MuMarch 2020, omu liuka lyatala hakulikangula chavatu lyaWorld Health Organization lyawanyine ngwalyo COVID-19 yinapu musongo wachihita, vavavulu kavatachikijile ngwavo musongo kana nautanda mukaye kosena, kaha nawa nautwalaho lika kuhambakana hamwaka umweko. Vatu vavavulu chikuma kuhakilako naVinjiho jaYehova vanamononga ukalu wakumujimba, namuvishinganyeka, nawakuhona jimbongo mwomwo yamusongo wachihita. Uno Vinjiho jaYehova vanalongesanga ngachilihi vyuma vyakuhana vaze vali muukalu nakuvapangila mulwola luno lwalukalu?

 Komiti yaKuwanyisa yaLizavu lyaKutwaminyina lyaVinjiho jaYehova, yinatungu jiKomiti jaKukafwa Vatu Vali muUkalu (DRC) jakuhambakana 950 mukaye kosena mulwola luno lwamusongo waCOVID-19. Shimbu jimwe vanawahisanga vyuma mangana Vinjiho vaze vali muukalu vavakafwe kuli vandumbwavo vamungalila yavo, kaha shimbu jimwe nawa ava Vinjiho vali muukalu vanavakafwenga kufulumende. Eji jiKomiti jaKukafwa Vatu Vali muUkalu, jinalongesanga vyuma vyavivulu chikuma vyakuhana vatu vali muukalu.

 Chakutalilaho tutalenu vyuma vyasolokele muParaguay. Lipapilo limwe lyamijimbu lyasolwele ngwalyo, ukalu wakuhona jimbongo uze unapuko mwomwo yamusongo wachihita, unalingisa vatu vavavulu muParaguay vafwenga zala. Oloze Komiti yaKukafwa Vatu Vali muUkalu yaputukile kututa jinjeke javyuma vyakukafwa vatu vali muukalu muze mwapwile vyakulya vyavivulu navyuma vyakuzachisa kupandama kuunyoji, nakuvihana kuvatu vapwile muukalu kana. Vahanyinenga vyuma vyavivulu vize tanga yavatu vawana yinahase kuzachisa muvyalumingo vivali. Njeke hinjeke yavyuma kana vayilanjilenga kafwe najindola 30 jaU.S.

 Uno vaka-kuzata mulimo wakukafwa vali muukalu, veji kulikinganga ngachilihi mangana vahone kutambula chipwe kutambwisako vakwavo musongo waCOVID-19? Veji kuvwalanga tumahina twakufwika kukanwa nakukavangiza lushimbi lwakulisosoloka. Kaha nawa veji kukekesanga vawane nge jikapani jeji kulanjisanga vyakulya jeji kuviwahishilanga muvihela vyaunyoji nakukavangiza jindongi jakulikinga kumusongo. Vaka-kututa jinjeke javyuma nawa veji kuvalwezanga vavwale vyuma vyakulikinga kuchina kulilemeka, nakukosa jiminyau javo navitumbo, nakutumbika jinjeke kana havihela vyakuwahisa kanawa. Kahomu veji kuhetanga veji kukavangizanga lundongi lwakulisosoloka hakuhana vyuma kana kuli vandumbwetu.

 Kuheta muJanuary 2021, Komiti yaKuwanyisa yetavishile kuzachisa jimbongo jakuhambakana hajimiliyoni jajindola 25 jaU.S mangana vakafwe vaze vali muukalu mwomwo yamusongo waCOVID-19. Jiofesi jamitango najikomiti jaDRC jeji kuzachisanga kanawa mawana kana nakuzata nangolo mangana valande vyuma vinakusakiwa handando yakutamo. Chakutalilaho, omu vandumbwetu vamuChile vapwile nakulongesa vyuma vyakuhana vali muukalu, vasakile kulanda makunde akuheta kujikilongalamu 750. Oloze vawanyine nge ndando yanyinyine chikuma kuhambakana muze yapwile kakweji afumineho. Vetavilile kulanda handando vene yize yayinene. Oloze omu mwahichile jiola jivali shimbu kanda valande, muka-kulanjisa avalwezele ngwenyi kuli mutu uze asakile kulanda makunde oloze ahonene. Shikaho muchishishisa chakuvalanjisa handando yayinene, avalanjishile makunde kana handando yayindende yize valanjishilenga mukakweji afumineho.

 Oloze omu vandumbwetu vakindulukililileko nakumbata makunde valanjile, muka-kulanjisa akanyine kuvahanawo. Ambile ngwenyi vyakulya kana vavipangilililenga mujila yalizangamina ngana muze eji kulinganga mauka eka. Ndumbwetu umwe alombelele mumuchima, kufumaho alwezele uze muka-kulanjisa ngwenyi: “Tunakekesa kanawa vikungulwilo mangana tumone vaze vali nakusakiwa chikupu kuvakafwa.” Vandumbwetu valumbunwine nawa ngwavo: “Hakuwana nge vatu vakwechi viyoyelo vyakulisezaseza, ngocho tanga hitanga natuyihana vyuma yili nakusakiwa chikuma.” Kufumaho vamulweze ngwavo mawana veji kuhananga Vinjiho jaYehova namulimo veji kuzatanga, vyapwa vyakulisakila. Muka-kulanjisa alikomokelele ngocho avalanjishile handando yayindende. Kahomu valanjile makunde akwavo avahakilileho jikilongalamu jamakunde 400 jawana.

 Ndumbwetu Lusu tuliwe wakashinakaji wamuLiberia, eji kutwamanga navatanga jenyi vatanu. Likumbi limwe omu vapwile nakulya kulya chachimene oku vali nakukekesa chisoneka chalikumbi, muzukulyenyi umwe wamyaka yakusemuka 7 amwene ngwenyi muzuvo kamwasalile vyakulyako. Ngocho ahulishile ngwenyi, “Natulya ika lelo?” Kaka yenyi Lusu amukumbulwile ngwenyi: “Ngwalombanga lyehi kuli Yehova, kaha ngunafwelela ngwami mwatuhana vyakulya.” Likumbi vene lize namusana, ndumbu Lusu vamutuminyinyine shinga kuvakulwane vamuchikungulwilo chenyi, nakumulweza ayenga akatambule vyakulya. Ou ndumbwetu ambile ngwenyi: “Muzukulyami natachikiza jino ngwenyi, Yehova eji kwivwililanga nakukumbulula kulomba mwomwo akumbululanga kulomba chami.”

 Omu pwevo umwe wamuDemocratic Republic of Congo uze alihata natanga yimwe yaVinjiho jaYehova, amwene tanga kana vanayinehela vyakulya kuli vandumbwavo ambile ngwenyi, “Omu naukakuma musongo wachihita nayetu natukapwa tuVinjiho jaYehova mwomwo tunamono omu vanakafwe vandumbwavo mulwola luno lwalukalu.” Oloze lunga lyenyi amuhulishile ngwenyi, “Uno uli nakusaka kupwa Chinjiho chaYehova mwomwo yanjeke yimwe yaloso tahi?” Ikiye amukumbulwile ngwenyi, “Keshi ngochoko, oloze eyi njeke yaloso yinapu hiunjiho wakusolola zangi yamwenemwene.”

 Vinjiho jaYehova vanakafwenga vandumbwavo halwola lwakutamo omu kuli musongo wachihita mwomwo yamawana mweji kuhananga namuchima wakusuuluka. Tuli nakumisakwilila chikuma hamawana mweji kuhananga kuzachisa jijila jatwama ha donate.pr418.com.