Kuli Vandumbwetu:

Kuzanga Kalunga navatu cheji kutukunyulanga ‘tuyenga nakunangula vatu vakumafuchi osena vapwenga tumbaji, nakuvambapachisa.’ (Mateu 28:19, 20; Mako 12:28-31) Zangi yamuchano yatwama nangolo. Nge natupwa nazangi kaneyi, kaha natukafwa vatu vaze vatwama “namichima yamwaza yakusaka kuyoya chahaya myaka yosena.”—Vili. 13:48.

Kunyima twahakilenga muchima kukulijilisa mwakuhanjikila navatu namwakuhanyina mikanda. Oloze makumbi ano twatela kuhotola uhashi wetu mangana tuputuke kushimutwila navatu. Tuli nakufwila kusolwela vatu zangi hakuhanjika navo vyuma vize vyeji kuvevwisanga kuwaha. Echi chili nakulumbununa nge, twatela kupwa vavavwovu, nakushinganyeka havyuma vize nalizakamina mutu himutu navize vyeji kumwivwisanga kuwaha. Uno yino mbuloshuwa nayitukafwa ngachilihi mangana tulinge vyuma kana?

Mumbuloshuwa kana muli vilongesa 12 vize vili navyuma navitukafwa mangana tusolwele vatu zangi nakuvanangula vapwenga tumbaji. Chilongesa hichilongesa chinazame hamujimbu wamuMbimbiliya waYesu chipwe hali vaka-Kulishitu vamulikulukaji lyamyaka lyakulivanga vaze vakavangijilenga vyuma kana hakuzata mulimo wakwambulula. Katweshi nakufwila kulijilisa mwakuhanjikila navatuko, oloze tuli nakufwila kuwana jijila jakusolwelamo vatu zangi. Numba tuhu tuli nakusakiwa kukavangiza vyuma vyosenevi hakuzata mulimo wakwambulula, oloze natushimutwila omwo tunahase kuzachisa vyuma vimwe havyuma kana hakuputuka kushimutwila navatu, nahaungeji wakukindulukilako chipwe hakutwaminyina vilongesa vyaMbimbiliya.

Omu namushimutwila hachilongesa hichilongesa, shinganyekenu omwo munahase kukavangijilamo vyuma kana hakushimutwila navatu vamungalila yenu. Fwilenu kuzanga chikuma Yehova navatu. Zangi kana yikiko kaha yinahase kumikafwa mutesemo mulimo wenu wakukafwa vatu vapwenga tumbaji.

Tweji kumisakwililanga chikuma hakuzachila hamwe nayetu. (Zefwa. 3:9) Yehova atwaleho lika kumikisula omu namutwalaho lika kuzanga vatu nakuvanangula vapwenga tumbaji.