KUNANGULA VATU VAPWENGA TUMBAJI
CHILONGESA 10
Fwilenu Kukafwa Vatu
Lundongi: “Twafwililile kumihana mujimbu wamwaza waKalunga, namyono yetu nawa, mwomwo twamizangile chikuma.”—Teso. 1, 2:8.
Vyuma Alingile Yesu
1. Talenu VINDIYO, chipwe tangenu Yowano 3:1, 2. Kufumaho lihulisenu vihula vino vinakavangizaho:
-
Chuma muka chalingishile Nyikotemu ayenga kuli Yesu naufuku?—Talenu Yowano 12:42, 43.
-
Uno Yesu hakwitavila kushimutwila naNyikotemu naufuku asolwele ngachilihi nge afwililile kunangula vatu vapwenga tumbaji?
Vyuma Muka Tunalinangula Kuli Yesu?
2. Tweji kusololanga ngwetu twazanga vatu hakufwila kuvakafwa vapwenga tumbaji.
Londezezenunga Yesu
3. Linangulenu halwola nakuchihela mwasaka chilongesa chenu. Mutu nahase kusakula likumbi limwe muchalumingo chipwe lwola luze mwasaka. Kutala nachimwashiwila kulinangwila kuchihela azachila, chipwe hembo lyenyi chipwe kuchihela chasanga tahi? Nge chinahase, kaha nonekenu kanawa vyuma mangana mumunangulenga halwola nakuchihela chize nasake.
4. Linangulenu hamakumbi osena aze mwanoneka. Kachi nge namufumaho, kaha kanda kumulweza ngwenu kamweshi kulinangulako. Esekenu kukavangiza vyuma vino:
-
Kutala munahase kukalinangula likumbi lyeka muchalumingo kana tahi?
-
Kutala munahase kulinangwila hashinga chipwe kulinangwila halikina oku munakumumona tahi?
-
Kutala munahase kulwezako ndumbwenu weka akatwaminyine chilongesa kana tahi?
5. Lombenu Yehova amikafwe muunde muchima. Lombenu Yehova amikafwe mutwaleho lika kunangula chilongesa chenu numba nge kamweshi nakulinangulanga hamakumbi aze mwanoneka chipwe nge keshi nakukavangiza jindongi jamuVisonekako. (Fwili. 2:13) Pamo chilongesa chenu ali navilinga vyamwaza vyavivulu, shikaho lombenu Yehova amikafwe mushinganyeke havilinga kana.
