Vinjiho jaYehova makumbi ano, vali nakutambula kulya chakushipilitu chachivulu hamakina kuhambakana muze chapwile kunyima. Oloze kuvihela vimwe muno mukaye, vandumbwetu vavavulu chinakuvakaluhwila kuwana vyakulya vyakushipilitu. Kuvihela vimwe network yeji kukaluhwanga, kweka cheji kumbata lwola hakututulula vyuma kaha kuvihela vikwavo naInternet vene yauchiko.

 Chipwe ngocho, vandumbwetu jino vali nakututulula mikanda yahamakina chakuzeneka kuzachisa numba Internet. Uno vali nakuhasa kulinga ngachilihi ngocho?

 Vali nakuzachisa kalikina kaze vali nakuvuluka ngwavo JW Box kaze vali nakutuma kuvikungulwilo kuze kakweshi Internetko. Kalikina kana vakalanjile kukapani, kaha Lipatimende LyajiKopyuta lyahaMbetele lyahakile polongalamu yimwe mukalikina kana mangana vahase kuhakangamo mikanda yahamakina najivindiyo jaha jw.org. Kalikina kamwe vakalanjile najindola ja US kafwe 75.

 Vandumbwetu haZuvo yaWangana, veji kuzachisanga makina avo nakulipachika kukalikina ka JW Box kuzachisa WiFi. Kahechi cheji kuvakafwanga vatutulule mikanda najivindiyo. Navaze vali nashinga yamwaka chipwe yandando yayindende vanahase kuzachisa WiFi kana. Hakuwana nge awa makina a JW Box vali nakuwatuma nakuvihela kwakuzeneka internet, uno anahase kupwa ngachilihi navinoma vyavihya vyaha jw.org? Ofesi yamutango yeji kutumanga ji USB kuswakumwe, jize jeji kupwanga navinoma vyavihya vyaha jw.org vize vatela kuhaka mu JW Box. USB yimwe veji kuyilandanga najimbongo jakuheta kafwe kujindola ja US 4.

 Uno eli likina lya JW Box linakafwe ngachilihi vandumbwetu? Nathan Adruandra chisemi walunga uze atwama muDemocratic Republic of Congo ahanjikile ngwenyi:“Ngwesekele halwola lwalusuku kututulula chimweso chakwamba ngwavo, ‘Ove Yehova , . . . Ngwakufwelela’ nechi chakwamba ngwavo Anukenu Pwevo lyaLote. Oloze ngwahonene, ngocho ngwafutukile kumuchima. Oholyapwa nguli nakuhasa jino kututulula jivindiyo kana hashinga yami, kaha echi chili nakutukafwa etu visemi tunangule kanawa vana vetu.”

 Ndumbwetu umwe uze eji kukafwanga vikungulwilo vyamuNigeria mwakuzachishila kalikina ka JW Box ambile ngwenyi: “Vandumbwetu vali nakumona aka kalikina ka JW Box kupwa hiwana waulemu wakufuma kuli Yehova. Vanawahilila chikuma hakuwana nge vali jino nakuhasa kututulula kanawa mikanda najivindiyo vize vyatwama haVinoma vyaKuzachisa haKunangula.”

 Makina a JW Box akuzomboka ha 1,700 vanawatumu kuvikungulwilo vyamuAfrica, namuOceania, namuSouth America. Kaha nawa vali nakulongesa vyuma mangana valande makina akwavo nakuwatuma kuvikungulwilo vyavivulu. Uno jimbongo jakulanda vyuma vyosena evi jili nakufuma kulihi? Jeji kufumanga kumawana ajimbongo veji kuhananga akukundwiza mulimo wamukaye kosena kuzachisa donate.pr418.com najijila jeka. Tuli nakumisakwilila hamuchima wenu wakuhana.