KUPUTUKA KUSHIMUTWILA NAVATU
CHILONGESA 5
Hanjikenunga Mukalemesa
Lundongi: “Mazu enu apwenganga akukokweza shimbu yosena.”—Kolo. 4:6.
Vyuma Alingile Paulu
1. Talenu VINDIYO, chipwe tangenu Vilinga 17:22, 23. Kufumaho lihulisenu vihula vino vinakavangizaho:
-
Uno Paulu evwile ngachilihi hamakombelo amwene muAtene?—Talenu Vilinga 17:16.
-
Uno Paulu azachishile ngachilihi vyuma vafwelelele vaka-Atene mangana avambulile mujimbu wamwaza mujila yakalemesa muchishishisa chakuvapopolola?
Vyuma Muka Tunalinangula Kuli Paulu?
2. Vatu vanahase kutwivwilila kachi nge natuzachisa mazu amwaza nakushimutwila navo halwola lwakutamo kaha nawa mujila yamwaza.
Londezezenunga Paulu
3. Zachisenu mazu amwaza. Chakutalilaho, nge muli nakushimutwila namutu uze kapwa muka-Kulishituko, kaha mwatela kwalumunako jila namujimbwilamo vyuma vyamuMbimbiliya navyuma vyakutalisa kuli Yesu.
4. Kanda kulusuka kwolola mutuko. Mwechenu mangana ahanjike vyuma vili kumuchima wenyi. Kachi nge mwahanjika vyuma vimwe vize vyalimbalaka navyuma yanangula Mbimbiliya, kaha kanda namulipula nenyi jipamiko. (Yako. 1:19) Kumwivwilila kanawa nachimikafwa mutachikize vyuma afwelela novyo vyamulingisa avifwelele.—Vishi. 20:5.
5. Livwasanenu nakumusangejeka nge chinatemo. Mutu nahase kukunyuka ngwenyi vyuma afwelela vyamuchano. Vangilenu kushimutwila nenyi vyuma vize etavila naikiye, kufumaho mukafwenu atachikize vyuma yanangula Mbimbiliya.
