Mumwaka wamulimo a wa 2021, Vatu mukaye vapwile lika nakulipika namusongo wachihita waCOVID-19. Ngana muze valumbunwine muchihande chakwamba ngwavo “Kukafwa Vatu Vali muUkalu Mwomwo yaMusongo Wachihita,” tunazachisa jimiliyoni jajimbongo jajindola b hakukafwa kumusongo wachihita nakutunga jiKomiti yaKukafwa Vatu Vali muUkalu Wakulijila jakuheta ku 950.

 Chaluvinda, halwola vene elu kwapwanga musongo wachihita, kwapwanga nawa nakusoloka ukalu weka wakulijila nou wakuneha kuvatu uze wawananga vandumbwetu mukaye kosena. Komiti yaKuwanyisa yaLizavu lyaKutwaminyina yetavishile kuzachisa jimbongo jajindola jakuheta kujimiliyoni 8, kuukalu wakulijila wakulisezaseza wakuzomboka 200 kuhakila kujimbongo jize vazachishile hakukafwa vatu kumusongo waCOVID-19. Tala omwo mawana ove vawazachishile hakukafwa vatu vapwile muukalu uvali wakulijila.

 Ha 22 May, 2021, pili yakakahya yaNyiragongo yamuDemocratic Republic of the Congo yaputukile kupulika. Kakahya kafumine hapili kana kenyekele jizuvo najishikola nameya. Kwapwile nawa vyuma vikwavo vyanehele ukalu. Chakutalilaho, kufuma vene haze yapulikile pili, peho yayipi yakufuma kupili kana yahichile munganda yaGoma hamakumbi amavulu, kaha nawa kwapwile mindenda yayivulu. Kafwe chimbwa chavatu munganda kana vavalwezele vafumemo. Vavavulu vachinyine kaha vamwe vachinyinyine kulifuchi lyaRwanda.

 Havatu vaze vachinyine, hapwile naVinjiho jaYehova vakuheta ku 5,000. Vamwe jizuvo javo jalyenyekele nakakahya, kaha veka jizuvo javo vajipukwile omu valingile vakiko vanachinyi lyehi. Jikomiti jakukafwa vaze vali muukalu jamuRwanda najamuDemocratic Republic of the Congo jazachililile hamwe. Mutango waCongo (Kinshasa) wahanjikile hamulimo yazachile komiti yimwe ngwawo: “Chamokomoko naukalu wapwile munganda kana, kaha nawa shimbu kanda vatu vavalweze kufuma munganda, eyi komiti yaputukile kuhana vatu vyakulya nameya nahakusavala, navyakuvwala.” Mumbaka yimwe muze mwachinyinyine vandumbwetu vakuhambakana ha 2,000, komiti yakukafwa vatu vali muukalu yalemene jimbalaka nakuhana vatu tumahina twakufwika kukanwa nakuvalumbunwina mwakuhonesela kutanda chamusongo waCOVID-19 namusongo wakapwele kachikonga.

 Mutukweji vatatu kaha kufuma haze waputukile ukalu kana, vandumbwetu vapangililile vatu jitani 6 jaloso, najitani 6 jaunga wachivwale, najitani jitatu jamaji akutelekesa najitani jitatu jameya. Hakusaka kuzachisa kanawa jimbongo, mutango walanjile vyakulya vyavivulu vyamulifuchi lyavo muchishishisa chakulanda vyakulya vyakumafuchi eka handando yayinene.

 Ndumbwetu umwe wapwevo ukwechi zuvo yenyi yayihya yalyenyekele nakakahya kakupili, ambile ngwenyi: “Twahombele nakwivwa kukola kumuchima.” Hakuwana nge tanga yenyi vayikafwile kumujimba nakushipilitu, ambile jino ngwenyi: “Yehova natukafwe tutwaleho kupwa navyuma tuli nakusakiwa. Tunamono ngwetu Yehova eji kutumbachilanga chiteli mangana tuhase kumika.”

 Mulifuchi lyaVenezuela munapunga uhutu kufuma vene kumyaka yakunyima. Vandumbwetu vamulifuchi kana vanakumona ukalu wamukuyoya wakufwana nge kukeha chavyakulya nakuvula chauhwanga. Oloze chamokomoko navyuma kanevi liuka lyaYehova kalyavavulyamineko.

 Mumwaka wamulimo unafumuho vazachisanga jimbongo jajindola jakuheta kumiliyoni yimwe nachimbwa (1.5) hakulanda nakutuma vyakulya najisopo kuli vandumbwetu vakuhutwa. Mutango waVenezuela wambile ngwawo, “Chapwa chachikalu chikuma kutwala vyakulya vyakuheta kujitani 130 mulifuchi lyosena kuli vandumbwetu vaze vali muukalu kakweji hikakweji.” Vandumbwetu kavatuma vyakulya vize vyeji kupolanga washiko kuchina navilyenyeka. Mutango wambile nawa ngwawo: “Tweji kulandanga vyakulya vyavivulu hangonde yakwaha haze ndando yinatepuluka. Kufumaho tweji kuvitumanga kuzachisa jimbongo jajindende.”

 Leonel, wamuKomiti yaKukafwa Vatu Vali muUkalu Wakulijila muVenezuela, azanga chikuma kuzata ou mulimo kana. Ambile ngwenyi, “Mulimo kukafwa vatu vali muukalu wakulijila wamwaza chikuma. Ou mulimo unangukolezezanga chikuma kufuma hakufwa chapuwami kumusongo waCOVID-19. Ngweji kukilikitanga chikuma kaha nawa ngwamona ngwami nguli nakukafwa vandumbwami vali muukalu. Ngunalimwena nameso ami kapu omu Yehova natesangamo lushiko lyenyi lwakuhona kuseza vangamba jenyi.”

 Ndumbwetu umwe uze vakafwile uze nawa apwile mukomiti yakukafwa vali muukalu wakulijila ambile ngwenyi, “Ngwakafwilenga vakwetu oloze oholyapwa jino yami vali nakukafwa. Vandumbwetu vatukafwile hakutuhana vyakulikafwa navyo kumujimba nakungukafwa ami napuwami tuunde muchima. Vatuzakaminenga nakutuvendejeka nakutujikijisa.”

 Ukalu umwe weji kwizanga mukukasumuna. Chipwe ngocho liuka lyaYehova lyeji kutwalangaho lika kuwana vyakulikafwa navyo nakuvituma washi. Vyuma kana vyeji kulingiwanga ngocho mwomwo yamawana enu mweji kuhananga mukaye kosena. Jijila jimwe jakuhanyinamo mawana vanajilumbununa ha donate.pr418.com. Tweji kumisakwililanga chikuma hamuchima wenu wazumbu.