Mumakumbi ano akukuminyina twatela kufwelela ngwetu ‘natwivwanga jijita namijimbu yajijita.’ (Mateu 24:6) Oloze nge vandumbwetu vali nakumona ukalu mwomwo yavyuma kanevi, veji kuvahananga vyuma vyasakiwa. Lipoti #3 Lyamu 2022 Lyakufuma kuLizavu lyaKutwaminyina lyatulwezele mijimbu yamwaza yakusolola omwo wapwile nakutambuka mulimo wakukafwa vandumbwetu Kumututuko waEurope vaze vapwile muukalu mwomwo yajita yamuUkraine. Uno vandumbwetu vali nakuvakafwa ngachilihi okunyi kuli jita? Uno ou mulimo wakukafwa vaze vali muukalu unakafwe ngachilihi vandumbwetu muUkraine?

 Ha 24 February 2022, halikumbi vene lize jita yepukile muUkraine, Komiti yaKuwanyisa yetavishile kuzachisa jimbongo hakukafwa vandumbwetu muUkraine. Mutango wamuUkraine waputukile hahaze vene kulanda vyuma vyapwile nakusakiwa. Vyuma kana vavilanjililile vene muUkraine, nakuvipangila kuhichila mujiKomiti 27 jaKukafwa Vatu Vali muUkalu Wakulijila jize vatungile.

 Hakusaka kukundwiza ou mulimo, Chikota chaVinjiho jaYehova chaputukile kushinganyeka jijila jakukundwijilamo mulimo kana. Komiti yaKuwanyisa naKomiti Yatala haKupulita naKutuma Mikanda yaLizavu lyaKutwaminyina yalwezele Lipatimende Lyatala haMulimo waVyakulandalanda Mukaye Kosena, mangana lizachile hamwe navakakwimanyinako mutango waUkraine naPoland vatale havyuma vyapwile nakusakiwa nakuwana nawa jila yakuzachilamo. Vandumbwetu vamuLipatimende lyaKulanda Vyuma nalyaKupulita naKutuma Mikanda naLipatimende Lyatala haJishimbi vahamitango eyi yivali, kuhakilako nandumbwetu wamuKomiti yaMutango waUkraine navandumbwetu vamuLipatimende Lyatala haMulimo waVyakulandalanda Mukaye Kosena valiwanyinenga hakumbi hakumbi mangana vazachile hamwe.

 Jay Swinney wamuLipatimende Lyatala haMulimo waVyakulandalanda Mukaye Kosena ambile ngwenyi, “Twafwililile kutachikiza vyuma vyapwile nakusakiwa. Twasakile kuhana vyakulya navyuma vyakuzachisa kuunyoji vize vatachikiza vandumbwetu. Chipwe ngocho, kwapwile nawa ukalu weka. Twafwililile nawa kuwana jila yakutuminamo washi vyuma kana kuUkraine mujila yakukingiwa chamokomoko najita.”

 Kuheta ha 9 March 2022, twatachikijile jino vyuma vyosena vyapwile nakusakiwa. Vikasha vyavyakulya vyakufwana nge nyama navaishi vamuvifwoyo, naloso, namakunde vavitwalilile hamwe navyuma vyakuzachisa kuunyoji vyakufwana nge jinjapau namapepa akuzachisa muchimbushu. Halwola kana, chasakiwile kuzachisa jimbongo jajindola jaUS 65 hakulanjila mutu umwe vyuma vize mwazachisa havyalumingo viwana. Komiti yaKuwanyisa yetavishile kuzachisa jimbongo jajivulu chikuma hakutachikiza ngwavo vandumbwetu vavavulu navasakiwa kuvakafwa. Uno vyuma kana navavitwala ngachilihi chakuzeneka kuhaka vandumbwetu muponde?

 Ha 13 March, vandumbwetu vavali vamuPoland vesekele kufumisa vyuma kumutango waPoland nakuvitwala kuzuvo yakulamina vyuma kwakamwihi naLviv, muUkraine. Kaha mumakumbi akukokela kukusunuka, vaka-mbetele vamuPoland namuUkraine vakafwile ava vandumbwetu kuwahisa vyaungeji kana. Mutango wakumishile kuwahisa mapapilo asakiwile hakuzomboka museto hakutwala vyakulikafwa navyo, nakuhaka tutachikijilo vakutamuka kanawa hajiminyau javandumbwetu, twakusolola nge vali nakuya nakutwala vyuma vyakulikafwa navyo, nakuzachila hamwe navandumbwetu vamuUkraine hakusaka kutachikiza jijila jakavatu vanahase kuzachisa vandumbwetu nge vanahichi lyehi hamuseto. Kuwahisa vyuma kana nakutukisula kuli Yehova, chalingishile vyuma vyakukafwa vandumbwetu vihete mulikumbi lyangongo kujiKomiti jaKukafwa Vatu Vali muUkalu Wakulijila muLviv, kaha ava vandumbwetu nawa vakindulukile kanawa kuPoland.

 Numba tuhu ungeji wakavanga watambukile kanawa oloze vandumbwetu vatwalile kaha tani yimwe yavyakulikafwa navyo. Oloze kwapwile nakusakiwa lika jitani 220. Uno vyuma vyosenevi vyavivulu ngana navavitwala nakuvipangila ngachilihi mukashimbu kakandende?

 Omu vandumbwetu vamukaye kosena vatangile mijimbu yavyuma vyapwile nakusoloka kuli vandumbwetu muUkraine ha jw.org, vafwililile kuvakafwa. Vandumbwetu vakuvihela vyakwakusuku vakundwijile jimbongo kumulimo wamukaye kosena waVinjiho jaYehova mwomwo yakutachikiza ngwavo jimbongo kana navajizachisa kanawa. Oloze vandumbwetu vamumafuchi aze alihata naUkraine vazachishile lwola lwavo nangolo javo navikumba vyavo hakukafwa vandumbwavo. Tala vyakutalilaho vimwe vino.

 Vandumbwetu muPoland, valisuwile kuhana vikasha vyavivulu chikuma vyavyuma vyakulikafwa navyo, kaha vanyike nawa vasonekele jikati. Bartosz Kościelniak wamuLipatimende lyaKulanda Vyuma wahamutango waPoland ambile ngwenyi, “Ngunatangenga mazu ahali Samu 110:3 mapapa kakavulu haze vamba ngwavo, ‘vatu jaYehova navakalihana.’ Oloze kulimwena nameso ami kapu omu vatu vavavulu chikuma vanafwilanga kulihana vazate mulimo chinangulingisa ngukunyuke chikupu ngwami mazu kana amuchano.”

 Chinjiho chaYehova umwe uze atwama nakapani yayinene uze nawa ahanyine vimbayambaya vyenyi namaji akuzachisa ambile ngwenyi: “Kukafwa kana ngwachimonanga kupwa hijila yimwe yakusolwelamo ngwami ngwazanga vandumbwami naYehova. Ngunawahilila chikuma hakuwana nge ngwalisuulanga kukafwa.” Vandumbwetu vakundwijile jilita jamaji jakuzomboka, 7,700 kaha vandumbwetu vazachishile lwola lwavo nangolo javo mangana vatambukise jiminyau tunda yajikilomita kafwe 48,000 hakutwala vyuma kana.

 Kuheta ha 28 March kafwe makumbi 15 kufuma haze vatwalile vyuma vyakwesekelaho, vandumbwetu valisuwile kuzata nangolo vatwale vyakulya navitumbo navyuma vyakuzachisa kuunyoji kuUkraine, vyakuheta kujitani 110. Muchima wakuhana wavandumbwetu, nawavatu vakujikapani kuze twapwilenga nakulandanga, walingishile tuzachise jimbongo jajindende jaliuka kuhambakana jize twashinganyekele hakavanga. Oholyapwa ngana, Vinjiho jaYehova vanahane vyuma vyakulifwana navyo muUkraine vyakuheta kujitani 209. Uno vyuma kana vinakafwe ngachilihi vandumbwetu?

 Omu wana kana wahetele munganda yaLviv, jiKomiti jaKukafwa Vatu Vali muUkalu Wakulijila japangililile vandumbwetu vaze vapwile nakusakiwa kuvakafwa muUkraine. Vatwalile vyakulikafwa navyo kujingalila jajivulu. Hakuya kujingalila jimwe vatambukile tunda yajikilomita jakuzomboka 1,300 kufuma kuLviv. Numba tuhu mulimo kana watambukile kanawa, oloze wambachili lwola. a

 Markus Reinhardt wamuKomiti yaMutango waUkraine ambile ngwenyi: “Mulwola kanolu lwalukalu vandumbwetu vavavulu vanamono zangi yaYehova, nanganyo yakukavangiza jindongi jakufuma kuliuka lyaYehova, numba vene shimbu kanda ukalu usoloke. Chakutalilaho, vosena vavakolezeza kulamangako vyakulya nameya mujizuvo javo vize vanahase kuzachisa havyalumingo vyavivulu. Kalama walijina lyaAnton wamuKyiv ahanjikile kutalisa kulundongi kana ngwenyi, ‘liuka lyaYehova linatukafwe tulizange vyaukalu uli nakwiza kulutwe, kaha tweji kusakwililanga hachuma kana. Kulama vyakulya nameya nakupwa nachisaji chinayovola myono yetu.’ Tunawahilila chikuma hakuwana nge vandumbwetu vononokele lundongi kana mwomwo echi chahanyine mutango lwola lyakuwahisa vyuma vyakukafwa vandumbwetu.”

 Uno vandumbwetu vevwile ngachilihi omu chahetele echi kukafwa? Mykola naZinaida vaze vatwama muKharkiv vambile ngwavo: “Twevwile kuwaha chikuma hakutuzakama. Twasakwilila chikuma havyakulya navitumbo mwatunehelelele. Chikupu vene, twamwene ngwetu Yehova ikiye ali nakutuzakama.” Valentyna uze atwama mumbaka yoyimwe ambile ngwenyi: “Omu jita yaputukile, vatu vashimbwilenga chikuma mumukana numba valande vyakulikafwa navyo. Kachapwilenga chachashi kulanda vyuma vyapwile nakusakiwako. Oloze Yehova atachikijile nakumona ukalu kana. Atongwele vandumbwetu mangana vapangile vyuma vyakulikafwa navyo hajizuvo, kaha vyuma kana vikiko twasakiwilenga. Halwola lwalukalu ngana, kachi nge chiyoyelo chinakaluhwa, mutu eji kumonanga kuzakama chaYehova naliuka lyenyi mujila yakulipwila. . . . Cheji kutwivwisanga kuwaha chikuma kumona omwo Yehova eji kutukafwanga nakutukundwiza halwola lwakutamo.”

 Yevhen naIryna naMykyta vaze vachinyine munganda yaMariupol vambile ngwavo: “Twasakwilila chikuma hakuzakama nakukafwa tanga yetu. Tachikizenu ngwenu mwatukafwanga halwola lwakutamo. Hakavanga twashinganyekele ngwetu muvikasha kana mwapwile kaha vyuma vyakulikafwa navyo, oloze omu twavisokolwele twawanyinemo nawa mazu akusolola zangi yenu.”

 Twafwelela unamono omwo Yehova azachishile shipilitu yenyi mangana ahane vatu jenyi jindongi jamwakutwalila vyakulikafwa navyo kuli vandumbwetu muLwola ‘lwaJijita naMijimbu yaJijita.’ Mawana ove akukundwiza kumulimo wamukaye kosena, amwe aze weji kuhananga kuzachisa keyala ya donate.pr418.com, vawazachishile kumulimo kanou. Tuli nakukusakwilila chikuma hamuchima wove wakuhana.

Kuwahisa Vyuma Vyakulikafwa Navyo Nakuvipangila Washiwashi Kaha Nawa Mujila yaKukingiwa

1. February 24, 2022: Komiti yaKuwanyisa yetavishile kuzachisa jimbongo hakukafwa vandumbwetu muUkraine, kaha echi chalingishile mutango uputuke kukafwa vandumbwetu

2. February 24–March 8, 2022: Mutango wamuUkraine waputukile hahaze vene kulanda vyuma vyapwile nakusakiwa mujingalila jamuUkraine nakuvipangila kuhichila mujiKomiti jaKukafwa Vatu Vali muUkalu Wakulijila. Ofesi yamutango nawa yalizangile kutambula nakupangila vyuma vyafumine kuPoland

3. March 9, 2022: Komiti yaKuwanyisa yetavishile kutwalila vandumbwetu muUkraine vyuma vyakulikafwa navyo

4. March 10–12, 2022: Vaputukile kuwahisa vyuma mangana veseke kutwala vyakulya navyuma vyeka kufuma muPoland nakuvitwala munganda yaLviv, muUkraine

5. March 13, 2022: Vesekele kutwala vyakulya navyuma vyeka kufuma muPoland nakuvitwala munganda yaLviv, muUkraine

6. March 14–16, 2022: Valwezele Vaka-Kuzata Mulimo Wakulisakila muLipatimende lyaLDC valiwanyine haZuvo yaKukunguluka Chachinene kwakamwihi nanganda yaPoznan, muPoland, mangana valongejeke vyakulya navyuma vyakulikafwa navyo kuunyoji muvikasha

7. March 17, 2022: Hanyima yamakumbi awana kufuma haze vesekele kutwala vyakulikafwa navyo, vatwalile cheka jitani 14 muUkraine

8. March 21–27, 2022: Vazachishile jila yoyimwe, valongejekelelenga vyakulya navyakulikafwa navyo vize vyasalileho muPoland nakuvitwala kuUkraine, kaha vavipangililile mujiola 24 kuvihela kuze vyasakiwilenga

9. March 28, 2022: Kufuma haze vatwitavishile kutwala vyakulikafwa navyo muUkraine, twahashile kutwala jitani 110, javyakulya, navitumbo navyuma vyeka vyakulikafwa navyo. Kaha mulimo kana twauzachile mumakumbi 20

 Oholyapwa ngana, Vinjiho jaYehova vanahane vyuma vyakulifwana navyo muUkraine vyakuheta kujitani 209.