MuLipoti #6 Lyamu 2020 Lyakufuma kuLizavu lyaKutwaminyina, ndumbu Geoffrey Jackson ahanjikile ngwenyi: “Kunyima katwashinganyekelenga ngwetu tunahase kutambula kulya chakushipilitu hamakinako.” Kutala nayenu munetavila mazu kana tahi? Ahanjikile nawa ngwenyi: “Oloze oholyapwa tunahase kulihulisa ngwetu, kachi tunalingi ngachilihi nge kakwapwanga vinoma vyakufwana nge Chisete cha JW ko? Chasoloka nge Yehova natukafwenga tulizange hakuhita muukalu wakufwana nganou.”

 Uno Yehova natukafwenga ngachilihi tupwenga vakulizanga? Vyuma muka valingile hakutunga Chisete cha JW, kaha vyuma muka vyasakiwa mangana vachiwahise nakuhakilako vyuma vyavihya?

 MuMay 2013, Lizavu lyaKutwaminyina lyalwezele lipatimende lyaMEPS Programming lyahachikota chetu, mangana litunge app yize yatelele kupwa naMbimbiliya yaVisoneka vyaKaye Kakahya yakusononona. Paul Willies, uze azachila kulipatimende lyaMEPS Programming ambile ngwenyi: “Elu lukiko lwapwile lwola lwatete kutunga app yize nayizata hamakina akufwana nge jitambuleti najishinga. Shikaho twemikileko milimo yimwe twapwile nakuzata, kaha twatungile lizavu lize lyazachililile hamwe namalipatimende eka mangana vatunge app kana nakuhakaho vyuma vyapwile nakusakiwa. Twalombelenga kuli Yehova lwola lwosena mangana atukafwe, kahomu mwahichile kaha tukweji vatanu twalowele app kana hakuliwana chamwaka himwaka chaliuka.”

 Kufumaho twapwile jino namulimo wakwalumuna app kana mangana yipwenga chisete chize nachipwanga namikanda yayivulu mumalimi amavulu. Kuheta muJanuary 2015, haapp kana hapwile mikanda yetu yayihya yayivulu yamuchingeleshi. Kahomu omu mwahichile tukweji 6, vatu vaputukile kututulula mikanda kana mumalimi eka amavulu.

 Kufuma vene halwola kana vandumbwetu vanapunga nakuhakilako vyuma vyeka vyavihya. Vyuma kana shina, jivindiyo, nakuhaka mikanda yosena namivwimbimbi namyaso najivindiyo jakuzachisa hakukunguluka chachikungulwilo muchihanda chimwe. Kaha nawa vanayitungu mujila yize nayikafwa vatu vawane mikanda yamuChinoma Chakukafwa Kuhehwojola yize vanenyikilako mujivesi jamuMbimbiliya.

 Chisete cha JW veji kuchisokololanga hamakina akuheta kujimiliyoni 8 hakumbi hakumbi, nahamakina akuhambakana jimiliyoni 15 kakweji hikakweji. Jino vyuma muka vyeji kusakiwanga numba app kana yizate kanawa? Ndumbu Willies ambile ngwenyi: “App kana yasakiwa vyavivulu. Tuli nakutwalaho lika kuhakilako vyuma vyavihya nakulingisa vatu vachiwane kupwa chachashi kuzachisa app kana. Hakuwana nge hamakina heji kupwanga eji jiapp veji kuwalumunanga kuswa kumwe, shikaho nayetu tuli nakwalumuna alumunako vyuma vimwe mangana app kana vayizachisenga hamakina kana. Kaha nawa hakuwana nge mikanda navyakukopa vili nakuvulilako haChisete cha JW, ngocho tuli nakuchiwahisa nakuhakilako vyuma vyeka.” Oholyapwa haChisete cha JW hali kafwe mikanda 200,000 najivindiyo namazu akukopa vyakuhambakana 600,000 mumalimi akulisezaseza.

 Hakusaka eyi app kana yizate kanawa, kwatela nawa kupwa jipolongalamu jeka. Twatela kufwetela jipolongalamu jakulisezaseza jahakopyuta. Polongalamu yimwe tweji kuyifwetelanga jimbongo jajindola 1,500 ja U.S mumwaka. Kaha nawa mwaka himwaka, lipatimende lyaMEPS Programming lyeji kufwetanga jimbongo jajindola 10,000 ja U.S. kujikapani jakulisezaseza jize jeji kutunganga jikopyuta, najitambuleti, najishinga mangana app kana yitwaleho kuzata kanawa hamakina amahya.

 Chisete cha JW chinalingisa liuka lihone kuzachisa jimbongo jajivulu chikuma kumulimo wakupulita mikanda nakuyituma kuvikungulwilo. Tutalenu hachakutalilaho chakamukanda kaKukekesa Visoneka Hakumbi Hakumbi. Mu 2013, twapulitile jikope jakamukanda kana jakuheta kafwe kujimiliyoni 12. Oloze kuheta mu 2020, twapulitile kaha jikope kafwe jimiliyoni jitanu jakamukanda kana numba tuhu kwavulilile vaka-kwambulula vakuheta kafwe 700,000. Mwomwo ika kwapwililile kwalumuka kana? Mwomwo vandumbwetu vavavulu vali nakutanganga jino kamukanda kana ha Chisete cha JW. a

 Chisete cha JW chili nakukafwa chikuma vaka-kuchizachisa. Geneviève wamulifuchi lyaCanada ambile ngwenyi, app kana yinamukafwe alingenga chilongesa chauka lwola lwosena. Ambile nawa ngwenyi: “Kuhanjika muchano, nge nangukungulula mikanda yosena ngunakusakiwa hakulinangula kachi kangwahasa kulinangula hakumbi hakumbiko. Oloze Chisete cha JW chinangukafwe nguchiwane kupwa chachashi kuwana mikanda yosena yize ngunakusakiwa. Kulinangula lwola lwosena chinangulingisa ngupandame chikuma kuli Yehova.”

 Eyi app yinatukafwe chikuma mulwola luno kuli musongo wachihita waCOVID-19. Charlyn wamuUnited States ambile ngwenyi: “Hakuwana nge musongo waCOVID-19 uli nakutohwelako mukaye, munahichi jino mwaka umwe nakuzombokaho kufuma haze ngwatambwile mukanda wakupulita wauhya. Chipwe ngocho, Chisete cha JW chili nakutukafwa tupwenga nakulya chakushipilitu chize chinazamisa lufwelelo lwetu. Nguli nakusakwilila chikuma Yehova hakutuzakama mujila kaneyi.”

 Vatu vavavulu vali nakumona app kana nganomu ayimona Faye wamuPhilippines. Ambile ngwenyi: “Eyi app yili nakungukafwa ngupandame chikuma kuli Yehova. Yikiko app yatete ngweji kusokololanga chimene hichimene. Kaha ngweji kwivwililanga kuvyuma vyakukopa vyaha app kana nge ngunakuzata milimo yahazuvo. Kaha nawa yikiko ngweji kuzachisanga hakuwahisa vyakukunguluka nahakuwahisa vyachilongesa chaMbimbiliya. Ngweji kutalanga jivindiyo nge nguli nakunoka, kaha nawa ngweji kutanganga vihande chipwe Mbimbiliya kachi nge nguli nakuvandaminako vyuma vimwe. Chikupu vene, app kana hiwana waulemu chikuma.”

 App kana yinakutukafwa chikuma mumulimo wamuwande. Chakutalilaho, omu ndumbwetu umwe wapwevo wamuCameroon apwile nakwambulula, asakile kuzachisa chisoneka chimwe azachishile ndumbwenyi wapwevo lwola lumwe. Oloze kahashile kuchiwanako. Ambile ngwenyi: “Ngwanukileko mazu amwe amuchisoneka kana. Kufumaho ngwasokolwele app kana, nakunyachika haMbimbiliya, nakutonda jino aze mazu ngwanukile. Nakushimbula chiku ngwawanyine chize chisoneka. Kuzachisa eyi app cheji kungukafwanga nguwane visoneka vize ngweji kuvulyamanga shimbu jimwe.”

 Wana mweji kuhananga kuzachisa jijila jakulisezaseza jatwama ha donate.pr418.com, unatukafwe tutunge Chisete cha JW, nakutwalaho kuchiwahisa nakuhakilako vyuma vyavihya mangana vandumbwetu mukaye kosena vachiwane kupwa chachashi kuchizachisa. Tuli nakumisakwilila chikuma hamuchima wenu wakuhana nakusuuluka.

1. MuOctober 2013, valowele Chisete cha JW haze vahakile Mbimbiliya yaKaye Kakahya yakusononona

2. MuJanuary 2015, vahakileho mikanda yamuChingeleshi, kaha kutwala muze vahakileho neyi yamumalimi eka amavulu

3. MuNovember 2015, vahakileho chinjikizo chaulombo wakukwita hamazu

4. MuMay 2016, vahakileho chihanda chakukunguluka

5. MuMay 2017, vahakileho chinjikizo chamwakusoneka vishina

6. MuDecember 2017, vahakileho vyuma vyakutukafwa hakutanga Mbimbiliya Yakulinangula

7. MuMarch 2019, vahakileho chinjikizo chamwakututulwila mazu akukopa, nachakuzachisa hakutala vindiyo, namwakuwanyina mikanda vanenyikilako muChinoma Chakukafwa Kuhehwojola

8. MuJanuary 2021, vahakileho vyuma vyakutukafwa hakulinangula mukanda waLivwise Kuwaha Kuyoya Haya Myaka