MUJILA VEJI KUZACHISHILANGAMO MAWANA ENU
Chanelo ya JW YahaSetilayiti Yili Nakukafwa Vatu Vakungalila Kuze Kakwatwama Internetko
APRIL 1, 2021
Kakweji hikakweji tweji kutalililanga kunganyala kujipolongalamu najivindiyo veji kuhakanga ha JW Broadcasting. Chipwe ngocho, vandumbwetu vavavulu muAfrica kavahasa kutala jipolongalamu kana haInternetko. Mwomwo ika?
Mumafuchi amavulu muAfrica kamweshi Internetko. Kaha kuze kwatwama Internet kakavulu kayazata kanawako chipwe yandando chikuma. Chakutalilaho, kalama wakujinguluka umwe muMadagascar ayile kuzuvo yakufwetela Internet nakututulula polongalamu yimwe ya JW Broadcasting. Vamulwezele afwete jindola 16, jimbongo jakuhambakana jimbongo veji kuhananga vatu vamwe muchalumingo chamuundu. a
Chamokomoko naukalu kanou, vatu vavavulu muAfrica vali jino nakulivwisa kuwaha kutala JW Broadcasting chakuzeneka kuzachisa Internet. Vali nakuhasa ngachilihi kulinga ngocho?
Kufuma vene mu 2017, vatu vamumafuchi amuAfrica akusulo yalikundu lyaSahara vali lika nakutala JW Broadcasting hachanelo yahasetilayiti yachisaji chamivwimbimbi. Eyi chanelo kana yapwa yawana kaha veji kuyitalisanga hajiola 24 chalumingo hichalumingo mumalimi 16.
Vandumbwetu muMozambique vali nakuseteka kanawa dish yachanelo ya JW yahasetilayiti haZuvo yaWangana mu 2018
Hakusaka kutesamo chuma kana, Vinjiho jaYehova veji kufwetanga mangana vatu vatale jivindiyo hachanelo ya JW hachisaji chamivwimbimbi chakuzeneka kufweta. Chanelo kana yeji kuhetanga kumafuchi 35 akusulo yalikundu lyaSahara muAfrica. Veji kufwetanga jimbongo jakuzomboka hajindola 12,000 kakweji hikakweji. Shimbu jimwe, veji kufwetanga jimbongo jeka mangana vatalise vyuma vili nakusoloka hali luze lwola hachanelo yeka. Echi cheji kulingisanga vatu vavavulu vatale kukunguluka changalila chipwe kukunguluka cheka chakulipwila chize veji kutwaminyinanga kuli vaka-kutambukila mitango.
Vandumbwetu vamulipatimende Lyatala haMulimo waKutunga vamuMalawi vali nakutala vindiyo hachanelo ya JW yahasetilayiti, mu 2018
Vatu vavavulu kuhakilako navatu vaze kavapwa Vinjiho jaYehovako, vali nakutala jivindiyo kuzachisa chanelo ya JW havisaji vyavo vyamivwimbimbi hamembo avo. Chipwe ngocho, vandumbwetu vamwe kaveshi najimbongo jakulanda vinoma vyakuzachisa mangana vatale jivindiyo hachanelo kanako. Hakusaka kukumisa ukalu kanou liuka linalande vinoma vyasakiwa hakutala jivindiyo kuzachisa chanelo kana nakuvihaka hajiZuvo jaWangana jakuhambakana 3,670 mangana vandumbwetu vatalilenga JW Broadcasting hajiZuvo jaWangana. Kachi nge Zuvo yaWangana yatwama nachisaji chamivwimbimbi chipwe pulonjekita kaha kulanda vinoma kana nakuvitwala haZuvo yaWangana chili kufwika jimbongo jajindola kafwe 70. Oloze nge chikungulwilo kachatwama navinoma kanako kaha kulanda vinoma vyosena chinahase kufwika jindola jakuheta ku 530.
Vandumbwetu vanawahilila chikuma hakupwa nachanelo kana. Kalama umwe wamuCameroon ambile ngwenyi: “Ami natanga yami tuli nakumona chanelo kana kwijiva nge mana yize vali nakutuhana mulikundu.” Ndumbwetu Odebode wamuNigeria ambile ngwenyi: “Ami natanga yami tweji kutalanga jivindiyo hachanelo kana mapapa katatu muchalumingo, kaha vana vami veji kutalililanga kulwola kana. Kaha veji kusakanga tutalenga jivindiyo hachanelo kana nahamakumbi eka.” Rose wamuNigeria ambile ngwenyi: “Ngwejililile chikuma kutala chanelo yamijimbu yamukaye, oloze ngwawahilila hakuwana nge oholyapwa nguli nakutala chikuma jivindiyo hachanelo ya JW yahasetilayiti. Omu ngwatalilenga mijimbu yamukaye ngwevwilenga kupihya chikuma havyuma ngwamwenenga kaha ngwavijilenga muchima, oloze kutala JW Broadcasting chili nakungunganyalisa chikuma nakuunjisa muchima wami. Chanelo kana ngunayizange chikuma kaha yinapu wana waunene wakufuma kuli Yehova.”
Tanga yimwe yamuMalawi yili nakutala vindiyo yavanyike hachanelo ya JW yahasetilayiti
Kalama umwe wakujinguluka wamuMozambique ambile ngwenyi, jiZuvo jaWangana jajivulu jamuchihanda chenyi vanajihake vinoma vyasakiwa hakutala jivindiyo hachanelo ya JW hasetilayiti. Vandumbwetu vamuvikungulwilo vyamuchihanda kana veji kuhetanga haZuvo yaWangana ola yimwe chipwe kuhambakanaho shimbu kanda kukunguluka mangana vatale JW Broadcasting hachanelo yahasetilayiti.
Chikungulwilo chimwe chamuEthiopia chalivwishile kuwaha kutala polongalamu ya JW Broadcasting chakuzeneka kuzachisa Internet mu 2018
Hakukunguluka chamafuchi amavulu chamu 2019 chapwile muJohannesburg mulifuchi lyaSouth Africa, vazachishile chanelo kana mangana vandumbwetu vakuvihela 9 vatale vihande vyakulipwila kuhakilako navize vahanjikile kuli ndumbwetu wamuLizavu Lyakutwaminyina. Sphumelele wamuLipatimende Lyatala vyaBroadcasting wahamutango waSouth Africa ambile ngwenyi: “Hakavanga twazachishilenga Internet mangana vandumbwetu vatale vihande. Oloze echi chasakiwa kupwa naInternet yangolo najimbongo jajivulu. Oloze chanelo ya JW yahasetilayiti yili nakuzata kanawa chikuma kaha nawa kayasakiwa jimbongo jajivuluko.”
Tweji kumisakwililanga chikuma hamawana mweji kuhananga kumulimo wamukaye kosena aze ali nakulingisa vandumbwetu vamuAfrica vatale JW Broadcasting kuzachisa chanelo yahasetilayiti. Tuli nakumisakwilila chikuma hamawana mweji kuhananga kuzachisa jijila jakulisezaseza jili ha donate.pr418.com.
a Jindola josena vanavuluka muchihande chino ja U.S.
Pamo Nauzanga Nawa
MUJILA LIUKA LYEJI KUZACHISHILANGAMO MAWANA ENU
Vihande VyahaKukunguluka chaNgalila Vize Vatu Vali ‘naKumona naKwivwa’
Talenu milimo veji kuzatanga vandumbwetu numba tupwenga namakina amwaza hakukunguluka changalila.
MUJILA LIUKA LYEJI KUZACHISHILANGAMO MAWANA ENU
Kalikina Kaze Kali Nakukafwa Vatu Vatambule Kulya chaKushipilitu
Vinjiho jaYehova vavavulu vali jino nakututulula mikanda yahamakina chakuzeneka kuzachisa numba Internet.
VIHULA VEJI KWIHULANGA KUSWAKUMWE
Uno Vinjiho jaYehova Veji Kuwana Kulihi Jimbongo Jakukundwiza Mulimo Wavo?
Katwazachisa jijila veji kuzachisanga vaka-jichachi hakutambula jimbongo kuvatuko.
