Mumwaka wa 2020, mwasolokanga ukalu wauvulu wakulijila kuhakilako nakutanda chamusongo waCOVID-19 mukaye kosena. Uno Vinjiho jaYehova vanakafwe ngachilihi vatu vanamononga ukalu kana?

 Mumwaka wamulimo wa 2020, a Komiti yaKuwanyisa yaLizavu lyaKutwaminyina yetavishile kuzachisa jimbongo jajindola b jakuheta kujimiliyoni 28 kumulimo wakukafwa vaze vali muukalu wakulijila. Jimbongo kana vajizachishile kumaukalu asolokele akuhambakana ha 200, hamaukalu kana hapwile naukalu wamusongo waCOVID-19, najipeho janyamanganda, namavaji asolokele muAfrica, nakukeha chavyakulya muVenezuela, nachanga chapwile muZimbabwe. Jimbongo kana vajizachishile hakulanda vyakulya, meya, kuwahisa mwakutwama vandumbwetu, kulanda uvwalo, navitumbo, navyuma vyakuzachisa kuunyoji, nakukuwahisa vyuma vize vyalyenyekele, nakumulimo wakutungulula jizuvo. Tutalenu havyakutalilaho vimwe vyakusolola omu vakafwile vandumbwetu vapwile muukalu wakulijila.

 Musongo waCOVID-19. Vandumbwetu mukaye kosena vali nakumona ukalu wakumujimba, namuvishinganyeka, nakuhona jimbongo jakulikafwa najo mwomwo yamusongo kanou wachihita. Hakusaka kukafwa vatu kana, liuka lyatungile jiKomiti jaKukafwa Vatu Vali muUkalu Wakulijila (DRC) jakuzomboka 800 mukaye kosena. Jikomiti kana jakekesele vyuma vapwile nakusakiwa vandumbwetu nakulweza washi Komiti yaKuwanyisa mangana yiwane jila yakuvakafwilamo.

 Jikomiti jaKukafwa Vatu Vali muUkalu Wakulijila jinahanenga vandumbwetu vyakulya, meya, navyuma vyakuzachisa kuunyoji, navitumbo mumwaka wosena wamuundu. Jikomiti kana, jazachililile hamwe natulama muvikungulwilo mangana vakafwe vandumbwetu vatambule kukafwa kufulumende.

 Vatu vaze kavapwa vinjihoko vali nakusakwilila hamulimo tuli nakuzata wakukafwa vatu vali muukalu. Chakutalilaho, Field Simwinga nguvulu wambongi yaNakonde muZambia, alwezele vandumbwetu ngwenyi: “Tunamisakwilila hakukafwa jitanga japwanga nakusakiwa chikuma kukafwa halwola lwakutamo.”

 Kukeha chaVyakulya muAngola. Musongo wachihita waCOVID-19 unalingisa vatu muAngola vahone kupwa navyakulya vyakutamo nakulingisa jindando javyakulya jinyine. Ngocho, vandumbwetu vavavulu chavakaluhwilile kulanda vyakulya.

 Mutango waBrazil vaulwezele ukafwe vandumbwetu vamuAngola hakuvatuminako vyakulya. Hakusaka vazachise kanawa jimbongo jakukafwa vali muukalu, vandumbwetu vakekesele kanawa jijila jakulanjilamo vyakulya vyavivulu nakuvituma. Chikasha chimwe chavyakulya vachilanjile najimbongo jajindola kafwe 22, kaha chalemene kafwe jikilongalamu 20. Muchikasha hichikasha, mwapwile loso, namakunde, namaji akutelekesa. Shikaho, vanatumu lyehi vikasha vyavyakulya 33,544 vize vinaleme kafwe jitani 654. Vyakulya kana vavifutwile navize yalongesele ofesi yamutango waAngola, kaha vavihanyine kuvatu vakuzomboka 50,000.

 Uno vandumbwetu vali nakwivwa ngachilihi hakuvakafwa mujila kaneyi? Ndumbwetu Alexandre uze atwama kungalila yimwe yakumembo yamuAngola, ambile ngwenyi: “Echi kukafwa chinangulingisa ngumone ngwami Yehova anguzanga kaha nawa kangweshi ukawamiko. Chikupu vene liuka lyenyi lyangumona kupwa nguwamulemu.” Mariza chisemi wapwevo wamujike ambile ngwenyi: “Yehova nakumbulula kulomba chami, ngocho nguli nakumusakwilila hamwe kaha naliuka lyenyi.”

 Kukafwa Vatu Vapwile muUkalu waChanga muZimbabwe. Mumwaka wamulimo wa 2020, muZimbabwe mwapwanga changa chachinene chikuma chize chalingisanga vatu jimiliyoni jajivulu vafwenga zala. Kaha Vinjiho jaYehova vavavulu muZimbabwe kavapwanga navyakulya vyakutamoko.

 Liuka lyatungile jikomiti jitanu jakukafwa vali muukalu wakulijila mangana jihane vandumbwetu vyakulya. Vandubwetu vavavulu valisuwile kulongejeka vyakulya muvikasha namujiminyau, veka nawa vasuwile jiminyau javo mangana vajizachise. c Mumwaka wamulimo wa 2020 vazachisanga jimbongo jajindola 691,561 hakulanda vyakulya vyavatu vakuzomboka 22,700.

 Vandumbwetu vamwe, kavapwile navyakulya numba vyavindendeko halwola vavatwalilile vyakulya. Omu vyakulya vyahetele, vandumbwetu valishile Yehova kaha veka vaputukile nakwimba myaso yaWangana.

 Mungalila yimwe, Vinjiho vavali vavatuliwe vayile kukuliwana chimwe chize chapwile nakuhanjika havyakulya vize navifuma kumauka akulimanyina (NGO), oloze vyuma vashimutwilile vyakundwijile mapolitiki ngocho ava vandumbwetu vamapwevo vakanyine kulinga vyuma vavalwezele kulinga numba vavahane vyakulya. Omu vakatukile nakuseza kuliwana kana, vavasawile nakuvamba ngwavo: “Kanda namukeza kujizuvo jetu nakulomba vyakulyako.” Oloze omu mwahichile vyalumingo vivali, vandumbwetu vamuKomiti yaKukafwa Vatu Vali Muukalu waKulijila vavatwalilile vyakulya shimbu kanda liuka lya (NGO) litwalile vatu vyakulya.

 Mulimo wakukafwa vatu vali muukalu muZimbabwe, unalingisa vatu vafwile kutachikiza Yehova. Chakutalilaho, ivwenu vyuma vyasolokele kuli ndumbwetu Prisca uze atwama kungalila yimwe yakumembo. Numba tuhu kwapwile ukalu wakulisezaseza mwomwo yachanga, oloze Prisca azachilenga mulimo wakwambulula lyachitatu nachitanu namungonde yakulima. Vatu vamungalila yenyi vamusehelenga nakumwamba ngwavo: “Namukafwa zala natanga yove mwomwo yakuhaka chikuma mangana kukwambulula.” Ikiye avalwezelenga ngwenyi: “Yehova eji kukafwanga vangamba jenyi.” Omu mwahichile makumbi amandende, atambwile vyakulya kufuma kuliuka lyetu, echi chevwishile kuwaha vakwavo mungalila yenyi. Kaha vamulwezele ngwavo: “Chikupu vene Yehova eji kukukafwanga, ngocho tuli nakusaka kulinangula vyavivulu hali ikiye.” Kaha vatu 7 vamungalila yenyi vali nakwivwilila jino kukunguluka hachisaji.

 Omu tuli nakupandama kukukuma chakano kaye, natumonanga ukalu wauvulu. (Mateu 24:3, 7) Tweji kumisakwilila chikuma hamawana mweji kuhananga, kuzachisa jijila jakulisezaseza jatwama ha donate.pr418.com. Mawana kana eji kutukafwanga tuzakame vaze vali muukalu halwola lwakutamo.