VIHANDE VYAKUHAKILAKO C
Mwakutwaminyina Vilongesa vyaMbimbiliya Kuzachisa Mukanda waLivwise Kuwaha Kuyoya Haya Myaka
Vandumbwetu valombelenga chikuma kuli Yehova nakukekesa vihande vyatela kupwa mumukanda waLivwise Kuwaha Kuyoya Haya Myaka. Shikaho hakusaka muzachise kanawa mukanda kana, kavangizenu jijila jinakavangizaho hakutetekela vilongesa vyaMbimbiliya.
Shimbu kanda mulinangule
-
1. Hitulukenu kanawa chihande namukalinangula. Shinganyekenu havyuma ali nakusakiwa chilongesa chenu, naukalu anakuhitamo navyuma vize afwelela. Hunananenu havishina vize mwahona kwivwishisa kanawa navize nachimukaluhwila kukavangiza. Wanenu omwo vihande vili muchihanda “[cha]Wana Vyavivulu” vinahase kumukafwa, nakulizanga kuchizachisa hakulinangula nge chinakusakiwa.
Hakulinangula
-
2. Putukenu nakulomba nakukumisa nakulomba kachi nge chilongesa chenu netavila.
-
3. Kanda kuhanjika chikumako. Hakenu mangana kuchihande munakulinangula nakwecha chilongesa ahanjike vili kumuchima wenyi.
-
4. Nge munaputuka kulinangula chihanda cheka, kaha tangenu mazu achishina chachihanda kana nakuvuluka mitwe yavilongesa yilimo.
-
5. Hakukumisa kulinangula chilongesa, zachisenu chihanda chakuhituluka mangana mukafwe chilongesa chenu anuke vishina vyamuMbimbiliya nalinangula.
-
6. Omu namulinangulanga chilongesa hichilongesa, nachilongesa chenu:
-
Tangenu jipalangalafu.
-
Tangenu visoneka vyosena vanasolola ngwavo “Tangenu.”
-
Tangenu visoneka vyeka vize vinakusakiwa.
-
Talisenu jivindiyo josena vanasolola ngwavo “Talisa” (nge muli najo).
-
Hulisenu chilongesa chenu vihula vyosena.
-
Lwezenu chillongesa chenu ahanjike hamuvwimbimbi uli hachihanda chakwamba ngwavo “Linangule Vyakujiminyina.”
-
Zachisenu chihanda chakwamba ngwavo “Chuma watela kulinga,” mangana mukafwe chilongesa chenu amone numba nge ali nakuzovoloka nyi chiku. Mukolezezenu azachise chuma vanavuluka hachihanda kana mangana chimukafwe alitomene kulinga vyuma vyeka chipwe kulitomena nechi vanavuluka.
-
Hulisenu chilongesa chenu ahanjike numba nge alivwisanga kuwaha kutanga chihande chimwe chipwe kutala vindiyo yahachihanda chakwamba ngwavo “Wana Vyavivulu” omu apwanga nakuwahisa chilongesa kana.
-
Esekenu kukumisa chilongesa chimwe halwola namulinangula.
-
Hanyima yakulinangula
-
7. Shinganyekenunga hali chilongesa chenu. Lombenu Yehova akafwe chilongesa chenu azovoloke nakumihana mangana, mutachikize mwakumukafwila.
