” Shikaho omu Yesu ahanjikile ‘vyachisemunwino chino,’ apwile nakuvuluka vyatumbaji twenyi vawavisa.

17. Mazu akwamba ngwavo “chisemunwino,” “navyuma vyosena evi” alumbunukila mulihi?

¹⁷ “Kacheshi kuhitako kuvanga vyuma vyosena evi vinasoloka.” Uno mazu kana atalisa mulihi? Hakusaka tukumbulule chihula kana, chatete twatela kutachikiza mwalumbunukila lizu “chisemunwino,” “navyuma vyosena evi.” Lizu lyakwamba ngwavo “chisemunwino” lyalumbununa vatu vamyaka yakulisezaseza vaze vayoyele hatando yimwe. Chisemunwino chatwama nalwola lwakuputuka nalwola lwakukuma. (Kulo. 1:6) Mazu akwamba ngwavo “vyuma vyosena evi” emanyinako vyuma vyosena vize vavulukile kutesamo mulwola lwakupwako chaYesu, kuputuka vene mu 1914 swi nakukukuma ‘chaluyando lwalunene.’—Mateu 24:21.

18, 19. Twatela kwivwishisa ngachilihi mazu aYesu akwamba ngwenyi “chisemunwino chino,” kaha vyuma muka natukukulula?

¹⁸ Uno twatela kwivwishisa ngachilihi mazu aYesu akwamba ngwenyi “chisemunwino chino”? Echi chisemunwino chatwama namazavu avali avawavisa. Lizavu lyatete lyapwa lyavawavisa vaze vamwene muvyaputukile kutesamo vinjikizo mu 1914. Lizavu lyamuchivali lyapwa lyavawavisa vaze vamwene ava vawavisa vamulizavu lyatete. Kaha vawavisa vamwe  vamulizavu lyamuchivali navakapwako nomu nalukaputuka luyando lwalunene. Shikaho, awa mazavu osena avali apwa chisemunwino chimwe, mwomwo kuyoya chavo chalishishile. *

¹⁹ Jino vyuma muka twatela kukukulula omu tunakekesa chihande kana? Tunamono ngwetu vinjikizo vyakusolola nge Yesu ali nakuyula jino muWangana wenyi vinakusoloka mukaye kosena. Kaha tunamono nawa ngwetu vawavisa vaze vapwa ‘vamuchisemunwino chino’ vanashinakaja lyehi, oloze kaveshi kufwa vosenako shimbu kanda luyando lwalunene lwizenga. Shikaho nachipwa chakutamo kukukulula ngwetu Wangana waKalunga kalinwaha wizenga nakuyula hano hamavu. Nachikapwa chamwaza kukamona omu nawakatesamo mazu amukulomba chaYesu chakwamba ngwenyi: “Wangana wove wizenga.”

20. Vyuma muka natushimutwila mumukanda uno, kaha navatulumbunwina ika mukapetulu mwakavangizaho?

²⁰ Twatela kwanuka nawa mazu ahanjikile Yehova ivene mwilu akuvuluka Mwanenyi ngwenyi: “Mwivwililenunga.” Hakupwa tuvaka-Kulishitu vamuchano twatela kufwila kukavangiza mazu kana. Twatela nawa kufwila kutachikiza vyuma vyosena ahanjikile Yesu navize anangwile vyakuvuluka Wangana waKalunga. Ngachize mumukanda uno natushimutwila vyuma unatesamo Wangana navize naukatesamo kulutwe. Mukapetulu mwakavangizaho navatulumbunwina vyuma vinalingiwa kufuma haze Wangana waKalunga waputukile kuyula mwilu.