Hakuwana nge vatu vavavulu vali nakuvambapachisa mwaka himwaka, ngocho kuli nakusakiwa vihela vyavivulu chikuma vyakulemesela Kalunga. Hakusaka kutesamo mulimo kana, maLipatimende Atala haMulimo waKutunga amukaye kosena ashinganyekele kutunga nakutungulula vihela vyakulemesela Kalunga vyakuzomboka ha 2,700, mumwaka wamulimo wa 2020. a

 Chaluvinda, chakaluhwile kutesamo vyuma vanonekela mwomwo yamusongo waCOVID-19. Shikaho, Komiti Yatala haKupulita naKutuma Mikanda yaLizavu lyaKutwaminyina, yemikileko milimo yayivulu yakutungatunga yamukaye kosena mangana vakinge vandumbwetu kumusongo kana nakukavangiza nawa jishimbi jafulumende. Chipwe ngocho, mumwaka wamulimo wa 2020 shimbu kanda ou musongo uputuke, vatungile nakutungulula vihela vyakulemesela Kalunga vyakuzomboka ha 1,700, kuhakilako najiofesi jamitango naji RTO jakuzomboka ha 100. Talenu omu vihela vivali vize vakumishile kutunga vinanganyalisa vandumbwetu.

 Mutango waCameroon. Ofesi yamutango yamwaka yize yapwile muDouala yakehele chikuma, ngocho yasakiwile kuyitohwesa. Shikaho, Komiti Yatala haKupulita naKutuma Mikanda yashinganyekele kutungulula ou mutango. Oloze kwasakiwile jimbongo jajivulu kuhambakana jize vazachishile hakuyitunga. Vashinganyeke kutungila hachihela cheka chipwe kulanda zuvo nakuyitungulula, oloze vyuma vyosena evi kavyazachiwileko.

 Shimbu vapwile nakushinganyeka mwakulingila, vevwile ngwavo fulumende yinakutunga mukwakwa kunote yaDouala, kwakamwihi naZuvo yaKukungulukila Chachinene. Echi chalingishile vandumbwetu vashinganyeke ngwavo nachipwa chamwaza kutungila kuchihela kana mwomwo nachipwa chachashi kututa vyuma vyakutungisa. Ngocho Lizavu lyaKutwaminyina lyetavishile vandumbwetu vatungile ofesi yamutango hachihanda chimwe chahachihela chetu chaZuvo Yakukungulukila Chachinene.

 Vinjiho vazachililile hamwe navatu vaze vakumwine, kaha echi chavakafwile vahone kuzachisa jimbongo jajivulu nakuhona kumbata lwola lwalusuku chikuma. Ngocho, mulimo wosena wakumine najimbongo jakuzomboka hajimiliyoni jivali jajindola (U.S.) Jimbongo kana japwile jajindende hakujesekesa kuli jize vashinganyekele kuzachisa. Tanga yaMbetele yalukilile hachihela kana echi chachihya shimbu kanda musongo waCOVID-19 uputuke.

 Ava vandumbwetu vahaMbetele yamuCameroon, vali nakulivwisa kuwaha kuzachila hamutango kana ou wauhya. Kaha vanamono chihela kana kupwa wana wakufuma kuli Yehova. Tanga yimwe yahaMbetele yambile ngwayo, “Tuli nakusaka kuzata chikuma nangolo mangana tusolole ngwetu twasakwilila Yehova hakutuhana wana kana.”

 Ofesi Yavaka-Kwalumuna Mikanda Yakwakusuku yaTojolabal (RTO), YamuMexico. Hamyaka yayivulu, lizavu lyavaka-kwalumuna mikanda yamulilimi lyaTojolabal, linazachilanga haofesi yamutango waCentral America uze wapwila kwakamwihi nambaka yaMexico City. Chipwe ngocho, lilimi lyaTojolabal veji kulizachisanga chikuma mungalila yaAltamirano namuLas Margaritas. Jingalila kana jatwamina kwakusuku naofesi yamutango waCentral America kafwe jikilomita 1,000 (620 mi). Echi chapwile nakukaluhwila vaka-kwalumuna kutachikiza mazu amahya amulilimi lyavo. Kaha nawa chapwile nakukaluhwila ofesi yamutango, kuwana vandumbwetu vamukamwihi vaze vanahase kukafwa mulimo wakwalumuna nakukopa mazu mulilimi lyaTojolabal.

 Mwomwo yavyuma kana evi, Komiti Yakusoneka Mikanda yaLizavu lyaKutwaminyina yashinganyekele kunungulula lizavu lyavaka-kwalumuna mikanda yamulilimi lyaTojolabal, nakulitwala kungalila kuze vahanjika lilimi kana. Hakusaka kutesamo mulimo kana, ofesi yamutango yashinganyekele kulanda zuvo nakuyitungulula. Kulinga ngocho chavakafwile vahone kuzachisa jimbongo jajivulu kuhambakana kutunga zuvo chipwe kuyifwetela.

 Ndumbwetu umwe uze apwa muka-kwalumuna ahanjikile omu nanganyala. Ambile ngwenyi: “Hamyaka 10 yize ngunazatenga mulimo wakwalumuna haofesi yamutango, kangwawanyine tanga yimwe yamukamwihi yize yazachisa lilimi lyamiko. Oloze, ofesi yakwalumwina mikanda yili jino mungalila muze vazachisa lilimi lyaTojolabal. Hakumbi hakumbi, ngweji kupwanga navatu vahanjika lilimi kana. Echi chinangukafwe nguhotole uhashi wami wakuhanjika lilimi kana nakuzata kanawa mulimo wakwalumuna.”

 Mumwaka wamulimo wa 2021, tuli nakushinganyeka kutunga jiRTO 75 namashikola akulinangwila Mbimbiliya, nge vyuma navitambuka kanawa. Kaha natutwalaho lika kuzata mulimo waunene wakutunga jiofesi jamitango 8, kuhakilako vene nakutunga chihela chachihya chamuRamapo muNew York, nakunungulula ofesi yamutango waArgentina naItaly. Kuli nakusakiwa nawa kutunga jizuvo jaWangana jakuzomboka ha 1,000. Vihela vyakukungulukila kafwe 6,000 kavyeshi kanawako, ngocho kunakusakiwa kutunga vyeka. Kaha nawa jiZuvo jaWangana 4,000 jinakusakiwa kujitungulula.

 Uno jimbongo jakuzachisa kumilimo yakufwana ngana eyi jeji kufumanga kulihi? Ndumbwetu Lázaro González, wamuKomiti yaMutango waCentral America, akumbulwile chihula kana echi omu vapwile nakushimutwila hamulimo wakutunga Ofesi Yakwalumwina Mikanda yaTojolabal. Ambile ngwenyi, “Chapwa chachikalu kuwana jimbongo mungalila yamutango wetu. Shikaho chakuzeneka kutukafwa kuli vandumbwetu, katweshi kuhasa kutunga jiofesi jakwalumwina mikanda jamungalila yetuko. Wana wajimbongo vali nakuhana vandumbwetu vamukaye kosena, unalingisa vaka-kwalumuna mikanda vayenga nakutwama kujingalila kuze vazachisa lilimi lyavo.” Tuli nakusakwilila chikuma vandumbwetu vamukaye kosena, hamuchima wavo wakulisuula kukafwa vandumbwavo. Chikupu vene, tweji kumisakwililanga chikuma hamawana mweji kuhananga, kuzachisa jijila jakulisezaseza jakufwana nge donate.pr418.com. Mwomwo mawana kana akiko anakutukafwa mangana tutesemo kutunga vihela vyosena evi.